КЫРГЫЗ РЕСПУБЛИКАСЫНЫН УЛУТТУК БАНКЫ

ТОКТОМ

2011-жылдын 29-сентябры № 55/9

Кыргыз Республикасынын Улуттук банкынын айрым ченемдик укуктук актыларына өзгөртүүлөрдү жана толуктоолорду киргизүү тууралуу

Кыргыз Республикасынын "Кыргыз Республикасынын Улуттук банкы жөнүндө" мыйзамынын 7 жана 43-статьясына ылайык, Кыргыз Республикасынын Улуттук банк Башкармасы

ТОКТОМ КЫЛАТ:

1. Кыргыз Республикасынын Улуттук банкынын айрым ченемдик укуктук актыларына сунуш кылынган өзгөртүүлөр жана толуктоолор (кошо тиркелет) бекитилсин.

2. Токтом расмий жарыялангандан бир ай өткөндөн кийин күчүнө кирет.

3. Юридика Башкармалыгы Кыргыз Республикасынын ченемдик укуктук актыларынын мамлекеттик реестринде чагылдырылышы үчүн бул токтомду, расмий жарыялангандан кийин Кыргыз Республикасынын Адилет министрлигине жөнөтсүн.

4. Көзөмөл методологиясы жана лицензиялоо башкармалыгы ушул токтом менен коммерциялык банктарды тааныштырсын.

5. Ушул токтомдун аткарылышына контролдукту жүзөгө ашыруу милдети Кыргыз Республикасынын Улуттук банкынын Төрагасынын орун басары, айым Б.Ж.Жеенбаевага ыйгарылсын.

Кыргыз Республикасынын Улуттук банкынын айрым ченемдик укуктук актыларына ӨЗГӨРТҮҮЛӨР ЖАНА ТОЛУКТООЛОР

I. Улуттук банк Башкармасынын 2010-жылдын 29-декабрындагы № 96/2 "Терроризмди каржылоого жана кылмыш жолу менен алынган кирешелерди легализациялоого (адалдоо) каршы аракеттенүү максатында, коммерциялык банктарда ички контролдукту уюштуруу боюнча минималдуу талаптар жөнүндө" жобонун жаңы редакциясын бекитүү тууралуу" токтому менен бекитилген, "Терроризмди (экстремизмди) каржылоого жана кылмыш жолу менен алынган кирешелерди легализациялоого (адалдоого) каршы аракеттенүү максатында, коммерциялык банктарда ички контролдукту уюштуруу боюнча минималдуу талаптар жөнүндө" жобого төмөнкүдөй өзгөртүүлөр жана толуктоолор киргизилсин:

1. Жобонун 2-бөлүгүнүн 4-пунктунун экинчи абзацы "Пайда алуучу" деген сөздөн кийин "ушул жобонун максатында" деген сөздөр менен толукталсын.

2. Жобонун 2-бөлүгүнүн 4-пунктунун сегизинчи абзацы "Верификациялоо" деген сөздөн кийин "ушул жобонун максатында" деген сөздөр менен толукталсын.

3. Жобонун 3-бөлүгүнүн 7-пункту төмөнкү редакцияда берилсин:

"7. Банк Башкармасы, банктык эсептерди ачуу(анын ичинде кардарларды идентификациялоо жана верификациялоо), эсептер боюнча операцияларды жүргүзүү, кардарлар (эсеп ээлери) жана аманатчылар менен түзүлгөн келишимдерди бузууга тиешелүү талаптарды кошо алганда, ички контролдуктун натыйжалуу камсыз кылынышына жана "Терроризмди (экстремизмди) каржылоо жана кылмыш жолу менен алынган кирешелерди легализациялоо (адалдоо) каршы аракеттерди көрүү жөнүндө" мыйзамдын талаптарын сактоо боюнча чаралардын жүзөгө ашырылышына жооп берет.

Банк Башкармасы банктын шектүү операциялардын белгилерин камтыган операцияларды жүргүзүүсүнө жол бербөө максатында, тиешелүү чараларды кабыл алууга тийиш."

