"Каракол" эркин экономикалык чөлкөм жөнүндө ЖОБО

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

1. Жалпы жоболор

1. Ушул Жобо "Кыргыз Республикасындагы эркин экономикалык зоналар жөнүндө" Кыргыз Республикасынын Мыйзамына ылайык иштелип чыккан жана "Каракол" эркин экономикалык чөлкөмүндөгү (мындан ары - "Каракол" ЭЭЧ) чарбалык жана тышкы экономикалык иштин укуктук негиздерин аныктайт.

2. "Каракол" ЭЭЧны түзүүнүн максаты регионду социалдык-экономикалык жактан өнүктүрүүгө көмөк көрсөтүү, инвестицияларды, технологияларды тартууга жагымдуу шарттарды камсыз кылуу, өндүрүштү, унаа инфратүзүмүн, заманбап өндүрүштүк жана социалдык инфратүзүмдү, жаңы жумуш орундарын түзүү жана өнүктүрүү, рынокторду товарлар менен толтуруу, калктын жашоо турмушунун деңгээлин жогорулатуу болуп саналат.

3. "Каракол" ЭЭЧнын иши жана "Каракол" ЭЭЧнын субъекттери катары юридикалык жактарды каттоо менен байланышкан мамилелер "Кыргыз Республикасындагы эркин экономикалык зоналар жөнүндө" Кыргыз Республикасынын Мыйзамы, Кыргыз Республикасынын салык мыйзамдары, Кыргыз Республикасынын бажы иштери чөйрөсүндөгү мыйзамдары, ошондой эле мыйзамдарда белгиленген тартипте күчүнө кирген Кыргыз Республикасы катышуучу болуп саналган эл аралык келишимдер менен жөнгө салынат.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

4. Эгерде мыйзамда белгиленген тартипте күчүнө кирген Кыргыз Республикасы катышуучу болуп саналган эл аралык келишимдерде ЭЭЧ жөнүндө мыйзамдарда каралгандан башкача эрежелер белгиленген болсо, анда эл аралык келишимдердин эрежелери колдонулат.

5. "Каракол" ЭЭЧ функциялык типтеги ЭЭЧ болуп саналат, анын тосмо тургузулган аймагы жана чек аралары, бюджети, башкаруунун өздүк органдары бар.

6. "Каракол" ЭЭЧ төмөнкү эки участокто жайгашкан:

- Ысык-Көл облусунун Балкычы шаарында - 500 га аянттагы участокто;

- Ысык-Көл облусунун Ысык-Көл районундагы Тамчы айыл аймагынын Тамчы айылынын чет-жакасында - 1180 га аянттагы участокто.

2. "Каракол" ЭЭЧны уюштуруунун жана анын иштешинин шарттары

7. "Каракол" ЭЭЧ Кыргыз Республикасынын бажы иштери чөйрөсүндөгү мыйзамдарынын талаптарына ылайык "Каракол" ЭЭЧнын субъекттеринин ишине бажылык контролдоо жана бажылык жөнгө салуу менен камсыз кылына турган атайын бөлүнгөн аймакта түзүлөт.

8. Эркин бажы чөлкөмүнүн бажылык режими колдонулган "Каракол" ЭЭЧнын аймагын ыңгайлаштырууга карата талаптар, анын ичинде тосмо орнотуу боюнча талаптар, ошондой эле "Каракол" ЭЭЧнын аймагында "Каракол" ЭЭЧнын субъекттеринин ишин жөнгө салуу Кыргыз Республикасынын мыйзамдарына ылайык аныкталат.

Бажы тармагындагы ыйгарым укуктуу мамлекеттик орган тосмонун же бажылык контролдоонун башка шарттарынын Кыргыз Республикасынын мыйзамдарынын талаптарына шайкеш келүүсүн бышыктайт.

9. Эгерде ушул бапта башкача каралбаса, ушул Жобонун 7-пунктунда каралган шарттар сакталбаган учурда "Каракол" ЭЭЧнын субъекттерине жалпы салыктык режим колдонулат.

10. "Каракол" ЭЭЧнын субъекттери "Каракол" ЭЭЧнын аймагында "Кыргыз Республикасындагы эркин экономикалык зоналар жөнүндө" Кыргыз Республикасынын Мыйзамын жана Кыргыз Республикасынын башка ченемдик укуктук актыларын сактаган шартта Евразия экономикалык бирлигинин товарларын жана чет өлкөлүк товарларды колдонуу менен байланышкан өндүрүштүк жана башка чарбалык ишти жүргүзө алышат.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

11. "Каракол" ЭЭЧнын субъекттери Кыргыз Республикасынын мыйзамдарында тыюу салынбаган башка иштерди жүргүзөт.

