Кыргыз Республикасында жайгаштыруу каражаттарын классификациялоонун мамлекеттик системасы жөнүндө ЖОБО

1-глава. Жалпы жоболор

1. Кыргыз Республикасында жайгаштыруу каражаттарын классификациялоонун мамлекеттик системасы жөнүндө жобо (мындан ары - Жобо) жайгаштыруу каражаттарын классификациялоо тартибин, анын ичинде жайгаштыруу каражаттарына коюлуучу талаптарды, жайгаштыруу каражаттарын классификациялоо системасынын уюштуруу түзүмүн жана анын катышуучуларынын функцияларын, жайгаштыруу каражаттарын классификациялоо системасында колдонулуучу документтердин формаларын, аппеляцияларды кароо тартибин, жайгаштыруу каражаттарынын категориясынын белгисин колдонуу эрежелерин белгилейт.

2. Бул Жобо жайгаштыруу каражаттарынын төмөнкүдөй түрлөрүн классификациялоого карата колдонулат: мейманкана, конок үйү, боз үй (боз үй лагерлери), курорт.

3. Мейманкана кызматтарын көрсөтүү боюнча иш бир нече юридикалык жактар (чет өлкөлүк юридикалык жактын филиалдары) жана (же) жеке ишкерлер тарабынан менчик, ижара укугунда же башка мыйзамдуу негизде аталган жактарга таандык бир нече мейманкана жайгашкан бир имаратта (корпуста, курулмада) же имараттын (корпустун, курулманын) бөлүгүндө жүргүзүлгөн учурларды кошпогондо, жайгаштыруу каражаттарын классификациялоо өзүнчө номерлерге, имараттын (корпустун, курулманын) кабаттарына же имараттын (корпустун, курулманын) бөлүгүнө карата жүргүзүлбөйт.

4. Бул Жободо төмөнкүдөй негизги түшүнүктөр колдонулат:

жайгаштыруу каражаты - жеке жактардын убактылуу жайгашуусу жана жашоосу үчүн арналган бир же бир нече турак бөлмөлөрү, ошондой эле жабдуулары жана башка мүлкү бар имараттан же анын бөлүгүнөн, жайлардан турган мүлктүк комплекс;

жайгаштыруу каражаттарын классификациялоо боюнча катчылык - ушул Жобонун 13-пунктунда каралган функцияларды аткаруу үчүн ыйгарым укуктарга ээ болгон Кыргыз Республикасында туризмди өнүктүрүүнү колдоо максатында түзүлгөн жүз пайыз мамлекеттин катышуусу менен акционердик коом;

жайгаштыруу каражаттарын классификациялоо - жайгаштыруу каражаттарын жана жеке жактардын убактылуу жайгашуусу жана убактылуу жашоосун камсыз кылуу боюнча кызмат көрсөтүүлөрдү баалоонун негизинде ушул Жобого ылайык тиешелүү категорияны ыйгаруу талабы менен мейманканаларды, конок үйлөрүн, боз үйлөрдү (боз үй лагерлерин) жана курортторду аныкталган категорияларга киргизүү;

мейманкана - мейманкана кызматтары көрсөтүлүүчү жана ушул Жободо каралган мейманканалардын түрлөрүнүн бирине кирген жайгаштыруу каражаты;

конок үйү - жеке менчик үй ээлиги болуп саналган жана бүтүндөй же бөлмөлөрүн жашоого берген, ошондой эле конок үйүнүн ээси тарабынан аныкталуучу башка кызматтарды көрсөткөн жайгаштыруу каражаты. Ээси жана/же анын үй-бүлөсү ошол эле үйдө, конокторго убактылуу жашоо үчүн берилген номерлерден өзүнчө бөлмөдө(лөрдө) же кабатта жашашы мүмкүн;

боз үй (боз үй лагери) - калктуу конуштарда, ошондой эле анын чегинен сыртта жайгашуусу мүмкүн болгон жайгаштыруу каражаты, анда убактылуу жашоо үчүн кызмат көрсөтүүлөр жана боз үйдүн ээси тарабынан аныкталуучу башка кызматтар көрсөтүлүшү мүмкүн;

курорттор - убактылуу жашоо үчүн кызмат көрсөтүүлөрдөн тышкары, ден соолукту чыңдоо мүнөзүндөгү, анын ичинде дарылык жаратылыш ресурстарын пайдалануу менен кошумча кызматтардын комплексин көрсөткөн дарылоо-ден соолукту чыңдоочу жерлерде жайгашкан жайгаштыруу каражаты;

жайгаштыруу каражаттарынын категориясы - аныкталган түрдөгү жана категориядагы жайгаштыруу каражаттары үчүн ушул Жободо каралган талаптардын деңгээлине жайгаштыруу каражаттарынын жана алардагы убактылуу жашоо боюнча кызмат көрсөтүүлөрүнүн шайкештигин аныктоочу көрсөткүч;

