КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2013-жылдын 2-октябры № 545

“Кыргыз Республикасынын Салык кодексине толуктоо киргизүү жөнүндө” Кыргыз Республикасынын Мыйзам долбооруна Кыргыз Республикасынын Өкмөтүнүн  корутундусу тууралуу

“Кыргыз Республикасынын Өкмөтү жөнүндө” Кыргыз Республикасынын конституциялык Мыйзамынын 31-беренесине ылайык Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын Жогорку Кеңешинин депутаттары С.Нышанов, Т. Узакбаев, Э.Исаков, К.Самаков, А.Кочкорбаев, З.Бекбоев жана Р.Шин тарабынан демилгеленген “Кыргыз Республикасынын Салык кодексине толуктоо киргизүү жөнүндө” Кыргыз Республикасынын Мыйзам долбооруна Кыргыз Республикасынын Өкмөтүнүн тиркелген  корутундусу жактырылсын.

2. Бул токтом Кыргыз Республикасынын Жогорку Кеңешине жиберилсин.

“Кыргыз Республикасынын Салык кодексине толуктоо киргизүү жөнүндө”  Кыргыз Республикасынын Мыйзам долбооруна Кыргыз Республикасынын Өкмөтүнүн корутундусу

 “Кыргыз Республикасынын Өкмөтү жөнүндө” Кыргыз Республикасынын конституциялык Мыйзамынын 31-беренесине ылайык, Кыргыз Республикасынын Жогорку Кеңешинин депутаттары С.Нышанов, Т. Узакбаев, Э.Исаков, К.Самаков, А.Кочкорбаев, З.Бекбоев жана Р.Шин тарабынан демилгеленген  “Кыргыз Республикасынын Салык кодексине толуктоо киргизүү жөнүндө” Кыргыз Республикасынын Мыйзам долбоорун карап чыгып, Кыргыз Республикасынын Өкмөтү төмөнкү корутундуга келди.

Жогоруда аталган Кыргыз Республикасынын Мыйзам долбоорунда Кыргыз Республикасынын Салык кодексинин (мындан ары – КР СК)  259-беренесинин 2-бөлүгүнө финансылык ижара келишими (лизинг) боюнча импорттолгон теплицаларды кошумча нарк салыгын  (мындан ары – КНС) төлөөдөн бошотууну сунуштаган толуктоо киргизүү каралган.

259-берененин 1-бөлүгүнө ылайык, КНС төлөөчү катары катталган чарба субъекттери түздөн-түз өздөрүнүн өндүрүштүк максаттары үчүн Кыргыз Республикасынын бажы аймагына импорттогон негизги каражаттар КНС төлөөдөн бошотулат.

Мында 259-берененин 2-бөлүгүндө бул берененин 1-бөлүгүндө каралган, бошотула турган негизги каражаттардын товардык позициялары саналып өтөт.

Буга байланыштуу жана 259-берененин 1-бөлүгүндө императивдүү ченем каралып, анын квалификациялоочу өзгөчөлүгү импорттоочу чарба субьектинин максаты – түздөн-түз өзүнүн өндүрүштүк максаты болгондуктан, 259-берененин 1-бөлүгүнүн жана 2-бөлүгүнүн ченемдери бири-бирине шайкеш келбей калат.

Мыйзам долбоорун иштеп чыккандардын максатына жетишүү, ошондой эле көрсөтүлгөн карама-каршылыктарды жоюу үчүн Кыргыз Республикасынын Салык кодексинин 259-беренесинин 1-пунктун ТЭИ ТН 9406 00310 0 коду менен  толуктоо жетиштүү.

Жогоруда баяндалгандарды эске алуу менен, Кыргыз Республикасынын Өкмөтү “Кыргыз Республикасынын Салык кодексине толуктоо киргизүү жөнүндө” Кыргыз Республикасынын Мыйзам долбоорун сунушталган сын-пикирлерди  жана сунуштарды эске алуу менен толуктап иштеп чыгуу зарыл деп эсептейт.