КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИ

ТОКТОМ

2022-жылдын 31-январы № 45

 Кыргыз Республикасынын Өкмөтүнүн 2017-жылдын 21-ноябрындагы № 762 "Мамлекеттик маалыматтык системалар базасында камтылган маалыматты коргоо талаптарын бекитүү жөнүндө" токтомуна өзгөртүүлөрдү киргизүү тууралуу

Коллизиялык ченемдерди жоюу, мамлекеттик сатып алууларды жүзөгө ашырууда жеткирип берүүчүлөр (подрядчылар) үчүн бирдей жана адилеттүү шарттарды түзүү максатында, "Мамлекеттик сатып алуулар жөнүндө" Кыргыз Республикасынын Мыйзамынын 1-беренесине, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Өкмөтүнүн 2017-жылдын 21-ноябрындагы № 762 "Мамлекеттик маалыматтык системалар базасында камтылган маалыматты коргоо талаптарын бекитүү жөнүндө" токтомуна төмөнкүдөй өзгөртүүлөр киргизилсин:

1) 5-пунктундагы "Кыргыз Республикасынын Маалыматтык технологиялар жана байланыш мамлекеттик комитетине" деген сөздөр "Кыргыз Республикасынын Санариптик өнүктүрүү министрлигине" деген сөздөр менен алмаштырылсын;

2) аталган токтом менен бекитилген Мамлекеттик маалыматтык системалар базасында камтылган маалыматты коргоо талаптарында:

- 79-пункту төмөнкүдөй редакцияда баяндалсын:

"79. Системалык программалык камсыздоо мамлекеттик орган, жергиликтүү өз алдынча башкаруу органы, уюм тарабынан мамлекеттик сатып алуулар чөйрөсүндөгү Кыргыз Республикасынын мыйзамдарына ылайык сатып алынат же автордук укук жөнүндө Кыргыз Республикасынын мыйзамдарынын талаптарын, ошондой эле жүктөлүүчү системалык программалык камсыздоого лицензиялардын шарттарын сактоо менен акысыз негизде жүктөлөт.";

- 80-пункту күчүн жоготту деп таанылсын.

2. Бул токтом расмий жарыяланган күндөн тартып он беш күн өткөндөн кийин күчүнө кирет.