КР Министрлер Кабинетинин 2026-жылдын 7-апрелиндеги № 228 токтомуна ылайык КҮЧҮН ЖОГОТТУ

КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ

2023-жылдын 24-ноябры № 618

Кыргыз Республикасынын Өкмөтүнүн 2019-жылдын 20-февралындагы № 80 "Кыргыз Республикасынын Өкмөтүнө караштуу Интеллектуалдык менчик жана инновациялар мамлекеттик кызматынын алдындагы Апелляциялык кеңешке каршы пикирлерди, арыздарды берүүнүн жана аларды кароонун эрежелерин бекитүү жөнүндө" токтомуна өзгөртүүлөрдү киргизүү тууралуу

"Товардык белгилер, тейлөө белгилери, географиялык көрсөтмөлөр жана товарлар чыгарылган жерлердин аталыштары жөнүндө" Кыргыз Республикасынын Мыйзамынын 1-беренесинин 4-бөлүгүнө, 3-беренесинин 2-бөлүгүнө, 54-беренесинин 7-бөлүгүнө, "Патент мыйзамы" Кыргыз Республикасынын Мыйзамынын 1-беренесинин 4-бөлүгүнө, 3-беренесинин 3-бөлүгүнө, 47-беренесинин 3-бөлүгүнө, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Өкмөтүнүн 2019-жылдын 20-февралындагы № 80 "Кыргыз Республикасынын Өкмөтүнө караштуу Интеллектуалдык менчик жана инновациялар мамлекеттик кызматынын алдындагы Апелляциялык кеңешке каршы пикирлерди, арыздарды берүүнүн жана аларды кароонун эрежелерин бекитүү жөнүндө" токтомуна төмөнкүдөй өзгөртүүлөр киргизилсин:

1) аталышындагы, преамбуладагы, 1-пункттагы "Өкмөтүнө караштуу Интеллектуалдык менчик жана инновациялар мамлекеттик кызматынын" деген сөздөр "Министрлер Кабинетине караштуу Интеллектуалдык менчик жана инновациялар мамлекеттик агенттигинин" деген сөздөргө алмаштырылсын;

2) жогоруда токтом менен бекитилген Кыргыз Республикасынын Өкмөтүнө караштуу Интеллектуалдык менчик жана инновациялар мамлекеттик кызматынын алдындагы Апелляциялык кеңешке каршы пикирлерди, арыздарды берүүнүн жана аларды кароонун эрежелеринде:

- аталышындагы жана 1-пункттагы "Өкмөтүнө караштуу Интеллектуалдык менчик жана инновациялар мамлекеттик кызматынын" деген сөздөр "Министрлер Кабинетине караштуу Интеллектуалдык менчик жана инновациялар мамлекеттик агенттигинин" деген сөздөргө алмаштырылсын;

- 2-пунктта:

биринчи, экинчи абзацтардагы "Өкмөтүнө караштуу Интеллектуалдык менчик жана инновациялар мамлекеттик кызматынын" деген сөздөр "Министрлер Кабинетине караштуу Интеллектуалдык менчик жана инновациялар мамлекеттик агенттигинин" деген сөздөргө алмаштырылсын;

үчүнчү абзац төмөнкүдөй редакцияда баяндалсын:

"Апелляциялык кеңештин жыйындарында каршы пикирлерди жана арыздарды ачык жана айкын кароону камсыздоо максатында чечимдерди кабыл алууда добуш берүү укугусуз байкоочу катарында коррупциянын алдын алуу маселелери боюнча ыйгарым укуктуу катышат.";

- 3-пункт төмөнкүдөй редакцияда баяндалсын:

"3. "Патент мыйзамы" Кыргыз Республикасынын Мыйзамынын 3, 31, 33, 34, 36, 38-беренелерине, "Товардык белгилер, тейлөө белгилери, географиялык көрсөтмөлөр жана товарлар чыгарылган жерлердин аталыштары жөнүндө" Кыргыз Республикасынын Мыйзамынын 3, 16, 32-беренелерине, "Селекциялык жетишкендиктерди укуктук коргоо жөнүндө" Кыргыз Республикасынын Мыйзамынын 3, 12, 15-статьяларына жана Кыргыз Республикасынын мыйзамдарына ылайык күчүнө кирген эл аралык келишимдерге ылайык Апелляциялык кеңешке төмөнкүдөй каршы пикирлер берилиши мүмкүн:

