Кыргыз Республикасынын Министрлер Кабинетинин 2025-жылдын 14-ноябрындагы № 739 «Кылмыштуу ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө» Кыргыз Республикасынын Мыйзамын ишке ашыруу боюнча чаралар тууралуу» токтомуна өзгөртүүлөрдү киргизүү жөнүндө

Кардарларды алыстан санариптик идентификациялоо жана верификациялоо жүргүзүү тартибин өркүндөтүү, «Кылмыштуу ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө» Кыргыз Республикасынын Мыйзамынын 18-беренесинин 3-пунктун ишке ашыруу максатында, «Кыргыз Республикасынын Министрлер Кабинети жөнүндө» Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Министрлер Кабинетинин 2025-жылдын 14-ноябрындагы № 739 «Кылмыштуу ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө» Кыргыз Республикасынын Мыйзамын ишке ашыруу боюнча чаралар тууралуу» токтомуна төмөнкүдөй өзгөртүүлөр киргизилсин:

жогоруда аталган токтом менен бекитилген Кардарга талаптагыдай текшерүү жүргүзүү тартиби жөнүндө жободо:

– 11-пункт төмөнкүдөй мазмундагы абзац менен толукталсын:

«Орточо тобокелдик критерийлери финансылык мекемелер тарабынан өз алдынча белгиленет.»;

– 19-пункт төмөнкүдөй редакцияда баяндалсын:

«19. Кардарды – жеке жакты иштиктүү мамилелерди түзүүдө жана операцияларды (бүтүмдөрдү) алыстан ыкма менен жүзөгө ашырууда, анын ичинде банк эсебин, финансылык мекемелердеги эсептерди, ошондой эле электрондук капчыкты ачууда идентификациялоо жана верификациялоо ушул Жобонун 5-тиркемесинде белгиленген тартипте жүзөгө ашырылат.

Кыргыз Республикасынын Улуттук банкы жана башка ыйгарым укуктуу мамлекеттик текшерүү органдары (анын ичинде финансы рыногун жөнгө салуу жана көзөмөлдөө боюнча орган) өздөрүнүн компетенциясынын чегинде санариптик идентификациялоону жана верификациялоону жүргүзүүгө кошумча талаптарды, анын ичинде идентификациялоо жана верификациялоо жол-жоболоруна, колдонулган технологияларга, маалыматтык коопсуздукту камсыздоого, маалыматтарды сактоого жана коргоого, ошондой эле тобокелдиктерди башкарууга талаптарды белгилөөгө укуктуу.»;

– 47-пункт төмөнкүдөй мазмундагы абзац менен толукталсын:

«Кыргыз Республикасынын Улуттук банкынын көзөмөлүндөгү юридикалык жактардан тышкары, финансылык мекеме жогорку тобокелдиктеги өлкөлөрдүн тизмесине кирбеген юрисдикциялардын резиденти болуп саналган үчүнчү жак (финансылык мекеме) тарабынан жүргүзүлгөн чет мамлекеттин жараны болгон кардарды идентификациялоо жана верификациялоо боюнча чараларга таянууга укуктуу. Мындай аутсорсингге үчүнчү жак тарабынан чогултулган идентификациялык маалыматтарга дароо жетүү мүмкүнчүлүгү финансылык уюм тарабынан камсыз кылынган шартта жазуу жүзүндөгү макулдашуунун негизинде гана жана финансылык мекеменин үчүнчү тарап чет элдик компетенттүү органдар тарабынан КИК/ККЛК чөйрөсүндө адекваттуу көзөмөлдөнүүгө тийиш экендигине ишеними болгон учурда жол берилет. Жүргүзүлгөн идентификациялоонун жана верификациялоонун сапаты үчүн акыркы жоопкерчилик Кыргыз Республикасынын финансылык мекемесинде калат.»;

– 57-пункт төмөнкүдөй мазмундагы абзац менен толукталсын:

«Финансылык мекеменин кызматкерлери жана финансылык эмес категориядагы адамдар кардарды талаптагыдай текшерүүнүн жүрүшүндө алынган маалыматтардын сакталышы жана ачыкка чыкпоосу үчүн жеке жоопкерчилик тартат.»;

– жогоруда көрсөтүлгөн Жобонун 5-тиркемесинде:

аталышы төмөнкүдөй редакцияда баяндалсын: «Алыстан ыкма менен иштиктүү мамилелерди түзүүчү жана операцияларды (бүтүмдөрдү) жүзөгө ашыруучу кардарды санариптик идентификациялоо жана верификациялоо тартиби»;

1-пункт төмөнкүдөй редакцияда баяндалсын:

«1. Бул Тартип алыстан ыкма менен иштиктүү мамилелерди түзүүчү жана операцияларды (бүтүмдөрдү) жүзөгө ашыруучу кардарды – жеке адамды санариптик идентификациялоо жана верификациялоо үчүн (мындан ары – кардарды санариптик идентификациялоо жана верификациялоо) талаптарды жана шарттарды белгилейт.

