Республикалык бюджеттин долбоорун түзүү, республикалык бюджетке өзгөртүүлөрдү киргизүү жана бюджетти аткаруу процессинде каражаттарды кайра бөлүштүрүү ТАРТИБИ

(КР Министрлер Кабинетинин 2026-жылдын 6-февралындагы № 67 токтомунун редакциясына ылайык)

1-глава. Жалпы жоболор

1. Республикалык бюджеттин долбоорун түзүү, республикалык бюджетке өзгөртүүлөрдү киргизүү жана бюджетти аткаруу процессинде каражаттарды кайра бөлүштүрүү тартиби (мындан ары - Тартип) Кыргыз Республикасынын Бюджеттик кодексине ылайык иштелип чыккан жана республикалык бюджетти түзүү жана ага өзгөртүүлөрдү киргизүү процессинин бирдиктүү эрежелерин, ошондой эле бюджетти аткаруу процессинде бюджеттик каражаттарды кайра бөлүштүрүү тартибин аныктайт.

2. Республикалык бюджеттин долбоорун түзүү жана республикалык бюджетке өзгөртүүлөрдү киргизүү Кыргыз Республикасынын Министрлер Кабинетинин өзгөчө укугу болуп саналат.

3. Республикалык бюджеттин долбоорун түздөн-түз түзүүнү бюджетти болжолдоо жана аткаруу боюнча ыйгарым укуктуу мамлекеттик орган (мындан ары - ыйгарым укуктуу мамлекеттик орган) жүзөгө ашырат.

4. Ушул Тартипте колдонулуучу негизги түшүнүктөр жана терминдер:

1) автоматташтырылган система - казыналык системада кезектеги бюджеттик жылга жана пландык мезгилге Кыргыз Республикасынын республикалык бюджетинин долбоорун түзүү боюнча маалыматтарды генерациялоону, иштеп чыгууну, өткөрүп берүүнү, кабыл алууну, сактоону жана ага өзгөртүүлөрдү киргизүүнү камсыз кылуучу программалык, программалык-аппараттык жана аппараттык каражаттардын комплекси;

2) БКБТ - бюджеттик каражаттардын башкы тескөөчүсү;

3) контролдук цифралар - бюджеттик каражаттардын чектүү көрсөткүчү, анын негизинде бюджеттик мекемелердин чыгашалары түзүлөт;

4) БКА - бюджеттик каражаттарды алуучу;

5) БКТ - бюджеттик каражаттарды тескөөчү;

6) бюджеттик каражаттар боюнча чыгашалардын сметасы (мындан ары - бюджеттик каражаттар боюнча смета) - бюджеттик эсептердеги каражаттар боюнча БКБТ/БКТ/БКА иштешине жана жүргүзүлүп жаткан иш-чараларга алардын чыгашаларын аныктоочу документ;

7) атайын эсептердеги каражаттарды эсепке алуу боюнча кирешелердин жана чыгашалардын сметасы (мындан ары -атайын эсептердеги каражаттар боюнча смета) - атайын эсептердеги каражаттар боюнча БКБТ/БКТ/БКА иштешине жана жүргүзүлүп жаткан иш-чараларга алардын чыгашаларын аныктоочу документ;

8) квалификациялуу санариптик кол тамга (СК) - санариптик кол тамга жөнүндө Кыргыз Республикасынын мыйзамдарына ылайык квалификациялуу санариптик кол тамганын талаптарына ылайык келген санариптик кол тамга.

2-глава. Бюджеттик процесстин негиздери

5. Республикалык бюджеттин долбоору (мындан ары - республикалык бюджеттин долбоору) кезектеги бюджеттик жылга жана пландык мезгилге түзүлөт.

6. Республикалык бюджеттин долбоору Кыргыз Республикасын социалдык-экономикалык өнүктүрүүнүн болжолунун, ошондой эле Кыргыз Республикасынын фискалдык жана инвестициялык саясаты боюнча Кыргыз Республикасынын Министрлер Кабинетинин Кеңешинин кароосуна берилген орто мөөнөттүү мезгилге фискалдык саясаттын негизги багыттарынын (мындан ары - ФСНБ) негизинде иштелип чыгат.

7. Республикалык бюджеттин долбоорун өз убагында жана сапаттуу түзүү максатында ыйгарым укуктуу мамлекеттик орган бюджеттик мекемелерден, ишканалардан, чарбалык уюмдардан жана башка бюджеттик ассигнованиелерди алуучулардан зарыл болгон маалыматтарды суроого жана алууга укуктуу.

3-глава. Республикалык бюджеттен каржылануучу БКБТ/БКТ/БКА бюджеттеринин долбоорлорун түзүү тартиби

8. ФСНБда көрсөтүлгөн чыгашалардын ведомстволук классификациясы боюнча контролдук цифралар БКБТ/БКТ/БКА бюджеттеринин долбоорлорун түзүү үчүн негиз болуп саналат.

9. Ыйгарым укуктуу мамлекеттик орган контролдук цифраларды БКБТга жеткирет. БКБТ кезектеги бюджеттик жылга жана пландык мезгилге бюджеттик каражаттар боюнча сметаларды түзүү үчүн аларды БКТ жана БКАга өз убагында жеткирүүнү камсыз кылат.

10. Ыйгарым укуктуу мамлекеттик органдын ыйгарым укуктуу кызматкерлери автоматташтырылган системага чыгашалардын ведомстволук классификациясы боюнча контролдук цифраларды БКБТга жеткиргенден кийин киргизет.

11. БКБТ бюджеттик каражаттар боюнча сметаларды түзүүдө жеткирилген контролдук цифраларды бөлүштүрөт.

12. Бюджеттик каражаттар боюнча сметалар жана атайын эсептердеги каражаттар боюнча сметалар автоматташтырылган системада ушул Тартиптин 1-4-тиркемелерине ылайык кирешелердин, чыгашалардын экономикалык классификациясы, активдер жана милдеттенмелер менен операциялардын классификациясы боюнча ведомстволук, программалык, функциялык классификация боюнча ар бир БКБТ/БКТ/БКА тарабынан учурдагы жылдын 25-июлуна чейинки мөөнөттө түзүлөт.

13. БКБТ/БКТ/БКА чыгашалардын экономикалык классификациясы, активдер жана милдеттенмелер менен операциялардын классификациясы боюнча ведомстволук, программалык, функциялык классификация боюнча жеткирилген контролдук цифраларды бөлүштүрүү аркылуу автоматташтырылган системада бюджеттик каражаттар боюнча сметаларды түзөт.

14. БКБТ/БКТ/БКА автоматташтырылган системада атайын эсептердеги каражаттар боюнча сметаларды түзөт.

15. Бюджеттик каражаттар боюнча сметаларга жана атайын эсептердеги каражаттар боюнча сметаларга БКБТнын ыйгарым укуктуу кызматкери жана жетекчиси тарабынан автоматташтырылган системада СКны пайдалануу менен виза коюлат жана автоматташтырылган система аркылуу ыйгарым укуктуу мамлекеттик органга билдирилет.

16. Ыйгарым укуктуу мамлекеттик органдын жооптуу кызматкерлери бюджеттик каражаттар боюнча БКБТ тарабынан берилген сметаларды кароо процессинде:

1) бюджеттик каражаттар боюнча сметаларга киргизилген чыгашалардын суммаларынын БКБТнын болжолдуу параметрлерине ылайык келишин жана алардын негиздүүлүгүн текшерет;

2) эмгек акы төлөө фондунун өлчөмдөрүн түзүүнүн жана материалдык жана акчалай чыгашалардын ченемдерин жана бааларын эсептөөдө колдонуунун тууралыгын текшерет;

3) чыгашалардын зарылдыгын баалайт, бюджеттик өтүнмөлөргө негизделген эсептөөлөрдүн болушун текшерет.

