КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2012-жылдын 3-августу № 545

Эл аралык аудитордук компанияларды тартуу жөнүндө

Кыргыз Республикасынын Жогорку Кеңешинин 2012-жылдын 27-июнундагы № 2117-V токтомун аткаруу үчүн, Кыргыз Республикасынын Өкмөтүнүн 2012-жылдын 3-июлундагы № 465 "Кумтөр Оперейтинг Компани" жабык акционердик коомунун жаратылыш ресурстарын сарамжалдуу пайдалануу, айлана-чөйрөнү коргоо, өндүрүш процесстеринин коопсуздугу жана калкты социалдык коргоо боюнча нормаларды жана талаптарды сактоосун текшерүү жана изилдөө боюнча мамлекеттик комиссия түзүү жөнүндө" токтомун ишке ашыруу, ошондой "Мамлекеттик сатып алуулар жөнүндө" Кыргыз Республикасынын Мыйзамына ылайык "Кумтөр Оперейтинг Компани" жабык акционердик коомунун - "Кумтөр" долбоорунун иши боюнча эксперттик корутундуну өз убагында даярдоо максатында Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын Өкмөтүнө караштуу Финансы рыногун жөнгө салуу жана көзөмөлдөө мамлекеттик кызматына эл аралык аудитордук компаниялардын кызмат Көрсөтүүлөрүн бир булактан алуу ыкмасы менен сатып алууга уруксат берилсин.

2. Кыргыз Республикасынын Өкмөтүнө караштуу Финансы рыногун жөнгө салуу жана көзөмөлдөө мамлекеттик кызматы "Кумтөр" долбооруна экологиялык экспертизаларды жана долбоордук жана техникалык чечимдерине экспертизаларды (экологиялык жана кен-техникалык), юридикалык, экономикалык (социалдык-экономикалык) экспертизаларды жүргүзүү боюнча кызмат көрсөтүү жөнүндө эл аралык аудитордук компаниялар менен келишимдерди түзсүн.

3. "Кыргызалтын" ачык акционердик коому Кыргыз Республикасынын Өкмөтүнүн 2012-жылдын 3-июлундагы № 465 токтомунун 2-пунктунда каралган экспертизаларды жүргүзүү боюнча эл аралык аудитордук компаниялардын кызмат көрсөтүүлөрүнө акы төлөөнү жүргүзсүн.

4. Бул токтомдун аткарылышын контролдоо Кыргыз Республикасынын Өкмөтүнүн Аппаратынын экономика жана инвестициялар бөлүмүнө жүктөлсүн.