Кыргыз Республикасынын Президентинин

Администрациясынын протокол кызматы жөнүндө

жобо

(Кыргыз Республикасынын Президентинин Администрациясынын Жетекчисинин 2024-жылдын 19-декабрындагы № 225 тескемесинин редакциясына ылайык)

1. Жалпы жоболор

1. Кыргыз Республикасынын Президентинин Администрациясынын протокол кызматы (мындан ары - кызмат) Кыргыз Республикасынын Президентинин Администрациясынын (мындан ары - Президенттин Администрациясы) Кыргыз Республикасынын Президентин (мындан ары - Президент), Президенттин жубайын, Кыргыз Республикасынын Министрлер Кабинетинин Төрагасы - Кыргыз Республикасынын Президентинин Администрациясынын Жетекчисин (мындан ары - Министрлер Кабинетинин Төрагасы - Президенттин Администрациясынын Жетекчиси) протоколдук коштоону камсыз кылуучу, кызматтын милдеттерине жана функцияларына кирген эл аралык кызматташтык маселелерин тескөөчү түзүмдүк бөлүмү болуп саналат.

2. Кызмат өз ишинде Кыргыз Республикасынын Конституциясын жана мыйзамдарын, Президенттин жарлыктарын жана тескемелерин, Министрлер Кабинетинин токтомдорун жана тескемелерин, Министрлер Кабинетинин Төрагасынын тескемелерин (Президенттин Администрациясынын Жетекчисинин тескемелерин), Президенттин Администрациясы жөнүндө жобону, Президенттин Администрациясынын регламентин, Президенттин Администрациясында документтер менен иштөөнүн регламентин, Кыргыз Республикасынын башка ченемдик укуктук актыларын жана ушул Жобону жетекчиликке алат.

3. Кызматтын кызматкерлери:

- мамлекеттик кызматчылар болуп саналат;

- чечимдерди кабыл алууда Кыргыз Республикасынын Конституциясын, Кыргыз Республикасынын мыйзамдарын жана башка ченемдик укуктук актыларын жетекчиликке алууга, мамлекеттик, кызматтык жана мыйзам менен корголуучу башка сырды сактоого милдеттүү;

- Президенттин Администрациясы жөнүндө жободо жана ушул Жободо аныкталган компетенциянын чегинде мамлекеттик органдар, жергиликтүү өз алдынча башкаруу органдары, алардын кызмат адамдары, юридикалык жактар жана жарандар менен болгон мамилелерде Президенттин Администрациясынын өкүлдөрү болуп саналат.

4. Кызматтын кызматкерлерин кызмат ордуна дайындоо жана кызмат ордунан бошотуу Президенттин Администрациясы жөнүндө жободо белгиленген тартипте жүзөгө ашырылат.

5. Кызматты кызматтын жетекчиси жетектейт, ал кызматтын ишине жалпы жетекчилик кылат.

Кызматтын жетекчисинин орун басары болот, ал кызматтын жетекчиси жок болгон мезгилде жана анын тапшырмасы боюнча кызматтык документтерге кол коюу укугу менен кызмат ордун ээлейт.

6. Кызматтын кызматкерлерине Кыргыз Республикасынын мыйзамдарында белгиленген тартипте дипломатиялык рангдар ыйгарылышы мүмкүн.

7. Кызмат Президентке жана Министрлер Кабинетинин Төрагасы - Президенттин Администрациясынын Жетекчисине отчет берет.

2. Кызматтын милдети

8. Кызматтын негизги милдети Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин ишин протоколдук камсыздоо болуп саналат.

3. Кызматтын функциялары

9. Кызмат төмөнкү функцияларды аткарат:

1) төмөнкүлөрдү протоколдук-уюштуруучулук камсыздоо боюнча ишти координациялайт:

- Кыргыз Республикасына жогорку жана эң жогорку деңгээлдеги жумушчу сапарларды жана Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин чет өлкөлөргө жумушчу сапарларын;

- Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин Кыргыз Республикасынын региондорундагы кеңешмелерин, жыйналыштарын жана жумушчу сапарларын;

2) Президентке, Президенттин жубайына жана Министрлер Кабинетинин Төрагасы - Президенттин Администрациясынын Жетекчисине протоколдук маселелер боюнча консультация берет;