17. БКБТ/БКТ/БКА боюнча бюджеттик ассигнованиелердин көлөмдөрүн азайтуу, бюджеттин ресурстарынын көлөмдөрүн көбөйтүү жагына өзгөртүү, ошондой эле бюджеттин ресурстарынын болжолдонгон көлөмдөрү кыскарган учурдагы өзгөрүүлөр Кыргыз Республикасынын Бюджеттик кодексинин 89-беренесине ылайык жүргүзүлөт.

18. Бюджеттик каражаттар боюнча сметаларга жана бюджеттик ассигнованиелерди бөлүштүрүүгө карата сын пикирлер жок болгон учурда ыйгарым укуктуу мамлекеттик органдын ыйгарым укуктуу кызматкерлери аларды СКны пайдалануу менен автоматташтырылган системага виза коюу аркылуу кабыл алат.

19. Бюджеттик каражаттар боюнча сметаларга сын пикирлер болгон учурда ыйгарым укуктуу мамлекеттик органдын жооптуу кызматкерлери сын пикирлерди четтетүү үчүн аларды автоматташтырылган система аркылуу БКБТга кайтарып берет.

20. БКБТ бюджеттик каражаттар боюнча сметаны кайтарып берген күндүн ичинде ыйгарым укуктуу мамлекеттик орган берген сын пикирлерге ылайык аларга оңдоолорду киргизет жана аларды автоматташтырылган системада ыйгарым укуктуу мамлекеттик органдын кароосуна кайра берет.

21. БКБТ бюджеттик каражаттар боюнча сметаларды карагандан жана тактагандан кийин ыйгарым укуктуу мамлекеттик орган учурдагы бюджеттик жылдын 25-августуна чейинки мөөнөттө Кыргыз Республикасынын кезектеги бюджеттик жылга жана пландык мезгилге республикалык бюджети жөнүндө Кыргыз Республикасынын мыйзамынын долбоорун (мындан ары - республикалык бюджет жөнүндө мыйзамдын долбоору) түзөт.

22. Кароо процессинде сметаларга тактоолор, ошондой эле БКБТ тарабынан берилген башка документтер киргизилиши мүмкүн.

23. Бюджеттик мекемелер бюджеттик каражаттарды чыгашалардын сметасында каралган каражаттардын көлөмүнө жана максаттуу багытына так ылайык чыгымдоону камсыз кылууга милдеттүү. Бюджеттик каражаттарды чыгашалардын сметасында каралбаган иш-чараларга жумшоого тыюу салынат.

24. БКБТ ушул Тартиптин 5-тиркемесине ылайык эмгек акы фондунун жылдык көлөмүн аныктоо менен мекемелердин штаттык расписаниелерин, ошондой эле экономикалык классификация боюнча башка эсептөөлөрдү берет, зарыл болгон учурда ушул Тартиптин 6-тиркемесине ылайык эмгек акы төлөө фондунун жылдык көлөмүн эске алуу менен штаттык расписаниелердин жыйынды көлөмү түзүлөт.

Социалдык чөйрөнүн бюджеттик мекемелери боюнча БКБТ тиешелүү чөйрөдө эмгек акы төлөө шарттарын жөнгө салуучу ченемдик укуктук актыларга ылайык бардык төлөөлөрдү жана кошумча төлөмдөрдү чагылдыруу менен штаттык расписаниелерди жана тарифтик тизмелерди берет.

25. БКБТ/БКТ/БКА ыйгарым укуктуу мамлекеттик органга ушул Тартиптин 7-9-тиркемелерине ылайык форма боюнча бюджеттик мекемелердин кызматкерлеринин саны жөнүндө маалыматтарды берет.

26. БКБТ бюджеттик мыйзамдарга ылайык бекитилген нускамалык материалдарга ылайык программалык негизде бюджеттерди түзөт жана ыйгарым укуктуу мамлекеттик органга берет.

4-глава. Республикалык бюджет жөнүндө мыйзамдын долбоорунун "Жалпы мамлекеттик программалар, иш-чаралар жана төлөмдөр" бөлүмүн түзүү тартиби

27. Республикалык бюджет жөнүндө мыйзамдын долбоорунун "Жалпы мамлекеттик программалар, иш-чаралар жана төлөмдөр" бөлүмүндө мамлекеттин милдеттерин жана функцияларын аткарууга бюджеттик ассигнованиелер каралат:

1) теңдөөчү жана максаттуу трансферттер;

2) дем берүүчү (үлүштүк) гранттар;

3) эл аралык уюмдарга төгүмдөр;

4) тышкы жана ички карыз боюнча пайыздарды жана негизги сумманы төлөө;

5) индекстелген суммалар боюнча калктын карызын жабуу;

6) кошумча нарк салыгынын ордун толтуруу жана кайтарып берүү;

7) соттун чечимдерин аткаруу;

8) банктардын кызмат көрсөтүүлөрүнө акы төлөө (коммерциялык банктарга жана финансы-кредиттик мекемелерге төлөм);

9) чек ара аймактарын өнүктүрүү;

10) коммерциялык банктардын пайыздык ставкаларын субсидиялоо;

11) капиталдык салымдарды каржылоо;

12) табигый кырсыктарды жоюу боюнча иш-чараларды каржылоо;

13) мамлекеттик бюджеттик резервдин каражаттарын резервдөө;

14) жергиликтүү бюджеттен республикалык бюджетке өткөрүлүп берилген мекемелерди күтүү;

15) мамлекеттик-жеке өнөктөштүк долбоорлорун даярдоону каржылоо;

16) экономикалык өнүктүрүү долбоорлорун каржылоо;

17) "Укук бузуулардын бирдиктүү реестри" автоматташтырылган маалыматтык системасында иштелип чыккан, анын ичинде "Акылдуу шаар" долбоорунун "Коопсуз шаар" компонентин ишке ашыруунун алкагында аппараттык-программалык комплексти колдонуу менен белгиленген укук бузууларды жасагандыгы үчүн өндүрүлгөн айыптардын суммасын пайдалануу;

18) финансылык резервдерди топтоо;

19) жугуштуу оорулардын эпидемиялары жана/же пандемиялары, ошондой эле алардын экономикага тийгизген таасиринин кесепеттери менен күрөшүү боюнча иш-чаралар;

20) акча каражаттарын Кыргыз Республикасынын Турукташтыруу фондуна (мындан ары - Турукташтыруу фонду) которуу;

21) Кыргыз Республикасынын Бюджеттик кодексине ылайык юридикалык жактардын акцияларын жана капиталга катышуусунун башка формаларын сатып алуу, юридикалык жактарга, айылдык товар өндүрүүчүлөргө жана ишкерлерге кредиттерди берүү;

22) социалдык төлөмдөрдү жогорулатуу жана башка иш-чаралар;

23) республикалык бюджеттин долбоорун түзүүдө, ошондой эле бюджетти аткаруунун жүрүшүндө келип чыгышы мүмкүн болгон иш-чаралар жана төлөмдөр.

28. Мамлекеттик маанидеги иш-чаралар жана мамлекеттик органдардын башка иш-чаралары, ошондой эле социалдык төлөмдөрдү жогорулатуу (мындан ары - мамлекеттик иш-чаралар жана социалдык төлөмдөр) республикалык бюджет жөнүндө мыйзамдын долбоорунда жана чыгымдарды жабууга республикалык бюджет жөнүндө мыйзамга өзгөртүүлөрдү киргизүү тууралуу мыйзамдын долбоорунда каралат:

1) эмгек акы төлөө фондунун, штаттык сандын, стипендиялардын, тамактануунун, медикаменттердин, пенсиялардын жана жөлөкпулдардын өлчөмдөрүнүн өзгөргөндүгүнө, ошондой эле кабыл алынган ченемдик укуктук актыларга жана/же ченемдик укуктук актылардын долбоорлоруна ылайык эмгек акы төлөө шарттарынын өзгөргөндүгүнө байланыштуу;

2) коммуналдык кызмат көрсөтүүлөргө тарифтердин жана отундун түрлөрүнө баалардын өсүшүнө байланыштуу;

3) бюджеттик системанын бюджеттеринин мүмкүн болуучу түшпөй калууларынын ордун толтуруу боюнча;

4) мамлекеттик программаларды ишке ашыруу боюнча;

5) мамлекеттик маанидеги иш-чаралар боюнча;

6) контролдук цифраларда каралбаган мамлекеттик органдардын башка пландаштырылган иш-чаралары боюнча.