өтүнмө ээси - жеке жактардын убактылуу жайгашуусу жана убактылуу жашап туруусун камсыз кылуу боюнча кызмат көрсөтүүчү ишкердикти жүзөгө ашырган жана адистештирилген онлайн-платформада же анын мобилдик тиркемесинде жайгаштыруу каражаттарын классификациялоого өтүнмө берген юридикалык жак, юридикалык жактын филиалы же өкүлчүлүгү же жеке ишкер;

классификациялоо боюнча эксперт - туризм чөйрөсүндөгү ыйгарым укуктуу мамлекеттик орган тарабынан аныкталган тартипте берилген эксперттик баалоо жүргүзүүгө квалификациялык сертификаты бар жана катчылык менен түзүлгөн жарандык-укуктук келишимдин негизинде жайгаштыруу объекттерин классификациялоо боюнча кесиптик ишти жүзөгө ашыруучу, баалоонун жыйынтыгына кызыкдар болбогон жак;

эксперттик баалоо - жайгаштыруу каражаттарынын ушул Жободо белгиленген талаптарга шайкештигин аныктоо процесси, ал классификациялоо боюнча эксперт тарабынан жүргүзүлөт жана категория ыйгаруу жөнүндө чечим кабыл алуу үчүн негиз болуп эсептелген белгиленген формада баалоо актысын түзүү менен аяктайт.

5. Жайгаштыруу каражаттары (мейманканалар, конок үйлөрү, боз үйлөр (боз үй лагерлери жана курорттор) Кыргыз Республикасынын Өкмөтүнүн 2016-жылдын 11-апрелиндеги № 201 "Коомдук саламаттык сактоо жаатындагы актыларды бекитүү жөнүндө" токтому менен бекитилген "Калктын эс алуу жана ден соолугун чыңдоо уюмдарына карата санитардык-эпидемиологиялык талаптар" санитардык-эпидемиологиялык эрежелерине жана ченемдерине (23-тиркеме), ошондой эле "Аквапарктарды жана бассейндерди, мончолорду, ден соолукту чыңдоочу мончо комплекстерин жана сауналарды, кир жуугуч жайларды жана мончо-кир жуугуч комбинаттарды, химиялык тазалоо жайларын, мейманканаларды, жатаканаларды, көрүстөндөрдү жана сөөк коюу объекттерин жайгаштырууга, жабдууга, иштетүүгө жана алардын түзүлүшүнө карата санитардык-эпидемиологиялык талаптар" санитардык-эпидемиологиялык эрежелерине жана ченемдерине (22-тиркеме) шайкеш келиши керек.

6. Жайгаштыруу каражаттарын классификациялоо ушул Жобого ылайык жайгаштыруу каражаттарына өтүнмө боюнча ыктыярдуу негизде жүргүзүлөт.

7. Жайгаштыруу каражаттарын классификациялоо системасынын негизги максаттары төмөнкүлөр болуп саналат:

1) керектөөчүнү жайгаштыруу каражаттарынын ушул Жободо каралган категорияларга шайкештиги жөнүндө зарыл жана так маалымат менен камсыз кылуу;

2) эл аралык жана заманбап тейлөө ченемдерин сактоону жана жайгаштыруу каражаттарында кызмат көрсөтүүнүн сапатынын туруктуулугун камсыз кылуу;

3) жайгаштыруу каражаттарын кызмат көрсөтүүнүн ассортиментине жана сапатына жараша дифференциациялоо;

4) жайгаштыруу каражаттарынын жана жалпысынан өлкөнүн туристтик тармагынын атаандаштыкка жөндөмдүүлүгүн жогорулатуу;

5) жайгаштыруу каражаттары тарабынан көрсөтүлүүчү кызматтардын сапатын баалоонун объективдүүлүгүнө карата керектөөчүлөрдүн ишенимин бекемдөөнүн эсебинен туристтик агымдын жана ички туризмден түшкөн кирешелердин көбөйүшүнө көмөк көрсөтүү.

8. Жайгаштыруу каражаттарын классификациялоо максаттары үчүн классификацияланат:

1) мейманканалар жана курорттор - жылдыз системасы боюнча, анда 5 категория каралган: "беш жылдыз", "төрт жылдыз", "үч жылдыз", "эки жылдыз", "бир жылдыз". Эң жогорку категория - "беш жылдыз" категориясы, эң төмөнкүсү - "бир жылдыз";

2) конок үйлөрү - эдельвейс системасы боюнча, анда 4 категория каралган: "төрт эдельвейс", "үч эдельвейс", "эки эдельвейс" жана "бир эдельвейс". Эң жогорку категория - "төрт эдельвейс", эң төмөнкүсү - "бир эдельвейс";

3) боз үйлөр (боз үй лагерлери) - түндүктөр системасы боюнча, анда 4 категория каралган: "төрт түндүк", "үч түндүк", "эки түндүк" жана "бир түндүк". Жогорку категория - "төрт түндүк", эң төмөнкүсү - "бир түндүк".

9. Бул Жобо менен номерлердин төмөнкү категориялары белгиленет:

1) стандарттык номери;

2) люкс (сьют);

3) жарымлюкс (джуниорсьют);

4) апартаменттер;

5) студия;

6) президенттик люкс (VIP).

