ОШ ШААРДЫК КЕӉЕШИ

ТОКТОМ

ОШ ШААРДЫК КЕҢЕШИНИН КЕЗЕКСИЗ XIII СЕССИЯСЫ

 (VI ЧАКЫРЫЛЫШ)

2025-жылдын 10-сентябры  № 81

Түнкү убакта коомдук тынчтыкты камсыз кылуу жөнүндө

Кыргыз Республикасынын 2024-жылдын 6-декабрындагы №194 «Тынчтык жөнүндө» мыйзамын, Кыргыз Республикасынын “Жергиликтүү мамлекеттик администрация жана жергиликтүү өз алдынча башкаруу органдары жөнүндө” мыйзамынын 34-беренесин, Кыргыз Республикасынын Президентинин 2022-жылдын 24-февралындагы №54 «Кыргыз Республикасында үй-бүлөлүк салтанаттарды жана маркумду эскерүү үрп-адаттарын тартипке келтирүү боюнча чаралар жөнүндө» жарлыгын жана Кыргыз Республикасынын Президентинин 2025-жылдын 14-августундагы №27-19633 чыгыш катын жетекчиликке алып, Ош шаарынын мэриясынын аппарат жетекчиси М.Айдарбекованын түнкү убакта коомдук тынчтыкты камсыз кылуу жөнүндө сунушун угуп жана талкуулап, Ош шаардык Кеңешинин мыйзамдуулук, укук-тартип, депутаттык этика, регламент, мандат жана дин маселелери боюнча туруктуу депутаттык комиссиясынын 2025-жылдын 5-сентябрындагы №9 чечимин эске алып, Ош шаардык Кеңеши токтом кылат:

1.Ош шаарынын мэриясына (Ж.Токторбаев) Ош шаарынын аймагындагы ресторандардын, банкет залдардын жана түнкү клубдардын ээлери менен Кыргыз Республикасынын 2024-жылдын 6-декабрындагы № 194 “Тынчтык жөнүндө” мыйзамынын талаптарын аткаруу боюнча түшүндүрүү иштерин алып баруу милдеттендирилсин.

2. Төмөнкү убакыт аралыгында үн басымынын жана ызы-чуунун белгиленген деңгээлдеринен ашууга жол берилбестиги белгиленсин:

- жумуш күндөрү саат 22:00дөн 07:00гө чейин;

- дем алыш жана майрам күндөрү саат 22:00дөн 09:00гө чейин.

3.Ош шаардык ички иштер башкармалыгы аталган чектөөлөрдүн аткарылышына көзөмөл жүргүзсүн.

4.Токтом мыйзамда каралган тартипте катталсын, жалпыга маалымдоо каражаттарына жарыялансын жана Кыргыз Республикасынын ченемдик-укуктук актыларынын реестрине киргизүү үчүн Ош юстиция башкармалыгына жөнөтүлсүн.

5. Токтом расмий жарыяланган күндөн баштап күчүнө кирет.

6.Токтомдун аткарылышын көзөмөлдөө Ош шаардык Кеңешинин мыйзамдуулук, укук-тартип, депутаттык этика, регламент, мандат жана дин маселелери боюнча туруктуу депутаттык комиссияга (А.Тургунбаев) жүктөлсүн.