29. Мамлекеттик иш-чараларга жана социалдык төлөмдөргө бюджеттик ассигнованиелер БКБТ өтүнмөлөрүнө ылайык ыйгарым укуктуу мамлекеттик органдын алдын ала болжолдук маалыматтарына ылайык бюджеттик каражаттарды натыйжалуу башкаруу жана андан ары каралган максаттарга иш жүзүндөгү керектөөнүн негизинде такталган эсептөөлөрдү БКБТ/БКБ/БКБТ берүү максатында каралат.

30. БКБТ/БКТ/БКА мамлекеттик иш-чараларга жана социалдык төлөмдөргө каралган бюджеттик ассигнованиелердин бюджетин аткаруунун жүрүшүндө иш жүзүндөгү керектөөнүн негизинде такталган эсептөөлөрдү түзөт жана ыйгарым укуктуу мамлекеттик органга берет.

31. Ыйгарым укуктуу мамлекеттик органга берилген такталган эсептөөлөргө ылайык БКБТ/БКТ/БКА СКны пайдалануу менен автоматташтырылган системада бюджетке өзгөртүүлөрдү киргизүүгө/мамлекеттик иш-чараларга жана социалдык төлөмдөргө каралган каражаттардан бюджеттик каражаттарды алардын тиешелүү эсептерине кайра бөлүштүрүүгө кабарлама-маалымкатты тариздейт.

32. Чет мамлекеттерден жана эл аралык финансылык уюмдардан алынган гранттар жана кредиттер Кыргыз Республикасынын эл аралык келишимдеринин негизинде бөлүнгөн каражаттар болуп саналат, алар толук көлөмдө максаттуу багыты боюнча пайдаланылууга тийиш. Учурдагы жылда бул каражаттар толук көлөмдө пайдаланылбаган учурда жылдын аягына карата калдыктар жаңы бюджеттик жылдагы каржылоо булагы болуп саналат.

33. Мамлекеттик-жеке өнөктөштүк долбоорлорун даярдоого чыгашаларды Мамлекеттик-жеке өнөктөштүк долбоорлорун даярдоону каржылоо фондунун каражаттарынын эсебинен каржылоо Фонддун байкоочу кеңешинин чечиминин негизинде ишке ашырылат.

34. Республикалык бюджет жөнүндө мыйзамдын долбоорунда жана республикалык бюджет жөнүндө мыйзамга өзгөртүүлөрдү киргизүү жөнүндө мыйзамдын долбоорунда төмөнкүдөй чыгашаларга бюджеттик ассигнованиелер каралышы мүмкүн:

1) стратегиялык документтерге, ошондой эле ченемдик укуктук актыларга жана Кыргыз Республикасынын Министрлер Кабинетинин тескемелерине ылайык экономикалык өнүктүрүү долбоорлорун каржылоо, анын ичинде ТЭНди иштеп чыгуу, экономиканын реалдуу секторун каржылоо, бюджеттик кредиттөө жана акцияларды сатып алуу жана юридикалык жактардын капиталына катышуунун башка формалары. Экономикалык өнүктүрүү долбоорлорун каржылоого каралган каражаттар Кыргыз Республикасынын Министрлер Кабинетинин чечимдерине ылайык башка чыгашаларды каржылоого багытталышы мүмкүн;

2) топтолгон финансылык резервдер - теңдештүүлүктү камсыз кылуу жана жыл ичинде күтүлбөгөн чыгашаларды жабуу үчүн республикалык бюджеттин чыгаша бөлүгүндө каралган каражаттар. Бюджеттик жыл ичинде Кыргыз Республикасынын Министрлер Кабинетинин чечимдерине ылайык республикалык бюджеттин күтүлбөгөн чыгашаларын каржылоого бөлүштүрүлөт;

3) Кыргыз Республикасынын Министрлер Кабинетинин чечимдерине ылайык салыктык, бажылык жана бюджеттик жол-жоболорду, ошондой эле башка кечиктирилгис чыгашаларды фискалдаштыруу;

4) жугуштуу оорулардын эпидемиясына жана/же пандемиясына, ошондой эле алардын экономикага тийгизген таасиринин кесепеттерине каршы күрөшүү боюнча жалпы мамлекеттик чыгашалар (вакциналарды, медициналык жабдууларды жана медикаменттерди сатып алуу, компенсацияларды төлөө ж.б.), ошондой эле экономиканы колдоо.

35. "Укук бузуулардын бирдиктүү реестри" автоматташтырылган маалыматтык системасында иштелип чыккан, анын ичинде "Акылдуу шаар" долбоорунун "Коопсуз шаар" компонентин ишке ашыруунун алкагында аппараттык-программалык комплексти колдонуу менен белгиленген укук бузууларды жасагандыгы үчүн өндүрүлгөн айыптардын суммаларын пайдаланууга бюджеттик ассигнованиелер Кыргыз Республикасынын бюджетинин ресурстарынын тиешелүү администраторлорунун болжолдуу маалыматтарынын негизинде республикалык бюджет жөнүндө мыйзамдын долбоорунда каралат.

Айыптардын суммасын пайдалануу Кыргыз Республикасынын Министрлер Кабинети аныктаган тартипке ылайык жүзөгө ашырылат.

36. Бюджеттик ассигнованиелер ушул Тартиптин 34-пунктуна ылайык төмөнкүдөй тартипте каралат:

1) экономикалык өнүктүрүү, фискалдаштыруу долбоорлорун, жугуштуу оорулардын эпидемиясына жана/же пандемиясына каршы күрөшүү боюнча жалпы мамлекеттик чыгашаларды төмөнкү варианттардын биринин же бир нечесинин негизинде каржылоо:

- бюджетти түзүүнүн мурдагы циклдеринде каралган тиешелүү жылга көрсөткүчтөргө ылайык;

- мамлекеттик органдардын өтүнмөсүнө, ченемдик укуктук актыларга жана Кыргыз Республикасынын Министрлер Кабинетинин тескемелерине, ошондой эле Кыргыз Республикасынын Президентинин, Кыргыз Республикасынын Министрлер Кабинетинин Төрагасынын жана анын орун басарларынын тапшырмаларына ылайык;

- республикалык бюджеттин ресурстарына жараша жана бюджеттин теңдештүүлүк принцибине ылайык;

2) топтолгон финансылык резервдер төмөнкүдөй формулага ылайык эсептелет:

ТФР = РБР - МОЧ - МПИТ,

мында:

ТФР - топтолгон финансылык резервдер;

РБР - атайын эсептердеги каражаттарды жана мамлекеттик тышкы инвестицияларды эсепке албаганда жыл башындагы республикалык бюджеттин ресурстары жана Кыргыз Республикасынын Министрлер Кабинетинин эсептериндеги калдыктар;

МОЧ - атайын эсептердеги каражаттарды жана мамлекеттик тышкы инвестицияларды эсепке албаганда мамлекеттик органдардын (БКБТ/БКТ/БКА) чыгашалары;

МПИТ - "Жалпы мамлекеттик программалар, иш-чаралар жана төлөмдөр" бөлүмүнүн башка чыгашалары.

37. Республикалык бюджет жөнүндө мыйзамдын долбоорун жана республикалык бюджет жөнүндө мыйзамга өзгөртүүлөрдү киргизүү тууралуу мыйзамдын долбоорун түзүүнүн жана кароонун жүрүшүндө ушул Тартиптин 36-пунктуна ылайык эсептелген бюджеттик ассигнованиелер аларды көбөйтүү зарылдыгында чыгашалардын башка категорияларына кайра бөлүштүрүлүшү мүмкүн.

