Көңүл буруңуздар!

Токтом менен бекитилген ушул Жобо,

расмий жарыяланган күндөн тартып

алты ай өткөндөн кийин күчүнө кирет

Качкындын жол жүрүү документин тариздөөгө,

жекелештирүүгө жана берүүгө документтерди

кабыл алуу тартиби жөнүндө жобо

1-глава. Жалпы жоболор

2-глава. Качкындын жол жүрүү документин тариздөө жана жекелештирүү үчүн зарыл болгон документтердин тизмеги

3-глава. Документтерди кабыл алуу жана тариздөө тартиби

4-глава. Качкындын жол жүрүү документин берүү

5-глава. Качкындын жол жүрүү документин алмаштыруу же жараксыз деп таануу тартиби

6-глава. Качкындын талап кылынбаган, жараксыз жана алынган жол жүрүү документтерин сактоо жана жок кылуу тартиби

1-глава. Жалпы жоболор

1. Жобо Кыргыз Республикасынын аймагында качкын деп таанылган адамга берилүүчү качкындын жол жүрүү документин жекелештирүү, даярдоо, эсепке алуу, берүү, алмаштыруу, алып коюу жана жок кылуу документтерин кабыл алуу жана тариздөө жол-жоболорун аныктайт.

2. Ушул Жободо төмөнкүдөй түшүнүктөр колдонулат:

автоматташтырылган маалыматтык система (мындан ары – АМС) – качкындардын маалыматтарын чогултууга, сактоого, өткөрүп берүүгө жана иштетүүгө байланышкан ишти автоматташтыруу үчүн арналган программалык аппараттык каражаттардын жыйындысы болгон система;

анкета-арыз – электрондук түрдө таризделген, өтүнүч билдирген адамдын жеке маалыматтарын камтыган документ;

аймактык бөлүмдөр – качкындын жол жүрүү документин жекелештирүү үчүн документтерди кабыл алууну, тариздөөнү жүргүзүүчү калкты каттоо чөйрөсүндөгү ыйгарым укуктуу органдын ведомстволук мекемесинин аймактык бөлүмдөрү;

жекелештирүү борбору – жол жүрүү документтерин жекелештирүүнү жүргүзүүчү калкты каттоо чөйрөсүндөгү ыйгарым укуктуу органдын ведомстволук мекемесинин карамагындагы жекелештирүү бөлүмү;

санариптик колтамга (мындан ары – СК) – санариптик формадагы башка маалыматка кошулган жана (же) ага логикалык жактан байланышкан жана санариптик документтин өзгөрбөстүгүн камсыз кылуу жана санариптик документтин авторун аныктоо үчүн колдонулган санариптик формадагы маалымат;

жол жүрүү документи – “Качкындар жөнүндө” Кыргыз Республикасынын Мыйзамына ылайык качкын деп таанылган адамдын Кыргыз Республикасынын чегинен тышкары чыгуусу жана Кыргыз Республикасынын аймагына кирүүсү үчүн арналган белгиленген формадагы документ, ал улуттук паспорттун ордуна адамдын ким экендигин ырастоочу документ катары колдонулушу мүмкүн.

3. Жол жүрүү документи тексттик, машина менен окула турган маалымат менен материалдык алып жүрүүчүдөгү документ түрүндө таризделет.

3.1. Жол жүрүү документи эки жылдык мөөнөткө берилет.

3.2. Качкындын ырастамасынын колдонуу мөөнөтү көрсөтүлгөн жол жүрүү документинин колдонуу мөөнөтүнө узартылат.

3.3. Жол жүрүү документин алмаштыруу качкындын арызынын негизинде, анын колдонуу мөөнөтү аяктаганга чейин үч ай мурда жүргүзүлүшү мүмкүн.

3.4. Кыргыз Республикасынын миграция чөйрөсүндөгү ыйгарым укуктуу мамлекеттик органы тарабынан берилген качкындын колдонуудагы ырастамасы берилгенде жол жүрүү документи жарактуу деп эсептелет.

4. Идентификациялык жеке номеринин болушу жана барган жери боюнча каттоодон өтүү качкындын жол жүрүү документин алуу үчүн милдеттүү шарт болуп саналат.

Өтүнүч билдирген адамда идентификациялык жеке номери (мындан ары – ИЖН) жок болгон учурда калкты каттоо чөйрөсүндөгү ыйгарым укуктуу мамлекеттик органдын аймактык бөлүмү мыйзамдарда белгиленген тартипте ИЖНди түзөт жана берет.

