Кыргыз Республикасынын

Министрлер Кабинетине караштуу

Мамлекеттик салык кызматынын

2026-жылдын 30-июнундагы № П-288

буйругуна ылайык

КҮЧҮН ЖОГОТТУ

Салык кызматынын органдарынын формалык кийимдерин жана айырмалоо белгилерин кийүү эрежелери

1-глава. Жалпы жоболор

1. Бул Эрежелер атайын наамдары бар салык кызматынын органдарынын кызмат адамдарынын кийим кийүү, ошондой эле ыйгарылган атайын наамдарга ылайык айырмалоо белгилерин тагынуу тартибин жана шарттарын аныктайт.

2. Салык кызматынын органдарында иштеген кызматкерлер аларга ыйгарылган атайын наамдарга ылайык салык кызматынын органынын формалык кийимин кийип жүрүүгө укуктуу.

3. Кызматтык мезгилде кызматкерлер ыйгарылган атайын наамга ылайык алар үчүн белгиленген форма кийимин кийип жүрүүгө милдеттүү.

Жетекчиликтин чечими менен адистештирилген бөлүктөрдүн кызматкерлерине формалуу кийим кийүүдөн бошотулуп, кызматтык милдеттерин аткарууга уруксат берилиши мүмкүн.

4. Кийим формасына тагылуучу предметтер жана айырмалоо белгилери белгиленген үлгүлөргө жана сыпаттамаларга толук ылайык келүүгө, ошондой эле кынтыксыз абалда болууга тийиш.

5. Төмөнкүлөрдү кийүүгө тыюу салынат:

– ушул Эрежелерде жана салык кызматынын органдарынын формалык кийимдеринин расмий сыпаттамасында белгиленген талаптарды бузуу менен формалык кийимдерди, айырмалоо белгилерин, сыйлык тилкелерин жана тигиштерди;

– калыбынан кеткен жана булганган погондор менен өңү өчкөн жана үтүктөлбөгөн кийим формаларын;

– өңү өчкөн жана булганган галстукту;

– үстү тытылган, согончогу эскирген же кончу оролгон, ошондой эле кир бут кийимдерди.

6. Салык кызматынын органынын кийим формасы күнүмдүк, жайкы жана кышкы, анын ичинде жазгы-күзгү форма болуп бөлүнөт.

7. Формалык кийимдин бардык элементтери, анын ичинде баш кийим, мээлей, моюн орогуч, сыйлык тилкелери, бут кийим жана погондор ушул Эрежелердин белгиленген үлгүлөрүнө жана көрсөтмөлөрүнө ылайык так колдонулууга тийиш.

2-глава. Күнүмдүк форма кийимдерин кийүү эрежелери

8. Күнүмдүк форма кийимине: шым же юбка менен күнүмдүк китель, жазгы-күзгү күрмө, күрмө, плащ, эркектердин жайкы костюму, айымдардын жайкы костюму, узун жана кыска жеңдүү көйнөк, галстук, галстук-бант, баш кийим (фуражка, кепка, пилотка, берет) кирет.

9. Күнүмдүк китель бардык топчулары топчуланып кийилет.

10. Шым бийик бийик такалуу бут кийимдер менен кийилет, бир аз түшүрүп кийүүгө уруксат берилет.

11. Айымдардын кители бардык топчулары сол жагына топчуланып кийилет. Юбканын этеги тизеден болушу керек.

12. Узун жеңдүү көйнөктөр манжеттери жана бели кошо бардык топчуларга топчуланып, погондору жана галстугу менен тагылат. Айымдар сол жагына жабылган көйнөк кийишет. Жайкы күнүмдүк форманы кийүүдө галстук менен узун жеңдүү көйнөктү кителсиз (костюмсуз) кийүүгө, ал эми имараттын ичинде – жылдын каалаган убагында кийүүгө уруксат берилет.

Кызматтык жайларда күнүмдүк форманы кийүүдө көйнөктүн үстүнкү топчусун ачып коюп, галстуксуз жана кителсиз (костюмсуз) кийүүгө уруксат берилет.

13. Пальто, китель, костюм, куртка жана көйнөктүн чөнтөк жапкычтары сыртка карай түздөлүшү керек.

