КЫРГЫЗ РЕСПУБЛИКАСЫНЫН МЫЙЗАМЫ

2008-жылдын 28-июлу № 177

Кыргыз Республикасындагы калкты социалдык жактан тейлөөнүн негиздери жөнүндө " Кыргыз Республикасынын Мыйзамына толуктоолор жана өзгөртүүлөр киргизүү тууралуу

1-берене.

"Кыргыз Республикасындагы калкты социалдык жактан тейлөөнүн негиздери жөнүндө" Кыргыз Республикасынын Мыйзамына (Кыргыз Республикасынын Жогорку Кенешинин Жарчысы, 2002-ж., № 1, 1-ст.) төмөнкүдөй толуктоолор жана өзгөртүүлөр киргизилсин:

1. 3-статьяда:

статья төмөнкү мазмундагы алтынчы - он үчүнчү абзацтар менен толукталсын:

"жетим балдар - ата-энесинин экөө тең (же ата-энесинин бири) каза болгон, он сегиз жашка чейинки курактагы адамдар;

ата-энесинин камкордугусуз калган балдар - төмөнкүлөргө байланыштуу ата-энесинин биринин же экөөсүнүн тең камкордугусуз калган он сегиз жашка чейинки курактагы адамдар:

- ата-энелеринин жоктугу же алардын ата-энелик укуктарынан ажырагандыгы, алардын ата-энелик укуктарынын чектелгендиги, ата-энелерин дайынсыз жок, жарамсыз (жарамдуулугу чектелген) деп таануу, алардын дарылоо мекемелеринде болуулары;

- ата-энелерин каза болду деп табуу;

- эркиндигинен ажыратуу түрүндө жазаны аткаруу мекемелеринде жазасын өтөп жаткан, кылмыш жасагандыгынан шектелип жана айыпталып кайтарууда кармалуучу жерлерде болуу;

- балдарын тарбиялоодон же алардын укуктарын жана кызыкчылыктарын коргоодон ата-энелердин баш тартуусу;

- тарбиялоочу, дарылоочу мекемелерден, калкты социалдык жактан коргоочу мекемелерден жана башка ушундай мекемелерден өздөрүнүн балдарын алуудан ата-энелердин баш тартуусу;

- жана белгиленген тартипте баланы ата-энелеринин камкордугусуз калган деп тааныган башка учурларда;";

алтынчы - жыйырма төртүнчү абзацтар тийиштүүлүгүнө жараша он төртүнчү - отуз экинчи абзацтар деп эсептелинсин.

2. 4-статьянын алтынчы абзацында "ата-энесинин багуусунан ажыраган балдар" деген сөздөрдөн кийин "(ата-энеси) жана өтө кыйын же оор турмуштук кырдаалда калган башка балдар"; деген сөздөр менен толукталсын.

3. 6-статьянын 2-бөлүгү төмөнкүдөй редакцияда баяндалсын:

"Социалдык жактан тейлөө тармагындагы мамлекеттик минималдык социалдык стандарттар Кыргыз Республикасынын Жогорку Кеңеши тарабынан белгиленет.".

4. 7-статьянын 3-бөлүгү төмөнкүдөй мазмундагы абзац менен толукталсын:

"- үй-бүлөлүк балдар үйү.".

5. 11-статьяда:

1-бөлүктүн он биринчи абзацы төмөнкүдөй редакцияда баяндалсын:

"ата-эненин багуусунан ажыраган жана жетим балдар социалдык жардамга;"

2-бөлүгүндөгү "Жогорку Кеңешинин Мыйзам чыгаруу жыйыны" деген сөздөр "Жогорку Кеңеши" деген сөздөр менен алмаштырылсын.

6. 14-статьянын 2-бөлүгү төмөнкүдөй мазмундагы абзац менен толукталсын:

" -социалдык коштоо.".

7. 21-статья төмөнкүдөй редакцияда баяндалсын:

"21-статья. Өтө кыйын турмуштук кырдаалда калган жетим жана

ата-эненин багуусунан ажыраган балдарга кошумча

социалдык жардам

Өтө кыйын турмуштук кырдаалда калган балдар төмөнкүдөй түрдөгү социалдык жардамдарга укуктуу:

- социалдык жактан тейлөөнүн адистештирилген уюмдарында жашоого жана акысыз социалдык кызмат көрсөтүүлөрдү алууга;

- камкорчуларды, асырап алуучу ата-энелерди жана фостердик үй-бүлөлөрдү издөөдө социалдык кызматтарга көмөк көрсөтүүгө;

- билим алууга жана кесипке ээ болууга;

- материалдык жардам алууга;

- ден соолугун чыңдоо жана жайкы эс алууну уюштурууга көмөк көрсөтүүгө;

- юридикалык жардамга;

- консультация алууга, жекече алдын алуу иштерин жүргүзүүгө.".

2-статья.

Ушул Мыйзам расмий жарыяланган күндөн тартып күчүнө кирет.

Кыргыз Республикасынын Өкмөтү өзүнүн ченемдик укуктук актыларын үч айлык мөөнөттө ушул Мыйзамга ылайык келтирсин.