5. Жол жүрүү документинин бланктарынын формалары, сыпаттамасы, үлгүлөрү, алардын техникалык өзгөчөлүгү, ошондой эле анкета-арыздардын формалары калкты каттоо чөйрөсүндөгү ыйгарым укуктуу мамлекеттик орган менен макулдашуу боюнча миграция чөйрөсүндөгү ыйгарым укуктуу мамлекеттик орган тарабынан бекитилет.

6. Жол жүрүү документин тариздөө, жол жүрүү документин жекелештирүү үчүн анкета-арызды жиберүү калкты каттоо чөйрөсүндөгү ыйгарым укуктуу мамлекеттик органдын аймактык бөлүмдөрүнө качкындын жеке өзү берген арызы боюнча жүргүзүлөт.

7. Качкындын жашы жете элек (18 жашка чейинки) балдарына, анын ичинде анын камкордугундагы же көзөмөлүндөгү балдарга жеке жол жүрүү документтери берилет.

Камкордукка же көзөмөлгө алынган жашы жете элек (18 жашка чейинки) балдар камкорчусунун, көзөмөлчүсүнүн же башка мыйзамдуу өкүлүнүн коштоосунда гана Кыргыз Республикасынан чыгат.

8. Качкындын жол жүрүү документин тариздөөгө жана жекелештирүүгө документтерди кабыл алуу үчүн Кыргыз Республикасынын мамлекеттик жана муниципалдык кызмат көрсөтүүлөр чөйрөсүндөгү мыйзамдарына ылайык мамлекеттик кызмат көрсөтүү үчүн акы алынат.

9. Качкындын жол жүрүү документин тариздөө жана жекелештирүү үчүн төлөм анкета-арыз берилген күндөн тартып он жумуш күндөн кечиктирбестен өтүнүч билдирүүчү тарабынан төлөнөт.

Кыргыз Республикасынын мыйзамдарында каралган качкындын жол жүрүү документин тариздөө жана жекелештирүү үчүн акынын төлөнгөндүгүн ырастоо жөнүндө маалыматтар АМСте чагылдырылат.

Качкындын жол жүрүү документин тариздөө жана жекелештирүү үчүн акы төлөнгөндүгүн ырастоо жок болгон учурда электрондук анкета-арыз кабыл алынбайт.

2-глава. Качкындын жол жүрүү документин тариздөө жана

жекелештирүү үчүн зарыл болгон документтердин тизмеги

10. Документтерди биринчи жолу тапшырууда:

1) качкындын ырастамасы;

2) чет өлкөлүк жарандын паспорту – болсо;

3) никени каттоо же бузуу жөнүндө күбөлүк (никеге турганда, нике бузулганда), жубайынын каза болгондугу тууралуу күбөлүк (жубайы каза болгон учурда) – болсо.

11. Алмаштырууда:

1) качкындын жол жүрүү документи;

2) качкындын ырастамасы.

12. Жоголгондо:

1) качкындын ырастамасы.

13. Жашы жете элек (18 жашка чейинки) үчүн:

1) качкын деп таанылган баланын туулгандыгы тууралуу күбөлүгү;

2) ата-энесинин, камкорчунун же көзөмөлчүнүн бала жөнүндө маалыматы бар качкындын ырастамасы.

Жашы жете элек (18 жашка чейинки) адамдын кызыкчылыгы үчүн качкындын жол жүрүү документин тариздөө жана жекелештирүү жөнүндө арызды анын мыйзамдуу өкүлү (ата-энеси, камкорчусу же көзөмөлчүсү) тарабынан берилген, нотариалдык күбөлөндүрүлгөн ишеним каттын негизинде өкүл аркылуу берүүгө жол берилет. Мындай ишеним кат көрсөтүлгөн иш-аракеттерди жасоого атайын ыйгарым укуктарды камтууга тийиш.

3-глава. Документтерди кабыл алуу жана тариздөө тартиби

14. Качкындын жол жүрүү документин жекелештирүүгө документтерди кабыл алуу жана анкета-арызды толтуруу калкты каттоо чөйрөсүндөгү ыйгарым укуктуу мамлекеттик органдын аймактык бөлүмүнүн кызматкери тарабынан ушул Жобонун 2-главасында көрсөтүлгөн тизмекке ылайык берилген документтердин негизинде жүргүзүлөт.