14. Галстук жана галстук-бант ушул Эрежелерде каралгандан башка учурларда дайыма тагылат.

3-глава. Кышкы форма кийимдерин кийүү эрежелери

15. Кышкы форма кийимдерине төмөнкүлөр кирет: кышкы пальто, эркектердин кышкы күрмөсү, эркектердин кышкы бушлаты, мээлей, моюн орогуч, баш кийим (фуражка, кулакчындуу тумак, бапак).

16. Кышкы пальто бардык топчулары топчуланып кийилет. Жерден пальтонун этегине чейинки аралык: эркектердики – 40 см, айымдардыкы – 38-42 см.

17. Эркектердин кышкы күрмөсүн бардык кнопкалары менен топчуланып, кокетканын деңгээлине чейин сыдырмасы бекитилип кийилет; суук мезгилде үстүнө чейин топчулоого уруксат берилет.

18. Эркектердин кышкы бушлаты сыдырмасы сыдырылып, кокеткага чейинки бардык кнопкалары бекитилип кийилет.

19. Моюн орогуч пальтонун, плащтын, күрмөнүн же жазгы-күзгү күрмөнүн жакасынын астына тыкан салынат. Моюн орогучтун үстүңкү чети жакадан 1-2 см тегиз чыгып турушу керек.

20. Кышкы форма кийимине мээлей кирет.

4-глава. Жайкы форма кийимдерин кийүү эрежелери

21. Жайкы форма кийимдерине төмөнкүлөр кирет: жайкы китель, эркектердин жайкы костюму, айымдардын жайкы костюму, жайкы көйнөк, кыска жеңдүү көйнөк, баш кийим (фуражка, кепка, пилотка, берет).

22. Эркектердин жайкы костюму сыдырмасы сыдырылып, кокеткага чейин темир кнопкасы бекитилет. Алдына шым, бут кийим кийилет.

23. Айымдардын жайкы костюму шымы менен ошол эле эрежелер боюнча кийилет.

24. Жайкы китель күнүмдүк кителдин эрежеси менен кийилет.

25. Кыска жеңдүү көйнөктөр бардык топчулары топчуланып кийилет. Жогорку топчуларын ачып, галстугу жок кийүүгө уруксат берилет.

26. Жайкы көйнөк бардык топчулары топчуланып кийилет. Алды жагында бүктөмөсү бар, белине кур тагылат.

5-глава. Баш кийимдер

26. Баш кийимге төмөнкүлөр кирет: фуражка, кепка, пилотка, берет, кулакчындуу тумак, бапак.

27. Кулакчындуу тумак, бапак, фуражка жана кепка түз кийилет, пилотка жана берет – бир аз оңго кыйшайып кийилет. Фуражканын жана кепканын маңдай кыры каштын деңгээлинде, кулакчындуу тумактын жана бапактын төмөнкү кыры каштын бийиктигинен 2-4 см жогору.

28. Бапакты жогорку курамдагы класстык чендери жана салык кызматынын 1-рангадагы кеңешчиси бар эркектер кийишет.

29. Тиешелүү наамдары бар айымдар боз түстөгү накта каракүлдөн жасалган берет кийишет.

30. Кулакчыны түшүрүлгөн кулакчындуу тумакты төмөн температурада кийүүгө уруксат берилет; өрүмдүн учтары ээктин астына байланат, кулакчын көтөрүлгөндө кулаккаптын астына киргизилет.

31. Улук курамдын адамдарынын фуражкалары алтын түстүү саймалуу, калгандары алтын түстүү кокарда менен кийилет.

6-глава. Бут кийим

32. Бут кийим иштиктүү стилге ылайык келип, катуу, жабык, жылмакай териден же ушул сыяктуу материалдардан жасалышы керек.

33. Классикалык таманы менен кара же кочкул күрөң түстөгү, декоративдик элементтери жок бут кийимдерге уруксат берилет.

34. Эркектер үчүн – үстү жабык же боосу жок, такасы жапыз же такасы жок бут кийим.

35. Айымдар үчүн – жабык типтеги, классикалык же моделдик, такасы ыңгайлуу 5 смден жогору эмес бут кийим.

36. Жылдын суук мезгилинде жылууланып ичтелген кара булгаары өтүк кийүүгө уруксат берилет: эркектер – кончу кыска, айымдар – кончу узун. Бут кийим сыдырма менен жабылышы мүмкүн.