10. Жайгаштыруу каражаттарына аларды классификациялоо үчүн талаптар ушул Жобонун 1-тиркемесинде каралган жайгаштыруу каражаттарын классификациялоо боюнча Жалпы талаптарда белгиленет.

11. Жайгаштыруу каражаттарын классификациялоо боюнча талаптар, катышуучулар жана классификациялоонун натыйжалары жөнүндө маалымат ачык болуп саналат жана адистештирилген онлайн-платформада жана анын мобилдик тиркемесинде жайгаштырылат.

2-глава. Жайгаштыруу каражаттарын классификациялоонун катышуучулары жана алардын функциялары

12. Жайгаштыруу каражаттарын классификациялоонун катышуучулары болуп төмөнкүлөр саналат:

1) туризм чөйрөсүндөгү ыйгарым укуктуу мамлекеттик орган;

2) жайгаштыруу каражаттарын классификациялоо боюнча катчылык;

3) классификациялоо боюнча эксперт;

4) апелляциялар боюнча комиссия;

5) жайгаштыруу каражаттарын классификациялоого өтүнмө берүүчү.

13. Ыйгарым укуктуу мамлекеттик орган:

1) жайгаштыруу каражаттарын классификациялоо үчүн жоопкерчилик тартат;

2) жайгаштыруу каражаттарын классификациялоо боюнча катчылык менен өз ара аракеттенет, анын ишин координациялайт жана ушул Жобого ылайык функциялардын аткарылышын контролдойт;

3) апелляциялар боюнча комиссияны түзөт жана ишин уюштурат;

4) жайгаштыруу каражаттарын классификациялоо боюнча катчылыктын сунушунун негизинде жайгаштыруу каражатына аныкталган категорияны ыйгарат же ушул Жободо каралган учурларда жайгаштыруу каражатына категория ыйгаруудан баш тартат;

5) жайгаштыруу каражаттарына ушул Жобонун 2-тиркемесине ылайык форма боюнча жайгаштыруу каражатынын категориясын ырастоочу күбөлүк (мындан ары - күбөлүк) берет, берилген күбөлүктөрдү эсепке алат;

6) өзүнүн расмий сайтына жайгаштыруу каражаттарын классификациялоо менен байланышкан иш жөнүндө маалыматты жайгаштырат, адистештирилген онлайн-платформанын жана ага мобилдик тиркеменин иштешин камсыз кылат, ошондой эле жайгаштыруу каражаттарын классификациялоо боюнча катчылык менен бирдикте аларды тейлөө боюнча чыгымдарды тартат;

7) жайгаштыруу каражаттарын классификациялоо реестрин жүргүзүү тартибин аныктайт жана адистештирилген онлайн-платформада жана ага мобилдик тиркемеде аны жүргүзүүнү камсыз кылат;

8) жайгаштыруу каражаттарын классификациялоо үчүн төлөмдү эсептөө тартибин жана өлчөмүн макулдашат;

9) жайгаштыруу каражаттарын классификациялоо боюнча катчылыктын сунуштарынын негизинде классификациялоо боюнча эксперттерге квалификациялык талаптарды бекитет;

10) ушул Жобого ылайык классификациялоо боюнча эксперттердин эксперттик баалоо жүргүзүү укугун ырастоочу квалификациялык сертификаттарды берүү тартибин аныктайт.

14. Жайгаштыруу каражаттарын классификациялоо боюнча катчылык:

1) жайгаштыруу каражаттарына өтүнмөлөрдү адистештирилген онлайн-платформа же ага мобилдик тиркеме аркылуу кабыл алат, аларды даярдоо бюджеттен тышкаркы каражаттардын, анын ичинде жайгаштыруу каражаттарын классификациялоо боюнча катчылыктын каражаттарынын жана Кыргыз Республикасынын мыйзамдарында тыюу салынбаган башка булактардын эсебинен каржыланат;

2) жайгаштыруу каражаттарын классификациялоо боюнча ишти уюштурат жана анын жыйынтыгы боюнча ыйгарым укуктуу органга ушул Жободо каралган жайгаштыруу каражатына билдирилген же башка категорияны ыйгаруу жөнүндө же жайгаштыруу каражатына категорияны ыйгаруудан баш тартуу жөнүндө сунуш киргизет;

3) адистештирилген онлайн-платформанын жана ага мобилдик тиркеменин талаптагыдай иштешин камсыз кылат, ыйгарым укуктуу мамлекеттик орган менен бирдикте аларды тейлөө боюнча чыгымдарды тартат;

4) ыйгарым укуктуу орган менен макулдашуу боюнча баалоонун татаалдык даражасын эске алуу менен жайгаштыруу каражаттарын классификациялоо үчүн төлөмдү эсептөө тартибин жана өлчөмүн бекитет;

5) конкурстук тандоону жүзөгө ашырат жана жайгаштыруу каражаттарын классификациялоо боюнча эксперттердин базасын түзөт, ошондой эле алардын потенциалын жогорулатууну камсыз кылат;

