Закон КР от 26 июля 2011 года № 131 «О внесении дополнений в Закон Кыргызской Республики»Об устойчивом развитии эколого-экономической системы «Иссык-Куль»

КЫРГЫЗ РЕСПУБЛИКАСЫНЫН МЫЙЗАМЫ

2011-жылдын 26-июлу № 131

"Ысыккөл" экологиялык-экономикалык тутумун туруктуу өнүктүрүү жөнүндө" Кыргыз Республикасынын Мыйзамына толуктоолорду киргизүү тууралуу

1-берене.

"Ысыккөл" экологиялык-экономикалык тутумун туруктуу өнүктүрүү жөнүндө" Кыргыз Республикасынын Мыйзамына (Кыргыз Республикасынын Жогорку Кеңешинин Жарчысы, 2004-ж., № 12, 530-ст.) төмөнкүдөй толуктоолор киргизилсин:

1. 8-статьянын 2-бөлүгүнүн биринчи абзацындагы "тоо этектеринин зонасындагы токойлор" деген сөздөрдөн кийин ", Ысык-Көлдүн айланасындагы чычырканак бадалдары" деген сөздөр менен толукталсын.

2. 14-статья төмөнкүдөй мазмундагы бешинчи - сегизинчи абзацтар менен толукталсын:

"- чычырканак бадалдарын кыюуга тыюу салуу, калыбына келтирүү жана Ысык-Көлдүн жээгиндеги зонада табигый экологиялык тутумдарды сактоо боюнча, ошондой эле чарбачылык иш менен алектенген субъекттерди жээктеги зонатардын аймагындагы пансионаттардагы, дагы башка чарбалык объекттердеги чычырканак бадалдарын калыбына келтирүүгө милдеттендирүү боюнча чараларды:

- мөңгүлөрдүн үстүнкү бетинин кирдешине жана булганышына жол бербөө боюнча чаралар, ошондой эле музга айланган алардын аянттарынын мындан ары төмөндөшүнө жол бербөө боюнча чараларды;

- радиоактивдик жана уулуу калдыктарды сактоонун коопсуздугун камсыз кылуу максаттарында калдыктарды сактоочу жайдын геотехникалык туруктуулугун бекемдөө боюнча чараларды;

- тоо аймактарында "Кумтөр Оперейтинг Компани" ЖАК колдонгон автотранспорттук каражаттарды көмүүгө тыюу салуу боюнча чараларды.".

2-берене.

Ушул Мыйзам расмий жарыяланган күндөн тартып күчүнө кирет.

"Эркин Тоо" газетасынын 2011-жылдын 2-августунда № 62 жарыяланды

Кыргыз Республикасынын Өкмөтү өзүнүн ченемдик укуктук актыларын үч айлык мөөнөттө ушул Мыйзамга ылайык келтирсин.