КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИНИН ТОКТОМУ

2026-жылдын 6-апрели № 224

Мамлекеттик сатып алуулар жол-жоболорунун айрым маселелери жөнүндө

Cатып алуулар чөйрөсүндө бирдиктүү маалыматтык мейкиндикти түзүү максатында, "Мамлекеттик сатып алуулар жөнүндө" Кыргыз Республикасынын Мыйзамынын 17, 45-беренелерине, "Кыргыз Республикасынын Министрлер Кабинети жөнүндө" Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Министрлер Кабинетинин 2023-жылдын 19-сентябрындагы № 489 "Мамлекеттик сатып алуулар жол-жоболорун жүргүзүү тартибин бекитүү жөнүндө" токтомуна төмөнкүдөй өзгөртүүлөр киргизилсин:

жогоруда аталган токтом менен бекитилген Мамлекеттик сатып алуулар жол-жоболорун жүргүзүү тартибинде:

- 24-пункттун 22, 32, 38, 42, 44, 46, 48, 53, 54, 56-пунктчалары күчүн жоготту деп таанылсын;

- 180-пункт төмөнкүдөй мазмундагы алтынчы абзац менен толукталсын:

"- Кыргыз Республикасынын ченемдик укуктук актыларында белгиленген тартипте сый акы алууга.".

2. Кыргыз Республикасынын Финансы министрлиги, Кыргыз Республикасынын Министрлер Кабинетине караштуу Мамлекеттик мүлктү башкаруу боюнча мамлекеттик агенттик 2027-жылдын аягына чейинки мөөнөттө мамлекеттик сатып алуулардын (www.zakupki.gov.kg) жана мамлекеттик жана муниципалдык ишканалардын, уставдык капиталга катышуу үлүшүнүн 50 жана андан көп пайызы мамлекетке таандык болгон чарбалык коомдордун, анын ичинде алардын туунду чарбалык коомдорунун сатып алууларынын (www.zakupki.okmot.kg) электрондук порталдарында бирдиктүү маалыматтык панелди түзүү үчүн аналитикалык модулу бар "Бирдиктүү терезе" системасын иштеп чыксын жана киргизсин.

3. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

4. Бул токтом расмий жарыяланган күндөн тартып жети күн өткөндөн кийин күчүнө кирет.