Бул Тартиптин технологиялык коопсуздуктун стандарттарын, биометрикалык көрсөтүүнүн аныктыгына чабуулдарга каршы аракеттенүүнү жана санариптик чөйрөдө документтердин аныктыгын текшерүү алгоритмдерин белгилеген жоболору иштиктүү мамилелерди аралыктан түзүүдө юридикалык жактардын бенефициардык ээлеринин жана кардардын (өкүлдөрүнүн) атынан аракеттенген адамдардын инсандыгын аралыктан аныктоо жана верификациялоо жол-жоболоруна тиешелүү айырмачылыктарды эске алуу менен колдонулат.»;

2-пункт төмөнкүдөй мазмундагы 7-пунктчa менен толукталсын:

«7) Кыргыз Республикасынын Экономика жана коммерция министрлигине караштуу Финансы рыногун жөнгө салуу жана көзөмөлдөө кызматынын көзөмөлүндөгү башка финансылык мекемелер.»;

3-пункт төмөнкүдөй мазмундагы 8-пунктчa менен толукталсын:

«8) финансылык мекемелерде кардарлардын эсептерин ачуу.»;

4-пункт төмөнкүдөй редакцияда баяндалсын:

«4. Кыргыз Республикасынын Улуттук банкы жана башка ыйгарым укуктуу мамлекеттик текшерүү органдары (анын ичинде финансылык рынокту жөнгө салуу жана көзөмөлдөө боюнча орган) өздөрүнүн компетенциясынын чегинде жана сектордук тобокелдиктерди эске алуу менен маалыматтык системаларга уюштуруу-техникалык талаптарды, алдамчылыкка каршы алгоритмдерди, ошондой эле санариптик идентификациялоо жол-жоболорун колдонуу менен ачылган эсептер боюнча операцияларды жүргүзүүгө катуу сандык жана сапаттык чектөөлөрдү ченемдик укуктук актылар менен белгилөөгө укуктуу. Көрсөтүлгөн кошумча талаптар ушул Тартипте белгиленген кардарды талаптагыдай текшерүүнүн базалык стандарттарын жеңилдете албайт же жокко чыгара албайт.»;

6-пункт төмөнкүдөй редакцияда баяндалсын:

«6. Кардарды санариптик идентификациялоо жана верификациялоо Кыргыз Республикасынын жарандарына жана Кыргыз Республикасынын Министрлер Кабинетинин 2025-жылдын 14-ноябрындагы № 739 «Кылмыштуу ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө» Кыргыз Республикасынын Мыйзамын ишке ашыруу боюнча чаралар тууралуу» токтому менен бекитилген Жогорку тобокелдиктеги өлкөлөргө карата чараларды (санкцияларды) колдонуу тартиби жөнүндө жобонун талаптарына ылайык түзүлгөн жогорку тобокелдиктеги өлкөлөрдүн тизмегине кирбеген өлкөлөрдүн чет өлкөлүк жарандарына карата кардар менен иштиктүү мамилелерди түзүүдө колдонулат.

Кыргыз Республикасынын Улуттук банкынын көзөмөлүндөгү финансылык мекемелер Кыргыз Республикасынын аймагында чет өлкөлүк жарандар туруктуу же убактылуу жашаган шартта аларды санариптик идентификациялоону жана верификациялоону жүргүзөт.»;

7-пункт төмөнкүдөй мазмундагы абзац менен толукталсын:

«Муну менен бирге финансылык мекемелер жетүү мүмкүнчүлүгүн берүүнүн ишенимдүү механизмдерин колдонууга милдеттүү, анын ичинде:

– видео байланыш аркылуу идентификациялоо жана верификациялоо технологияларын (текшерүүнүн кошумча инструменти катары);

– беткаптарды, сүрөттөрдү жана башка инсанды алмаштыруу каражаттарын колдонууну жокко чыгаруу үчүн жандуулугун текшерүү методдорун (liveness check);

