1-тиркеме

Кыргыз Республикасындагы камсыздандыруу брокерлеринин иши жөнүндө ЖОБО

1. Жалпы жобо

1. Кыргыз Республикасындагы камсыздандыруу брокерлеринин иши жөнүндө ушул жобо (мындан ары - Жобо) камсыздандыруу брокерлеринин өздөрүнүн кесипкөй ишин жүзөгө ашырышынын негизги талаптарын жана шарттарын белгилейт.

2. Камсыздандыруу брокери тиешелүү лицензияны алгандан кийин камсыздандырылуучунун же болбосо камсыздандыруучунун тапшырмаларынын негизинде өзүнүн атынан камсыздандыруу боюнча ортомчулук ишти жүзөгө ашыруучу юридикалык жак болуп саналат.

2. Камсыздандыруу брокеринин ишине карата коюлуучу талаптар

3. Камсыздандыруу брокери брокердик иштин төмөнкүдөй түрлөрүн жүзөгө ашырат:

1) өзүнүн атынан жана камсыздандырылуучунун тапшырмасы боюнча же кайра камсыздандыруу келишими боюнча өзүнүн атынан жана цеденттин тапшырмасы боюнча камсыздандыруу келишимдерин түзгөн ортомчулук ишти;

2) камсыздандыруу (кайра камсыздандыруу) маселелери боюнча кеңеш берүүчү ишти;

3) камсыздандырууга (кайра камсыздандырууга) жеке жана юридикалык жактарды издөө жана тартуу;

4) камсыздандыруу (кайра камсыздандыруу) уюмдарынын кызмат көрсөтүүсүнө жана финансылык абалына салыштырма талдоо жүргүзүү;

5) камсыздандыруу (кайра камсыздандыруу) уюмдарынын көрсөткөн кызматтарына салыштырма талдоо жүргүзүү максатында камсыздандыруу объекттери жөнүндө маалыматтарды чогултуу;

6) кардарлардын тапшырмасы боюнча камсыздандыруу (кайра камсыздандыруу) шарттарын, камсыздандыруучуларды (кайра камсыздандыруучуларды) тандоо критерийлерин, камсыздандыруу кооптуулугун табуу боюнча эксперттик кызмат көрсөтүүнү иштеп чыгуу;

7) камсыздандырылуучунун (цеденттин) тапшырмасы менен камсыздандыруу (кайра камсыздандыруу) келишимин түзүүгө керектүү документтерди даярдоо жана (же) жол-жоболоштуруу, камсыздандыруу маселеси боюнча маалыматтарды чогултуу;

8) камсыздандырылуучунун (цеденттин) тапшырмасы боюнча камсыздандыруу (кайра камсыздандыруу) келишимин жол-жоболоштуруу;

9) камсыздандырылуучу (цедент) менен тиешелүү макулдашуу болсо, камсыздандырууга (кайра камсыздандырууга) аларды кийин которуу үчүн камсыздандыруу (кайра камсыздандыруу) келишими боюнча камсыздандырылуучудан (цеденттен) камсыздандыруу сый төлөмдөрүн чогултуу;

10) кардардын тапшырмасы боюнча камсыздандыруу (кайра камсыздандыруу) келишими же кошо камсыздандыруу боюнча камсыздандыруу кооптуулуктарын жайгаштыруу;

11) камсыздандыруу (кайра камсыздандыруу) келишимин түзүүдө, камсыздандыруу төлөмдөрүн төлөп берүүдө, камсыздандыруу окуясы болгондо дооматтарды, ошондой эле камсыздандыруу (кайра камсыздандыруу) келишимин түзүү менен байланышкан башка документтерди кароодо документтердин туура жана өз учурунда жол-жоболоштурулушун камсыз кылуу;

12) камсыздандыруу окуясы болгондо камсыздандырылуучунун (цеденттин), пайда көрүүчүнүн камсыздандыруу төлөмдөрүн алуусуна кеңеш берүү жана жардам көрсөтүү;

13) камсыздандыруу төлөмдөрүн алуу үчүн керектүү документтерди бepилгeн ыйгарым укуктарга ылайык жол-жоболоштуруу;

14) камсыздандырылуучунун (цеденттин) тапшырмасы боюнча камсыздандыруу төлөмдөрүн кийин камсыздандырылуучуга (цедентке), пайда табуучуга берүү үчүн камсыздандыруу (кайра камсыздандыруу) уюмдарынан камсыздандыруу төлөмдөрүн чогултуу;

15) камсыздандыруу окуясы болгондо кызыкдар жактардын тапшырмасы боюнча чыгымдарды кароо жана жөнгө салуу маселелери боюнча документтерди даярдоо;

16) камсыздандыруу келишимин түзгөнгө чейин камсыздандыруу объектисин баалоо, ошондой эле чыгашаларды баалоо жана камсыздандыруу төлөмдөрүнүн өлчөмүн аныктоо боюнча эксперттердин кызмат көрсөтүүсүн уюштуруу.