6) кызматтарды көрсөтүүгө классификациялоо боюнча эксперт менен келишим түзөт жана анын кызмат көрсөтүүлөрүнө акы төлөйт;

7) жайгаштыруу каражаттарын классификациялоону жүргүзүүгө арыз ээси менен келишим түзөт;

8) эксперттин көз карандысыздык принцибинин сакталышын камсыз кылуу менен жайгаштыруу объектилеринин классификациясына эксперттик баалоону уюштурат жана аны контролдойт;

9) жайгаштыруу каражаттарын классификациялоо системасы жөнүндө маалыматтык кампания жүргүзөт жана башка жол менен кызыкдар жактарга маалымдайт;

10) күбөлүктөрдүн бланктарын даярдоону уюштурат жана алардын эсебин жүргүзөт;

11) жайгаштыруу каражаттарын классификациялоо системасы боюнча маалыматтарды чогултууну жана талдоону жүзөгө ашырат, аны өркүндөтүү боюнча сунуштарды ыйгарым укуктуу мамлекеттик органга киргизет;

12) ушул Жобого ылайык апелляциялар боюнча комиссия менен өз ара аракеттенет;

13) апелляциялар боюнча комиссиянын тапшырмасы боюнча классификациянын жыйынтыктарына эксперттик текшерүү жүргүзүүнү уюштурат;

14) классификациялоо боюнча эксперттерге квалификациялык талаптарды иштеп чыгат жана ыйгарым укуктуу органга бекитүүгө киргизет;

15) ыйгарым укуктуу орган тарабынан белгиленген тартипте классификациялоо боюнча эксперттерди даярдоону жана алардын эксперттик баалоо жүргүзүү укугун ырастоочу квалификациялык сертификаттарды берүүнү уюштурат;

16) ушул Жободо каралган башка ыйгарым укуктарды жүзөгө ашырат.

15. Классификациялоо боюнча эксперт:

1) жайгаштыруу каражаттарын классификациялоо боюнча катчылык менен жарандык-укуктук келишимдин негизинде ыйгарым укуктуу орган тарабынан берилген квалификациялык сертификатка ылайык эксперттик баалоо жүргүзөт;

2) жайгаштыруу каражаттарына чыгат жана жайгаштыруу каражаттарынын классификациясына эксперттик баалоо жүргүзөт, жайгаштыруу каражаттарынын ушул Жободо белгиленген талаптарга шайкештиги же шайкеш эместиги жөнүндө тыянактар менен баалоо актысын түзөт;

3) эксперттик баалоонун жыйынтыктарын адистештирилген онлайн-платформада жана ага мобилдик тиркемеде жайгаштырат;

4) алынган маалыматтардын купуялуулугун камсыз кылат жана эксперттик баалоонун жүрүшүндө белгилүү болгон маалыматтарды ачыкка чыгарууга укугу жок;

5) эксперттик баалоо жүргүзүүдө кызыкдар тараптардын таасирине жол бербөөгө тийиш жана көз карандысыздык жана калыстык принциптерин сактоого, ошондой эле кызыкчылыктардын потенциалдуу кагылышуусу болгон учурда баалоого катышпоого милдеттүү.

16. Апелляциялар боюнча комиссия жайгаштыруу каражаттарын классификациялоонун жыйынтыгы боюнча классификациялоонун катышуучуларынын талаш маселелерин карайт.

Апелляциялар боюнча комиссия туристтик индустрия уюмдарынын жана туризм чөйрөсүндө иш жүргүзгөн башка уюмдардын өкүлдөрүн тартуу менен ыйгарым укуктуу мамлекеттик орган тарабынан түзүлөт. Апелляциялар боюнча комиссия зарылдыгына жараша чогулат. Классификация менен байланышкан маселелер боюнча апелляциялар ушул Жободо белгиленген тартипте каралат. Апелляциялар боюнча комиссиянын чечими жайгаштыруу каражаттарын классификациялоонун бардык катышуучуларынын аткаруусу үчүн милдеттүү болуп саналат.

17. Өтүнмө ээси:

1) адистештирилген онлайн-платформа же ага мобилдик тиркеме аркылуу жайгаштыруу каражаттарын классификациялоо боюнча талаптар менен таанышууга жана жайгаштыруу каражаттарынын шайкештигин баалоодон өз алдынча өтүүгө укуктуу;

2) адистештирилген онлайн-платформа же ага мобилдик тиркеме аркылуу жайгаштыруу каражаттарын классификациялоого өтүнмөнү жөнөтөт;

3) жайгаштыруу каражаттарын классификациялоо боюнча катчылыктын кызмат көрсөтүүлөрүнүн наркын, ошондой эле апелляция берилген учурда апелляция боюнча комиссияга - анын апелляциясын кароо менен байланышкан чыгымдарды төлөйт;

