16 жашка чейинки балдары бар муктаж жарандардын (үй-бүлөлөрдүн) "үй-бүлөгө көмөк" - ай сайын жөлөкпул алууга жарандардын (үй-бүлөлөрдүн) муктаждыгын аныктоо тартиби жөнүндө ЖОБО

1-глава. Жалпы жоболор

1. Бул 16 жашка чейинки балдары бар муктаж жарандарга (үй-бүлөлөргө) "үй-бүлөгө көмөк" ай сайын берилүүчү жөлөкпулга жарандардын (үй-бүлөлөрдүн) муктаждыгын аныктоо тартиби жөнүндө жобо (мындан ары - Жобо) 16 жашка чейинки балдары бар муктаж жарандарга (үй-бүлөлөргө) "үй-бүлөгө көмөк" (мындан ары - "үй-бүлөгө көмөк") ай сайын берилүүчү жөлөкпулга жарандардын (үй-бүлөлөрдүн) муктаждыгын аныктоо тартибин жөнгө салат.

2. Бул Жободо төмөнкүдөй түшүнүктөр колдонулат:

1) жарды жаран - үй-бүлөнүн ар бир мүчөсүнүн (анын ичинде жалгыз жашаган жарандын) айлык кирешеси Кыргыз Республикасынын Улуттук статистика комитети тарабынан жыл сайын аныкталуучу кедейликтин чегинен төмөн болгон жарды үй-бүлөдө жашаган жаран;

2) аз камсыз болгон жаран - үй-бүлөнүн ар бир мүчөсүнүн (анын ичинде кепилденген минимумдук кирешеден төмөн айлык киреше менен жалгыз жашаган жаран үчүн да) айлык кирешеси Кыргыз Республикасынын Өкмөтү тарабынан жыл сайын белгиленүүчү кепилденген минимумдук кирешеден төмөн болгон аз камсыз үй-бүлөдө жашаган жаран;

3) аз камсыз болгон үй-бүлө - үй-бүлөнүн ар бир мүчөсүнүн айлык кирешеси кепилденген минимумдук кирешеден төмөн болгон үй-бүлө;

4) муктаждыкты аныктоо - 16 жашка чейинки балдары бар муктаж жарандарга (үй-бүлөлөргө) "үй-бүлөгө көмөк" ай сайын жөлөкпул чектөө үчүн зарыл болгон үй-бүлөнүн кирешесинин бардык булактарын изилдөө;

6) жыйынды киреше аныктоодо эске алынуучу үй-бүлөнүн курамы - никеден, туугандыктан же бала асырап алуудан улам келип чыга турган мүлктүк жана жеке мүлктүк эмес укуктарга жана милдеттерге байланышкан, чогуу жашаган, бирге чарба жүргүзүшкөн жана бюджети жалпы болгон адамдар;

7) киши башына карата орточо жыйынды киреше- бир айга же бир жылга үй-бүлөнүн ар бир мүчөсүнө карата эсептелген жыйынды киреше.

(КР Өкмөтүнүн 2019-жылдын 29-мартындагы № 149, 2024-жылдын 27-августундагы № 506  токтомунун редакциясына ылайык)

2-глава. Негизги иштеген жери, өтөгөн кызматы (аскер кызматчылары) жана окуусу боюнча жарандардын кирешелери

3. Негизги иштеген жери, өтөгөн кызматы (аскер кызматчылары) жана окуусу боюнча жарандардын кирешелерине төмөнкүлөр кирет:

1) кызматкерлердин эмгек акысы, анын ичинде үстөк акысы, сыйлыктары, кызматты айкалыштырганы үчүн акысы, иш стажы үчүн, бийик тоолуу жана алыскы райондордо жана климаттык шарты оор жерлерде иштегени үчүн жана иш орду боюнча башка төлөмдөр үчүн коэффициенттери жана үстөк акысы;

2) акчалай камсыздоо, аскердик наамга жана иштеген жылдарга үстөк акы, ошондой эле аскер кызматчыларына жана аларга теңештирилген адамдарга натуралай камсыздоо же камсыздоонун ордуна төлөнүүчү суммалар;

