КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2010-жылдын 21-октябрындагы №252

Кыргыз Республикасынын Нарын облусунун Нарын районунун Жерге-Тал айылдык округунун аймагында жайгашкан жерлерди которуу жөнүндө

Кыргыз Республикасынын Жер кодексинин 5 жана 20-беренелерине ылайык Кыргыз Республикасынын Өкмөтү токтом кылат:

1. Кыргыз Республикасынын Нарын облустук мамлекеттик администрациясынын Жер бөлүүгө байланыштуу маселелер боюнча республикалык комиссия менен макулдашылган сунушу кабыл алынсын жана Нарын облусунун Нарын районунун Жерге-Тал айылдык округунун аймагында жайгашкан 118,0 га жерди, анын ичинен 80,33 га - жайытты жана 37,67 га - башка жерди «Айыл чарба багытындагы жерлер» категориясынан «Өнөр жайынын, транспорттун, байланыштын, коргонуунун жерлери жана башка багыттагы жерлер» категориясына которулсун.

2. Бул токтомдун 1-пунктунда көрсөтүлгөн жерлер «Сары-Жел» жана «Кум-Бел» алтын-вольфрам кендерин иштетүү үчүн «Рокизол» жоопкерчилиги чектелген коомуна (мындан ары - «Рокизол» ЖЧК) мөөнөттүү (убактылуу) пайдаланууга берилсин.

3. Кыргыз Республикасынын Нарын облусунун мамлекеттик администрациясы:

- жерди эсепке алуу документтерине тийиштүү өзгөртүүлөрдү киргизсин;

- төмөнкүлөрдү камсыз кылсын:

«Рокизол» ЖЧК айыл чарба өндүрүшүнүн жоготууларынын жана албай калган пайдаларынын наркынын суммасын Кыргыз Республикасынын Өкмөтү белгилеген ченемдерге ылайык төлөшүн;

«Рокизол» ЖЧК менен Кыргыз Республикасынын Нарын облусунун Нарын районунун мамлекеттик администрациясы ылайык ушул токтомдун 1-пунктунда көрсөтүлгөн жер участокторуна Кыргыз Республикасынын мыйзамдарына ылайык ижаралоо келишимдерин түзүшүн;

- «Рокизол» ЖЧКны төмөнкүлөргө милдеттендирсин:

тийиштүү долбоордук документтерди бөлүнгөн жер участокто экологиялык жана техникалык коопсуздукту камсыздоо, жер казынасын коргоо жана пайдалануу жагындагы эксперттик корутундулары менен белгиленген тартипте иштеп чыгышын камсыздоого;

«Сары-Жел» жана «Кум-Бел» кендерин иштетүү үчүн объекттерди долбоорлоо жана куруу боюнча долбоордук-сметалык документтерди колдонуудагы нормаларга жана эрежелерге ылайык макулдашууга жана экспертизалоого;

жер казынасын иштетүү боюнча жумуштар аяктагандан кийин жерди рекультивациялоо боюнча иш-чаралардын жүргүзүлүшүн камсыздоого.

4. Бул токтомдун аткарылышын контролдоо Кыргыз Республикасынын Президентинин Администрациясынын агроөнөржай комплекси жана жаратылышты пайдалануу бөлүмүнө тапшырылсын.

5. Бул токтом расмий жарыяланган күндөн баштап күчүнө кирет.