4) күбөлүк алгандан кийин категория белгисин колдонуу, ошондой эле ыйгарылган категорияны документтерди тариздөөдө жана жарнамалык максаттарда пайдалануу укугуна ээ болот;

5) күбөлүктү колдонуунун бүткүл мөөнөтүнө жайгаштыруу каражаттарынын ушул Жободо белгиленген, ыйгарылган категориянын талаптарына ылайык келишин камсыз кылат;

6) жайгаштыруу каражаттарын классификациялоо боюнча катчылыкка ыйгарылган категориянын талаптарына шайкеш келүүсүнө таасир этүүчү бардык өзгөртүүлөр жөнүндө маалымдайт;

7) классификациялоо боюнча эксперттерге жана апелляциялар боюнча комиссиянын мүчөлөрүнө жайгаштыруу каражатынын ушул Жобого ылайык ыйгарылган категориянын талаптарына шайкештигин текшерүү жүргүзүү мүмкүнчүлүгүн берет;

8) күбөлүктү колдонуу мезгилинде мейманкана кызматтарын көрсөтүү боюнча ишти токтотуу жөнүндө, ошондой эле жеке ишкер катары ишти токтотуу жөнүндө же болбосо юридикалык жакты, филиалдарды же өкүлчүлүктөрдү жана жеке ишкерлерди мамлекеттик каттоо жөнүндө мыйзамдарга ылайык юридикалык жакты, юридикалык жактын филиалын же өкүлчүлүгүн жоюу жөнүндө ыйгарым укуктуу мамлекеттик органга маалымдайт.

3-глава. Жайгаштыруу каражаттарын классификациялоо тартиби

18. Өтүнмө ээси адистештирилген онлайн-платформа же ага мобилдик тиркеме аркылуу жайгаштыруу каражатынын тийиштүү категориясы боюнча зарыл болгон белгини алуу үчүн белгиленген критерийлери бар анкетаны толтурат. Жайгаштыруу каражаттарын классификациялоо системасы өтүнмө ээсинин толтурулган анкетасы боюнча жайгаштыруу каражаттарын классификациялоонун жыйынтыгын автоматтык түрдө чыгарат.

Жайгаштыруу каражаттарын классификациялоодо оң натыйжа болгон учурда, өтүнмө ээси адистештирилген онлайн-платформа же ага мобилдик тиркеме аркылуу классификациялоо жүргүзүүгө өтүнмө (мындан ары - өтүнмө) берет, анда: өтүнмө ээсинин толук аталышы (фамилиясы, аты, атасынын аты), жайгаштыруу каражатынын түрү жана аталышы, өтүнмө ээсинин өкүлүнүн фамилиясы, аты жана атасынын аты, өтүнмө ээсинин байланыш маалыматтары (электрондук почтасы жана телефон номери) көрсөтүлөт жана жайгаштыруу каражатын классификациялоону жүргүзүүгө келишим түзөт.

Жайгаштыруу каражаттарын классификациялоонун натыйжасы терс болгон учурда, өтүнмө ээси ал терс натыйжа алган тиешелүү категория боюнча классификациялоону жүргүзүүгө өтүнмө берүүгө укугу жок.

19. Өтүнмөгө төмөнкүлөр тиркелет:

1) юридикалык жакты, филиалды же өкүлчүлүктү мамлекеттик каттоо (кайра каттоо) жөнүндө күбөлүктүн көчүрмөсү же болбосо жеке жакты жеке ишкер катары мамлекеттик каттоо жөнүндө күбөлүктүн көчүрмөсү;

2) юридикалык жактын, филиалдын же өкүлчүлүктүн жетекчисинин же башка өкүлүнүн ким экендигин күбөлөндүргөн документтин көчүрмөсү же жеке ишкердин паспортунун көчүрмөсү;

3) юридикалык жактын, филиалдын же өкүлчүлүктүн же жеке ишкердин жетекчисинин же башка өкүлүнүн анын өздүк маалыматтарын иштеп чыгууга байланышкан жол-жоболорду жүзөгө ашырууга макулдугу;

4) жайгаштыруу каражаттарын классификациялоону жүргүзүүгө өтүнмө ээсинин өкүлүнө ыйгарым укук берген ишеним каттын көчүрмөсү;

5) жайгаштыруу каражаттарын классификациялоону жүргүзүү үчүн тиешелүү акы төлөнгөндүгүн ырастоочу документтин көчүрмөсү;

6) мейманкана кызмат көрсөтүүлөрүнө ыктыярдуу шайкештик сертификатынын көчүрмөсү (жашоо коопсуздугу жана тейлөө сапаты).

20. Жайгаштыруу каражаттарын классификациялоо боюнча катчылык өтүнмө ээси берген документтердин сакталышын камсыз кылуу, ошондой эле жайгаштыруу каражаттарын классификациялоону ишке ашырууга байланыштуу ошол уюмга белгилүү болгон купуя маалыматты ачыкка чыгарбоо боюнча чараларды көрөт.