1) ойлоп табууга патент берүүдөн баш тартуу жөнүндө формалдуу экспертизанын жана маани-маңызы боюнча экспертизанын чечимине;

2) пайдалуу моделге патент берүүдөн баш тартуу жөнүндө формалдуу же алдын ала экспертизанын чечимине;

3) өнөр жай үлгүсүнө патент берүүдөн баш тартуу жөнүндө формалдуу же маани-маңызы боюнча экспертизанын чечимине;

4) ойлоп табууга, пайдалуу моделге, өнөр жай үлгүсүнө, селекциялык жетишкендикке патент берүүгө каршы;

5) товардык белгини, тейлөө белгисин каттоодон баш тартуу жөнүндө билдирилген белгиге экспертизанын чечимине;

6) товардык белгини, тейлөө белгисин каттоого каршы;

7) географиялык көрсөтмөнү каттоодон баш тартуу жөнүндө экспертизанын чечимине;

8) товар чыгарылган жердин аталышын каттоодон баш тартуу жөнүндө экспертизанын чечимине;

9) географиялык көрсөтмөнү каттоого жана географиялык көрсөтмөнү пайдалануу укугуна күбөлүк берүүгө каршы;

10) товар чыгарылган жердин аталышын каттоого жана товар чыгарылган жердин аталышын пайдалануу укугуна күбөлүк берүүгө каршы;

11) селекциялык жетишкендикке патент берүүдөн баш тартуу жөнүндө чечимге.";

- 4-пункттун 2-пунктчасы төмөнкүдөй редакцияда баяндалсын:

"2) Кыргыз Республикасынын аймагында жалпыга белгилүү товардык белгини укуктук коргоону токтотуу жөнүндө.";

- 5-пунктта:

биринчи абзацтагы "3-пунктунун 1-5, 7-11-пунктчаларында жана 4-пунктунун 1-пунктчасында" деген сөздөр "3, 4-пункттарында" деген сөздөргө алмаштырылсын;

экинчи абзац күчүн жоготту деп таанылсын;

- төмөнкүдөй мазмундагы 5¹ - 5⁶-пункттар менен толукталсын:

"5¹. Каршы пикир, арыз жана ушул Эрежелерде каралган башка документтер жана материалдар Апелляциялык кеңешке кагаз жүзүндө почта аркылуу же болбосо кириш корреспонденцияны кабыл алууну тейлеген Кыргызпатенттин түзүмдүк бөлүмүнө түздөн-түз берилет.

Каршы пикир, арыз жана ушул Эрежелерде каралган башка документтер жана материалдар Кыргызпатенттин расмий сайты аркылуу электрондук түрдө берилиши мүмкүн.

5². Кагаз жүзүндө берилген каршы пикирге же арызга каршы пикирдин жана арыздын көчүрмөлөрүн жана ага тиркелген PDF форматындагы документтерди жана материалдарды камтыган электрондук алып жүрүүчү тиркелет.

5³. Каршы пикирди же арызды, ага пикирди, ошондой эле тараптардын түшүндүрмөлөрүн жана өтүнүчтөрүн электрондук түрдө расмий сайт аркылуу берүүдө жөнөкөй электрондук кол тамга колдонулат.

5⁴. Каршы пикир же арыз бир өтүнмөгө, ойлоп табууга, пайдалуу моделге, өнөр жай үлгүсүнө бир патентке, эл аралык каттоо боюнча бир өнөр жай үлгүсүнө, селекциялык жетишкендикке, бир товардык белгиге, тейлөө белгисине, географиялык көрсөтмөгө же товар чыгарылган жердин аталышына, географиялык көрсөтмөнү же товар чыгарылган жердин аталышын пайдалануу укугу жөнүндө бир күбөлүккө тиешелүү болууга тийиш.

