КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ

2023-жылдын 10-февралы № 61

"Улуу Көчмөндөр Мурасы" улуттук холдинг компаниясы" ачык акционердик коомун жоюу жөнүндө

(КР Министрлер Кабинетинин 2023-жылдын 12-июлундагы №351, токтомунун редакциясына ылайык)

Кыргыз Республикасынын Граждандык кодексинин 96, 97-статьяларына, "Акционердик коомдор жөнүндө" Кыргыз Республикасынын Мыйзамынын 18-статьясына, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Финансы министрлиги:

1) "Улуу Көчмөндөр Мурасы" улуттук холдинг компаниясы" ачык акционердик коомун жойсун;

2) Кыргыз Республикасынын Финансы министрлигинин, Кыргыз Республикасынын Экономика жана коммерция министрлигинин жана Кыргыз Республикасынын Юстиция министрлигинин өкүлдөрүнөн турган жоюу комиссиясын түзсүн;

3) "Улуу Көчмөндөр Мурасы" улуттук холдинг компаниясы" ачык акционердик коомунун ишине тиешелүү ченемдик укуктук актыларга инвентаризация жүргүзсүн жана Кыргыз Республикасынын Министрлер Кабинетинин кароосуна сунуш киргизсин;

4) "Улуу Көчмөндөр Мурасы" улуттук холдинг компаниясы" ачык акционердик коомунун жоюу балансын бекитсин.

2. Жоюу комиссиясы мыйзамдарда белгиленген тартипте Кыргыз Республикасынын Граждандык кодексинин 96-99-статьяларына ылайык "Улуу Көчмөндөр Мурасы" улуттук холдинг компаниясы" ачык акционердик коомун жоюу боюнча иш-чараларды жүргүзсүн.

(КР Министрлер Кабинетинин 2023-жылдын 12-июлундагы №351, токтомунун редакциясына ылайык)

3. Төмөнкүлөр күчүн жоготту деп таанылсын:

1) Кыргыз Республикасынын Өкмөтүнүн 2020-жылдын 27-майындагы № 274 "Мамлекеттик үлүш катышкан чарбакер коомдордун башкаруу органдарына мүчө кызмат ордуна талапкерлерди мамлекеттик органдар тарабынан тандоо жана көрсөтүү маселелери жөнүндө" токтомунун 1-2, 1-3-пункттары;

2) Кыргыз Республикасынын Министрлер Кабинетинин 2021-жылдын 25-декабрындагы № 352 "2026-жылга чейин Кыргыз Республикасын өнүктүрүүнүн улуттук программасын ишке ашыруу боюнча Кыргыз Республикасынын Министрлер Кабинетинин иш-чаралар планын бекитүү жөнүндө" токтому менен бекитилген 2026-жылга чейин Кыргыз Республикасын өнүктүрүүнүн улуттук программасын ишке ашыруу боюнча Кыргыз Республикасынын Министрлер Кабинетинин иш-чаралар планынын 539-пункту;

3) Кыргыз Республикасынын Министрлер Кабинетинин 2022-жылдын 10-июнундагы № 307 "Кыргыз Республикасынын Министрлер Кабинетинин мамлекеттик мүлктү башкаруу маселелерин жөнгө салуучу айрым чечимдерине өзгөртүүлөрдү киргизүү жөнүндө" токтомунун 2, 4-пункттары.

4. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

5. Бул токтом расмий жарыяланган күндөн тартып жети күн өткөндөн кийин күчүнө кирет.