12. "Каракол" ЭЭЧнын субъекттерин алар тарабынан бажы иштери чөйрөсүндөгү мыйзамдардын, салык мыйзамдарынын жана мамлекеттик социалдык камсыздандыруу боюнча мыйзамдардын талаптарын сактоо маселелери боюнча текшерүү Кыргыз Республикасынын мыйзамдарына ылайык "Каракол" ЭЭЧнын башкы дирекциясын кабарлоо менен жүргузүлөт.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

13. Кыргыз Республикасынын мыйзамында аныкталган учурлардан тышкары, каалаган мамлекеттик орган тарабынан "Каракол" ЭЭЧнын субъекттеринин чарбалык иштерине кийлигишүүсүнө жол берилбейт.

3. "Каракол" ЭЭЧны каржылоо жана өзгөчө валюталык режим

14. "Каракол" ЭЭЧны түзүүгө жана өнүктүрүүгө кеткен чыгымдарды, анын ичинде өндүрүштүк, инженердик, унаалык жана башка инфратүзүмдүк, "Каракол" ЭЭЧнын иштеши менен байланышкан башка чыгымдарды, ошондой эле башкы дирекцияны күтүүгө каралган сарптоолорду каржылоо республикалык бюджеттен, жергиликтүү бюджеттен, "Каракол" ЭЭЧнын өздүк бюджетинен же Кыргыз Республикасынын мыйзамдары менен тыюу салынбаган башка булактардан жүргүзүлүшү мүмкүн.

15. "Каракол" ЭЭЧнын башкы дирекциясы ай сайын келип түшкөн акчадан 0,01 пайыз өлчөмүндө жергиликтүү бюджетке жана келип түшкөн акчадан 0,01 пайыз өлчөмүндө республикалык бюджетке чегерет.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

15-1. "Каракол" ЭЭЧнын субъекттери "Каракол" ЭЭЧнын аймагында "Каракол" ЭЭЧнын субъекттери катары өз иштерин жүзөгө ашыруу укугу үчүн "Каракол" ЭЭЧнын башкы дирекциясына жыл сайын акы төлөшөт.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

16. "Каракол" ЭЭЧнын субъекттери катары "Каракол" ЭЭЧнын аймагында ишти жүзөгө ашыруу укугу үчүн акы төлөө эсеп фактураларды жана товарларга декларацияларды тариздөө бүткөндө, Кыргыз Республикасынын аймагында товарларды, жумуштарды жана кызмат көрсөтүүлөрдү сатуудан түшкөн акчанын 1 пайыз өлчөмүндө, Кыргыз Республикасынын аймагынан тышкары товарларды, жумуштарды жана кызмат көрсөтүүлөрдү сатуудан түшкөн акчанын 1 пайыз өлчөмүндө белгиленет.

Жогоруда көрсөтүлгөн төлөмдөрдөн жана "Каракол" ЭЭЧнын башкы дирекциясынын "Каракол" ЭЭЧнын субъекттери менен түзгөн келишимдер боюнча төлөмдөрдөн башка төлөмдөр каралбайт.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

17. "Каракол" ЭЭЧнын аймагында өзгөчө валюталык режим Кыргыз Республикасынын мыйзамдарында белгиленген эрежелерге ылайык кызмат көрсөтүүдө жана юридикалык жана жеке жактардын ортосундагы эсептешүүлөрдө чет өлкөлүк валютанын эркин жүгүртүлүшүн карайт.

18. "Каракол" ЭЭЧнын субъекттеринин тышкы соода ишинин чет өлкөлүк катышуучулары менен болгон эсептешүүлөрү тараптардын макулдугу боюнча каалагандай валютада жүргүзүлөт.

4. Салыктык милдеттенмелерди жана мамлекеттик социалдык камсыздандыруу боюнча милдеттенмелерди аткаруу

19. Юридикалык жакты ЭЭЧнын субъекти катары каттоо же юридикалык жак тарабынан ЭЭЧнын субъекти катары макамын жоготуу Юридикалык жакты ЭЭЧнын субъекти катары эсептик каттоо тартибине ылайык жүргүзүлөт.