5⁵. Каршы пикир же арыз мамлекеттик же расмий тилде машинага басылган түрдө түзүлүүгө, аны берген жак (анын өкүлү) тарабынан кол коюлууга жана окулгудай болууга тийиш.

5⁶. Каршы пикир же арыз Апелляциялык кеңешке эки нускада берилет.";

- 6-пунктта:

экинчи абзацтагы "тейлөө белгисине жана" деген сөздөр "тейлөө белгисине, географиялык көрсөтмөгө жана/же" деген сөздөргө алмаштырылсын;

жетинчи абзац күчүн жоготту деп таанылсын;

төмөнкүдөй мазмундагы абзацтар менен толукталсын:

"- каршы пикирге же арызга тиркелген документтердин тизмеги;

- каршы пикир жана арыз берилген күн, ай жана жыл;

- каршы пикирди же арызды берген адамдын колу;

- юридикалык жактын атынан каршы пикирди же арызды берген адамдын колу жана юридикалык жактын мөөрү.";

- 7-пунктта:

биринчи абзац төмөнкүдөй редакцияда баяндалсын:

"7. Эгерде ушул пунктта башкача каралбаса, каршы пикирлер арыз ээсине чечим жөнөтүлгөн датадан тартып үч айдын ичинде берилет.";

экинчи, үчүнчү абзацтар күчүн жоготту деп таанылсын;

төртүнчү абзацтагы "12-пунктчасында" деген сөздөр "4-пунктчасында" деген сөздөргө алмаштырылсын;

бешинчи, алтынчы абзацтар төмөнкүдөй редакцияда баяндалсын:

"Товардык белгилер, тейлөө белгилери, географиялык көрсөтмөлөр жана товарлар чыгарылган жерлердин аталыштары жөнүндө" Кыргыз Республикасынын Мыйзамынын 9-беренесинде белгиленген талаптар бузулган учурда, ушул Эрежелердин 3-пунктунун 6-пунктчасында каралган каршы пикир каттоо колдонулган бүткүл мөөнөт ичинде, ал эми "Товардык белгилер, тейлөө белгилери, географиялык көрсөтмөлөр жана товарлар чыгарылган жерлердин аталыштары жөнүндө" Кыргыз Республикасынын Мыйзамынын 10-беренесинде белгиленген негиздер боюнча - Кыргызпатенттин расмий бюллетенинде каттоо жөнүндө маалыматтар жарыяланган датадан тартып беш жыл өткөнгө чейин берилет.

Ушул Эрежелердин 3-пунктунун 9-пунктчасында каралган каршы пикир географиялык көрсөтмөнү каттоону, географиялык көрсөтмөнү пайдалануу укугуна күбөлүктү колдонуу мөөнөтү ичинде берилет.";

жетинчи абзацтагы " 16-пунктчасында" деген сөздөр "10-пунктчасында" деген сөздөргө алмаштырылсын;

сегизинчи, тогузунчу абзацтар күчүн жоготту деп таанылсын;

төмөнкүдөй мазмундагы абзац менен толукталсын:

"Ушул пунктта көрсөтүлгөн каршы пикирлерди берүү мөөнөтү Апелляциялык кеңешке каршы пикир келип түшкөн учурда Апелляциялык кеңеш каршы пикир боюнча чечим кабыл алганга чейин токтотулуп турат. Апелляциялык кеңеш каршы пикирди кароосуз калтырган же каршы пикирди кайтарган учурда, каршы пикирлерди берүү мөөнөтү жалпы тартипте улантылат.";

- 8-пунктта:

экинчи абзац төмөнкүдөй редакцияда баяндалсын:

"Бир түрдүү товарларга карата ушул Эрежелердин 3-пунктунун 5-пунктчасында каралган каршы пикирге "Товардык белгилер, тейлөө белгилери, географиялык көрсөтмөлөр жана товарлар чыгарылган жерлердин аталыштары жөнүндө" Кыргыз Республикасынын Мыйзамынын 10-беренесинин 1-бөлүгүнүн 1, 2, 3-пункттарында көрсөтүлгөн товардык белгинин ээсинин берилген белгини каттоого макулдугу тиркелет.";