38. Ушул Тартиптин 34-пунктуна ылайык каралган бюджеттик ассигнованиелер Кыргыз Республикасынын Министрлер Кабинетинин ченемдик укуктук актыларына жана/же тескемелерине ылайык СК пайдалануу менен автоматташтырылган системада бюджетке өзгөртүүлөрдү киргизүүгө/бюджеттик каражаттарды кайра бөлүштүрүү жөнүндө маалымкат-кабарлоолор аркылуу БКБТ/БКТ/БКАнын тиешелүү эсептерине бөлүштүрүлөт.

39. "Жалпы мамлекеттик программалар, иш-чаралар жана төлөөлөр" бөлүмүндө каралган бюджеттик ассигнованиелер пайдаланылбаган учурда бул каражаттар республикалык бюджет жөнүндө мыйзамга өзгөртүүлөрдү киргизүү тууралуу мыйзамдын долбоорун түзүүдө бюджеттин теңдештүүлүк принцибин камсыз кылуу зарылдыгында өзгөрүүсүз калышы мүмкүн.

40. Ыйгарым укуктуу мамлекеттик орган Турукташтыруу фондун түзүү булактарынын болжолдоруна, Кыргыз Республикасынын Бюджеттик кодексинин 43-2-беренесинин 1-бөлүгүнүн 1 жана 2-пункттарына ылайык Турукташтыруу фондуна которулууга тийиш болгон каражаттарды карайт.

41. Республикалык бюджеттин долбоорун түзүүдө ыйгарым укуктуу мамлекеттик орган кезектеги бюджеттик жылга пландалган жана милдеттүү болгон чыгашалар жабылган учурда Турукташтыруу фондуна республикалык бюджеттин кирешелеринин бөлүгүнүн которулуучу суммасын белгилөөгө укуктуу.

Корголгон жана милдеттүү чыгашаларды жабуу төмөнкү формула боюнча эсептелет:

КМЧ = ПССК > КЧ;

мында:

КМЧ - корголгон жана милдеттүү чыгашаларды жабуу;

ПССК - кезектеги бюджеттик жылга пландалган салыктык жана салыктык эмес кирешелер;

КЧ - кезектеги бюджеттик жылга пландалган корголгон чыгашалар, мамлекеттик карыз боюнча пайыздарды жана негизги сумманы төлөөгө чыгашалар, Социалдык фондго жана Милдеттүү медициналык камсыздандыруу фондуна трансферттер, ошондой эле теңдештирүүчү трансферттер.

42. "Жалпы мамлекеттик программалар, иш-чаралар жана төлөмдөр" бөлүгү боюнча бюджеттик ассигнованиелер ыйгарым укуктуу мамлекеттик орган тарабынан түзүлөт.

5-глава. Кыргыз Республикасынын сот системасынын мекемелеринин жана Кыргыз Республикасынын Эсептөө палатасынын бюджеттик өтүнмөлөрүн даярдоо жана берүү

43. Кыргыз Республикасынын сот системасынын бюджетинин долбоору өз алдынча түзүлөт жана аткаруу жана мыйзам чыгаруу бийлиги менен макулдашуу боюнча Кыргыз Республикасынын Бюджеттик кодексине ылайык республикалык бюджетке киргизилет.

44. Кыргыз Республикасынын Эсептөө палатасы өз ишин каржылоо үчүн бюджеттин долбоорун жыл сайын өз алдынча түзөт жана корутунду берүү үчүн Кыргыз Республикасынын Министрлер Кабинетине жиберет.

45. Кыргыз Республикасынын Эсептөө палатасы Кыргыз Республикасынын Министрлер Кабинетинин корутундусу менен бюджеттин долбоорун Кыргыз Республикасынын Жогорку Кеңешинин профилдик комитетине аны республикалык бюджет жөнүндө мыйзамдын долбоорунун курамына киргизүү үчүн макулдашууга жиберет.

46. Кыргыз Республикасынын Эсептөө палатасынын бюджетинин долбооруна Кыргыз Республикасынын Министрлер Кабинети тарабынан каршы пикирлер болгон учурда Кыргыз Республикасынын Жогорку Кеңешинин профилдик комитети берилген каршы пикирлерди Кыргыз Республикасынын Министрлер Кабинетинин жана Кыргыз Республикасынын Эсептөө палатасынын өкүлдөрү менен биргеликте карайт. Кыргыз Республикасынын Эсептөө палатасынын макулдашылган бюджетинин долбоору республикалык бюджет жөнүндө мыйзамдын долбооруна киргизүү үчүн ыйгарым укуктуу мамлекеттик органга жиберилет.

47. Эсептөө палатасы өз ишин камсыз кылуу үчүн зарыл болгон кошумча каржылоо жөнүндө сунушту Кыргыз Республикасынын Жогорку Кеңешинин профилдик комитетине макулдашууга киргизүүгө укуктуу.

48. Кыргыз Республикасынын сот системасынын жана Эсептөө палатасынын бюджеттеринин долбоорлору ыйгарым укуктуу мамлекеттик органга, анын ичинде автоматташтырылган система аркылуу республикалык бюджеттин долбооруна киргизүү үчүн учурдагы жылдын 20-июлуна чейинки мөөнөттө берилет.

49. Ыйгарым укуктуу мамлекеттик орган бюджеттердин алынган долбоорлоруна ылайык республикалык бюджет жөнүндө мыйзамдын долбооруна учурдагы бюджеттик жылдын 25-августуна чейинки мөөнөттө Кыргыз Республикасынын сот системасынын мекемелеринин жана Эсептөө палатасынын бюджеттик ассигнованиелерин киргизет.

6-глава. Кыргыз Республикасынын бюджеттик системасынын трансферттерине бюджеттик өтүнмөлөрдү даярдоо жана берүү

50. Кыргыз Республикасынын бюджеттик системасынын деңгээлдеринин ортосундагы өз ара мамилелер республикалык бюджет жөнүндө мыйзамдын долбоорунун чыгаша бөлүгүндө чагылдырылган.

51. Кыргыз Республикасынын бюджеттик системасынын деңгээлдеринин ортосундагы мамилелер жалпы мамлекеттик кирешелерден жана бюджеттер аралык трансферттерден чегерүүлөрдүн ченемдерин белгилөө аркылуу жөнгө салынат.

52. Бюджеттер аралык трансферттердин системасына төмөнкүлөр кирет:

1) теңдөөчү трансферттер жана максаттуу трансферттер түрүндөгү трансферттер;

2) Социалдык фонддун жана Милдеттүү медициналык камсыздандыруу фондунун бюджеттерине республикалык бюджеттен ассигнованиелер.

53. Республикалык бюджеттен жергиликтүү бюджеттерге теңдөөчү жана максаттуу трансферттерге бюджеттик ассигнованиелер ыйгарым укуктуу мамлекеттик орган тарабынан түзүлөт.

54. Республикалык бюджеттен Социалдык фонддун жана Милдеттүү медициналык камсыздандыруу фондунун бюджеттерине ассигнованиелер Кыргыз Республикасынын Бюджеттик кодексине ылайык берилет жана каржыланат жана ыйгарым укуктуу мамлекеттик орган тарабынан Социалдык фонд жана Милдеттүү медициналык камсыздандыруу фонду менен биргеликте, анын ичинде автоматташтырылган системада түзүлөт.

7-глава. Бюджеттик инвестицияларга бюджеттик өтүнмөлөрдү даярдоо жана берүү

55. Республикалык бюджеттин чыгаша бөлүгүнө бюджеттик инвестицияларды ишке ашырууга ассигнованиелер кошулат.

56. Бюджеттик инвестициялар инфраструктураны, инновациялык системаны түзүүгө жана өнүктүрүүгө, социалдык секторду, экономиканын тармактарын колдоого жана өнүктүрүүгө, ошондой эле инвестициялык долбоорлор аркылуу мамлекеттик башкаруу секторундагы институттук кайра түзүүлөрдү ишке ашырууну камсыз кылууга багытталат.