4. Жобонун 4-пункту төмөнкү мазмундагы 9-1-пункт менен толукталсын:

"9-1. Банктар, ыйгарым укук чегерилген мамлекеттик органдын банктык мыйзамдарга жана Улуттук банктын ченемдик укуктук актыларына каршы келбеген талаптарын эске алуу менен терроризмди (экстремизмди) каржылоого жана кылмыш жолу менен алынган кирешелерди легализациялоого (адалдоого) каршы аракеттерди көрүү боюнча ички контролдук чараларын иштеп чыгуулары зарыл".

5. Жобонун 6-бөлүгүнүн 25-пунктунун 2-пунктчасы төмөнкү редакцияда берилсин:

"2) банк кардарларынын төмөнкүлөргө тиешелүү маалыматтарды камтыган, шектүү операциялардын бүтүмдөрдүн) белгилери бар операцияларды табуу максатында жүргүзгөн операцияларына иликтөөлөрдүн натыйжалары:

- кардарлардын эсептери (кардарлардын колдонуудагы эсептери, банк кызматкерлеринин эсептери) боюнча олуттуу динамикага;

- эң ири суммадагы операцияларга;

- чет өлкө валюталарын сатып алууга же аларды кардарларга чектүү суммадан ашкан суммада сатууга;

- кардарлардын суммалары анкетада көрсөтүлгөн жүгүртүүлөрдөн олуттуу ашкан операцияларына;

- накталай каражаттар менен операцияларга (каражаттарды нак акчага айландыруу, активдер менен алмашуу, банктын адистештирилген аралыкта орнотулган жабдуулары аркылуу банктык эсепти толтуруу үчүн нак акчаларды салуу);

- кредиттерди берүү жана депозиттерди (мөөнөттүү) кабыл алуу боюнча операцияларга;

- гарантиялар, аккредитивдер жана башка шарттуу милдеттенмелер менен операцияларга;

- акча которуулар системасы боюнча, ошондой эле SWIFT системасы (же банктарда негизги катары саналуучу башка системалар) аркылуу эсеп ачуусуз эле которууларга;

- кардардын жана банктын баалуу кагаздарды сатып алуу-сатуу боюнча операцияларына;

- башка өлкөлөрдө жайгашкан банктын кардарларынын акча каражаттарынын кыймылы."

6. Жобонун 6-бөлүгүнүн 25-пунктунун 4-пунктчасында "анда" деген сөз "аларда" деген сөзгө алмаштырылсын;

7. Жобонун 6-бөлүгүнүн 25-пунктунун 9-пунктчасы төмөнкү редакцияда берилсин:

"9) төмөнкүлөр боюнча аналитикалык маалыматтарды:

- кардарлардын мүмкүн болуучу өз ара байланышы;

- банк корреспонденттер;

- кардарлар менен келишим боюнча мүлктү ишеним боюнча тескөө (траст) операциялары;

- жаңы банктык продуктуларды жана технологияларды жайылтуу жана алардын жайылтылышына байланыштуу келип чыккан тобокелдиктер."

8. Жобонун 8-бөлүгүнүн 38-пункту төмөнкү мазмундагы сүйлөм менен толукталсын:

"Ыйгарым укук чегерилген мамлекеттик орган тарабынан аныкталган тизмеге кирбеген операциялар да милдеттүү түрдө контролдукка алынууга тийиш.".

9. Жобого карата кошо тиркелген 1-тиркеме төмөнкү мазмундагы 14-17-пунктчалар менен толукталсын:

"14) жеке адамдын уюмдун уставдык капиталына акча каражаттарын накталай формада салышы;

15) тараптарынын бири тиешелүү каттоодон өткөн, жашаган жери бар же финансылык операцияларды жүргүзүүдө маалыматтарды ачып көрсөтүү же берүү каралган өлкөдө жеке адам же юридикалык жак болсо, же болбосо тараптарынын бири көрсөтүлгөн мамлекетте (көрсөтүлгөн аймакта) катталган банктагы эсепке ээлик кылуучу адам болгон шартта, операциялар (бүтүмдөр);

16) эгерде, жок дегенде, бул операцияларга (бүтүмдөргө) катышкан тараптардын бирөө, ага карата мыйзамдарда же Кыргыз Республикасынын эл аралык келишимдеринде белгиленген тартипте террористтик же экстремисттик иштерге катыштыгы бар экендиги жөнүндө (терроризмди же экстремизмди каржылоо) маалыматтар бар жеке адам же юридикалык жак болгон шартта, акча каражаттары же мүлк менен жүргүзүлгөн операциялар (бүтүмдөр);

17) шектүү операциялар (бүтүмдөр)".