– кардардын атынан уруксатсыз кирүүнү жана алдамчылык иш-аракеттерди алдын алуу боюнча чараларды.»;

8-пунктта:

3-пунктча төмөнкүдөй редакцияда баяндалсын:

«3) кардар – Кыргыз Республикасынын жаранынын мобилдик телефон номериндеги өлкөнүн эл аралык коду улуттук кодго дал келбесе, ошондой эле анын IP-дареги чет өлкөдө жүргөндүгүнүн объективдүү себептерин (мисалы эл аралык роуминг, тунук маршрутизациялоосу менен корпоративдик VPN-тармактарды колдонуу) документ же алгоритм менен тастыктоосуз Кыргыз Республикасынын чегинен тышкары жайгашса;»;

төмөнкүдөй мазмундагы 3¹–3³-пунктчалар менен толукталсын:

«3¹) кардар тарабынан реалдуу тармак дарегин (VPN, proxy-серверлер, Tor тармагы) жашырууга же алмаштырууга арналган программалык же аппараттык камсыздоонун колдонулушу аныкталса же кардардын түзүлүшүн алыстан башкаруу сеансынын белгилери (RDP, TeamViewer, AnyDesk жана ушул сыяктуулар) аныкталса;

3²) түзүлүштүн идентификаторлору (Device ID, IMEI, MAC-дареги) ушул финансылык мекемеде санариптик идентификациялоодон өтүү үчүн мурун башка кардарлар тарабынан колдонулган түзүлүштөрдүн маалыматтарына дал келгендиги аныкталса;

3³) эгерде идентификациялык маалыматтарды санкцияланбаган алмаштыруу алгоритмдери (Anti-Spoofing) жасалмалоо, монтаждоо каражаттарын, камера эмуляторлорун же жасалма интеллектти (Deepfake) колдонуунун орточо же жогорку ыктымалдыгын белгилесе;»;

төмөнкүдөй мазмундагы 10¹-пунктча менен толукталсын:

«10¹) финансылык мекеменин жогорку жетекчилигинен иштиктүү мамилелерди белгилөөгө жазуу жүзүндөгү (электрондук) макулдук алганга жана каражаттын келип чыгуу булагын белгилегенге чейин кардардын маалыматтары улуттук коомдук кызмат адамдарынын (ККА), чет элдик ККАлардын же эл аралык уюмдар тарабынан маанилүү функциялар ишенип берилген адамдардын электрондук маалыматтар базаларына дал келсе;»;

9-пунктта ««Паспорт», «Жүзүнөн таануу система үчүн чакан системалар» автоматташтырылган маалыматтык системасынан веб-сервистер аркылуу кармоочунун электрондук сервистери» деген сөздөр «ээсинин электрондук сервистери аркылуу веб-сервистер» деген сөздөргө алмаштырылсын;

10-пункт төмөнкүдөй редакцияда баяндалсын:

«10. Финансылык мекеме Кыргыз Республикасынын Министрлер Кабинетинин токтому менен бекитилген Кыргыз Республикасынын жарандарынын улуттук паспортторунун мамлекеттик реестринен маалымат берүү тартиби жөнүндө жобого ылайык Кыргыз Республикасынын Президентинин Иш башкармасы тарабынан аныкталган тартипте мамлекеттик электрондук сервистерге кирүү мүмкүнчүлүгүн алат.»;

15-пункт төмөнкүдөй редакцияда баяндалсын:

«15. Кардар – Кыргыз Республикасынын Министрлер Кабинетинин 2025-жылдын 14-ноябрындагы № 739 «Кылмыштуу ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө» Кыргыз Республикасынын Мыйзамын ишке ашыруу боюнча чаралар тууралуу» токтому менен бекитилген Жогорку тобокелдиктеги өлкөлөргө карата чараларды (санкцияларды) колдонуу тартиби жөнүндө жобонун талаптарына ылайык түзүлгөн жогорку тобокелдиктеги өлкөлөрдүн тизмегине кирбеген чет мамлекеттин жаранын санариптик идентификациялоо жана верификациялоо кардар тарабынан берилген маалыматтардын негизинде, берилген электрондук сүрөттөрдүн жана документтердин көчүрмөлөрүнүн аныктыгын текшерүүнү камсыз кылуучу маалыматтык системаларды (программалык камсыздоону) милдеттүү түрдө пайдалануу менен жүргүзүлөт.»;