57. Бюджеттик инвестицияларды жүзөгө ашырууга бюджеттик ассигнованиелер ыйгарым укуктуу мамлекеттик орган тарабынан, анын ичинде автоматташтырылган системада түзүлөт.

8-глава. Мамлекеттик карызды тейлөөгө бюджеттик өтүнмөлөрдү даярдоо жана берүү, анын ичинде негизги сумма, пайыздар боюнча төлөмдөр жана башка төлөмдөр менен чектелбестен

58. Чет мамлекеттерден жана эл аралык уюмдардан алынган кредиттер жана зайымдар боюнча негизги сумманы, пайыздарды жана башка төлөмдөрдү төлөөгө, башка тышкы карыздарды жабууга (еврооблигациялар, капиталдын эл аралык рынокторунда чыгарылуучу жана жайгаштырылуучу башка мамлекеттик баалуу кагаздар), акциялардан тышкары мамлекеттик баалуу кагаздар боюнча негизги сумманы жана пайыздарды төлөөгө бюджеттик ассигнованиелер ыйгарым укуктуу мамлекеттик орган тарабынан, анын ичинде автоматташтырылган системада түзүлөт.

9-глава. Республикалык бюджет жөнүндө мыйзамдын долбоорун түзүү тартиби

59. Ыйгарым укуктуу мамлекеттик орган республикалык бюджет жөнүндө мыйзамдын долбоорун, анын ичинде автоматташтырылган системада түзөт.

60. Республикалык бюджет жөнүндө мыйзамдын долбоору Кыргыз Республикасынын Бюджеттик кодексине ылайык көрсөткүчтөрдү камтыйт.

61. Республикалык бюджет жөнүндө мыйзамдын долбоорунун тиркемелеринде чыгашалардын көрсөткүчтөрү Кыргыз Республикасынын Бюджеттик классификациясына ылайык төмөнкүлөрдү бөлүү менен чагылдырылат:

1) бюджеттик эсептер боюнча чыгашаларды (учурдагы бюджет);

2) атайын эсептердеги каражаттар боюнча чыгашаларды;

3) мамлекеттик инвестицияларды.

62. Ыйгарым укуктуу мамлекеттик орган кезектеги бюджеттик жылга жана пландалган мезгилге Кыргыз Республикасынын мамлекеттик башкаруу секторунун консолидацияланган бюджетинин ирилештирилген болжолдуу көрсөткүчтөрүн жыл сайын эсептеп чыгат жана аны республикалык бюджет жөнүндө мыйзамдын долбооруна өзүнчө тиркеме менен киргизет.

63. Бюджеттин кирешелери, чыгашалары, дефицити/профицити жана дефицитти жабуунун булактары/профицитти пайдалануунун багыттары боюнча бюджеттин параметрлери мамлекеттик финансылардын статистикасынын эл аралык стандарттарына ылайык түзүмү боюнча төмөнкүдөй тартипте түзүлөт:

1) операциялык ишке байланыштуу акча каражаттарынын агымдары;

2) операциялык иштен акча каражаттарынын келип түшүүсү;

3) салыктык кирешелер;

4) алынган расмий трансферттер;

5) салыктык эмес кирешелер;

6) операциялык иштен акча каражаттарын төлөө;

7) кызматкерлердин эмгегине акы төлөө;

8) товарларды жана кызмат көрсөтүүлөрдү сатып алуу;

9) пайыздар;

10) субсидиялар;

11) гранттар;

12) социалдык жөлөкпулдар;

13) башка чыгашалар;

14) операциялык иштен акча каражаттарынын таза агып кирүүсү;

15) финансылык эмес активдерге салымдарга байланыштуу акча каражаттарынын агымдары;

16) финансылык эмес активдерди сатып алуу;

17) негизги фонддор;

18) стратегиялык запастар;

19) баалуулуктар;

20) өндүрүлбөгөн активдер;

21) финансылык эмес активдерге салымдардын натыйжасында акча каражаттарынын таза агып чыгуусу;

22) дефицит/профицит;

23) каржылоо боюнча операцияларга байланыштуу акча каражаттарынын агымдары;

24) финансылык активдерди (ички, тышкы) таза сатып алуу;

25) милдеттенмелерди (ички, тышкы) таза алуу;

26) каржылоо боюнча операциялардан акча каражаттарынын таза келип түшүүсү;

27) акча каражаттарынын запасындагы таза өзгөрүү, мында:

операциялык иштен акча каражаттарынын таза агып кирүүсү = операциялык иштен түшкөн кирешелер/акча каражаттарынын келип түшүүлөрү - операциялык ишти жүргүзүү үчүн акча каражаттарынын чыгашалары/төлөмдөрү;

финансылык эмес активдерге (ФЭА) салымдардын натыйжасында акча каражаттарынын таза агып чыгуусу = ФЭАны сатып алуу - ФЭАны сатуу;

акча каражаттарынын профицити/дефицити = операциялык иштен акча каражаттарынын таза агып кирүүсү - ФЭАга салымдардын натыйжасында акча каражаттарынын таза агып чыгуусу;

каржылоо боюнча операциялардан акча каражаттарынын таза агып кирүүсү = милдеттенмелерди таза алуу - финансылык активдерди таза сатып алуу;

акча каражаттарынын запасынын таза өзгөрүүсү = акча каражаттарынын профицити/дефицити + каржылоо боюнча операциялардан акча каражаттарынын таза агып кирүүсү.

63¹. Кезектеги бюджеттик жылга жана пландык мезгилге республикалык бюджеттин негизги параметрлерин түзүүдө республикалык бюджеттин дефицитинин чектүү деңгээли ички дүң продуктуга карата 3 пайыздан ашпаган өлчөмдө белгиленет.

(КР Министрлер Кабинетинин 2026-жылдын 6-февралындагы № 67 токтомунун редакциясына ылайык)

63². Республикалык бюджеттин параметрлерин түзүүдө мамлекеттик карыздын ички дүң продуктуга карата чектүү катышы 70 пайыздан ашпаган өлчөмдө белгиленет.

(КР Министрлер Кабинетинин 2026-жылдын 6-февралындагы № 67 токтомунун редакциясына ылайык)

64. Республикалык бюджет жөнүндө мыйзамдын долбоору өзүнө республикалык бюджет жөнүндө мыйзамдын долбооруна түшүндүрмө катты жана ушул Тартиптин 10-тиркемесине ылайык форма боюнча тиркемени камтыйт.

65. Ыйгарым укуктуу мамлекеттик орган зарыл болгон учурда Кыргыз Республикасынын мыйзамдарына ылайык Кыргыз Республикасынын Жогорку Кеңеши (жергиликтүү кеңештер) тарабынан бекитилүүгө же жактырылууга тийиш болгон башка болжолдорду (эсептөөлөрдү, баалоолорду) жана ченемдерди киргизүүгө укуктуу.

10-глава. Республикалык бюджет жөнүндө мыйзамдын долбооруна түшүндүрмө кат

66. Республикалык бюджет жөнүндө мыйзамдын долбооруна түшүндүрмө кат төмөнкүдөй бөлүмдөрдөн турат:

1) өнүктүрүүнүн макроэкономикалык келечектери;

2) бюджеттин киреше бөлүгү;

3) бюджеттин чыгаша бөлүгү;

4) бюджеттин дефицити/профицити;

5) бюджетти аткаруунун тобокелдиктери;

6) программалык бюджеттөө.

67. Ар бир бөлүмдүн жана бөлүмчөнүн сыпаттоо бөлүгүнүн мазмуну беш жылдагы көрсөткүчтөрдү чагылдырган таблицаны камтууга тийиш:

1) өткөн жылдын фактысы;

2) учурдагы мезгил;

3) болжолдонгон үч жыл.

68. "Өнүктүрүүнүн макроэкономикалык келечектери" бөлүмү негизги макроэкономикалык көрсөткүчтөрдү чагылдырат:

1) болжолдонгон үч жылга ички дүң продуктунун (мындан ары - ИДП) өсүшүнө таасир этүүнүн күтүлүүчү тобокелдиктери;

2) беш жылдык мезгилдеги негизги макрокөрсөткүчтөр (өткөн жылдын фактысы, учурдагы мезгил жана болжолдонгон үч жыл):

3) ИДПнын номиналдык көлөмү;

4) инфляциянын деңгээли;

5) ИДПнын реалдуу өсүү темпи.