21. Жайгаштыруу каражаттарын классификациялоо боюнча катчылык өтүнмө жана ага тиркелген, ушул Жобонун 15-пунктунда каралган документтер келип түшкөн күндөн тартып 3 (үч) жумуш күндүн ичинде өтүнмөнү аткарууга классификациялоо боюнча экспертке жөнөтөт, ал адистештирилген онлайн-платформадагы классификациялоо боюнча эксперттердин базасынан жайгаштыруу каражаттарын классификациялоо системасы менен тандалып алынат, жайгаштыруу каражаттарына эксперттик баалоо жүргүзүү мөөнөттөрүн белгилейт, алар жөнүндө өтүнмө ээсине жана классификациялоо боюнча экспертке кабарлайт же жайгаштыруу каражаттарын классификациялоодон жүйөлөштүрүлгөн баш тартууну чыгарат.

22. Жайгаштыруу каражаттарын классификациялоо боюнча катчылык өтүнмө ээсине төмөнкү негиздер боюнча жайгаштыруу каражаттарын классификациялоо жүргүзүүдөн баш тартат:

1) ушул Жобонун 18-пунктунда каралган маалыматтар жана документтер берилбегенде;

2) өтүнмө ээси берген документтерде анык эмес маалыматтар болгондо.

23. Классификациялоо боюнча эксперт анкетаны толтуруунун жыйынтыгы боюнча өтүнмө ээси алган классификациянын жыйынтыктарына алардын аныктыгына жана ушул Жободо белгиленген талаптарга шайкеш келүүсүнө карата көчмө эксперттик баалоо жүргүзөт.

24. Эксперттик баалоо өтүнмө ээсинин ыйгарым укуктуу өкүлүнүн катышуусунда жүргүзүлөт. Өтүнмө ээсинин өкүлү экспертке жайгаштыруу объектине кирүү жана зарыл болгон документтерди алуу мүмкүнчүлүгүн камсыздоого милдеттүү.

25. Эксперттик баалоо жайгаштыруу каражаттарын классификациялоо боюнча катчылык тарабынан белгиленген мөөнөттө жүргүзүлөт жана 10 (он) жумуш күндөн ашпайт. Мөөнөтүн эсептөө жайгаштыруу объектин кароо учурунан тартып башталат.

Өзгөчө учурларда эксперттик баалоону жүргүзүү мөөнөтү классификациялоо боюнча эксперттин жүйөлүү өтүнүчүнүн негизинде жайгаштыруу каражаттарын классификациялоо боюнча катчылыктын чечими менен 5 (беш) жумуш күндөн ашпаган мөөнөткө узартылышы мүмкүн.

Мындай учурларга төмөнкүлөр кирет:

1) өтүнмө ээсинин кошумча документтерди же маалыматтарды берүү зарылдыгы;

2) объектти кароодо тоскоолдуктар;

3) форс-мажордук жагдайлар.

26. Оңдоо же реконструкциялоо процессинде турган, ошондой эле эксплуатациялоодон чыгарылган мейманкана бөлмөлөрү эксперттик баалоого жатпайт. Мындай номерлерди эксперттик баалоо жана аларга категорияларды ыйгаруу алар эксплуатацияга берилгенден кийин жүргүзүлөт.

27. Жайгаштыруу каражаттарын эксперттик баалоо жайгаштыруу каражаттарын классификациялоо боюнча жалпы талаптарда каралган баллдык система боюнча жүргүзүлөт.

28. Эгерде баллдын суммалык саны боюнча жайгаштыруу каражаты эксперттик баалоонун натыйжалары боюнча белгиленген категорияга ылайык келбесе, төмөнкү чечимдердин бири кабыл алынат:

1) эгерде баллдын суммалык саны жайгаштыруу каражатынын ушул категориясы үчүн белгиленген маанилерден төмөн болсо, мындай жайгаштыруу каражаттарына кыйла төмөнкү категория ыйгарылат;

2) эгерде баллдын суммалык саны жайгаштыруу каражатынын ушул категориясы үчүн белгиленген мааниден жогору болсо, мындай жайгаштыруу каражатына билдирилген категория же өтүнмө ээси менен макулдашуу боюнча - эксперттик баалоонун натыйжалары боюнча белгиленген категорияга ылайык келген категория ыйгарылат.

29. Классификациялоо боюнча эксперт эксперттик баалоонун жыйынтыгы боюнча жайгаштыруу каражатынын тийиштүү категориясы үчүн ушул Жободо белгиленген талаптарга шайкештиги же шайкеш эместиги жөнүндө тыянактары менен баалоо актысын түзөт жана аны адистештирилген онлайн-платформага жайгаштырат.

30. Жайгаштыруу каражаттарын классификациялоо боюнча катчылык өтүнмө ээси берген маалыматтарды жана документтерди талдоонун жана баалоо актысында белгиленген эксперттик баалоонун натыйжаларынын негизинде, эксперттик баалоо аяктаган күндөн тартып 3 (үч) жумуш күндүн ичинде адистештирилген онлайн-платформа аркылуу ыйгарым укуктуу мамлекеттик органга жайгаштыруу каражатына ушул Жободо каралган билдирилген категорияны же башка категорияны ыйгаруу жөнүндө же жайгаштыруу каражатына категорияны ыйгаруудан баш тартуу жөнүндө мындай баш тартуунун себептерин көрсөтүү менен сунуш киргизет.