II. Улуттук банк Башкармасы тарабынан 2003-жылдын 19-февралында кабыл алынган, Кыргыз Республикасынын Адилет министрлигинде 2003-жылдын 19-февралында 25-03 номеринде каттоодон өткөртүлгөн № 4/4 токтому менен бекитилген, Депозиттер менен иштөө боюнча нускоого төмөнкүдөй өзгөртүүлөр жана толуктоолор киргизилсин:

1. Нускоонун 1-бөлүгүнүн 3-абзацы "банк ишинин масштабына" деген сөздөрдөн кийин ", анын ичинде кардар менен түздөн-түз байланышуусуз (мисалы, интернет-банкинг) аралыктан туруп ишке ашырылган операциялар (бүтүмдөр) боюнча" деген сөздөр менен толукталсын";

2. 5- жана 6-абзацтар төмөнкү мазмундагы абзац менен толукталсын:

"Банктын бир кызматкеринин операцияларды башынан аягына чейин жүргүзүү мүмкүнчүлүгүн жок кылуу максатында, банк кызматкерлеринин функцияларына так чектөөлөр коюлуп, банктын тиешелүү бөлүмдөрүнүн кызматкерлеринин кызматтык нускоолорунда чагылдырылууга тийиш. Банктын кызматкерлери өз милдеттеринин аткарылышына жооп беришет."

3. Нускоонун 1-бөлүгүнүн жетинчи абзацындагы төртүнчү сүйлөмдөгү "тастыктоочу документти эске албаганда" деген сөздөр "тастыктаган документтин көчүрмөсүн кошо алганда" деген сөздөр менен алмаштырылсын.

4. 2-бөлүктөгү "Пайда алуучу" деген аныктама төмөнкү редакцияда берилсин:

"Пайда алуучу ушул нускоонун максатында - бул, акча каражаттарына же мүлккө менчикке укукка ээ жана кардар анын атынан жана/же анын эсебинен акча каражаттары же мүлк менен операцияларды (бүтүмдөрдү) ишке ашырган жак же болбосо түпкүлүгүндө келип, акча каражаттары же мүлк менен операциялар (бүтүмдөр) анын пайдасына ишке ашырылган жак."

5. 2-бөлүктүн аягы төмөнкү мазмундагы абзац менен толукталсын:

"Аманат (сактык) сертификаты - бул, баалуу кагаз, ал банкка аманат катары акча каражаттарынын салынгандыгын жана аманатчынын белгиленген мөөнөт аяктаган учурда аманаттын суммасын же ал боюнча пайыздарды банктын кайсы болбосун мекемесинен алууга укугун тастыктайт. Жеке адам гана аманат сертификатына ээлик кыла алат.

Депозиттик сертификат - бул, аманат сертификаты сыяктуу эле баалуу кагаз, бирок ага юридикалык жак гана элик кыла алат.

Банк-депозиттик же аманат сертификатынын эмитенти менен анын кардарынын ортосундагы мамилелердин негизин, банктык аманат мамилелери түзөт."