Берилген документтерде оңдоонун, кырып өчүрүүнүн жана кошуп жазуунун белгилери жана/же документтин жасалма белгилери табылган учурда калкты каттоо чөйрөсүндөгү ыйгарым укуктуу мамлекеттик органдын аймактык бөлүмүнүн кызматкери бул жөнүндө миграция чөйрөсүндөгү ыйгарым укуктуу мамлекеттик органга, ошондой эле мамлекеттик ички иштер органдарына дароо кабарлоого жана үч нускада актыны түзүүгө милдеттүү: бир нускасы бир жумуш күндүн ичинде аймактык бөлүмдүн жайгашкан жери боюнча мамлекеттик ички иштер органына жиберилет, экинчиси калкты каттоо чөйрөсүндөгү ыйгарым укуктуу мамлекеттик органдын аймактык бөлүмүндө калат, үчүнчүсү өтүнүч билдирген адамга берилет.

Ошондой эле электрондук документ жүгүртүү системасы аркылуу актынын сканерленген нускасы миграция чөйрөсүндөгү ыйгарым укуктуу мамлекеттик органга жиберилет.

Өтүнүч билдирген адамдан качкындын жол жүрүү документин тариздөөгө, жекелештирүүгө жана берүүгө алынган, оңдоонун, кырып өчүрүүнүн жана кошуп жазуунун белгилери жана/же документтин жасалма белгилери табылган документтерди кабыл алуу маселеси компетенттүү органдардын акыркы чечими чыгарылгандан кийин чечилет.

15. Калкты каттоо чөйрөсүндөгү ыйгарым укуктуу мамлекеттик органдын аймактык бөлүмүнүн кызматкери тарабынан анкета-арызды толтурууда төмөнкүдөй иш-аракеттер жасалат:

1) миграция чөйрөсүндөгү ыйгарым укуктуу мамлекеттик органдын маалыматтар базасы боюнча качкындын учурдагы статусунун бар экендигин текшерүү. Качкындын учурдагы статусу жөнүндө маалыматтар жок болгон учурда анкета-арызды андан ары тариздөө токтотулат;

2) “ЖААК” автоматташтырылган маалыматтык системасында ИЖНди, Тышкы миграцияны эсепке алуунун бирдиктүү системасында (ТМЭБС) барган жери боюнча каттоосун, “Жарандык” автоматташтырылган маалыматтык системасында Кыргыз Республикасынын жарандыгынын бар экендигин текшерүү;

3) качкындын жол жүрүү документин тариздөөгө, жекелештирүүгө АМСке киргизүү үчүн өтүнүч билдирген адам тарабынан берилген документтердин түп нускаларын сканерлөө. Сканерленгенден кийин документтердин түп нускалары өтүнүч билдирген адамга кайтарылууга тийиш;

4) өтүнүч билдирген адамдан анкета-арызга киргизилген маалыматтардын тууралыгын тактоо. Анкета-арызга өтүнүч билдирген адам электрондук жеке кол тамга алуу үчүн түзүлүш аркылуу кол коет. Жашы жете элек (18 жашка чейинки) адам үчүн “Колу” деген жерге анын аты көрсөтүлөт;

5) өтүнүч билдирген адамдын бетин сүрөткө тартуу.

Калкты каттоо чөйрөсүндөгү ыйгарым укуктуу мамлекеттик органдын аймактык бөлүмүнүн кызматкери документтерди кабыл алууда өтүнүч билдирген адамга аларды кабыл алуу датасын көрсөтүү менен документтердин кабыл алгандыгы жөнүндө тил кат берет.

16. Калкты каттоо чөйрөсүндөгү ыйгарым укуктуу мамлекеттик органдын аймактык бөлүмүнүн кызматкери тарабынан текшерилген жана СК аркылуу кол коюлган анкета-арыз сканерленген документтер менен бирге байланыштын корголгон электрондук каналдары аркылуу жекелештирүү борборуна жиберилет.

СКны колдонуу санариптик документтин аныктыгын, арыздын тишелүүлүгүн жана мазмунунун өзгөрүлбөгөндүгүн ырастайт.

17. Анкета-арыздар жана сканерленген документтер келип түшкөндө жекелештирүү борбору тарабынан арызда көрсөтүлгөн маалыматтардын сканерленген документтерде камтылган маалыматтарга шайкештик предметине кошумча текшерүү жүргүзүлөт.

Анкета-арызда көрсөтүлгөн маалыматтар менен сканерленген документтердеги маалыматтардын ортосунда шайкешсиздик аныкталганда жекелештирүү борбору анкета-арызды жана ага тиешелүү материалдарды калкты каттоо чөйрөсүндөгү ыйгарым укуктуу мамлекеттик органдын аймактык бөлүмүнө кайтарат.