төмөнкүдөй мазмундагы абзац менен толукталсын:

"Жеке жак тарабынан же анын атынан берилүүчү каршы пикирге же арызга ошондой эле арыз ээсинин жеке мүнөздөгү маалыматтарды (жеке маалыматтарды) чогултууга, сактоого, иштетүүгө, пайдаланууга, берүүгө, анын ичинде Кыргыз Республикасынын Өкмөтүнүн 2017-жылдын 21-ноябрындагы № 759 "Жеке маалыматтар субъектисинин жеке маалыматтарын чогултууга жана иштетүүгө анын макулдугун алуу тартибин, алардын жеке маалыматтарын үчүнчү тарапка берүү жөнүндө жеке маалыматтар субъектилерине билдирүү тартибин жана формасын бекитүү тууралуу" токтому менен бекитилген форма боюнча жеке маалыматтарды трансчек аралык берүүгө макулдугун ырастоочу документ тиркелүүгө тийиш.";

- 9-пунктта:

биринчи абзацтагы "каршы пикир же арыз берген күн эсептелет" деген сөздөр "каршы пикир же арыз келип түшкөн күн эсептелет" деген сөздөргө алмаштырылсын;

экинчи абзацтагы "каршы пикир же арыз берилбеген болуп эсептелет" деген сөздөр "арыз ээсине тиешелүү суроо-талап жөнөтүлөт" деген сөздөргө алмаштырылсын;

үчүнчү абзац төмөнкүдөй редакцияда баяндалсын:

"Оңдолгон каршы пикирлер, арыздар же алымды кошумча төлөөнү ырастоочу документ берилбеген учурда, каршы пикир же арыз арыз ээсине кайтарылат. Каршы пикирди же арызды кароонун мөөнөтү оңдолгон документ же алымды кошумча төлөө жөнүндө документ берилген датадан тартып эсептелет.";

- 14-пункт төмөнкүдөй редакцияда баяндалсын:

"14. Келип түшкөн каршы пикирди же арызды кабыл алуу жана каттоо ушул Эрежелердин III бөлүмүндө каралган талаптардын сакталгандыгын текшерүүнү жана ага каттоо номерин ыйгарууну камтыйт.";

-төмөнкүдөй мазмундагы 14¹ - 14⁸-пункттар менен толукталсын:

"14¹. Каршы пикирди же арызды кабыл алуу, каттоо, ошондой эле Апелляциялык кеңештин катчысына тиркелген материалдары менен берүү иш кагаздарын жүргүзүү үчүн жооптуу түзүмдүк бөлүм тарабынан каршы пикир же арыз Кыргызпатентке келип түшкөн күндөн тартып үч жумуш күнгө чейинки мөөнөттө жүзөгө ашырылат.

14². Апелляциялык кеңештин катчысы келип түшкөн каршы пикирдин, арыздын жана аларга тиркелген материалдардын толуктугун формалдуу текшерүүнү жүргүзөт.

14³. Эгерде каршы пикирде же арызда формалдуу, анын ичинде ушул Эрежелердин 6-8-пункттарына ылайык келбеген кемчиликтер аныкталса, анда Апелляциялык кеңештин катчысы аларды көрсөтүү менен бул кемчиликтерди оңдоо үчүн эки айдан ашпаган мөөнөттү белгилөө аркылуу аталган кемчиликтерди оңдоо мүмкүндүгүн берүү менен арыз ээсине суроо-талап жөнөтөт.

14⁴. Эгерде каршы пикирге же арызга мыйзамдар жана ушул Эрежелер менен талап кылынган документтер тиркелбесе, анда Апелляциялык кеңештин катчысы арыз ээсине он жумуш күндүн ичинде, ал эми арыз ээси чет өлкөдө болсо, анда эки айдан ашпаган мөөнөттө мындай документтерди берүүнү сунуштайт.