3) кызматтын компетенциясынын чегинде Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин чет өлкөлөргө жумушчу сапарларынын программаларын макулдашат, бул программаларды аткаруу боюнча ишти координациялайт;

4) чет өлкөлөргө жумушчу сапарларды уюштуруучу жана камсыз кылуучу даярдоо жана алдынкы топторду түзүү жана багыттоо боюнча ишти координациялайт, мындай топторду башкарат;

5) Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин катышуусундагы мамлекеттик ички жана эл аралык иш-чараларды протоколдук-уюштуруучулук даярдоо жана өткөрүү маселелери боюнча Президенттин Администрациясынын түзүмдүк бөлүмдөрүнүн, Кыргыз Республикасынын мамлекеттик органдарынын ишин координациялайт;

6) Президенттин жана Министрлер Кабинетинин Төрагасы - Президенттин Администрациясынын Жетекчисинин тапшырмасы боюнча Кыргыз Республикасынын дипломатиялык жана кызматтык паспортторун тариздөө бөлүгүндө Кыргыз Республикасынын Тышкы иштер министрлигинин ишин координациялайт;

7) Кыргыз Республикасынын протоколдук аземин өркүндөтүү боюнча сунуштарды иштеп чыгат жана киргизет (Кыргыз Республикасына жумушчу сапарлардын алкагында чет мамлекеттердин башчыларынын жолугушуулары жана жөнөтүүлөр, Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин чет өлкөлөргө жумушчу сапарлары, Кыргыз Республикасында аккредиттелген чет мамлекеттердин Атайын жана Ыйгарым укуктуу элчилеринин Президентке ишеним грамоталарын тапшыруусу);

8) белгиленген компетенциянын чегинде республикалык тышкы саясий органдарда жана алардын чет өлкөлүк бөлүмдөрүндө мамлекеттик кадр саясатын камсыз кылууга катышат.

4. Кызматтын жана анын кызматкерлеринин

ыйгарым укуктары

10. Кызмат, кызматтын жетекчилери жана кызматкерлери Министрлер Кабинетинин Төрагасы - Президенттин Администрациясынын Жетекчиси бекиткен Президенттин Администрациясынын түзүмдүк бөлүмдөрүнүн жалпы милдеттери, функциялары жана ыйгарым укуктары жөнүндө жободо каралган ыйгарым укуктарга, ошондой эле кызматтын ишинин өзгөчөлүктөрүнө жараша башка ыйгарым укуктарга ээ.

Анын ичинде кызмат төмөнкүдөй ыйгарым укуктарга ээ:

1) Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин катышуусундагы ар кандай протоколдук иш-чараларды өткөрүү боюнча сунуштарды Министрлер Кабинетинин Төрагасы - Президенттин Администрациясынын Жетекчисинин кароосуна киргизүүгө;

2) жооптуу кызматкерлерди тартиптик жоопкерчиликке тартуу үчүн тапшырмаларды өз убагында же толук аткарбагандыгы жөнүндө Министрлер Кабинетинин Төрагасы - Президенттин Администрациясынын Жетекчисине баяндоого;

3) Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин катышуусундагы протоколдук иш-чараларды аткарууга Кыргыз Республикасынын мамлекеттик органдарынын жана жергиликтүү өз алдынча башкаруу органдарынын кызматкерлерин тартууга;

4) мамлекеттик органдардан жана жергиликтүү өз алдынча башкаруу органдарынан зарыл маалыматтарды суроого жана алууга, аларга кызматтын компетенциясына кирген маселелер боюнча аткарууга милдеттүү болгон тапшырмаларды берүүгө;

5) протоколдук-уюштуруу маселелери бөлүгүндө чет мамлекеттердин өкүлдөрү, ошол мамлекеттердин мамлекеттик органдары, чет мамлекеттердин жана эл аралык уюмдардын Кыргыз Республикасындагы өкүлчүлүктөрү менен өз ара аракеттенүүгө;

6) кызматка жүктөлгөн милдеттерди жана функцияларды аткаруу үчүн зарыл болгон башка ыйгарым укуктарды жүзөгө ашырууга.