3-глава. Негизги иштеген жери, өтөгөн кызматы (аскер кызматчылары) жана окуусу боюнча эмес жарандардын кирешелери

4. Негизги иштеген жери, өтөгөн кызматы (аскер кызматчылары) жана окуусу боюнча эмес жарандардын кирешелерине төмөнкүлөр кирет:

1) автордук сый акылар, анын ичинде ачылыш жасаганга, ойлоп табууга, өнөр жай үлгүлөрүнө жана рационализатордук сунуштарга, ошондой эле илимдин, адабияттын, искусствонун чыгармаларын жаратуу, басып чыгаруу, аткаруу же башкача пайдалануу үчүн суммалар;

2) банкка салынган акчалар боюнча жана Кыргыз Республикасынын мамлекеттик казынасынын милдеттенмелери боюнча пайыздар жана утуштар;

3) акчалай же натуралай түрүндө мураска калтыруу жана белекке алуу тартибинде алынган суммалар;

4) жеке менчик укугунда ээлеген кыймылдуу жана кыймылсыз мүлктү сатуудан алынган суммалар;

5) юридикалык жактардын уставдык (уюштуруу) фондундагы үлүштөрүнө ылайык жарандарга акционердик коомдордун акцияларынан түшкөн кирешелерден төлөнө турган дивиденддер;

6) Кыргыз Республикасынын мыйзамдарына ылайык алынуучу алименттер.

4-глава. Экономикалык (ишкердик) иш жүргүзүүдөн жарандардын кирешелери

5. Экономикалык (ишкердик) ишти жүргүзүүдөн жарандардын кирешелерине экономикалык (ишкердик) ишти төмөнкүлөрдүн негизинде жүргүзүүдөн алынган кирешелер кирет:

1) юридикалык жак катары мамлекеттик каттоо тууралуу күбөлүктүн;

2) салык органдары тарабынан берилген патенттин (багууга жана көзөмөлгө дайыма муктаж болгон ден соолугунун мүмкүнчүлүгү чектелүү баланын жеке ассистентине берилүүчү ыктыярдуу патенттен тышкары).

Жарандардын патенттин негизинде экономикалык (ишкердик) ишти жүргүзүүдөн алынган кирешелери патенттин наркы алынган жалпы кирешенин 10%на барабар болгондугун эсептеп аныкталат. Мында алынган киреше жалпы алынган киреше менен патенттин наркынын айырмасы катары эсептелет.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

6. Экономикалык (ишкердик) иштин башка түрлөрүнөн алынган кирешелерге төмөнкүлөр кирет:

1) кыймылдуу жана кыймылсыз мүлктү жалдоого (ижарага, киреге, пайдаланууга) берүүдөн;

2) териси баалуу айбанаттарды багып өстүрүүдөн жана сатуудан;

3) үйдөгү малды кайтарып багуу боюнча иштерди аткаруудан;

4) жер үлүшүн ижарага берүүдөн же ижарага алуудан.

5-глава. Фермердик, дыйкан чарбалардын жана башка айыл чарба бирикмелеринин жана уюмдарынын мүчөлөрүнүн - жарандардын жер участокторун жана айыл чарба жаныбарларын пайдалануудан алган кирешелери

7. Жер үлүшүн жана үйдүн жанындагы участокту пайдалануудан алынган жарандын (үй-бүлөнүн) кирешелери жер үлүшүн жана үйдүн жанындагы участокту пайдалануудан алынчу кирешелердин ченемдерин колдонуунун негизинде эсептелет, алар ушул Жобонун тиркемесине ылайык калктын айыл чарба ишинен алынган шарттуу кирешелерин баалоо боюнча Кыргыз Республикасынын Улуттук статистика комитетинин эсептеринин негизинде жыл сайын кайра каралып турат.

8. Эгерде үй-бүлө бир калктуу конуштан башкасына көчсө, бирок мурдагы жашаган жеринде үй-бүлөнүн жер үлүшү жана/же үйдүн жанындагы участогу калып калса, анда жер үлүшүн жана/же үйдүн жаанындагы участокту пайдалануудан түшкөн кирешелер жер үлүшүн жана/же үйдүн жанындагы участокту иштетүү/иштетпөө фактысын далилдеген, мурда жашаган жери боюнча жергиликтүү өз алдынча башкаруу органы тарабынан берилген маалымкаттын негизинде эсепке алынат.