69. Бөлүм бюджеттин чыгашаларына жана кирешелерине макроэкономикалык божомолдордун (сезимталдыкты талдоо) таасири жөнүндө маалыматты камтыйт.

70. "Бюджеттин киреше бөлүгү" бөлүмү төмөнкүдөй бөлүктөрдөн турат:

1) мурунку эки жыл үчүн киреше бөлүгүнүн негизги көрсөткүчтөрү пландык бюджеттик жылга жана кийинки эки жылга (мамлекеттик жана республикалык бюджеттер), атап айтканда республикалык бюджеттин кирешелеринин толук көлөмү, анын ичинде салыктык, салыктык эмес кирешелер жана алынган расмий трансферттер өткөн жыл үчүн (иш жүзүндөгү маалыматтар), учурдагы жыл үчүн (такталган маалыматтар) жана пландык үч жылдык мезгилге, мурдагы жана пландык мезгил үчүн жылдар боюнча чагылдырылат;

2) учурдагы жылда жана болжолдонгон мезгилде республикалык бюджеттин түшүүлөрүнүн айрым булактарын (бир жолку түшүүлөр) баалоо;

3) пландалган бюджеттик жылда болжолдуу көрсөткүчтөрдүн аткарылбай калуу тобокелдиктери.

71. Пландык мезгилге ар бир параметр ИДПнын тиешелүү номиналдык көлөмүнө карата катышты, ошондой эле мурунку мезгилге карата көрсөткүчтөрдүн өсүүсүн же төмөндөөсүн чагылдырат жана болжолдонгон бюджеттик жылда аткаруу бийлигинин саясатынын республикалык бюджеттин ресурстарына тийгизген таасиринин даражасын баалоо боюнча маалыматты, ар бир салыктык жеңилдикке карата саясаттын максаттарын баяндоо жана негиздөө менен жаңы салыктык преференцияларды берүүнүн натыйжасында алынбай калган кирешелер, болжолдонгон бенефициарлар жана алынбай калган кирешени баалоо жөнүндө маалыматтарды камтыйт.

72. "Бюджеттин чыгаша бөлүгү" бөлүмү функциялык жана/же ведомстволук классификация боюнча чыгашаларды бөлүштүрүү принциби боюнча бөлүнгөн. Ыйгарым укуктуу мамлекеттик орган тейлеген БКБТ боюнча функциялык жана/же ведомстволук классификация боюнча жыйынды түшүндүрмө каттарды түзөт.

73. Пландык мезгилге ар бир параметр көрсөткүчтөрдүн ИДПнын тиешелүү номиналдык көлөмүнө карата катышын, ошондой эле мурунку мезгилге салыштырмалуу өсүүсүн же төмөндөөсүн чагылдырат.

74. Чыгаша бөлүк боюнча маалымат төмөнкүлөрдү камтыйт:

1) функциялык жана/же ведомстволук классификация боюнча өткөн жыл үчүн (иш жүзүндөгү маалыматтар), учурдагы жыл үчүн (бекитилген/такталган маалыматтар) жана жыл боюнча пландалган үч жылдык мезгилге (мындан ары - беш жылдык мезгил) республикалык бюджеттин чыгашаларынын көлөмү;

2) Кыргыз Республикасынын мамлекеттик карызын тейлөөгө багытталган чыгашалар жөнүндө маалыматтар (тышкы жана ички карыз боюнча түзүмдүк көрсөткүчтөр боюнча беш жылдык мезгил үчүн чыгашалардын динамикасын көрсөтүү менен);

3) мамлекеттик ишканалардын (анын ичинде энергетика секторунун) республикалык бюджетке карыздары жөнүндө маалыматтар, таза пайдадан 50 пайыздык чегерүүлөр жана бюджеттик кредиттер боюнча мамлекеттик ишканалардын болгон карыздары боюнча маалыматтар;

4) беш жылдык мезгил үчүн жергиликтүү бюджеттердин кирешелеринин/чыгашаларынын көлөмү, теңдөөчү трансферттердин көлөмү жөнүндө маалымат жана жергиликтүү бюджеттердин түшпөй калган кирешелери жана аларды компенсациялоо жөнүндө маалыматтар;

5) жалпы мамлекеттик чыгашалар боюнча чыгашалардын көлөмү: пландалган мезгилге мамлекеттик программалар, иш-чаралар жана төлөмдөр;

6) беш жылдык мезгилдин аналитикасы менен бюджеттик инвестициялардын көлөмү: капиталдык салымдар, дем берүүчү гранттар жана мамлекеттик инвестициялар.

75. "Бюджеттин дефицити/профицити" бөлүмү тиешелүү пландык мезгилге карата көрсөткүчтөн, ошондой эле бюджеттин дефицитин каржылоо булактарынан/бюджеттин профицитин пайдалануу багытынан турат. Көрсөткүч ИДПнын тиешелүү номиналдык көлөмүнө карата катышты, ошондой эле мурунку мезгилге салыштырмалуу өсүүсүн же төмөндөөсүн чагылдырышы керек.

76. "Бюджетти аткаруу тобокелдиктери" бөлүмү республикалык бюджеттин ар бир түзүүчү бөлүгү боюнча бюджетти аткаруунун тиешелүү мезгилинде бардык күтүлүүчү тобокелдиктерди чагылдырат (өнүктүрүүнүн макроэкономикалык келечектери, бюджеттин киреше жана чыгаша бөлүктөрү). Ар бир бөлүм боюнча тобокелдиктердин сыпаттамасы аныкталган тобокелдиктер үчүн негиздөө катары кыскача талдоону камтууга тийиш.

77. "Программалык бюджеттөө" бөлүмү Кыргыз Республикасын өнүктүрүү программаларынын/стратегияларынын алкагында программалык бюджеттөөнү киргизүү процессин чагылдырат жана алдыдагы мезгилдерге пландалган чаралар жөнүндө маалыматтарды камтыйт.

78. Республикалык бюджет жөнүндө мыйзам долбооруна түшүндүрмө катты түзүү үчүн көрсөткүчтөрдүн тизмеги ушул Тартиптин 11-тиркемесине ылайык форма боюнча түзүлөт.

11-глава. Кезектеги бюджеттик жылга жана пландык мезгилге республикалык бюджет жөнүндө мыйзамга өзгөртүүлөрдү киргизүү

79. Кыргыз Республикасынын Министрлер Кабинети, эгерде республикалык бюджет жөнүндө мыйзам менен бекитилген бюджеттик параметрлердин өзгөрүүсүнө алып келбесе, төмөнкүлөрдү киргизүүгө укуктуу:

1) эгерде бюджеттин киреше бөлүгүн азайтууга алып келбесе, республикалык бюджет жөнүндө мыйзамдын тиркемесине каралган суммалардын чегинде өзгөртүүлөрдү киргизүүгө;

2) тиешелүү органдар кабыл алган ченемдик укуктук актыларга, ошондой эле түзүмдүк өзгөртүүлөргө, өндүрүштүн (жумуштардын, кызмат көрсөтүүлөрдүн) көлөмдөрүнүн, баалардын деңгээлдеринин өзгөрүүлөрүнө ылайык республикалык бюджеттин жергиликтүү өз алдынча башкаруу органдарынын бюджеттери менен өз ара эсептөөлөрүнө тактоолорду киргизүүгө.

80. Кыргыз Республикасынын Министрлер Кабинети өзгөртүүлөр киргизилгенге чейин республикалык бюджеттин негизги параметрлерин өзгөртүү зарыл болгондо, бул өзгөртүүлөрдү карамагына бюджеттик мыйзамдар маселелери кирген Кыргыз Республикасынын Жогорку Кеңешинин профилдик комитети менен макулдашуу боюнча Кыргыз Республикасынын Министрлер Кабинетинин чечимдерине ылайык жүзөгө ашырат.

