Мамлекеттик жана мамлекеттик эмес кызмат көрсөтүүлөрдүн сапатын жана жеткиликтүүлүгүн жогорулатуу максатында, Кыргыз Республикасынын Президентинин 2020-жылдын 17-декабрындагы № 64 "Кыргыз Республикасынын мамлекеттик башкаруусуна санариптик технологияларды киргизүүнү активдештирүү боюнча кечиктирилгис чаралар жөнүндө" Жарлыгына, "Кыргыз Республикасынын жарандарын биометрикалык каттоо жөнүндө" Кыргыз Республикасынын Мыйзамынын 6-беренесинин 3-бөлүгүнө, ошондой эле "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын жарандарын биометрикалык маалыматтар базасы аркылуу идентификациялоо жана аутентификациялоо тартиби тиркемеге ылайык бекитилсин.

2. Кыргыз Республикасынын Санариптик өнүктүрүү министрлигине караштуу "Инфоком" мамлекеттик ишканасы Кыргыз Республикасынын Санариптик өнүктүрүү министрлигинин карамагындагы Кыргыз Республикасынын жарандарынын биометрикалык маалыматтар базасынын техникалык оператору болуп аныкталсын.

3. Кыргыз Республикасынын Санариптик өнүктүрүү министрлиги жана анын карамагындагы техникалык оператор ушул токтомдон келип чыгуучу, анын ичинде Кыргыз Республикасынын жарандарынын биометрикалык маалыматтар базасынын үзгүлтүксүз иштөөсүн камсыз кылуу боюнча зарыл болгон чараларды көрсүн.

4. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.