11. Протокол кызматынын жетекчиси жалпы ыйгарым укуктарды толуктоо иретинде:

1) даярдоо жана алдыңкы топторду түзүү жана чет өлкөлөргө жиберүү боюнча иштерди жүргүзөт, алардын ишин координациялайт;

2) чет өлкөлөрдө жана Кыргыз Республикасында Президенттин, Президенттин жубайынын жана Министрлер Кабинетинин Төрагасы - Президенттин Администрациясынын Жетекчисинин катышуусундагы тышкы саясий иш-чаралардын уюштуруу-протоколдук бөлүгүн координациялайт;

3) Президенттин эл аралык байланыштарын протоколдук-уюштуруучулук жактан камсыз кылат;

4) кызматтын кызматкерлерин сыйлоого, класстык чендерди жана дипломатиялык рангдарды ыйгарууга белгиленген тартипте сунуштайт.

12. Башка ыйгарым укуктар менен бирге кызматтын жетекчисинин орун басары:

1) Кыргыз Республикасында жана чет өлкөлөрдө Министрлер Кабинетинин Төрагасы - Президенттин Администрациясынын Жетекчисинин катышуусундагы тышкы саясий иш-чаралардын уюштуруу-протоколдук бөлүгүн координациялайт;

2) даярдоо жана алдыңкы топторду түзүү жана чет өлкөлөргө жиберүү боюнча иштерди жүргүзөт, алардын ишин координациялайт;

3) Министрлер Кабинетинин Төрагасынын эл аралык байланыштарын протоколдук-уюштуруучулук жактан камсыз кылат;

4) Министрлер Кабинетинин Төрагасынын жана кызматтын жетекчисинин айрым тапшырмалары боюнча башка ыйгарым укуктарды жүзөгө ашырат.

13. Кызматтын эксперттери башка ыйгарым укуктар менен катар:

1) Кыргыз Республикасынын Тышкы иштер министрлиги, мамлекеттик органдар, жергиликтүү өз алдынча башкаруу органдары жана чет өлкөлүк өнөктөштөр менен биргеликте иш сапарлардын программаларынын схемаларын, ошондой эле иш сапарлардын кеңири программаларын, тиешелүү иш-чаралардын тизмелерин иштеп чыгууга катышат;

2) кызматтын компетенциясынын чегинде Президенттин жана Министрлер Кабинетинин Төрагасы - Президенттин Администрациясынын Жетекчисинин катышуусу менен мамлекеттик ички жана эл аралык иш-чараларды өткөрүүнүн жыйынтыгы боюнча маалыматтык материалдарды жана документтерди талдайт;

3) Кыргыз Республикасынын протоколдук аземин өркүндөтүү боюнча сунуштарды иштеп чыгат;

4) аткарылган иштер жөнүндө кварталдык пландарды жана отчетторду берет;

5) документтердин сакталышын жана өз убагында архивге чыгарылышын камсыз кылат;

6) Кыргыз Республикасынын мамлекеттик органдары тарабынан тиешелүү маалыматтардын өз убагында берилишин контролдойт;

7) кызматтын жетекчисинин жана анын орун басарынын тапшырмасы боюнча тейлеген мамлекеттик органдар өткөрүүчү жыйналыштарга жана кеңешмелерге катышат;

8) кызматтын жетекчисинин жана анын орун басарынын тапшырмасы боюнча башка ыйгарым укуктарды жүзөгө ашырат.

5. Кураторлук

14. Кызмат өзүнүн ишин Президенттин Администрациясынын башка түзүмдүк бөлүмдөрү, Министрлер Кабинети, Кыргыз Республикасынын Жогорку Кеңешинин Аппараты, Кыргыз Республикасынын министрликтери, мамлекеттик комитети, административдик ведомстволору жана башка органдары, ошондой эле эл аралык уюмдар менен бөлүмдүн милдеттерине жана функцияларына кирген маселелер боюнча тыгыз өз ара аракеттенүү менен жүргүзөт.

15. Кызмат төмөнкүлөрдү тейлейт:

1) Кыргыз Республикасынын Тышкы иштер министрлигин (Президенттин жана Министрлер Кабинетинин Төрагасы - Президенттин Администрациясынын Жетекчисинин тапшырмасы боюнча мамлекеттик протокол жана дипломатиялык жана кызматтык паспортторду тариздөө маселелери боюнча);

2) Кыргыз Республикасынын Президентинин Иш башкармасын (Президенттин жана Министрлер Кабинетинин Төрагасы - Президенттин Администрациясынын Жетекчисинин катышуусундагы протоколдук иш-чараларды уюштуруу маселелери боюнча).