төмөнкүдөй мазмундагы 15¹-пункт менен толукталсын:

«15¹. Кардарды – чет мамлекеттин жаранын ал жараны жана (же) резиденти болгон мамлекет финансылык чалгындоо органы тарабынан Жогорку тобокелдиктеги өлкөлөргө карата чараларды (санкцияларды) колдонуу тартиби жөнүндө жобого (Кыргыз Республикасынын Министрлер Кабинетинин 2025-жылдын 14-ноябрындагы № 739 «Кылмыштуу ишти каржылоого жана кылмыштуу кирешелерди легалдаштырууга (адалдоого) каршы аракеттенүү жөнүндө» Кыргыз Республикасынын Мыйзамын ишке ашыруу боюнча чаралар тууралуу» токтомуна 10-тиркеме) ылайык талаптагыдай текшерүүнүн же максаттуу контрчаралардын күчөтүлгөн чаралары көрүлгөн жогорку тобокелдиктеги өлкөлөрдүн тизмегине киргизилбеген шартта санариптик идентификациялоо жана верификациялоо кардар тарабынан берилген маалыматтардын негизинде, берилген электрондук сүрөттөрдүн жана документтердин көчүрмөлөрүнүн аныктыгын криптографиялык жана алгоритмдик текшерүүнү камсыз кылуучу маалыматтык системаларды (программалык камсыздоону) милдеттүү түрдө колдонуу менен жүргүзүлөт.»;

төмөнкүдөй мазмундагы 17¹-пункт менен толукталсын:

«17¹. Финансылык мекеме кардарды – чет мамлекеттин жаранын идентификациялоо жана верификациялоо боюнча жогорку тобокелдиктеги өлкөлөрдүн тизмегине киргизилбеген юрисдикциянын резиденти болуп саналган үчүнчү тарап (финансылык мекеме) жүргүзгөн чараларга таянууга укуктуу. Мындай аутсорсингге финансылык мекеме үчүнчү тарап чогулткан идентификациялык маалыматтарга дароо жетүү мүмкүнчүлүгүн камсыз кылган жана финансылык мекеменин үчүнчү тарап чет элдик компетенттүү органдар тарабынан КИК/ККЛК чөйрөсүндө адекваттуу көзөмөлдөнүүгө тийиш экендигине ишеними болгон шартта жазуу жүзүндөгү макулдашуунун негизинде гана жол берилет. Жүргүзүлгөн идентификациялоонун сапаты үчүн акыркы жоопкерчилик Кыргыз Республикасынын финансылык мекемесинде калат.»;

18-пункт төмөнкүдөй мазмундагы 7-пунктча менен толукталсын:

«7) кардардын идентификациялык маалыматтарын жана анын талаптагыдай идентификациясы үчүн зарыл болгон башка маалыматтарды тастыктаган же тактаган кошумча документтерди (анын ичинде коммуналдык кызматтар үчүн төлөмдөр, ижара келишими, банктык эсептен көчүрмө, жашаган жери жөнүндө маалымкат, менчик укугун тастыктаган документтер жана башка документтер) суроо аркылуу текшерүү жүргүзүү.»;

19-пунктта «кызматкери» деген сөздөн кийин «зарыл болгон учурда жана/же күмөн саноо болгондо» деген сөздөр менен толукталсын;

23-пунктта:

4-пунктчадагы «кошулган» деген сөз «кошулууга мүмкүндүк берген» деген сөздөргө алмаштырылсын;

төмөнкүдөй мазмундагы 11-пунктча менен толукталсын:

«11) баштапкы каттоодон өткөндөн кийин эсептик жазууну пайдаланууда үчүнчү жактарга (дропторго) эсепти башкаруу укугунун өткөрүп берилгендиги жөнүндө күбөлөндүрүүчү аномалияларды аныктоо үчүн жүрүм-турумду талдоо модулдарын интеграциялоого.»;

төмөнкүдөй мазмундагы 25¹-пункт менен толукталсын:

«25¹. Финансылык мекемелер тарабынан санариптик идентификациялоо жана верификациялоо үчүн пайдаланылуучу маалыматтык системалар (веб-сайттар, мобилдик тиркемелер) инклюзивдүүлүк принциптерин эске алуу менен долбоорлонууга жана ден соолугунун мүмкүнчүлүктөрү чектелүү (ДМЧ) адамдар үчүн жеткиликтүүлүктү камсыз кылууга тийиш. Финансылык мекемелер ылайыкташтырылган колдонуучу интерфейстерин (анын ичинде экрандык дикторлорду колдоо, визуалдык элементтерди масштабдоо) киргизүүгө жана физикалык өзгөчөлүктөрү автоматташтырылган биометрикалык көзөмөлдөн туура өтүүгө тоскоолдук кылган кардарлар үчүн идентификациялоонун коопсуздук деңгээли боюнча тең маанилүү альтернативдүү каналдарды (мисалы корголгон видеоконференцбайланыш каналы боюнча оператор аркылуу верификациялоо) кароого тийиш.»;

26-пункт төмөнкүдөй мазмундагы абзац менен толукталсын:

«Кардарларды санариптик идентификациялоо жана верификациялоо үчүн колдонулган финансылык мекеменин платформасы же программалык продуктунун комплекси төмөнкүлөрдү камсыз кылууга тийиш:

1) маалыматтарды берүү каналдарын шифрлөөнү, анын ичинде сүрөттөрдү, видеоагымды жана жандуулукту текшерүү маалыматтарын берүүнү, ошондой эле видео байланыш сеанстарын (болгон учурда);

2) фото- жана видеоматериалдардын тийиштүү сапатын, ошондой эле аларды уруксатсыз кирүүдөн, көчүрүүдөн жана үчүнчү жактардын колдонуусунан коргоону;

3) фото- жана видеоматериалдарды система тарабынан белгиленген баштапкы сапатта сактоону. Сапатка карата техникалык талаптарды финансылык мекеме аныктайт жана ички ченемдик документтерде бекитилет;

4) фото- жана видеоматериалдардын файлдарында жазуунун датасы жана убактысы жөнүндө маалыматтарды, ошондой эле кардардын идентификациялык маалыматтарын, анын ичинде фамилиясын, атын, атасынын атын (болгон учурда) жана башка маалыматтарды белгилөөнү, ошондой эле кардардын анкетасына киргизилген бардык өзгөртүүлөрдү журналга түшүрүүнү;

5) реалдуу убакыт режиминде алынган фото- жана видеоматериалдарды гана колдонууну;

6) мурун түзүлгөн фото- жана видеоматериалдарды алмаштыруудан, уруксатсыз өзгөртүүдөн жана колдонуудан коргоону;

7) үчүнчү жактардын сүрөттөрдү жана (же) видео жазууларды тараптан колдонуу аракеттерин аныктоону;

8) кардардын акыркы түзүлүшүнүн IP-дарегин аныктоону;

9) санариптик идентификациялоодон жана верификациялоодон өткөн кардарлар жөнүндө жеке жана статистикалык маалыматтарды түзүүнү жана алууну;

10) төмөнкүлөрдү камтыган функционалдык мүмкүнчүлүктөрдү:

– жеке маалыматтарды иштетүүгө жана берүүгө жеке маалыматтар субъектинин макулдугун алуу;

– суроо-талаптарды автоматтык түрдө түзүү жана мамлекеттик электрондук сервистерден жоопторду алуу;

– кардар тарабынан берилген маалыматтарды мамлекеттик маалымат системаларынын жана башка булактардын маалыматтары менен салыштыруу;

– кардарды санкциялык тизмектер боюнча автоматташтырылган текшерүү;

– маалыматтарды үзгүлтүксүз резервдик көчүрүү, алардын сакталышын, өзгөрүлбөстүгүн жана кийинчерээк белгиленген мөөнөттөрдө жүктөлүү мүмкүнчүлүгүн камсыз кылуу.

Видео байланыш сеанстарынын видео жазуулары, ошондой эле кардардын сүрөтү КИК/ККЛК чөйрөсүндөгү ченемдик укуктук актыларда каралган башка маалыматтар менен бирге кардардын электрондук досьесинде сакталууга тийиш.

Иштиктүү мамилелердин жүрүшүндө финансылык мекеме кардар жөнүндө маалыматтарды Кыргыз Республикасынын КИК/ККЛК чөйрөсүндөгү мыйзамдарында белгиленген тартипте жана мөөнөттөрдө актуалдаштырууну (жаңыртууну) жүзөгө ашырууга милдеттүү.

Жасалма интеллект технологияларын, машиналык окутууну жана биометрикалык маалыматтарды иштетүүчү башка алгоритмдерди колдонууда финансылык мекеме ушул Тартиптин талаптарына ылайык кардарларды идентификациялоонун жана верификациялоонун талап кылынган тактыгынын деңгээлин камсыз кылууга милдеттүү.