20. "Каракол" ЭЭЧнын субъекттеринин ишине карата жеңилдетилген салыктык режим бажы иштери чөйрөсүндө ыйгарым укуктуу мамлекеттик орган тосмолордун же башка шарттардын "Каракол" ЭЭЧнын субъекттерин бажылык контролдоо талаптарына шайкештигин бышыктаган учурда Кыргыз Республикасынын Салык кодексиндеги 57-бапка ылайык колдонулат.

21. "Каракол" ЭЭЧнын субъекти мамлекеттик социалдык камсыздандыруу боюнча милдеттенмелерди аткарат, анын ичинде Кыргыз Республикасынын мыйзамдарына ылайык жалдануу боюнча иштеп жаткан жеке жактарды мамлекеттик социалдык камсыздандырат.

22. "Каракол" ЭЭЧнын субъекттери бухгалтердик эсеп жөнүндө тартипке жана Кыргыз Республикасынын салык мыйзамдарына ылайык бухгалтердик эсеп жана финансылык-чарбалык иш тууралуу отчеттуулукту жүргүзөт.

5. 5. "Каракол" ЭЭЧда колдонулуучу бажылык жол-жобо

(Бөлүктүн аталышы КР Өкмөтүнүн 2016-жылдын 8-июлундагы № 376  токтомунун редакциясына ылайык)

23. "Каракол" ЭЭЧнын аймагы Кыргыз Республикасынын бажы иштери чөйрөсүндөгү мыйзамдарына ылайык бажылык контролдоонун ченемдерин сактоо максатында Евразия экономикалык бирлигинин бажылык аймагынын бөлүгү болуп саналат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

24. Эркин бажы чөлкөмү - бажылык жол-жобосу, мында "Каракол" ЭЭЧнын субъекттери бажы алымдарын, салыкты төлөбөстөн, ошондой эле чет өлкөлүк товарларга карата тарифтик жана тарифтик эмес жөнгө салуунун чараларын колдонбостон жана Евразия экономикалык бирлигинин товарларына карата тыюу салууларды жана чектөөлөрдү колдонбостон "Каракол" ЭЭЧнын аймагынын чектеринде товарларды жайгаштырат жана колдонушат.

"Каракол" ЭЭЧнын аймагына эркин бажы чөлкөмү бажылык жол-жобосунун алдындагы товарларды жайгаштыруунун шарты жана тартиби Евразия экономикалык бирлигине мүчө мамлекеттердин бажы иштери чөйрөсүндөгү эл аралык келишимдерине жана Кыргыз Республикасынын мыйзамдарына ылайык жүзөгө ашырылат.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

25. Эркин бажы чөлкөмүнүн бажылык жол-жобосу Кыргыз Республикасынын бажы иштери чөйрөсүндөгү мыйзамдарынын талаптарына ылайык бажылык контролдоону камсыз кылуу максатында ыңгайлаштырылган "Каракол" ЭЭЧнын аймагында колдонулат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

26. "Каракол" ЭЭЧнын субъекттери "Каракол" ЭЭЧнын аймагына алып келген чет өлкөлүк товарлар эркин бажы чөлкөмүнүн бажылык жол-жобосунун шарттарына ылайык "Каракол" ЭЭЧнын аймагына жайгаштырылат жана колдонулат.

"Каракол" ЭЭЧнын аймагынан товарларды алып чыгуу Кыргыз Республикасынын бажы чөйрөсүндөгү мыйзамдарына ылайык "Каракол" ЭЭЧнын субъекти тандап алган бажылык жол-жобонун шарттарында жүзөгө ашырылат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

27. Эркин бажы чөлкөмүнүн бажылык жол-жобосу колдонулуучу "Каракол" ЭЭЧнын аймагы бажылык контролдоонун чөлкөмү болуп саналат. "Каракол" ЭЭЧнын субъекттеринин товарларын бажылык жол-жобонун алдында жайгаштыруу менен байланышкан бажылык контролдоо жана бажылык операциялар Кыргыз Республикасынын бажы иштери чөйрөсүндөгү мыйзамдарына ылайык Кыргыз Республикасынын бажы органдары тарабынан жүзөгө ашырылат.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

28. "Каракол" ЭЭЧнын субъекттери тарабынан "Каракол" ЭЭЧнын аймагына алып келген жана эркин бажы чөлкөмүнүн бажылык жол-жобосу менен жайгаштырылган чет өлкөлүк товарлар бажы алымдарын, салыктарды, ошондой эле тарифтик жана тарифтик эмес жөнгө салуунун чараларын колдонуу максаты үчүн Евразия экономикалык бирлигинин бажы аймагынан тышкары турган товарлар катары каралат.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