31. Ыйгарым укуктуу мамлекеттик орган жайгаштыруу каражаттарын классификациялоо боюнча катчылыктын сунушун алган күндөн тартып 2 (эки) жумуш күндүн ичинде, жайгаштыруу каражатына электрондук түрдөгү күбөлүктү автоматтык түрдө генерациялоочу онлайн-платформада ушул Жободо каралган билдирилген же башка категорияны ыйгаруу жөнүндө чечим кабыл алат, аны өтүнмө ээсине жөнөтөт жана квалификацияланган жайгаштыруу каражаттарынын маалыматтарын классификацияланган жайгаштыруу каражаттарынын реестрине киргизет.

32. Жайгаштыруу каражаттарын классификациялоо боюнча катчылык өтүнмө ээсинин суроо-талабы боюнча жайгаштыруу каражатына белгилүү категорияны ыйгаруу жөнүндө чечим кабыл алынган күндөн тартып 5 (беш) жумуш күндүн ичинде кагаз жүзүндөгү күбөлүктү тариздейт жана өтүнмө ээсине жиберет. Күбөлүктүн бланктары катуу эсепке алынууга тийиш жана жайгаштыруу каражаттарын классификациялоо боюнча катчылыкта сакталат.

33. Жайгаштыруу каражатынын шайкештигин баалоо актысында ушул Жободо белгиленген талаптар ырасталбаган учурда ыйгарым укуктуу мамлекеттик орган жайгаштыруу каражаттарын классификациялоо боюнча катчылыктын сунушунун негизинде мындай чечимди кабыл алуунун себептерин көрсөтүү менен жайгаштыруу каражатына тиешелүү категорияны ыйгаруудан баш тартат.

34. Жайгаштыруу каражатына билдирилген же башка категорияны ыйгаруу жөнүндө же жайгаштыруу каражатына категорияны ыйгаруудан баш тартуу жөнүндө чечимдин көчүрмөсү ал кабыл алынган күндөн тартып 2 (эки) жумуш күндүн ичинде өтүнмө ээсине жиберилет.

35. Күбөлүк жайгаштыруу каражатына белгилүү бир категорияны ыйгаруу жөнүндө чечим кабыл алынган күндөн тартып 3 (үч) жыл жарактуу болот.

36. Жайгаштыруу каражаттарынын жана анда көрсөтүлүүчү кызматтардын ушул Жобонун талаптарына шайкештигин аныктоочу категорияны алгандан кийин көрсөткүчтөр начарлаган учурда туризм боюнча ыйгарым укуктуу орган даттануулардын жана билдирүүлөрдүн негизинде текшерүүнү демилгелөөгө укуктуу. Шайкеш эместиги ырасталганда категория күбөлүктүн колдонуу мөөнөтү аяктаганга чейин чакыртып алынышы мүмкүн.

37. Күбөлүктүн колдонуу мөөнөтү аяктагандан кийин жайгаштыруу каражатын классификациялоо ушул Жободо белгиленген тартипте жүргүзүлөт.

38. Жайгаштыруу каражатын классификациялоо үчүн өтүнмө ээсинен алынган баалоо актысы, күбөлүктүн көчүрмөсү, арыз жана башка документтер жана жамааттык жайгаштыруу каражатын классификациялоо жөнүндө келишимдин көчүрмөсү жайгаштыруу каражаттарын классификациялоо боюнча катчылыкта жана өтүнмө ээсинде жайгаштыруу каражатына категорияны ыйгаруу жөнүндө чечим кабыл алынган күндөн тартып 5 (беш) жыл бою сакталат.

4-глава. Аппеляцияларды кароо

39. Өтүнмө ээси жайгаштыруу каражаттарын классификациялоонун натыйжаларын апелляция боюнча комиссияга ыйгарым укуктуу мамлекеттик органдын чечиминин көчүрмөсүн алган күндөн тартып 14 календардык күндүн ичинде даттанууга укуктуу.

40. Апелляциялар боюнча комиссия жазуу жүзүндө берилген апелляцияны ал келип түшкөн күндөн тартып 30 (отуз) календардык күндүн ичинде карайт.

41. Зарыл болгон учурда апелляциялар боюнча комиссия классификациянын катышуучуларынан ушул Жободо белгиленген талаптардын чегинде кошумча материалдарды сурап, жайгаштыруу каражатына эксперттик баалоону кайталап жүргүзүүнү дайындай алат. Мындай учурда апелляцияны кароо мөөнөтү апелляциялар боюнча комиссия тарабынан суралган документтерди алуу жана аларды иликтөө, кошумча эксперттик баалоо жүргүзүү үчүн зарыл болгон, бирок 30 (отуз) календардык күндөн ашпаган мөөнөткө узартылышы мүмкүн.