Кыргыз Республикасынын Жогорку Кеңешинин сессияларынын ортосундагы мезгилде жана депутаттар шайлоочулар менен иштеген мезгилде Кыргыз Республикасынын Министрлер Кабинети зарыл болгондо республикалык бюджет жөнүндө мыйзамга тиешелүү түзөтүүлөр кабыл алынганга чейин республикалык бюджеттин негизги параметрлерине өзгөртүүлөрдү киргизет жана карамагына бюджеттик мыйзамдар маселелери кирген Кыргыз Республикасынын Жогорку Кеңешинин тармактык комитетине маалымат берүү менен аларды аткарат.

81. Республикалык бюджет жөнүндө мыйзамга Кыргыз Республикасынын Бюджеттик кодексинин 115-беренесинде белгиленген учурларда жана мезгилдүүлүктө өзгөртүүлөр киргизилет.

82. Республикалык бюджетке өзгөртүүлөрдү киргизүү бюджеттин аткарылышын талдоонун жана бюджеттик ассигнованиелерди пайдалануунун натыйжалуулугун баалоонун, бюджеттик программаларды ишке ашыруунун натыйжаларынын негизинде жүзөгө ашырылат.

83. Республикалык бюджет жөнүндө мыйзамга өзгөртүүлөрдү киргизүү тууралуу мыйзамдын долбоору ыйгарым укуктуу мамлекеттик орган тарабынан, анын ичинде автоматташтырылган системада түзүлөт.

84. Өзгөртүүлөр жана толуктоолор кийинки пландык мезгилге республикалык бюджеттин параметрлерин өзгөртүүсүз учурдагы жылдын республикалык бюджетинин параметрлерине киргизилет.

85. Бюджеттик программалардын натыйжалуулугуна мониторинг жүргүзүү жана баалоо максатында кийинки пландык мезгилге программалык негизде республикалык бюджеттин параметрлерине өзгөртүүлөр жана толуктоолор киргизилиши мүмкүн.

12-глава. Аткаруу процессинде бюджеттик каражаттарды кайра бөлүштүрүү

86. Бюджеттик системанын бюджеттеринин бюджеттик каражаттарын кайра бөлүштүрүү чыгашалардын ведомстволук, экономикалык, функциялык жана программалык классификациясы боюнча жалпы бюджеттик ассигнованиелердин чегинде жүзөгө ашырылат.

87. Бюджеттик системанын бюджеттеринин бюджеттик каражаттарын кайра бөлүштүрүү төмөнкүдөй түрлөрдө жүзөгө ашырылат:

1) ички ведомстволук кайра бөлүштүрүү;

2) республикалык бюджеттин алкагында ведомстволор аралык кайра бөлүштүрүү (мындан ары - ведомстволор аралык кайра бөлүштүрүү).

88. Ички ведомстволук кайра бөлүштүрүү экономикалык классификациянын (финансылык активдерди кошо алганда), ведомстволук классификациянын беренелеринин, функциялык классификациянын бөлүмдөрүнүн жана бюджеттик программалардын ортосунда бир БКБТ/БКТ/БКА бюджеттик ассигнованиелердин чегинде жүзөгө ашырылат.

89. БКБТ төмөнкү бир же бир нече негиздөөлөрдүн негизинде ички ведомстволук кайра бөлүштүрүүнүн зарылдыгын аныктайт:

1) каралган бюджеттик ассигнованиелерди өздөштүрүүнү талдоо;

3) мурда бюджетте каралбаган иш-чараларды оперативдүү каржылоонун зарылдыгы;

4) мамлекеттик саясаттын артыкчылыктарын, чыгашалардын айрым беренелери боюнча бюджетти аткаруунун жүрүшүндө иш жүзүндөгү жана болжолдонгон четтөөлөрдү өзгөртүү;

5) мамлекеттик кызмат көрсөтүүлөрдүн үзгүлтүксүздүгүн камсыз кылуу үчүн ведомстволук мекемелердин ортосунда каражаттарды кайра бөлүштүрүү зарылдыгы;

6) биринчи кезектеги бюджеттик милдеттенмелерге (эмгек акы, коммуналдык кызмат көрсөтүүлөр, тамак-аш, медикаменттер ж.б.) каражаттардын жетишсиздиги жөнүндө ведомстволук уюмдардан кайрылуулардын келип түшүүсү;

7) чыгашаларды бөлүштүрүүнү ыкчам түзөтүүнү талап кылган тышкы факторлор (өзгөчө кырдаалдар, ченемдик укуктук актылардын өзгөрүшү ж.б.).

90. Республикалык бюджет боюнча ички ведомстволук кайра бөлүштүрүү мындай кайра бөлүштүрүүнүн негиздемеси берилген ыйгарым укуктуу мамлекеттик орган менен макулдашуу боюнча жүргүзүлөт.

91. Ички ведомстволук кайра бөлүштүрүү жана мындай кайра бөлүштүрүүнүн натыйжалары жөнүндө БКБТ отчету ыйгарым укуктуу мамлекеттик органга бюджеттик каражаттарды кайра бөлүштүрүү жүргүзүлгөн күнү СКны пайдалануу менен автоматташтырылган системада гана ушул Тартиптин 12-15-тиркемелерине ылайык формалар боюнча бюджетке өзгөртүүлөрдү киргизүүгө/бюджеттик каражаттарды кайра бөлүштүрүүгө кабарлама-маалымкат түрүндө берилет. Бюджетке өзгөртүүлөрдү киргизүүгө/бюджеттик каражаттарды кайра бөлүштүрүүгө кабарлама-маалымкаттарды кагаз сактагычтарда суратууга/берүүгө жол берилбейт.

92. Ведомстволор аралык кайра бөлүштүрүү БКБТнын чыгашаларын каржылоого "Жалпы мамлекеттик программалар, иш-чаралар жана төлөмдөр" бөлүмү боюнча каралган каражаттарды кайра бөлүштүрүүнү кошо алганда, БКБТнын ортосунда жүзөгө ашырылат.

93. Ведомстволор аралык кайра бөлүштүрүү каражаттары башка БКБТга кайра бөлүштүрүлүүгө тийиш болгон БКБТ менен макулдашуу боюнча Кыргыз Республикасынын Министрлер Кабинетинин чечими боюнча жүзөгө ашырылат.

94. Ведомстволор аралык кайра бөлүштүрүү жөнүндө Кыргыз Республикасынын Министрлер Кабинетинин чечими кабыл алынгандан кийин кезектүүлүк тартибинде төмөнкү иш-чаралар жүзөгө ашырылат:

1) каражаттары кайра бөлүштүрүлүп жаткан БКБТ "минус" белгиси менен Кыргыз Республикасынын Министрлер Кабинетинин чечиминде көрсөтүлгөн тиешелүү суммаларды көрсөтүү менен СКны пайдалануу менен бюджетке өзгөртүүлөрдү киргизүү/бюджеттик каражаттарды кайра бөлүштүрүү жөнүндө кабарлама-маалымкатты автоматташтырылган системага киргизет;

2) каражаттар кайра бөлүштүрүлүп жаткан БКБТ "плюс" белгиси менен Кыргыз Республикасынын Министрлер Кабинетинин чечиминде көрсөтүлгөн тиешелүү суммаларды көрсөтүү менен СКны пайдалануу менен бюджетке өзгөртүүлөрдү киргизүү/бюджеттик каражаттарды кайра бөлүштүрүү жөнүндө кабарлама-маалымкатты автоматташтырылган системага киргизет;

3) ыйгарым укуктуу мамлекеттик орган ушул пункттун 1 жана 2-пунктчаларында көрсөтүлгөн кабарлама-маалымкаттардын Кыргыз Республикасынын Министрлер Кабинетинин чечимине ылайык экендигин карайт жана аларды ырастайт.