18. Качкындын жол жүрүү документин тариздөө, даярдоо жана берүү анкета-арыз толтурулган күндөн тартып 18 жумуш күндүн ичинде жүргүзүлөт.

19. Качкындын даярдалган жол жүрүү документтери жекелештирүү борбору тарабынан почта/фельдъегердик байланыш аркылуу миграция чөйрөсүндөгү ыйгарым укуктуу мамлекеттик органга өткөрүп берилет.

20. Качкындардын жол жүрүү документтеринин бланктары миграция чөйрөсүндөгү ыйгарым укуктуу мамлекеттик орган тарабынан жекелештирүү борборуна акты боюнча берилет.

4-глава. Качкындын жол жүрүү документин берүү

21. Миграция чөйрөсүндөгү ыйгарым укуктуу мамлекеттик орган качкындын жол жүрүү документин өтүнүч билдирген адамдын өзүнө же анын мыйзамдуу өкүлүнө берет.

22. Качкындын жол жүрүү документин берүү төмөнкүдөй учурларда токтотулат, эгерде өтүнүч билдирген адам:

1) Кыргыз Республикасынан чыгуу үчүн документтерди тариздөөдө атайылап жалган маалыматтарды билдирсе;

2) өтүнүч билдирген адамга карата кылмыш иши козголсо же ал издөөдө жүрсө, анын ичинде издөө картасы болсо;

3) Кыргыз Республикасынын аймагында кылмыш жасагандыгы үчүн соттолсо – жазасын өтөп бүткөнгө (аткарганга) же жазадан бошотулганга чейин;

4) сот тарабынан ага жүктөлгөн милдеттенмелерди аткаруудан баш тартса – милдеттенмелер аткарылганга же тараптар макулдашканга чейин.

Компетентүү мамлекеттик органдардан качкындын жол жүрүү документин алуусун чектөө үчүн негиздердин жок экендиги жөнүндө расмий кабарлама алынгандан кийин гана жол-жобо кайрадан жүргүзүлөт.

23. Качкындын жол жүрүү документин берүүдө миграция чөйрөсүндөгү ыйгарым укуктуу мамлекеттик органдын кызматкери төмөнкүлөргө милдеттүү:

– качкындын жол жүрүү документи кимдин атына даярдалса, өтүнүч билдирген адамдын ошол адам экендигин текшерүүгө;

– өтүнүч билдирген адамга качкындын жол жүрүү документине киргизилген маалыматтардын тууралыгын текшерүүнү сунуштоого;

– заводдук же өндүрүштүк кемчилик табылган учурда миграция чөйрөсүндөгү ыйгарым укуктуу мамлекеттик органдын кызматкери ушул Жобонун 24-пунктуна ылайык иш алып барат.

24. Качкындын жол жүрүү документинде заводдук же өндүрүштүк кемчилик табылса 3 нускада актыны түзүү зарыл. Актынын биринчи нускасы качкындын жол жүрүү документи менен бирге жекелештирүү борборуна өткөрүп берилет. Актынын экинчи нускасы миграция чөйрөсүндөгү ыйгарым укуктуу мамлекеттик органда калат. Үчүнчү нускасы өтүнүч билдирген адамга берилет.

24.1. Заводдук же өндүрүштүк кемчилик табылгандан кийин качкындын жол жүрүү документин кайра даярдоо актыны берүү менен өтүнүч билдирген адам тарабынан арыз берилген учурдан тартып 5 жумуш күндүн ичинде жүргүзүлөт.

24.2 Миграция чөйрөсүндөгү ыйгарым укуктуу мамлекеттик органдын, калкты каттоо чөйрөсүндөгү ыйгарым укуктуу мамлекеттик органдын же жекелештирүү борборунун кызматкери заводдук же өндүрүштүк кемчиликке алып келген катага жол берген учурда качкындын жол жүрүү документин кайрадан даярдоо Кыргыз Республикасынын эмгек мыйзамдарына ылайык күнөөлүү адамдын каражаттарынын эсебинен жүргүзүлөт.

