КЫРГЫЗ РЕСПУБЛИКАСЫНЫН ӨКМӨТҮНҮН ТОКТОМУ

2021-жылдын 1-марты № 66

Кыргыз Республикасынан мунайды жана мунай продуктуларын Евразия экономикалык бирлигинин бажы аймагынын чегинен тышкары ташып чыгууга (экспорттоого) убактылуу тыюу салуу жөнүндө

(КР Министрлер Кабинетинин 2022-жылдын 20-декабрындагы № 708, 2023-жылдын 24-июлундагы № 368, 2024-жылдын 6-августундагы № 458 , 2025-жылдын 7-октябрындагы № 645, 2026-жылдын 30-январы № 48 , 2026-жылдын 7-мартындагы № 159 токтомдорунун редакцияларына ылайык)

Ички рынокто мунай жана мунай продуктуларынын жетишсиздигин болтурбоо максатында, 2014-жылдын 29-майындагы Евразия экономикалык бирлиги жөнүндө келишимдин 46 жана 47-беренелерине, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык Кыргыз Республикасынын Өкмөтү токтом кылат:

1. Ички рынок толтурулганга же Евразия экономикалык бирлигинин мунай жана мунай продуктуларынын жалпы рыноктору түзүлгөнгө чейин Кыргыз Республикасынан Евразия экономикалык бирлигинин бажы аймагынын чегинен тышкары ташып чыгууга (экспорттоого) убактылуу тыюу салуу белгиленсин:

- «Чайна Петроль Компани «Джунда» жоопкерчилиги чектелген коомунун жана «Кыргызнефтегаз» ачык акционердик коомунун мунайды кайра иштетүүчү заводдору үчүн АИ-92 (К-2) маркасындагы бензинден, АИ-80 маркасындагы бензинден, дизель отунунан (К-2), нафтадан, ошондой эле мунайды кайра иштетүүчү ата мекендик заводдор тарабынан өндүрүлүүчү мазуттан жана жылытуучу отундан (ЕАЭБ ТЭИ ТН 2710 коду менен классификациялануучу) тышкары, автомобиль жана темир жол транспорту менен мунайды (ЕАЭБ ТЭИ ТН 2709 коду менен классификациялануучу) жана мунай продуктуларын (ЕАЭБ ТЭИ ТН 2710 коду менен классификациялануучу);

(КР Министрлер Кабинетинин 2022-жылдын 20-декабрындагы № 708,  2023-жылдын 24-июлундагы № 368, 2024-жылдын 6-августундагы № 458 , 2025-жылдын 7-октябрындагы № 645, 2026-жылдын 30-январы № 48, 2026-жылдын 7-мартындагы № 159 токтомдорунун редакцияларына ылайык)

2. Ушул токтомдун 1-пунктунда каралган талаптар Кыргыз Республикасынын аймагынан жеке адамдар тарабынан жеке пайдалануу үчүн ташылып чыгуучу, Бажы бирлигинин Дөңгөлөктүү транспорт каражаттарынын коопсуздугу жөнүндө техникалык регламентинин (ББ ТР 018/2011) талаптарына ылайык орнотулган транспорт каражатынын май куюучу бактарындагы, ошондой эле көлөмү 20 литрден ашпаган башка идиштеги мунай продуктуларына жайылтылбайт.

3. Кыргыз Республикасынын Экономика жана коммерция министрлиги ушул токтомдун 1-пунктунда көрсөтүлгөн убактылуу тыюу салууну киргизүү жөнүндө Дүйнөлүк соода уюмунун Коргоо чаралары боюнча комитетине жана Евразия экономикалык комиссиясына белгиленген тартипте кабарласын.

(Кыргыз Республикасынын Министрлер Кабинетинин 2025-жылдын 7-октябрындагы № 645 токтомунун редакциясына ылайык)

4. Кыргыз Республикасынын Тышкы иштер министрлиги ушул токтомдун 1-пунктунда көрсөтүлгөн убактылуу тыюу салууну киргизүү жөнүндө Көз карандысыз Мамлекеттер Шериктештигинин Аткаруу комитетине белгиленген тартипте кабарласын.

5. Кыргыз Республикасынын Министрлер Кабинетине караштуу Мамлекеттик бажы кызматы жана Кыргыз Республикасынын Улуттук коопсуздук мамлекеттик комитетинин Чек ара кызматы ушул токтомдун 1-пунктунда көрсөтүлгөн товарларды мыйзамсыз ташып чыгууга бөгөт коюуга багытталган зарыл чараларды көрүшсүн.

(КР Министрлер Кабинетинин 2022-жылдын 20-декабрындагы № 708 , 2025-жылдын 7-октябрындагы № 645 токтомдорунун редакцияларына ылайык)

6. Ушул токтом расмий жарыяланууга тийиш жана кол коюлган күндөн тартып күчүнө кирет.