КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ

2026-жылдын 30-марты № 201

Кыргыз Республикасынын Министрлер Кабинетинин 2023-жылдын 3-мартындагы № 115 "Кыргыз Республикасынын Министрлер Кабинетинин айрым ченем жаратуу ыйгарым укуктарын мамлекеттик органдарга жана жергиликтүү өз алдынча башкаруунун аткаруу органдарына өткөрүп берүү жөнүндө" токтомуна өзгөртүү киргизүү тууралуу

"Кыргыз Республикасындагы инвестициялар жөнүндө" Кыргыз Республикасынын Мыйзамынын 9-беренесинин тиешелүү талаптарын аткаруу үчүн, отчеттуулуктун формаларын бекитүү жана аларды бекитүү боюнча ыйгарым укуктарды өткөрүп берүү маселелериндеги ченемдик-методикалык базаны тартипке келтирүү максатында, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Министрлер Кабинетинин 2023-жылдын 3-мартындагы № 115 "Кыргыз Республикасынын Министрлер Кабинетинин айрым ченем жаратуу ыйгарым укуктарын мамлекеттик органдарга жана жергиликтүү өз алдынча башкаруунун аткаруу органдарына өткөрүп берүү жөнүндө" токтомуна төмөнкүдөй өзгөртүү киргизилсин:

жогоруда аталган токтомдун 1-тиркемесинде:

- төмөнкүдөй мазмундагы 35-пункт менен толукталсын:

"35. Кыргыз Республикасынын Президентине караштуу Инвестициялар боюнча улуттук агенттикке төмөнкүлөрдү бекитүү боюнча:

1) мамлекеттик органдар жана жергиликтүү өз алдынча башкаруу органдары тарабынан Кыргыз Республикасынын Президентине караштуу Инвестициялар боюнча улуттук агенттикке инвестицияларды тартуу жана инвестициялык долбоорлорду ишке ашыруу маселелери боюнча потенциалдуу инвесторлор менен өткөрүлгөн жолугушуулардын жыйынтыктары жөнүндө маалыматты берүү формасын;

2) мамлекеттик органдар жана жергиликтүү өз алдынча башкаруу органдары тарабынан Кыргыз Республикасынын Президентине караштуу Инвестициялар боюнча улуттук агенттикке календарлык жыл аяктагандан кийин инвестицияларды тартуу жана инвестициялык долбоорлорду ишке ашыруу боюнча жыйынтыктоочу маалыматты берүү формасын;

3) Кыргыз Республикасынын Президентине караштуу Инвестициялар боюнча улуттук агенттик тарабынан Кыргыз Республикасынын Президентине жана Кыргыз Республикасынын Министрлер Кабинетинин Төрагасына календарлык жыл аяктагандан кийин инвестициялык климаттын талдоосун жана Кыргыз Республикасында инвестициялык долбоорлордун ишке ашырылышы жөнүндө маалыматты берүү формасын.".

2. Бул токтомду ишке ашыруу тиешелүү жылга жана кийинки жылдарга Кыргыз Республикасынын Президентине караштуу Инвестициялар боюнча улуттук агенттик үчүн республикалык бюджетте каралган каражаттардын жана бекитилген штаттык персоналдын санынын алкагында жүзөгө ашырылат деп белгиленсин.

3. Бул токтом расмий жарыяланган күндөн тартып он беш күн өткөндөн кийин күчүнө кирет.

«Эркин-Тоо» мамлекеттик расмий гезитинин 2026-жылдын 3-апрелиндеги № 25 (3785) саны менен жарыяланды