9. Башка калктуу конушка туруктуу жашоого келген үй-бүлө мүчөсүнүн үлүштүк менчигиндеги жер үлүшүн пайдалануудан алынган кирешеси үй-бүлөнүн жыйынды кирешесин эсептөөдө эске алынбайт.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

10. Үй-бүлөнүн чыгып кеткен мүчөсүнүн үлүштүк менчигиндеги жер үлүшүн пайдалануудан алынган кирешеси, жер үлүшүн пайдаланып жаткан үй-бүлөнүн жыйынды кирешесин эсептөөдө эсепке алынат.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

11. Эгерде жер үлүшү иштетилбей, ижарага берилсе, анда жер үлүшүн ижарага берүү фактысын ырастаган, ижара төлөмүнүн суммасы көрсөтүлгөн айыл өкмөтүнүн маалымкатынын негизинде ижара акысынын суммасы кирешеге киргизилет.

(КР Өкмөтүнүн 2020-жылдын 24-августундагы № 442 токтомунун редакциясына ылайык)

12. Жер үлүшүнүн бардык аянтын (же кайсы бир бөлүгүн) иштетүү жана/же аны ижарага берүү мүмкүн болбогон учурда, жер үлүшү иштетилбешинин жана/же ижарага берилбешинин себебин көрсөтүү менен айыл өкмөтүнөн маалымкат талап кылынат. Анын негизинде жер үлүшүнөн түшкөн киреше эсептелбейт же жер үлүшүнүн иштетилген бөлүгүнөн алынган киреше эсептелет.

13. Үй-бүлөнүн айыл чарба жандыктары бар болсо, анын "үй-бүлөгө көмөк" жөлөкпулуна болгон муктаждыгы үй-бүлөнүн төмөнкүдөй малынын санына ылайык аныкталат:

1) майда жандыктар - кой жана эчки;

2) уй;

3) бодо мал - бир жаштан өткөн торпок, бука;

4) жылкы.

Мында үй-бүлөдө болгон айыл чарба жандыктарынын бардык түрлөрү майда жандыктардын төмөнкүдөй шарттуу бирдиктерине которулат:

- 1 уй - 6 майда жандык;

- 1 торпок - 2,5 майда жандык;

- 1 бука - 8 майда жандык;

- 1 жылкы - 7 майда жандык.

(КР Өкмөтүнүн 2020-жылдын 24-августундагы № 442 токтомунун редакциясына ылайык)

14. Үй-бүлөдө болгон айыл чарба жандыктарынын майда жандыктардын шарттуу бирдиктерине которулгандан кийинки саны үй-бүлөнүн ар бир мүчөсүнө 4төн көп болсо "үй-бүлөгө көмөк" жөлөкпулу чектелбейт.

6-глава. Үй-бүлөнүн жыйынды кирешесин аныктоодо узак пайдалануучу товарларды эсепке алуу

15. Үй-бүлөдө бир жана андан ашык аталыштагы узак пайдалануучу ишке даяр турган товарлар болгон учурда "үй-бүлөгө көмөк" жөлөкпулун алууга үй-бүлө укуктуу болбойт.

16. Узак пайдалануучу товарларга төмөнкүлөр кирет:

1) завод чыгарган жылды кошкондо пайдалануу мөөнөтү 20 жылдан аз жеңил автомобиль;

2) айыл чарба техникасы (трактор, комбайн);

3) жүк ташуучу автомобиль;

4) микроавтобустар.