6. Нускоонун 3-бөлүгүнүн 3.1-пунктундагы "-аманат (депозиттик) сертификаты." деген сөзү алынып салынсын;

7. Нускоонун 3-бөлүгүнүн 3.1-пунктунун 3.1.4-пунктчасы алынып салынсын;

8. Нускоонун 4-бөлүгүнүн 4.1-пунктунун үчүнчү абзацы "идентификациялоосуз" деген сөздөргө чейин "контрагенттерди жана/же кардарларды" деген сөздөр менен андан кийин "жана пайда алуучуларды аныктоосуз" деген сөздөр менен толукталсын;

9. Нускоонун 4-бөлүгүнүн 4.1-абзацы төмөнкү редакцияда берилсин:

"Банк кардарга банктык эсепти ачуудан жана эсеп боюнча операцияларды жүргүзүүдөн төмөнкү учурларда баш тартууга тийиш, эгерде:";

10. Нускоонун 4-бөлүгүнүн 4.1-пунктунун бешинчи абзацы "кардарды идентификациялоо" деген сөздөн кийин "жана эсеп боюнча операцияларды жүргүзүү боюнча пайда алуучуну аныктоо" деген сөздөр менен толукталсын;

11. Нускоонун 29 жана 30, 45 жана 46, 65- жана 66, 83 жана 84-абзацтары төмөнкү мазмундагы абзац менен толукталсын:

"- салык төлөөчүнүн салыктык каттоодон өткөндүгү фактысы тууралуу салык кызматынын маалымкаты;"

12. Нускоонун 5-абзацынын аягы төмөнкү мазмундагы абзац менен толукталсын:

"Банк кардардан пайда алуучуну идентификациялоо жана верификациялоо үчүн зарыл болгон документтерди жана маалыматтарды талап кылууга жана тиешелүү документтер сунушталганга чейин эсеп ачпоого укуктуу."

13. Нускоонун 6-бөлүгүнүн 6.1-пункту "чектүү лицензияга ээ" деген сөздөрдөн кийин "ошондой эле Кыргыз Республикасынын мыйзамдарында каралган учурларда" деген сөздөр менен толукталсын.

14. 1-тиркеме төмөнкү мазмундагы 4-1 - 4-3 пункттар менен толукталсын:

"4-1. Түздөн-түз байланышуусуз (мисалы, интернет-банкинг) аралыктан туруп операцияларды (бүтүмдөрдү) жүргүзүү үчүн банктык эсепти ачуу, кардардын милдеттүү түрдө катышуусу менен ишке ашырылууга тийиш. Мында, банктын жоопкерчиликтүү кызматкери кардардын паспортунун көчүрмөсүн алуусу зарыл, анын арткы бетинде жоопкерчиликтүү кызматкердин колу коюлуп, аты-жөнү, эсеп ачылган ай жана жыл жазылууга тийиш. Бул жазуулар кардар тарабынан да жазылуусу зарыл. Паспорттун көчүрмөсү кардардын делосуна көктөлүүгө тийиш. Банктын кызматкеринин кардарлардын паспортунун аныктыгы үчүн жоопкерчилиги, кызматкердин кызматтык нускоосунда чагылдырылуусу зарыл. Кардардын паспорттук маалыматтары атайын каттоо журналында (кагаз жүзүндө же электрондук түрүндө) катталууга тийиш.

4-2. Юридикалык жак болгон кардар (резидент, резидент эмес) менен кардарга түздөн-түз байланышуусуз (мисалы, интернет-банкинг) аралыктан туруп операцияларды жүргүзүү үчүн мамиле түзүү учурунда, банк, кардардан ушул Нускоонун 5 жана 6-бөлүктөрүнө ылайык маалыматтардан тышкары, кардардын Кыргыз Республикасында экономикалык ишти жүзөгө ашырып жаткандыгын тастыктаган документтерди (келишимдер, контрактылар, бажы декларациялары, салык декларациялары ж.б) да суроого тийиш.

4-3. Кардар менен түздөн-түз байланышуусуз (мисалы, интернет-банкинг) аралыктан туруп операцияларды (бүтүмдөрдү) жүргүзүү үчүн банктык эсептерди тейлөө келишиминде банк, кардардын терроризмди каржылоого жана кылмыш жолу менен алынган кирешелерди легализациялоого (адалдоого) каршы аракеттерди көрүү боюнча мыйзам талаптарын сактоо, көбүнчө банктын талабы боюнча жүргүзүлгөн операцияларды тастыктаган документтерди берүү жагындагы милдеттенмелерин да кароого тийиш."

15. Нускоого карата 1-тиркеменин он экинчи пунктунун экинчи абзацында "умтулуу" деген сөз алынып салынсын.