КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТЕСКЕМЕСИ

2024-жылдын 23-сентябры № 568-т

Кыргыз Республикасынын аймагында автомобилдик жана коммерциялык техниканы чогултуу жана өндүрүү боюнча инвестициялык долбоорду ишке ашыруу максатында, Кыргыз Республикасынын Салык кодексинин 3-беренесинин 3-бөлүгүнө, "Кыргыз Республикасында инвестициялар жөнүндө" Кыргыз Республикасынын Мыйзамынын 11¹-статьясына ылайык, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерин жетекчиликке алып:

1. Кыргыз Республикасынын Министрлер Кабинети менен "ДТ Техник" жоопкерчилиги чектелген коомунун ортосундагы Кыргыз Республикасынын аймагында автомобилдик жана коммерциялык техниканы чогултуу жана өндүрүү боюнча инвестициялык долбоорду ишке ашыруу жөнүндө инвестициялык макулдашуунун расмий тилде тиркелген долбоору жактырылсын.

2. Кыргыз Республикасынын Президентинин Кыргыз Республикасынын Чүй облусундагы ыйгарым укуктуу өкүлүнө жогоруда аталган Инвестициялык макулдашууга принциптүү эмес мүнөздөгү өзгөртүүлөрдү жана толуктоолорду киргизүү укугу менен Кыргыз Республикасынын Министрлер Кабинетинин атынан кол коюуга ыйгарым укук берилсин.