(КР Өкмөтүнүн 2019-жылдын 30-октябрындагы № 584, 2020-жылдын 24-августундагы № 442 токтомдорунун редакцияларына ылайык)

7-глава. Жыйынды кирешени аныктоодо эсепке алынбай турган кирешелердин түрлөрү

17. Үй-бүлөнүн жыйынды кирешесин аныктоодо эсепке алынбай турган кирешелердин түрлөрүнө төмөнкүлөр кирет:

1) мамлекеттик жөлөкпулдар;

2) сөөк коюуга жөлөкпул;

3) Кыргыз Республикасынын мыйзамдарында каралган компенсациялык төлөмдөр (жеңилдиктердин ордуна ай сайын берилүүчү акчалай компенсациялардан башкалар);

4) социалдык өнүктүрүү органдары тарабынан бир ирет берилүүчү жөлөкпулдар;

5) кош бойлуулук жана төрөгөндүк боюнча жөлөкпул;

6) жумушка убактылуу жарамсыздык боюнча жөлөкпул;

7) командировкага жана жаңыдан иштей турган жерге баруу үчүн берилчү сарптоолор (Кыргыз Республикасынын Өкмөтү тарабынан белгиленген ченемдердин чегинде);

9) травма же майыптык алган учурдагы, камсыздандырылган адам каза болгондогу, материалдык чыгым тарткандагы же мүлкүнөн айрылгандагы камсыздандырылган суммалар;

10) табигый кырсыктардын натыйжасында мүлкүн жоготкондо, ооруп калгандагы, ошондой эле кызматкер же анын жакын туугандары каза болгонго байланыштуу материалдык чыгымдарынын ордун толтуруу катары кызматкерге көрсөтүлчү материалдык жардамдын суммалары;

11) жумушсуздук боюнча жөлөкпул;

12) Кыргыз Республикасынын пенсиялык камсыздоо чөйрөсүндөгү мыйзамдарына ылайык чектелүүчү пенсиялар;

13) үй-бүлөнүн бакубаттыгын жакшыртууга жана үй-бүлөнү турмуштук оор кырдаалдан чыгарууга багытталган долбоорлордун алкагында үй-бүлөгө натуралык же акчалай түрдө көрсөтүлгөн жардамдын суммасы;

14) багууга жана көзөмөлгө дайыма муктаж болгон ден соолугунун мүмкүнчүлүгү чектелүү баланын жеке ассистентинин кызмат көрсөтүүлөрүнүн акысы;

15) иш менен камсыз кылуу мамлекеттик кызмат органы уюштурган акы төлөнүүчү коомдук жумуштар, кесиптик даярдоо, кайра даярдоо жана квалификациясын жогорулатуу мезгилинде стипендиялык төлөмдөр;

16) социалдык контракттын негизинде бөлүнүүчү социалдык жардамдын суммалары, ошондой эле тиешелүү контракт түзүлгөн айдан кийинки 3 айдын ичинде социалдык контрактты аткаруудан алынган материалдык же акчалай түрдөгү кирешелер.

8-глава. Үй-бүлөнүн жыйынды кирешесин аныктоодо эсепке алынчу адамдардын чөйрөсү

18. Үй-бүлөнүн жыйынды кирешесин аныктоодо үй-бүлөнүн курамында эсепке алынчу адамдарга атасы, энеси, өгөй атасы, өгөй энеси, алардын өз балдары, асырап алган жана камкордукка алган балдары, жалпы чарба жүргүзүп, чогуу жашаган ата-энелери (чоң ата, чоң энелери) кирет. Өгөй балдар жана өгөй кыздар чогуу жашаган шартта өз балдары менен бирдей эсептелишет.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

19. Үй-бүлөнүн курамы "үй-бүлөгө көмөк" жөлөкпул чектөө үчүн кайрылган учурдагы абалга карата аныкталат.

20. Үй-бүлөнүн курамы калкты каттоо чөйрөсүндө мамлекеттик саясатты ишке ашыруу боюнча функцияларды камсыздоочу ыйгарым укуктуу мамлекеттик органдын маалыматтык системасына суроо-талап жиберүү аркылуу ырастоо менен арыз берүүчүнүн ооз эки маалыматынан эсепке алынат.

Калкты каттоо чөйрөсүндө мамлекеттик саясатты ишке ашыруу боюнча функцияларды камсыздоочу ыйгарым укуктуу мамлекеттик органдын маалыматтык системасында маалыматтар жок болгон учурда же аны тактоо зарыл болсо, "үй-бүлөгө көмөк" жөлөкпулу чектелүүгө тийиш болгон үй-бүлөнүн үйүнө барат.