29. (КР Өкмөтүнүн 2016-жылдын 8-июлундагы № 376 токтомуна ылайык күчүн жоготту)

29-1. "Каракол" ЭЭЧнын аймагында товарлар менен операцияларды жүзөгө ашыруучу "Каракол" ЭЭЧнын субъекттери ташып келинүүчү, ташып чыгарылуучу, сакталуучу, өндүрүлүүчү, кайра иштетилүүчү, утилдештирилүүчү, сатып алынуучу жана сатылуучу товарлардын эсебин жүргүзүү жана ушул товарлар боюнча отчеттуулукту "Каракол" ЭЭЧнын башкы дирекциясына, ошондой эле товарларды контролдоо жана эсепке алуу боюнча отчеттуулукту бажы жана салык органдарына берүүгө милдеттүү. "Каракол" ЭЭЧнын чегинде товарларга байланыштуу ар кандай өзгөрүүлөр эсепке алуу документтеринде чагылдырылышы керек.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

30. Кыргыз Республикасынын бажы жана салык органдары, ошондой эле "Каракол" ЭЭЧнын башкы дирекциясы өз компетенцияларынын чегинде бажы жана салык иштери чөйрөсүндөгү Кыргыз Республикасынын мыйзамдарына ылайык "Каракол" ЭЭЧнын субъекттери иштеген товарлар менен болгон операцияларды контролдойт жана эсепке алат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

31. "Каракол" ЭЭЧнын субъекти "Каракол" ЭЭЧнын аймагынан Кыргыз Республикасынын аймагына алып чыгуучу товарларга карата:

1) салык салуу Кыргыз Республикасынын салык мыйзамдарына ылайык жүргүзүлөт;

2) тарифтик жана тарифтик эмес жөнгө салуу чаралары Кыргыз Республикасынын бажы иштери чөйрөсүндөгү мыйзамдарына ылайык колдонулат.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

32. (КР Өкмөтүнүн 2016-жылдын 8-июлундагы № 376 токтомуна ылайык күчүн жоготту)

33. "Каракол" ЭЭЧда өндүрүлгөн продукцияны Евразия экономикалык бирлигине мүчө мамлекеттердин аймагына, ошондой эле Евразия экономикалык бирлигинин аймагынан тышкары ташып чыгуу Кыргыз Республикасынын аймагына алып кирүүнү кошпогондо, квотадан бошотулат.

"Каракол" ЭЭЧда өндүрүлгөн продукцияны Кыргыз Республикасынын аймагына ташып келүү Кыргыз Республикасынын Өкмөтү бекиткен классификаторго ылайык аныкталган кайра иштетилүүчү ата мекендик айыл чарба продукциясын кошпогондо, квота алууга тийиш, анын көлөмү жыл ичинде "Каракол" ЭЭЧнын ар бир субъекти боюнча өндүрүлгөн продукциянын жалпы көлөмүнүн 30 пайызынан ашпашы керек.

Продукция өндүрүүчү ("Каракол" ЭЭЧнын субъекти) тарабынан ЭЭЧда өндүргөн продукциясын Кыргыз Республикасынын бажы аймагына ташып келүүдө белгиленген квотадан ашкан көлөмү Кыргыз Республикасынын салык мыйзамдарына ылайык салык салынууга тийиш.

"Каракол" ЭЭЧда өндүрүлгөн продукцияны экспорттоодо белгиленген квотанын сакталышын контролдоо Кыргыз Республикасынын бажы, салык органдары жана "Каракол" ЭЭЧнын башкы дирекциясы жүзөгө ашырат.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

34. Эгерде товар Евразия экономикалык бирлигинин мыйзамдарында жана Кыргыз Республикасынын мыйзамдарында белгиленген критерийлерге ылайык толук бойдон өндүрүлсө же жетиштүү иштетилсе/кайра иштетилсе "Каракол" ЭЭЧнын аймагында өндүрүлгөн деп эсептелет.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

35. "Каракол" ЭЭЧнын субъекттери тарабынан Кыргыз Республикасынын аймагына алып келинген товарларга "Каракол" ЭЭЧинде кайра иштетилген даражасына, бүтүмдүн көлөмүнө жана сатып алуучунун ким экендигине карабастан Кыргыз Республикасынын салык мыйзамдарына ылайык салык салынууга тийиш.