5-глава. Качкындын жол жүрүү документин алмаштыруу же

жараксыз деп таануу тартиби

25. Качкындын жол жүрүү документи төмөнкү учурларда жараксыз болуп саналат же тапшырылууга, алмаштырылууга тийиш:

1) качкындын жол жүрүү документинин колдонуу мөөнөтү аяктаганда ушул Жобонун 2-главасына ылайык;

2) качкындын жол жүрүү документи жоголгондо ушул Жобонун 2-главасына ылайык;

3) Кыргыз Республикасынын миграция чөйрөсүндөгү мыйзамдарына ылайык качкын статусун жоготкон учурда качкын миграция чөйрөсүндөгү ыйгарым укуктуу мамлекеттик органдын качкын статусун жоготуу жөнүндө чечиминин көчүрмөсүн алгандан кийин качкындын жол жүрүү документин миграция чөйрөсүндөгү ыйгарым укуктуу мамлекеттик органга тапшырат;

4) Кыргыз Республикасынын мыйзамдарына ылайык качкындын жол жүрүү документинде оңдоонун, кырып өчүрүүнүн жана кошуп жазуунун белгилери жана/же жол жүрүү документинин жасалма белгилери белгиленгенде жана ырасталганда;

5) качкындын жол жүрүү документи жараксыз болуп калган, механикалык жактан бузулган, анын колдонуу мөөнөтү өз убагында узартылбаган учурда.

26. Өтүнүч билдирген адам качкындын жол жүрүү документин өз убагында узартпоонун же бузулуунун себептерин көрсөтүү менен арыз берет жана документти миграция чөйрөсүндөгү ыйгарым укуктуу органга өткөрүп берет. Органдын кызматкери документти текшерет; аны жараксыз деп таануу үчүн негиздер ырасталса ушул Жобонун 31-пунктуна ылайык акты түзүлөт жана эсепке алуу журналына тиешелүү жазуу киргизилет. Зарыл болгон учурда белгиленген тартипте качкындын жаңы жол жүрүү документи берилет.

27. Адам качкын статусун жоготкон учурда же качкындын ырастамасынын колдонуу мөөнөтү бүткөндөн кийин ал Кыргыз Республикасынын аймагында жок болгон учурда качкындын жол жүрүү документи жараксыз деп таанылат.

28. Качкындын жараксыз жол жүрүү документтери Кыргыз Республикасынын мамлекеттик чек арасынан өтүүдө мамлекеттик чек араны коргоо чөйрөсүндөгү ыйгарым укуктуу мамлекеттик орган тарабынан алынууга тийиш, андан ары аларды миграция чөйрөсүндөгү ыйгарым укуктуу мамлекеттик органга акты боюнча өткөрүп берет.

29. Качкындын жарактуу жана жараксыз жол жүрүү документтеринин реестри миграция чөйрөсүндөгү ыйгарым укуктуу мамлекеттик орган тарабынан түзүлөт жана жүргүзүлөт.

30. Реестр ар бир документ жөнүндө маалыматтарды, анын ичинде анын статусу, берилген датасы, колдонуу мөөнөтү жана качкын статусун жоготуу жөнүндө маалыматты камтыйт. Реестрди жаңыртуу мезгилдүүлүгү миграция чөйрөсүндөгү ыйгарым укуктуу мамлекеттик орган тарабынан белгиленген тартипте жүргүзүлөт.

6-глава. Качкындын талап кылынбаган, жараксыз жана

алынган жол жүрүү документтерин сактоо жана жок кылуу

тартиби

31. Качкындын талап кылынбаган, жараксыз жана алынган жол жүрүү документтерин миграция чөйрөсүндөгү ыйгарым укуктуу мамлекеттик органда сактоо мөөнөтү 2 жылды түзөт.

Көрсөтүлгөн мөөнөт аяктаганда качкындын жол жүрүү документтери миграция чөйрөсүндөгү ыйгарым укуктуу мамлекеттик органдын жана калкты каттоо чөйрөсүндөгү ыйгарым укуктуу мамлекеттик органдын кызматкерлеринен турган комиссия тарабынан жок кылынууга тийиш.

32. Качкындын жол жүрүү документтери төмөнкү ыкмалар менен жок кылынат:

– качкындын жол жүрүү документиндеги маалыматтарды машина менен окулуучу зонадан эсепке алуу журналына киргизүү менен качкындын жол жүрүү документин тешкич менен тешүү;

– качкындын жол жүрүү документинин биринчи барагындагы номерди кесип алуу, качкындын жол жүрүү документинин калган барактары тешкич менен тешилет, ошол эле учурда качкындын жол жүрүү документинин кесип алынган номери эсепке алуу журналына чапталат.

33. Качкындын жол жүрүү документтерин жок кылуу боюнча комиссиянын жыйналышы жылына бир жолу өткөрүлөт.

34. Качкындын жол жүрүү документтерин жок кылууда комиссиянын мүчөлөрү тарабынан жок кылуу жөнүндө акты түзүлөт, ага комиссиянын бардык мүчөлөрү кол коет.