(КР Өкмөтүнүн 2020-жылдын 24-августундагы № 442 токтомунун редакциясына ылайык)

9-глава. Үй-бүлөнүн жыйынды кирешесин аныктоодо эсепке алынбачу адамдардын чөйрөсү

21. Үй-бүлөнүн жыйынды кирешесин аныктоодо эсепке алынбачу адамдарга төмөнкүлөр кирет:

1) үй-бүлөнүн бош жүргөн, окубаган жана ишке орношууга жардамдашуу бөлүмүндө белгиленген тартипте катталбаган, эмгекке жарактуу курактагы (16 жаштан жогорку) мүчөлөрү (ата-энесинен башкалар);

2) Кыргыз Республикасынын Куралдуу Күчтөрүнүн катарында мөөнөттүү чыныгы аскердик кызмат өтөп жүргөн үй-бүлө мүчөлөрү;

3) жазасын өтөөчү жайларда жүргөн, соттолуп кеткен үй-бүлө мүчөлөрү;

4) балдар үйлөрүндөгү, интернат үйлөрдөгү жана карылар үйлөрүндөгү мамлекеттин толук камкордугунда турган үй-бүлө мүчөлөрү;

5) социалдык тейлөөнүн жеке менчик формасындагы мекемелеринде туруктуу жашаган үй-бүлө мүчөлөрү;

6) ата-энелик укугунан ажыратылган ата-энелер;

7) арыз ээси менен такай чогуу жашаган жана жалпы чарба жүргүзгөн адамдардан башка, арыз берүүчү адам менен туугандык байланышы жок адамдар.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

10-глава. Үй-бүлөнүн жан башына орточо туура келүүчү жыйынды кирешесин аныктоо

22. Үй-бүлөнүн жан башына орточо туура келүүчү жыйынды киреше үй-бүлөнүн жөлөкпул алууга кайрылган айдан мурдагы үч ай ичиндеги жыйынды кирешесин үчкө, андан кийин үй-бүлөнүн жан башына туура келүүчү жыйынды кирешесин аныктоодо эске алынган үй-бүлө мүчөлөрүнүн санына бөлүү жолу менен эсептелет.

Арыз берген адам үй-бүлөнүн курамында же кирешенин өлчөмүндө жакында болгон өзгөрүүлөр жөнүндө билдирген учурда социалдык өнүктүрүү чөйрөсүндөгү ыйгарым укуктуу мамлекеттик органдын аймактык бөлүмү (мындан ары - аймактык бөлүм) тапшырылган документтерге ылайык кайрадан эсептөө жүргүзөт.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

23. Ушул Жобонун 6-пунктунда жана 11-пунктунда көрсөтүлгөн үй-бүлөнүн жан башына орточо туура келген жыйынды кирешеси жана мезгилдүү иштеген кызматкерлердин кирешелери үй-бүлөнүн жөлөкпул алууга кайрылганга чейинки 12 ай ичиндеги жыйынды кирешесин он экиге, андан кийин үй-бүлөнүн жан башына орточо туура келүүчү жыйынды кирешесин аныктоодо эске алынган үй-бүлө мүчөлөрүнүн санына бөлүү жолу менен эсептелет.

Менчигинин түрүнө карабастан чарбакер субъекттерде иштеген жарандардын кирешелери алардын эмгек акысы менен эсептелет.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

24. Натуралай түрдө алынган кирешелердин өлчөмү кирешени алган мезгилдеги базар баасына которуу жолу менен эсептелет.

25. Эгер аялына (күйөөсүнө) соттун чечими менен балдары үчүн алименттин өлчөмү аныкталып, бирок алимент төлөнбөсө, анда жөлөкпул сот органдарынын алимент төлөө боюнча карыз тууралуу маалымкатынын негизинде чектелет. Мындайда маалымкатты алты ай сайын жаңыртып туруу зарыл.

26. Эгер жубайлардын никеси ажыратылып, бирок соттун чечими менен алимент чектелбесе, анда кирешенин өлчөмү текшерүү актысынын жана арыз ээсинин түшүнүк катынын негизинде аныкталат.

27. Эгер жубайлардын никеси ажыратылбаган, бирок атасынан (энесинен) алимент төлөтүү жөнүндө соттун чечими чыгарылган болсо, ал эми жубайлар чогуу жашоосун улантышып жана жалпы чарба жүргүзүшсө, анда үй-бүлөнүн жыйынды киреше атасынын (энесинин) эмгек акылары киргизилет.

