КЫРГЫЗ РЕСПУЮЛИКАСЫНЫН МИНИСТРЛЕР КАБИНЕТИНИН ТОКТОМУ

2026-жылдын 4-августу № 523

Кыргыз Республикасынын Министрлер Кабинетинин кызыкчылыктардын кагылышуусу жөнүндө мыйзамдарды ишке ашыруу маселелери боюнча айрым чечимдерине өзгөртүүлөрдү киргизүү тууралуу

«Кызыкчылыктардын кагылышуусу жөнүндө» Кыргыз Республикасынын Мыйзамынын 7, 16-беренелерине, «Кыргыз Республикасынын Министрлер Кабинети жөнүндө» Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Өкмөтүнүн 2018-жылдын 7-августундагы № 362 «Кызыкчылыктардын кагылышуусу жөнүндө» Кыргыз Республикасынын Мыйзамын ишке ашыруу боюнча чаралар тууралуу» токтомуна төмөнкүдөй өзгөртүү киргизилсин:

– төмөнкүдөй мазмундагы 1¹-пункт менен толукталсын:

«1¹. Кыргыз Республикасынын Министрлер Кабинетине караштуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттикке «Кызыкчылыктардын кагылышуусу жөнүндө» Кыргыз Республикасынын Мыйзамын ишке ашырууну координациялоо жана мониторинг жүргүзүү функциялары жүктөлсүн.».

2. Кыргыз Республикасынын Министрлер Кабинетинин 2023-жылдын 12-декабрындагы № 668 «Кыргыз Республикасынын мамлекеттик органдарында жана жергиликтүү өз алдынча башкаруу органдарында персоналды башкаруу кызматы жөнүндө типтүү жобону бекитүү тууралуу» токтомуна төмөнкүдөй өзгөртүү киргизилсин:

жогоруда аталган токтом менен бекитилген Кыргыз Республикасынын мамлекеттик органдарында жана жергиликтүү өз алдынча башкаруу органдарында персоналды башкаруу кызматы жөнүндө типтүү жободо:

– 11-пункттун 33-пунктчасы төмөнкүдөй редакцияда баяндалсын:

«33) өздүк (жеке) кызыкчылыктар жөнүндө декларацияларды чогултууну жана верификациялоону жүргүзүү;».

3. Кыргыз Республикасынын Министрлер Кабинетине караштуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттик үч айлык мөөнөттө Өздүк (жеке) кызыкчылыктар жөнүндө декларацияларды верификациялоону жүзөгө ашыруу тартибин иштеп чыксын жана бекитсин.

4. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

5. Бул токтом расмий жарыяланган күндөн тартып он күн өткөндөн кийин күчүнө кирет.

“Эркин-Тоо” мамлекеттик расмий гезитинин 2026-жылдын 7-августундагы № 59 (3819) саны менен жарыяланды.