42. Кайталанган эксперттик баалоо жайгаштыруу каражатын классификациялоо боюнча катчылыктын классификациялоо боюнча эксперттердин базасында турган, өтүнмө ээсинин жайгаштыруу каражаттарына эксперттик баалоо жүргүзүүгө катышпаган классификация боюнча эксперттерди тартуу менен жүргүзүлөт.

43. Өтүнмө ээси анын даттануусун кароодо апелляциялар боюнча комиссиянын отурумуна катышууга укуктуу.

44. Жайгаштыруу каражатынын ушул Жободо белгиленген талаптарга шайкештиги ырасталган учурда апелляциялар боюнча комиссия даттанууну канааттандыруу жөнүндө чечим кабыл алат жана ыйгарым укуктуу мамлекеттик органга баш тартуу жөнүндө чечимди жокко чыгаруу жана жайгаштыруу каражатына ушул Жободо каралган билдирилген же башка категорияны ыйгаруу жөнүндө сунуш киргизет.

45. Жайгаштыруу каражаты ушул Жободо белгиленген талаптарга шайкеш келбегендиги ырасталган учурда апелляциялар боюнча комиссия даттанууну канааттандыруудан баш тартуу жөнүндө чечим кабыл алат.

46. Апелляциялар боюнча комиссия өтүнмө ээсине жана жайгаштыруу каражаттарын классификациялоо боюнча катчылыкка апелляцияны кароонун натыйжалары жөнүндө адистештирилген онлайн-платформа аркылуу, ошондой эле өтүнмө ээсинин каалоосу боюнча жазуу жүзүндө билдирет.

47. Ушул Жобонун 43-пунктунда каралган учурларда ыйгарым укуктуу мамлекеттик орган апелляциялар боюнча комиссиянын сунушун алган күндөн тартып 2 (эки) жумуш күндүн ичинде, жайгаштыруу каражатына электрондук түрдөгү күбөлүктү автоматтык түрдө генерациялоочу адистештирилген онлайн-платформада ушул Жободо каралган билдирилген же башка категорияны ыйгаруу жөнүндө чечим кабыл алат, аны өтүнмө ээсине жөнөтөт жана квалификацияланган жайгаштыруу каражаттарынын маалыматтарын классификацияланган жайгаштыруу каражаттарынын реестрине киргизет.

48. Апелляциялар боюнча комиссиянын даттанууларды кароосу менен байланышкан чыгымдарды өтүнмө ээси тартат. Бул чыгымдардын өлчөмү ыйгарым укуктуу мамлекеттик орган тарабынан белгиленген тартипте апелляцияны кароо үчүн зарыл болгон жайгаштыруу каражаттарын классификациялоо боюнча катчылык иш жүзүндө тарткан чыгымдарга жараша аныкталат.

49. Апелляциялар боюнча комиссиянын чечими административдик иштин негиздери жана административдик жол-жоболор жөнүндө мыйзамдарда каралган тартипте даттанылышы мүмкүн.

50. Жайгаштыруу каражаттарын классификациялоо процессинде пайдаланылуучу күбөлүктөр жана башка документтер мамлекеттик жана расмий тилдерде таризделет.

6-глава. Жайгаштыруу каражатынын категориясынын белгисин колдонуу

51. Ушул Жободо каралган категория ыйгарылган жайгаштыруу каражаттары аларга ыйгарылган категория жөнүндө белгини колдонууга укуктуу.

52. Жайгаштыруу каражатынын категориясынын белгисин колдонуу укугу күбөлүктүн колдонуу мөөнөтүнө белгиленет.

53. Ушул Жободо белгиленген тартипте жайгаштыруу каражаттарын классификациялоодон өтпөстөн ушул Жободо каралган категориянын белгисин колдонууга жол берилбейт.

7-глава. Классификациядан өтүүгө даярдануу

54. Жайгаштыруу каражаттарын классификациялоо боюнча катчылык классификациялоодон өтүүгө даярдоо, анын ичинде аныкталган шайкешсиздикти жоюу боюнча талаптардын жана сунуштардын ылайык келишин талдоо үчүн консультациялык кызматтарды көрсөтүүгө укуктуу.

55. Консультациялык кызмат көрсөтүүлөр өтүнмө ээсинин жазуу жүзүндөгү суроо-талабынын негизинде, кызмат көрсөтүүнүн шарттарын, наркын жана мөөнөттөрүн аныктоочу тиешелүү келишимди тариздөө менен көрсөтүлөт.

56. Даярдоо боюнча кызмат көрсөтүүлөр эксперттик баалоону алмаштырбайт жана белгилүү бир категорияны ыйгарууга кепилдик бербейт. Категорияны ыйгаруу жөнүндө чечим ушул Жобого ылайык жүргүзүлгөн расмий эксперттик баалоонун негизинде гана кабыл алынат.

Жайгаштыруу каражаттарына НЕГИЗГИ ТАЛАПТАР

Кыргыз Республикасындагы мейманканаларга категорияларды ыйгаруунун жалпы критерийлери