Эгерде атасы (энеси) өзүнчө жашаса, анда атасы (энеси) үй-бүлөнүн курамынан чыгарылат, ал эми үй-бүлөнүн жыйынды кирешесинде алып жаткан алимент гана эсептелет.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

28. Жубайлардын никеси ажыратылбаган, бирок алар чогуу жашабаган учурда, анда үй-бүлөнүн жыйынды кирешесин аныктоо үчүн атасынын (энесинин) кирешеси же алименттин өлчөмү талап кылынат.

Атасынын (энесинин) жашап турган орду аныкталбаган учурда ички иштер органдарынын издөө жөнүндө маалымкаты талап кылынат жана үй-бүлөнү текшерүү актысы жүргүзүлөт.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

29. Эгерде баланын ата-энеси никеге катталбаса жана чогуу жашашпаса үй-бүлөнүн курамын жана үй-бүлөнүн жыйынды кирешесин аныктоо үчүн үй-бүлөнү текшерүү актысы жүргүзүлөт.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

30. Алименттер сот органдарынын, ишканалардын, мекемелердин, уюмдардын жана чарбалардын маалымкаттарынын негизинде эсепке алынат.

31. Эгерде ата-энелердин бирөө республиканын чегинен сыртта, ошондой эле республикадагы иш жүзүндө жашаган ордунан башка жакта иштесе, анда үй-бүлөнүн жыйынды кирешеси текшерүү актысынын негизинде, үй-бүлөнүн жашоо-тиричилик шартын текшерүүнү эске алуу менен аныкталат.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

32. Жарандардын (үй-бүлөлөрдүн) "үй-бүлөгө көмөк" жөлөкпулга муктаждыгын аныктоодо камкордукка алгандардын (көзөмөлчүлөрдүн) кирешелери ушул Жобонун 3-17-пункттарына ылайык эсепке алынат.

33. Үй-бүлөнүн жыйынды кирешесин аныктоодо талаш маселелер пайда болгон учурда бул маселе жергиликтүү мамлекеттик администрациялардын алдындагы Мамлекеттик жөлөкпулдарды чектөө жана төлөө жөнүндө жарандардын арыздарын жана даттанууларын кароо боюнча комиссияда (мындан ары - Комиссия) каралат. Комиссия жөнүндө жобону Кыргыз Республикасынын Өкмөтү бекитет.

Комиссиянын чечимине макул болбогон учурда талаш социалдык өнүктүрүү чөйрөсүндөгү ыйгарым укуктуу мамлекеттик орган тарабынан, же Кыргыз Республикасынын администрациялык иш жана администрациялык жол-жоболор чөйрөсүндөгү мыйзамында белгиленген тартипте чечилет.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

11-глава. Бир жыл ичинде үй-бүлөнүн жыйынды кирешесин тактоо

34. Бир жыл ичинде үй-бүлөнүн жыйынды кирешесин тактоо төмөнкү учурларда жүргүзүлөт:

1) үй-бүлөнүн кирешеси өзгөргөндө;

2) үй-бүлөнүн курамы өзгөргөндө;

3) бала төрөлгөндө;

4) арыз ээсинин, үй-бүлө мүчөсүнүн туруктуу жашаган жери өзгөргөндө же республиканын чегинен сыртка туруктуу жашоо үчүн кеткенде;

5) үй-бүлө мүчөлөрүнүн бирөө мамлекеттин толук камсыздоосунда болуучу социалдык тейлөөчү мекемеге жайгаштырылса;

6) үй-бүлө мүчөлөрүнүн бирөө жеке менчик формасындагы социалдык тейлөөчү мекемеге жайгаштырылса;

7) никеге катталса же нике ажыратылса;

8) Кыргыз Республикасынын Куралдуу Күчтөрүнүн катарына жана башка аскердик кошуундарга, жана мыйзамда аскердик кызмат каралган Кыргыз Республикасынын мамлекеттик органдарына чакырылса (мөөнөттүү аскердик кызматты өтөгөндө);

9) арыз ээси же үй-бүлөнүн мүчөсү каза болсо;

10) атасы, энеси (ата-энелери) ата-энелик укуктан ажыратылса;

11) күйөөсү же аялы эркиндигинен ажыратууга соттолсо (тергөөдө болгон убакыт кошо эсептелет) же мажбурлап дарылоого жиберилсе;

12) бала 16 жашка чыкканда;

13) үй-бүлө мүчөлөрүнүн бирөө окууга же жумушка киргенде;

14) майыптык мөөнөтү бүткөндө.