Финансылык мекеме ички контролдоо системасын, ошондой эле маалыматтык коопсуздук механизмдерин киргизүү жана үзгүлтүксүз өркүндөтүү аркылуу санариптик идентификациялоо процессинде алынган кардарлардын купуя маалыматтарын жана жеке маалыматтарын коргоону камсыз кылууга милдеттүү.

Санариптик идентификациялоо платформасы жана колдонулган алгоритмдер реалдуу убакыт режиминде алынган кардардын сүрөтүн өздүгүн күбөлөндүрүүчү документтерде жана (же) мамлекеттик маалыматтык системаларда камтылган сүрөттөр менен салыштырууну караган «бирге-бир» («one-to-one») идентификациялоо ыкмасын колдонууну камсыз кылышы керек.

Салыштыруу беттин уникалдуу биометрикалык параметрлерин талдоого жана видеоагымды алмаштыруунун алдын алуу үчүн жандуулуктун белгилерин аныктоону камсыз кылууга мүмкүндүк берген технологияларды колдонуу менен жүргүзүлүшү керек.

Платформаларга карата минималдуу техникалык талаптар милдеттүү базалык деңгээл катары белгиленет жана бардык көзөмөлдөнүүчү уюмдар тарабынан сакталууга тийиш. Жөнгө салуучу органдар аларга берилген ыйгарым укуктардын чегинде техникалык платформаларга кошумча жана (же) күчөтүлгөн талаптарды белгилөөгө укуктуу.»;

27-пункттун 8-пунктчасында:

бешинчи абзац төмөнкүдөй редакцияда баяндалсын:

«– кардардын идентификациялык маалыматтарын санкциялык тизмектер, кылмыштуу кирешелерди легалдаштыруу (адалдоо) жана террористтик ишмердүүлүк үчүн жаза өтөгөн адамдардын тизмеги менен автоматтык түрдө текшерүүнү, ошондой эле улуттук жана чет өлкөлүк ККА маалымат базалары менен салыштырууну. ККА статусу аныкталган учурда комплаенс-кызматы тарабынан күчөтүлгөн талаптагыдай текшерүү жол-жоболорун колдонуу үчүн иштиктүү мамилелерди автоматташтырылган түрдө түзүү убактылуу токтотулат;»;

төмөнкүдөй мазмундагы абзац менен толукталсын:

«– корпоративдик кардарлардын чыныгы ээлери жөнүндө маалыматтарды аларды кызмат көрсөтүүгө аралыктан кабыл алуу процессинде автоматтык түрдө салыштыруу үчүн финансылык чалгындоо органынын жана Кыргыз Республикасынын Юстиция министрлигинин юридикалык жактарынын бенефициардык ээлеринин электрондук маалыматтар базасы менен интеграциялоону.»;

28-пункт төмөнкүдөй редакцияда баяндалсын:

«28. Кардарды санариптик идентификациялоодо жана верификациялоодо:

1) фотосүрөт жана (же) видео жазуу түстүү болууга тийиш;

2) фотосүрөттө жана (же) видео жазууда кардардын өзүнөн тышкары башка адамдардын болушуна жол берилбейт;

3) паспорттун алдынкы жана арткы беттеринин фотосүрөтүн алуу зарыл;

4) кардардын бети жарым-жартылай же толугу менен жабылбоого тийиш, кардардын бетине көлөкө түшпөөгө тийиш, кардар анын бетин жаап калуучу көз айнекчен (тунук айнеги бар көз айнектен тышкары) болбоого тийиш;

5) кардардын бети фотосүрөттө жана (же) видео жазууда даана көрүнүүгө тийиш. Видеобайланыш сеансынын жүрүшүндө кардар жетиштүү түрдө жарык жайда болууга тийиш;

6) жандуулукту текшерүү (liveness check) алгоритмдери биометрикалык көрсөтүүгө каршы чабуулдардан коргонуунун эл аралык стандарттарына (мисалы ISO/IEC 30107-3 же эквивалент) шайкештигине сертификацияланышы керек.».

2. Бул токтом расмий жарыяланган күндөн тартып он беш күн өткөндөн кийин күчүнө кирет.

Эркин-Тоо” мамлекеттик расмий гезитинин 2026-жылдын 10-июлундагы № 51 (3811) саны менен жарыяланды.