КР 2017-жылдын 13-апрелиндеги № 58 Кодексине ылайык 2019-жылдын 1-январынан тартып КҮЧҮН ЖОГОТТУ

КЫРГЫЗ РЕСПУБЛИКАСЫНЫН МЫЙЗАМЫ

Бишкек шаары, 2004-жылдын 26-июлу № 98

Кыргыз Республикасынын Администрациялык жоопкерчилик жөнүндө кодексине толуктоолор киргизүү тууралу

1-статья.

Кыргыз Республикасынын Администрациялык жоопкерчилик жөнүндө кодексине (Кыргыз Республикасынын Жогорку Кеңешинин Жарчысы, 1999-ж., N 2, 77-ст.) төмөнкүдөй толуктоолор киргизилсин:

Кодекс төмөнкүдөй мазмундагы 66-3, 66-4 жана 66-5-статьялар менен толукталсын:

"66-3-статья. Үй-бүлөдөгү зомбулук

Үй-бүлөдөгү зомбулук - үй-бүлөнүн бир мүчөсүнүн башка мүчөсүнө (кара күч, психикалык, сексуалдык) ар кандай атайылап жасаган каршы аракеттери, эгерде мындай аракеттер үй-бүлө мүчөсүнүн конституциялык жана башка укуктары менен эркиндиктерин кысымга алса, саламаттыгына жеңил зыян келтирсе, дене боюн же психикасын жабыркатса, жаш курагына жана жынысына карабастан үй-бүлө мүчөсүнүн дене бой жана психикалык жагынан өнүгүшүнө зыян келтирсе, жана бул аракеттер үчүн жазык жоопкерчилиги каралган квалифицирленүүчү белгилер болбосо, -

эң аз айлык акынын бештен онго чейинки өлчөмүндө администрациялык айып салууга алып келет.

66-4-статья. Убактылуу коргоо ордеринин шарттарын аткарбоо

Убактылуу коргоо ордеринин шарттарын аткарбоо -

эң аз айлык акынын бештен он бешке чейинки өлчөмүндө администрациялык айып салууга же он суткага чейинки мөөнөткө администрациялык камакка алууга алып келет.

66-5-статья. Коргоочу сот ордеринин шарттарын аткарбоо

Коргоочу сот ордеринде сот тарабынан белгиленген шарттарды аткарбоо, эгерде бул аракет үчүн жазык жоопкерчилиги каралган квалифицирленүүчү белгилер болбосо, -

эң аз айлык акынын ондон жыйырмага чейинки өлчөмүндө администрациялык айып салууга же ондон он беш суткага чейинки администрациялык камакка алууга алып келет.".

2-статья.

Ушул Мыйзам жарыяланган күндөн тартып күчүнө кирет.