(КР Өкмөтүнүн 2019-жылдын 29-мартындагы № 149 токтомунун редакциясына ылайык)

12-глава. Үй-бүлөнүн кирешесин түзгөн булактарды документ түрүндө тастыктоонун тартиби

35. Аймактык бөлүмгө "үй-бүлөгө көмөк" жөлөкпул чектөө жөнүндө кайрылган арыз ээси алган кирешелерин тастыктоочу төмөнкүдөй документтерди тапшырат:

1) негизги иштеген, кызмат өтөгөн (аскер кызматчылары), окуган жеринен;

2) негизги эмес иштеген, кызмат өтөгөн (аскер кызматчылары), окуган жерлеринен;

3) экономикалык иш (ишкердик) жүргүзүүдөн;

4) айыл чарба ишинен.

Кирешелер тууралуу маалымкаттар эгер алар берилген күндөн тартып эки айдан ашык өтүп кетпесе кабыл алынат.

36. Жарандардын негизги иштеген, кызмат өтөгөн (аскер кызматчылары), окуган жерлеринен эмгек акы, стипендия түрүндө алган кирешелери жөнүндө тастыктоочу документтер болуп иштеген, окуган жерлердин, жетекчи, башкы бухгалтер кол коюп, гербдүү мөөр менен күбөлөндүрүлгөн маалымкаттары эсептелет.

Жыйынды киреше жөнүндө маалымкаттын формасын социалдык өнүктүрүү чөйрөсүндөгү ыйгарым укуктуу мамлекеттик орган иштеп чыгат жана бекитет.

(КР Өкмөтүнүн 2019-жылдын 29-мартындагы № 149, 2020-жылдын 24-августундагы № 442 токтомдорунун редакцияларына ылайык)

37. Жарандардын ишкер катары мамлекеттик каттоодон өткөндүгү жөнүндө күбөлүктүн жана ушул Жобонун 4 жана 5-пункттарында көрсөтүлгөн салык органдары берүүчү патенттин негизинде иштеген, кызмат өтөгөн (аскер кызматчылары), окуган негизги жерлеринен эмес, экономикалык иш (ишкердик) жүргүзүүдөн алган кирешелери тууралуу маалымат ыйгарым укуктуу салык органынын маалыматтык системасынан суралат.

(КР Өкмөтүнүн 2020-жылдын 24-августундагы № 442 токтомунун редакциясына ылайык)

38. Алимент жөнүндө тастыктоочу документтерди сот органдары, ишканалар, мекемелер, уюмдар жана чарбалар кайрылган учурга карата аткаруу барагы бар болсо гана беришет.

39. Жер үлүшүн пайдалануудан, короо жанындагы тилкесинен, ошондой эле айыл чарба жандыктарынан түшкөн кирешелерди аныктоо үчүн жер ресурстары жана ветеринария чөйрөсүндөгү мамлекеттик органдардын маалыматтык системаларына суроо-талап жиберилет.

Маалыматты ырастоо мүмкүн болбогон учурда жердин өлчөмүн, категориясын жана айыл чарба жандыктарынын санын көрсөтүү менен айыл өкмөтүнүн маалым каты талап кылынат.

(КР Өкмөтүнүн 2020-жылдын 24-августундагы № 442 токтомунун редакциясына ылайык)

40. Менчигинин түрүнө карабастан чарбакер субъекттерде иштеген жарандар аймактык бөлүмгө иштеген жериндеги эмгек акысы жөнүндө маалыматтарды тапшырышат.

Жер үлүштөрүн жана короо жанындагы участокторду пайдалануудан алынган кирешелердин ЧЕНЕМДЕРИ