КЫРГЫЗ РЕСПУБЛИКАСЫНЫН ЖОГОРКУ КЕҢЕШИНИН ТОКТОМУ

2025-жылдын 2-апрели № 2953-VII

"Балдардын жашоо-тиричилигинин коопсуздугу жөнүндө" Кыргыз Республикасынын Жогорку Кеңешинин 2024-жылдын 30-майындагы № 2127-VII токтомуна өзгөртүүлөрдү киргизүү тууралуу

Кыргыз Республикасынын Жогорку Кеңеши токтом кылат:

1. "Балдардын жашоо-тиричилигинин коопсуздугу жөнүндө" Кыргыз Республикасынын Жогорку Кеңешинин 2024-жылдын 30-майындагы № 2127-VII токтомуна төмөнкүдөй өзгөртүүлөр киргизилсин:

1) 2-пункт төмөнкүдөй мазмундагы абзацтар менен толукталсын:

"- жашы жете электердин арасында мектеп рэкетчилигин, буллингди, зомбулукту жана башка укукка каршы аракеттерди жана терс көрүнүштөрдү жоюу боюнча мамлекеттик программаны иштеп чыгуу;

- жалпы билим берүүчү уюмдардын тарбия берүү пландарына чыр-чатактарды зомбулуксуз чечүү боюнча иш-чараларды киргизүү;

- жашы жете электердин арасында мектеп рэкетчилигинин, буллингдин, зомбулуктун жана башка укукка каршы аракеттердин жана терс көрүнүштөрдүн алдын алуу (күндөлүктөргө нускамаларды киргизүү, чат-ботторду жайылтуу);

- балдардын мыйзамдуу кызыкчылыктарын коргоо максатында, балдарды тарбиялоодон качкан, коомдо жат социалдык мүнөздө жашаган, өз аракеттери менен балдарды селсаяктыкка жана укукка каршы аракеттерди жасоого түрткөн ата-энелерге (мыйзамдуу өкүлдөргө) карата алдын алуу иштерин күчөтүү;

- баңги каражаттарын жана психотроптук заттарды пайдалануучуларды табууга башталгыч, негизги жана орто жалпы билим берген жалпы билим берүүчү уюмдарда окуучуларды нарколог-врачтар тарабынан текшерүү системасын иштеп чыгуу;

- мектеп рэкетчилигинин учурлары көбөйгөндүгүнө байланыштуу өспүрүмдөрдү кылмыштуу иш-аракеттерге тарткан чоң адамдарды аныктоо боюнча кошумча иш-чаралардын топтомун жүзөгө ашыруу;

- башталгыч, негизги жана жалпы орто билим берүүчү уюмдардын аймагында жана анын жанында энергетикалык суусундуктарды сатууга тыюу салуу;

- жашы жете электердин арасында баңги, алкоголдук жана башка каражаттардын таасири астында жасалган кылмыштуулуктун, кайталанган кылмыштуулуктун жалпы деңгээлин төмөндөтүү;

- балдардын (анын ичинде майыптыгы бар балдардын) биологиялык ата-энелеринен айрылуусуна жол бербөө үчүн үй-бүлөнү жана балдарды колдоо кызматтарынын системасын түзүү;

- эмгек мигранттары болгон ата-энелердин таштап кеткен балдарын эрте аныктоо жана коштоп жүрүү иштерин күчөтүү;

- коомчулуктун деңгээлинде эмгек мигранттарынын балдарына психосоциалдык колдоо көрсөтүү жана катаал мамиле жасалган фактылардын жеткиликтүүлүктү болушун камсыз кылуу;

- жашы жете элек балдарга карата зомбулук аракеттерин болтурбоо боюнча жүргүзүлүп жаткан алдын алуу иштери боюнча чараларды күчөтүү;

- бүткүл республика боюнча пробациялык көзөмөл дайындалган, мыйзам менен келишпестиги бар балдар кайра тарбиялоого багытталган коррекциялык программалардан жана башка тренингдерден өтсө боло турган ювеналдык пробация борборлорун түзүү;

- мыйзам менен келишпестиги бар баланын турмуштук абалына толук жана ар тараптуу баа берүүнүн жана талдоонун колдонулушун камсыз кылуу;

- ата-энелердин балдарды тарбиялоого жигердүү катышуусуна үндөөчү өбөлгөлөрдү жаратуу жана балдарды тарбиялоо менен байланышкан гендердик көндүм адаттарды жоюуга багытталган түшүндүрүү иштерин жүргүзүү.";

2) 3-пункттагы "2025" деген цифралар "2026" деген цифраларга алмаштырылсын.

2. Ушул токтом кабыл алынган күндөн тартып күчүнө кирет.