7-глава. Ийинге тагылуучу погондор

37. Погондор кителге, күрмөгө, пальтого, плащка жана сырт көйнөккө кийилет.

38. Тигилме погондор пальтого, плащка, кителге; чечилме погондор – костюмга, көйнөккө, күрмөгө жана сырт көйнөккө тагылат.

39. Погондордогу жылдызчалар аскер кызматчыларыныкына окшош жайгаштырылат.

40. Жогорку наамдагы адамдар үчүн погондордо форманын расмий сыпаттамасына ылайык кошумча декоративдик элементтер болушу мүмкүн.

8-глава. Атайын наамы жок кызматкерлердин формасы

41. Салык кызматынын органдарында иштеген жана атайын наамы жок кызматкерлер классикалык кеңсе кийимдерин кийүүгө милдеттүү.

42. Классикалык кеңсе кийимине төмөнкүлөр кирет:

– эркектер үчүн: көк, кочкул же кара түстөгү 1-4 топчулуу бир түстүү костюм шым же жакети менен; ак, ачык же көгүш түстөгү, узун жана кыска жеңдүү көйнөктөр; галстук; классикалык бут кийим.

– айымдар үчүн: көк, кочкул же кара бир түстөгү юбка костюм, эки же үч бөлүктөн турган костюм; ак, ачык же көк-көгүш түстөгү узун жана кыска жеңдүү көйнөктөр же блузкалар; классикалык бут кийим.

9-глава. Атайын наамы жок кызматкерлердин форма кийүү эрежелери

43. Эркектердин бир топчулуу костюм шымы жалгыз топчуга топчуланып кийилет.

44. Эркектердин эки же андан көп топчулуу костюм шымы бардык топчуга же жогорку топчуга топчуланып кийилет.

45. Эркектердин жилети бар костюм шымы ушундай эле эрежеде кийилет; жилет топчуланган болсо, костюмдун топчуларын топчулабай коюуга уруксат берилет.

46. Айымдардын эки жана үч бөлүктүү костюмдары эркектердики сыяктуу эле эрежеде кийилет. Юбкасы түз болушу керек. Юбканын этеги тизеден жогору болбошу керек.

47. Узун жеңдүү көйнөктөр бардык топчулары топчуланып кийилет. Көйнөктүн жакасы арт жагынан костюмдун жакасынын жогорку чети менен бирдей деңгээлде болушу керек же анын үстүнөн 0,5 смден ашпашы керек.

Узун жеңдүү көйнөктү төмөнкүдөй кийүүгө уруксат берилет:

– абанын температурасы жогору болгон учурда, ал эми имараттын ичинде жылдын каалаган убагында костюмсуз, галстук менен;

– абанын температурасы жогору болгон учурда, ал эми имараттын ичинде жылдын каалаган убагында костюмсуз, жилет менен же ансыз, галстук менен;

– кызматтык жайларда жогорку топчусун чечип, галстуксуз жана костюмсуз жүрүүгө болот.

48. Жай мезгилинде кыска жеңдүү көйнөк кийүүгө уруксат берилет. Кыска жеңдүү көйнөктү төмөнкүдөй кийүүгө болот:

– абанын температурасы жогору болгон учурда, ал эми имараттын ичинде жылдын каалаган убагында костюмсуз, галстук менен;

– абанын температурасы жогору болгон учурда, ал эми имараттын ичинде жылдын каалаган убагында костюмсуз, жилет менен же ансыз, галстук менен;

– кызматтык жайларда жогорку топчусун чечип, галстуксуз жана костюмсуз жүрүүгө болот.

49. Айымдар сол жакты көздөй жабылган көйнөк жана блузка кийишет.

50. Костюмдардын, көйнөктөрдүн жана блузкалардын чөнтөктөрүнүн жапкычтары, эгерде бар болсо, сыртка түздөлүшү керек.

51. Бут кийим кара, кочкул же кочкул күрөң түстө болушу керек; Эркектер үчүн үстү жабык, боолуу же боосу жок бут кийим; айымдар үчүн жабык типтеги, такасы туруктуу, 5 см чейинки бийиктиктеги бут кийим, башы жана согончогу жабык болушу шарт.