Кыргыз Республикасынын аймагына жеткирүү үчүн ЭЭЧнын субъекттери тарабынан ЭЭЧнын аймагынан ташылып чыккан товарлар, анын ичинде ЭЭЧнын субъекттери болуп саналбаган жактардын пайдасына аларды ажыратып алганда "салык салынуучу импорт" берими болуп саналат жана Кыргыз Республикасынын салык мыйзамдарына ылайык салык салынууга тийиш.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

36. "Каракол" ЭЭЧнын субъекттери тарабынан "Каракол" ЭЭЧнын аймагына алып келинген жана "Каракол" ЭЭЧнын субъекттери тарабынан "Каракол" ЭЭЧнын аймагынан алып чыгарылган товарларды бажылык тариздөө Кыргыз Республикасынын бажы органы тарабынан "Каракол" ЭЭЧнын башкы дирекциясын кабарлоо менен жүргүзүлөт.

37. Эркин бажы чөлкөмүнүн бажылык жол-жобосу алдына Кыргыз Республикасынын Өкмөтү тарабынан бекитилген тизмеге ылайык "Каракол" ЭЭЧнын аймагына алып келүүгө тыюу салынган товарларды жайгаштырууга болбойт.

38. Юридикалык жак "Каракол" ЭЭЧнын субъекти макамынан айрылгандан кийин "Каракол" ЭЭЧнын аймагына юридикалык жак алып келген товарлар эркин бажы чөлкөмүнүн бажылык жол-жобосу алдында жайгаштырылышы мүмкүн эмес.

39. Кыргыз Республикасынын контролдонуучу продукцияларынын Улуттук контролдук тизмесине киргизилген "Каракол" ЭЭЧнын аймагына киргизилүүчү товарларга карата тарифтик эмес жөнгө салуу чаралары Кыргыз Республикасынын бажы иштери чөйрөсүндөгү мыйзамдарына ылайык колдонулат.

6. "Каракол" ЭЭЧнын субъекттери жана чет өлкөлүк инвесторлору үчүн мамлекеттик кепилдиктер

40. "Каракол" ЭЭЧ жөнүндө мыйзамдар жана Кыргыз Республикасынын башка мыйзамдары менен "Каракол" ЭЭЧнын субъекттерине кепилдиктер белгиленет.

41. "Каракол" ЭЭЧнын субъекттерине Кыргыз Республикасынын инвестициялык иштер жөнүндөгү мыйзамдарында каралган инвесторлордун укугун жана инвестицияларды коргоонун кепилдиктери колдонулат.

42. Кыргыз Республикасынын мыйзамдарына ылайык чет өлкөлүк инвестицияларды укуктук жактан коргоо кепилденет.

43. Чет өлкөлүк инвестор ("Каракол" ЭЭЧнын субъекти) менен "Каракол" ЭЭЧнын башкы дирекциясынын ортосунда пайда болгон талаш-тартыштар Кыргыз Республикасынын мыйзамдарына ылайык каралат.

44. Чет өлкөлүк жарандардын жана жарандыгы жок жактардын кирүү, жүрүү жана чыгуу эрежелери Кыргыз Республикасынын мыйзамдары жана Кыргыз Республикасы катышуучу болгон, мыйзамда белгиленген тартипте күчүнө кирген эл аралык келишимдер менен жөнгө салынат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

45. Кыргыз Республикасынын мыйзамдарын бузуу үчүн "Каракол" ЭЭЧнын субъекттери Кыргыз Республикасынын мыйзамдарына ылайык жоопкерчилик тартышат.

7. "Каракол" ЭЭЧнын башкармалыгы

46. "Каракол" ЭЭЧнын башкы дирекциясы "Каракол" ЭЭЧнын иштешине жана өнүгүшүнө жетекчиликти, ошондой эле анын карамагына кирген маселелер боюнча "Каракол" ЭЭЧнын субъекттеринин ишин координациялоону ишке ашыруучу эркин экономикалык чөлкөмүнүн башкаруучу органы болуп саналат.