14⁵. Эгерде арыз ээси кемчиликтерди ушул Эрежелердин 14-3, 14-4-пункттарында көрсөтүлгөн тартипте жана мөөнөттөрдө жойбосо же каршы пикир же арыз ушул Эрежелердин 7-пунктунда белгиленген мөөнөттөрдөн тышкары берилсе жана бул мөөнөттөр мыйзамдарда каралган тартипте калыбына келтирилбесе, Апелляциялык кеңеш каршы пикирди же арызды кайтарат.

14⁶. Каршы пикирди же арызды кайтаруу жол берилген кемчиликтер жоюлгандан кийин аны менен жалпы тартипте экинчи ирет иштөөгө тоскоолдук кылбайт.

14⁷. Эгерде каршы пикирдин же арыздын талаптары Апелляциялык кеңештин компетенциясына кирбесе, анда Апелляциялык кеңеш арызды кароосуз калтыруу жөнүндө жүйөлүү чечим чыгарат.

14⁸. Каршы пикир/арыз кайтарылган же кароосуз калтырылган бардык учурларда Апелляциялык кеңештин катчысы каршы пикирдин/арыздын көчүрмөлөрүн, ошондой эле ага тиркелген документтерди же алардын бир бөлүгүнүн көчүрмөлөрүн өзүндө сактап калат.";

- 15, 16-пункттар төмөнкүдөй редакцияда баяндалсын:

"15. Арыз ээси каршы пикирди же арызды кайтаруу же кароосуз калтыруу менен макул болбогон учурда бул чечим сотко даттанылышы мүмкүн. Каршы пикирди же арызды кайтаруу же кароосуз калтыруу мыйзамсыз деп таанылган учурда ал биринчи кайрылган күнү берилген деп эсептелет.

16. Ушул Эрежелердин 3-пунктунун 4, 6, 9, 10-пунктчаларында, 4-пунктунун 2-пунктчасында каралган каршы пикирди же арызды кароого кабыл алуу жөнүндө каршы пикирдин же арыздын көчүрмөсүн тиркөө менен талашып жаткан коргоо документинин ээсине кабарлоо жөнөтүлөт жана каршы пикирдин (арыздын) тыянактарын жокко чыгаруучу өзүнүн тыянактарын берүү сунушталат.

Белгилерди эл аралык каттоо жөнүндө Мадрид макулдашуусуна же Белгилерди эл аралык каттоо жөнүндө Мадрид макулдашуусуна протоколго ылайык катталган товардык белгинин, тейлөө белгисинин ээсине аталган кабарлоо белгинин ээсинин дарегине түздөн-түз жөнөтүлөт. Ошол эле учурда каршы пикирди же арызды кароо менен байланышкан ишти мындан ары жүргүзүү ушул Эрежелердин III бөлүмүнө ылайык Кыргызпатентте катталган патенттик ишенимдүү өкүл аркылуу жүзөгө ашырыла тургандыгы билдирилет.";

- 18-пунктта:

биринчи абзац төмөнкүдөй редакцияда баяндалсын:

"18. Ушул Эрежелердин 3-пунктунун 1-3, 5-11-пунктчаларында каралган каршы пикирлер Апелляциялык кеңеш тарабынан алар келип түшкөн датадан тартып үч айдын ичинде каралат.";

экинчи абзацтагы "12-пунктчасында" деген сөздөр "4-пунктчасында" деген сөздөргө алмаштырылсын;

- 25-пункттун экинчи абзацы төмөнкүдөй редакцияда баяндалсын:

"Апелляциялык кеңеш өз демилгеси же талаш-тартышка катышкан адамдын өтүнүчү боюнча тараптардын келбегендигинин натыйжасында аталган жыйында каршы пикирди же арызды кароонун мүмкүн эместигин таануу менен жыйынды өткөрүү мөөнөтүн жылдырууга укуктуу.";

- 36-пункттагы "алты айдын ичинде" деген сөздөр "үч айлык мөөнөттө" деген сөздөргө алмаштырылсын.

2. Бул токтом расмий жарыяланган күндөн тартып он күн өткөндөн кийин күчүнө кирет.