95. Ыйгарым укуктуу мамлекеттик орган тарабынан автоматташтырылган системада 94-пункттун 1 жана 2-пунктчаларында көрсөтүлгөн кабарлама-маалымкаттар ырасталгандан кийин БКБТ кайра бөлүштүрүлгөн каражаттарды пайдаланууга укуктуу.

96. Кыргыз Республикасынын Министрлер Кабинети автоматташтырылган системага СКны пайдалануу менен бюджетке өзгөртүүлөрдү киргизүү/бюджеттик каражаттарды кайра бөлүштүрүү жөнүндө кабарлама-маалымкаттар аркылуу мурда БКБТ/БКТ/БКА тарабынан киргизилген бошогон бюджеттик каражаттарды төмөнкүлөрдүн эсебинен кайра бөлүштүрүүгө укуктуу:

1) чыгашалардын башка категорияларын, анын ичинде "Жалпы мамлекеттик программалар, иш-чаралар жана төлөмдөр" бөлүмүндө каралган каражаттарды оптималдаштыруунун;

2) аткарууну талдоонун негизинде белгиленген республикалык бюджеттин чыгашалары боюнча үнөмдөөнүн;

3) бюджеттик мекемелерди каржылоодо жылдык отчеттор, тиешелүү жылга республикалык бюджетти аткаруунун жыйынтыктары жөнүндө Кыргыз Республикасынын Эсептөө палатасынын аудитинин натыйжалары боюнча эсептөөлөрдө товардык-материалдык баалуулуктардын ченемден ашыкча запастарын жана каражаттардын калдыктарын эсепке алууга байланыштуу чыгашалар боюнча үнөмдөөнүн.

97. Ушул Тартиптин 96-пунктуна ылайык кайра бөлүштүрүү Кыргыз Республикасынын Министрлер Кабинетинин чечимдерине ылайык жүзөгө ашырылат.

13-глава. Жергиликтүү бюджеттерди аткаруу процессинде алардын каражаттарын кайра бөлүштүрүү

98. Жергиликтүү бюджеттерди аткаруу процессинде жалпы бюджеттик ассигнованиелердин чегинде бюджеттик каражаттарды кайра бөлүштүрүүгө жол берилет.

Бюджеттик каражаттар тиешелүү жергиликтүү кеңеш тарабынан аныкталган тартипке ылайык кайра бөлүштүрүлөт.

14-глава. Бюджетти кошумча каржылоо

99. Республикалык бюджеттин кошумча чыгашалары (мындан ары - кошумча чыгашалар) - бул республикалык бюджет жөнүндө мыйзамда мурда каралбаган жана аларды бөлүү республикалык бюджеттин негизги параметрлеринин өзгөрүшүнө алып келген республикалык бюджеттин чыгашалары.

100. Кошумча чыгашалар республикалык бюджеттин кошумча булактарынын эсебинен каржыланат.

101. Республикалык бюджеттин кошумча булактары болуп төмөнкүлөр саналат:

1) өткөн бюджеттик жылда кирешелер планын ашыкча аткаруунун же чыгашалар боюнча үнөмдөөнүн натыйжасында бюджеттик жылдын башында пайда болгон бюджеттик каражаттардын эркин калдыктары;

2) республикалык бюджеттин ресурстук бөлүгүнө мурда республикалык бюджет жөнүндө мыйзамда каралбаган кошумча түшүүлөр;

3) Кыргыз Республикасынын Министрлер Кабинетинин чечимдерине жана ченемдик укуктук актыларга ылайык мурда республикалык бюджет жөнүндө мыйзамда каралган конкреттүү чыгашаларды каржылоого багытталган кошумча түшүүлөр болгон учурда республикалык бюджет жөнүндө мыйзамда каралган республикалык бюджеттин бошогон ресурстары;

4) мурда кайра бөлүштүрүүгө багытталбаган республикалык бюджеттин чыгашалары боюнча үнөмдөө, ошондой эле эгерде үнөмдөөнүн суммасы кайра бөлүштүрүү үчүн зарыл болгон сумманы жаппаган учурда үнөмдөө.

102. Кошумча чыгашанын айрым түрүн жабуу үчүн ушул Тартиптин 101-пунктунда көрсөтүлгөн бир нече булактардын айкалышы колдонулушу мүмкүн.

103. Республикалык бюджеттин кошумча булактары ресурстар менен жалпы чыгашалардын ортосундагы ажырымды жабууга багытталышы мүмкүн.

104. БКБТ/БКТ экономикалык классификация боюнча кошумча чыгашаларга, анын ичинде эмгек акы төлөө фондунун өлчөмдөрүн көбөйтүүгө тиешелүү эсептөөлөрдү ыйгарым укуктуу мамлекеттик органга берет.

105. Кыргыз Республикасынын Министрлер Кабинетинин ченемдик укуктук актыларына жана тескемелерине ылайык кошумча чыгашалар СКны колдонуу менен автоматташтырылган системада бюджетке өзгөртүүлөрдү киргизүү/бюджеттик каражаттарды кайра бөлүштүрүү жөнүндө кабарлама-маалымкат түрүндө бөлүштүрүлөт.

106. Ыйгарым укуктуу мамлекеттик орган республикалык бюджет жөнүндө мыйзамга өзгөртүүлөр киргизилгенге чейин кошумча чыгашаларды каржылоо максатында учурдагы жылга республикалык бюджеттин чыгашаларынын кошумча реестрин (мындан ары - кошумча реестр) даярдайт.

107. Кошумча реестрге Кыргыз Республикасынын Министрлер Кабинетинин чечимдерине, ченемдик актыларга, ошондой эле Кыргыз Республикасынын Жогорку Кеңешинин профилдик комитетинин чечимдерине ылайык республикалык бюджет жөнүндө мыйзамга өзгөртүүлөр киргизилгенге чейин каралган кошумча чыгашалар ушул Тартиптин 16-тиркемесине ылайык форма боюнча киргизилет.

15-глава. Бюджеттик процесстин катышуучуларынын жоопкерчилиги

108. БКБТ/БКТ/БКАнын жетекчилери бюджеттик эсептердеги жана атайын эсептердеги каражаттардын сапаттуу пландалышы жана максаттуу пайдаланылышы үчүн жоопкерчилик тартат.

109. Бюджеттик процесстин катышуучуларынын бюджеттик мыйзамдарды бузгандыгы үчүн жоопкерчилик принциби Кыргыз Республикасынын бюджеттик мыйзамдарында каралган.

110. Мамлекеттик органдардын финансылык тартипти сактоосун контролдоо жана мониторинг жүргүзүү Кыргыз Республикасынын бюджеттик мыйзамдарында жана башка ченемдик укуктук актыларда каралган.

Бюджеттик каражаттар боюнча чыгашалардын СМЕТАСЫ № ___________________

____________________________________________________ (бюджеттик каражаттарды башкы тескөөчүнүн аталышы)

(миң сом)

Бюджеттик каражаттар боюнча чыгашалардын СМЕТАСЫ № ________________

__________________________________________________________________ (бюджеттик каражаттарды башкы тескөөчүнүн аталышы)

__________________________________________________________________ (бюджеттик каражаттарды алуучунун аталышы)

(миң сом)

Атайын эсептердеги каражаттарды эсепке алуу боюнча кирешелердин жана чыгашалардын СМЕТАСЫ № _________

__________________________________________________________________ (бюджеттик каражаттарды башкы тескөөчүнүн аталышы)

(миң сом)

Атайын эсептердеги каражаттарды эсепке алуу боюнча кирешелердин жана чыгашалардын СМЕТАСЫ № ____________

__________________________________________________________________ (бюджеттик каражаттарды башкы тескөөчүнүн аталышы)

__________________________________________________________________ (бюджеттик каражаттарды алуучунун аталышы)

 (миң сом)

_______-жылга типтүү штаттык расписание

Мамлекеттик/муниципалдык органдын аталышы

(сом менен)

_____-жылга жыйынды штаттык расписание

Мамлекеттик/муниципалдык органдын аталышы

(сом менен