46-1. "Каракол" ЭЭЧнын башкы дирекциясы мекеменин уюштуруу-укуктук формасында түзүлөт.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

46-2. "Каракол" ЭЭЧнын башкы дирекциясы өз ишинде Кыргыз Республикасынын Конституциясын, Кыргыз Республикасынын мыйзамдарын жана Кыргыз Республикасынын башка ченемдик укуктук актыларын жана Кыргыз Республикасы катышуучу болгон, мыйзамда белгиленген тартипте күчүнө кирген эл аралык келишимдерди, ошондой эле ЭЭЧнын ишинин мамлекеттик саясатын иштеп чыгуу боюнча функцияларды жүзөгө ашырган мамлекеттик органдын актыларын жана ушул Жобону жетекчиликке алат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

46-3. "Каракол" ЭЭЧнын башкы дирекциясы юридикалык жак болуп саналат, белгиленген тартипте Кыргыз Республикасынын банктарында алыш-бериш, валюталык жана башка эсептерди ачууга укуктуу.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

46-4. "Каракол" ЭЭЧнын башкы дирекциясынын толук расмий аталышы:

мамлекеттик тилде:

"Каракол" эркин экономикалык чөлкөмүнүн башкы дирекциясы" мекемеси";

расмий тилде:

"Учреждение "Генеральная дирекция Свободной экономической зоны "Каракол".

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

46-5. "Каракол" ЭЭЧнын башкы дирекциясынын юридикалык дареги: 721900, Кыргыз Республикасы, Ысык-Көл облусу, Балыкчы шаары, Нарын шоссеси, 1а.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

46-6. "Каракол" ЭЭЧнын башкы дирекциясы Кыргыз Республикасынын мыйзамдарына ылайык өзүнүн милдеттенмелери боюнча жоопкерчиликте болот.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

47. "Каракол" ЭЭЧнын ишин Кыргыз Республикасынын Премьер-министри тарабынан кызмат орунга дайындалуучу жана кызмат ордунан бошотулуучу башкы директор жана анын орун басарлары башкарышат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

48. Кыргыз Республикасынын министрликтери, мамлекеттик комитети, административдик ведомстволору жана башка мамлекеттик органдары алардын компетенциясына тийиштүү маселелерди чечүүдө, эгер алар "Каракол" ЭЭЧнын кызыкчылыктарын козгой турган болсо, "Каракол" ЭЭЧнын башкы дирекциясы менен макулдашуу боюнча аракет кылышат. Кайчы пикирлер пайда болгон учурда алар Кыргыз Республикасынын Өкмөтү тарабынан чечилет.

49. "Каракол" ЭЭЧнын башкы дирекциясы Кыргыз Республикасынын карыздары жана милдеттенмелери боюнча жооп бербейт, Кыргыз Республикасы "Каракол" ЭЭЧнын башкы дирекциясынын карыздары жана милдеттенмелери үчүн жооп бербейт.

50. "Каракол" ЭЭЧнын башкы дирекциясы төмөнкүдөй функцияларды аткарат:

1) "Каракол" ЭЭЧнын субъекттери катары юридикалык жактарды эсептик каттоону ишке ашыруу;

2) "Каракол" ЭЭЧнын субъекттеринин реестрин жүргүзүү, "Каракол" ЭЭЧнын субъекттеринин талабы боюнча же кызыкдар жактардын суроо-талаптары боюнча "Каракол" ЭЭЧнын субъекттеринин реестринен көчүрмөлөрдү берүү;

3) "Каракол" ЭЭЧда иштөө шарттары жөнүндө келишим түзүүгө юридикалык жактар берген билдирмелерди кароо;

4) "Каракол" ЭЭЧнын субъектисинин талабы боюнча же кызыкдар жактардын суроо-талаптары боюнча "Каракол" ЭЭЧнын субъекттеринин реестринен көчүрмөлөрдү берүү;

5) "Каракол" ЭЭЧнын иштери боюнча мамлекеттик органдар, жергиликтүү өз алдынча башкаруу органдары, уюмдар жана мекемелер менен өз ара аракеттенүүдө "Каракол" ЭЭЧнын субъекттеринин кызыкчылыктарын жактоо;

6) "Каракол" ЭЭЧда инвестициялык жана ишкердик иш-аракеттерди жүргүзүүнүн шарттарын чагылдыруу, чет өлкөлүк жана ата мекендик инвесторлорду тартуу максатында Кыргыз Республикасында жана анын чегинен сыртта жарнамалык, маалыматтык иштерди жүзөгө ашыруу;

7) "Каракол" ЭЭЧнын иштери тууралуу маалыматтарды жалпыга тааныштыруу үчүн аны ачык пайдаланууну, анын ичинде "Каракол" ЭЭЧнын башкы дирекциясынын сайтына милдеттүү түрдө жайгаштыруу менен камсыз кылуу;

8) ЭЭЧнын ишинин мамлекеттик саясатын иштеп чыгуу боюнча функцияларды жүзөгө ашыруучу ыйгарым укуктуу мамлекеттик орган менен макулдашуудан кийин "Каракол" ЭЭЧнын иштөө шарттары тууралуу типтүү келишимди иштеп чыгуу жана бекитүү;

9) "Каракол" ЭЭЧинде иштөөнүн шарттары тууралуу келишимди түзүү жана/же узартуу жана алардын аткарылышын контролдоону ишке ашыруу;

10) "Каракол" ЭЭЧнын субъекттери катары алардын иши тууралуу маалыматтарды "Каракол" ЭЭЧнын субъекттеринен алуу;

11) Кыргыз Республикасынын мыйзамдарына ылайык "Каракол" ЭЭЧнын субъектисинин макамынан ажыратуу жөнүндө чечим кабыл алуу;

12) "Каракол" ЭЭЧнын башкы дирекциясына оперативдүү башкарууга өткөрүп берилген мүлктү Кыргыз Республикасынын мыйзамдарында белгиленген тартипте тескөө;

13) Кыргыз Республикасынын Жогорку Кеңешине жана Кыргыз Республикасынын Өкмөтүнө "Каракол" ЭЭЧнын чек араларын өзгөртүү жөнүндө сунуш менен кайрылуу;

14) Кыргыз Республикасынын ченемдик укуктук актыларына жана ушул Жобого ылайык башка функцияларды ишке ашыруу.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

50-1. "Каракол" ЭЭЧнын башкы дирекциясы ушул Жободо аныкталган өз милдеттерин жана функцияларын аткаруу үчүн төмөнкүлөргө укуктуу:

1) "Каракол" ЭЭЧнын чек араларын өзгөртүү, анын иштөө мөөнөтүн узартуу демилгеси менен чыгууга;

2) мамлекеттик органдардан тийиштүү маалыматты суратууга;

3) "Каракол" ЭЭЧнын башкы дирекциясынын кызматкерлерин эл аралык конференцияларга, семинарларга, көргөзмөлөргө катышуу үчүн командировкаларга жөнөтүүгө.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

51."Каракол" ЭЭЧнын башкы дирекциясынын милдеттерине төмөнкүлөр кирет:

1) "Каракол" ЭЭЧнын жана анын компетенциясын чегинде республиканын экономикалык кызыкчылыктарын коргоо;

2) квартал сайын, отчеттук мезгилден кийинки айдын 15-күнүнө чейин ЭЭЧнын ишинин мамлекеттик саясатын иштеп чыгуу боюнча функцияларды жүзөгө ашыруучу ыйгарым укуктуу мамлекеттик органга, ал белгилеген форматка ылайык "Каракол" ЭЭЧнын башкы дирекциясынын иши тууралуу отчетту тапшырат;

2-1) ай сайын ЭЭЧнын ишинин мамлекеттик саясатын иштеп чыгуу боюнча функцияларды жүзөгө ашырган ыйгарым укуктуу мамлекеттик орган белгилеген форма боюнча, Кыргыз Республикасынын аймагына ташылып келген товарларды бөлүп көрсөтүү менен ЭЭЧнын субъекти тарабынан өндүрүлгөн продукциянын жалпы көлөмү жөнүндө маалыматты салык органына берүү;

3) тийиштүү жылга "Каракол" ЭЭЧны өнүктүрүүнүн ар жылдык планын иштеп чыгуу жана ЭЭЧнын ишинин мамлекеттик саясатын иштеп чыгуу боюнча функцияларды жүзөгө ашыруучу ыйгарым укуктуу мамлекеттик органга жиберүү;

4) "Каракол" ЭЭЧны заманбап талаптарга жооп берген инженердик курулмалар жана инфратүзүм менен куруу жана аларды мыйзамдарда белгиленген тартипте пайдалануу;

5) жер участоктор жана жайлар, сунушталган жер участоктор жана жайларга нарктын белгиленген тарифтери, "Каракол" ЭЭЧнын субъекттерин каттоо жана макамынан ажыратуу шарттары жана "Каракол" ЭЭЧнын субъекттеринин ишин жүргүзүү үчүн башка шарттар тууралуу толук маалымат алууга мүмкүнчүлүк берген "Каракол" ЭЭЧнын расмий сайтын иштеп чыгуу жана колдоо;

6) "Каракол" ЭЭЧнын ички коопсуздугунун эрежелерин белгилөө жана сактоо;

7) "Каракол" ЭЭЧнын башкы дирекциясынын түзүмүн жана штаттык санын аныктоо;

8) "Каракол" ЭЭЧнын башкы дирекциясынын кызматкерлерин кабыл алуу жана бошотуу.

9) оперативдүү башкарууга өткөрүп берилген мамлекеттик мүлктүн сакталышын камсыздоо;";

10) Кыргыз Республикасынын мыйзамдарына жана түзүлгөн келишимдерге ылайык өзүнүн милдеттерин аткаруу.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

52. "Каракол" ЭЭЧнын башкы дирекциясынын бюджети "Каракол" ЭЭЧнын бюджетинен турат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

53. "Каракол" ЭЭЧнын башкы дирекциясы өз ишин Кыргыз Республикасынын мыйзамдарына жана ушул Жобого ылайык толук чарбалык эсептин, өзүн-өзү каржылоонун жана өзүн-өзү актоонун принциптеринде жүзөгө ашырат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

54. "Каракол" ЭЭЧнын башкы дирекциясынын бюджети төмөнкүлөрдөн алынган каражаттардан түзүлөт:

1) "Каракол" ЭЭЧнын аймагында "Каракол" ЭЭЧнын субъекти катары ишти жүзөгө ашыруу укугуна төлөмдөн;

2) жер участокторун ижарага берүү үчүн төлөмдөн;

3) Кыргыз Республикасынын мыйзамдарында тыюу салынбаган башка кирешелерден.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

55. "Каракол" ЭЭЧнын бюджеттик каражаттарын башкы дирекция төмөнкүлөргө пайдаланат:

1) ЭЭЧ жөнүндө мыйзамдарда аныкталган транспорттук жана башка инфраструктураны түзүүгө, өнүктүрүүгө;

2) "Каракол" ЭЭЧнын башкы дирекциясынын оперативдүү башкаруусунда турган мүлктү тейлөөгө;

3) инфраструктураны күтүүгө, "Каракол" ЭЭЧнын кызматкерлеринин айлык акысын төлөөгө, коммуналдык жана өкүлчүлүк чыгымдарга.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

56. "Каракол" ЭЭЧнын башкы дирекциясы Кыргыз Республикасынын мыйзамдарында белгиленген тартипте бухгалтердик эсепти жүргүзөт.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

57. "Каракол" ЭЭЧнын башкы дирекциясынын кызматкерлеринин иштөө жана эс алуу режими, аларды социалдык камсыздоо жана камсыздандыруу Кыргыз Республикасынын мыйзамдарынын ченемдери менен жөнгө салынат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

58. Түзүм жана штаттык расписание "Каракол" ЭЭЧнын башкы директору тарабынан бекитилет.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

59. "Каракол" ЭЭЧнын башкы директору башкы дирекцияга жүктөлгөн милдеттердин жана функциялардын аткарылышы үчүн жеке жоопкерчиликте болот.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

60. "Каракол" ЭЭЧнын башкы дирекциясынын мүлкү анын балансында турат жана төмөнкүлөрдүн эсебинен түзүлөт:

1) "Каракол" ЭЭЧнын башкы дирекциясына аны уюштурууда оперативдүү башкаруу укугунда бекитилген мүлктөн;

2) "Каракол" ЭЭЧнын бюджеттик каражаттарынын эсебинен сатып алынган мүлктөн;

3) "Каракол" ЭЭЧнын башкы дирекциясына бекитилген мүлктү пайдалануунун жыйынтыгында алынган же сатып алынган мүлктөн, кирешелерди, жемиштерди, продукцияны кошкондо.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

61. "Каракол" ЭЭЧнын башкы дирекциясы Кыргыз Республикасынын мыйзамдарында белгиленген чекте ага бекитилген мүлккө ээлик кылууга, пайдаланууга жана тескөөгө укуктуу.

(КР Өкмөтүнүн 2016-жылдын 8-июлундагы № 376 токтомунун редакциясына ылайык)

62. "Каракол" ЭЭЧнын башкы дирекциясы мүлктү пайдалануу ченемдерин жана эрежелерин сактоо менен анын сакталышын жана натыйжалуу пайдаланылышын камсыздайт.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)

63. "Каракол" ЭЭЧнын башкы дирекциясы Кыргыз Республикасынын мыйзамдарында белгиленген тартипте жоюлат.

(КР Өкмөтүнүн 2016-жылдын 8-июлундагы № 376  токтомунун редакциясына ылайык)