4. Камсыздандыруу брокерлерине Кыргыз Республикасынын аймагында чет элдик камсыздандыруу уюмдарынын атынан камсыздандыруу келишимдерин түзүү менен байланышкан камсыздандыруу боюнча ортомчулук ишти жүргүзүүгө тыюу салынат.

5. Камсыздандыруу брокери өзүнүн ишин аткарууда камсыздандырылуучу/камсыздандыруучу менен түзүлгөн келишимдин алкагында камсыздандыруу (кайра камсыздандыруу) келишиминин бир тарабы болушу мүмкүн.

6. Камсыздандырылуучудан (кайра камсыздандырылуучудан) камсыздандыруу (кайра камсыздандыруу) келишиминин төлөө эсебине камсыздандыруу сый төлөмдөрүн кабыл алган камсыздандыруу брокерлери бул каражаттарды камсыздандыруучунун банктык эсебине үч иш күндөн ашпаган мөөнөттө чегерет.

7. Камсыздандырылуучудан (кайра камсыздандырылуучудан) камсыздандыруу (кайра камсыздандыруу) келишиминин төлөө эсебине акча каражаттарын кабыл алган камсыздандыруу брокери өзүнүн кесиптик жоопкерчилигин үч миллион сомдон кем эмес камсыздандыруу суммасына камсыздандырууга милдеттүү.

8. Эгерде камсыздандыруу (кайра камсыздандыруу) келишиминин төлөө эсебине камсыздандырылуучудан (кайра камсыздандырылуучудан) акча каражаттарын кабыл алуучу камсыздандыруу брокерлеринин кесиптик жоопкерчиликти белгиленген өлчөмдөгү суммага камсыздандырган келишими болбосо, үч миллион сомдон кем эмес суммага банктын кепилдигине ээ болууга тийиш.

3. Камсыздандыруу брокеринин укуктары, милдеттери жана жоопкерчилиги

9. Камсыздандыруу брокери төмөнкүлөргө укуктуу:

1) камсыздандыруучудан уставдык капиталдын өлчөмү, камсыздандыруу тарифтери жана кабыл алынган камсыздандыруу жоопкерчилиги жөнүндө, ошондой эле лицензиялардын болушу жөнүндө маалыматтарды алууга;

2) алынган лицензияларга ылайык камсыздандырууда жана кайра камсыздандырууда ортомчулук ишти жүзөгө ашырууга;

3) кызмат көрсөтүүлөр үчүн камсыздандыруучу сыяктуу эле камсыздандырылуучудан да сый акы алууга.

10. Камсыздандыруу брокери төмөнкүлөргө милдеттүү:

1) камсыздандыруу брокерлеринин кардарлар менен түзүлгөн келишимдерине ылайык милдеттенмелерди аткарууга;

2) туруктуу финансылык абалга жана камсыздандыруунун оптималдуу шарттарына ээ камсыздандыруучулар менен камсыздандыруу келишимдерин түзүүнү камсыздоого;

3) алынган камсыздандыруу сый төлөмүн ушул Жобонун 16-пунктуна ылайык камсыздандырылуучуга белгиленген мөөнөттө которууга.

11. Камсыздандыруу брокери мыйзамдарга жана түзүлгөн келишимдерге ылайык төмөнкүлөр үчүн жоопкерчилик тартат:

1) кардарга жана камсыздандыруу ишин жөнгө салуу жана көзөмөлдөө чөйрөсүндөгү ыйгарым укуктуу мамлекеттик органга маалыматтын ишенимсиздиги, объективдүү эместиги жана жетишсиздиги үчүн;

2) камсыздандыруудагы сырлуу маалыматтарды ачыкка чыгаргандыгы үчүн;

3) алар түзгөн келишимдерде каралган милдеттенмелерди аткарбагандыгы үчүн.

4. Камсыздандыруу брокеринин кызмат адамдарына коюлуучу квалификациялык талаптар

12. Камсыздандыруу брокеринин кызмат адамы болуп төмөнкүлөр саналат:

- жеке же коллегиялык аткаруу органынын жетекчиси;

- коллегиялык аткаруу органынын мүчөлөрү;

- башкы бухгалтер.

13. Камсыздандыруу брокеринин кызмат адамдары менеджмент, экономика, юриспруденция, камсыздандыруу, финансы-кредит чөйрөсү жаатындагы тиешелүү билимге жана эмгек стажы болсо, практикалык иштеги тажрыйбага ээ болуусу зарыл.

14. Камсыздандыруу брокеринин кызмат адамы Кыргыз Республикасында таанылган документтер менен ырасталган жогорку билимге ээ болууга тийиш.

15. Камсыздандыруу брокеринин кызмат адамдарынын стажына жана тажрыйбасына карата коюлуучу квалификациялык талаптар:

1) камсыздандыруу брокеринин жеке же коллегиялык аткаруу органынын жетекчиси ишке жөндөмдүү, менеджмент, экономика, юриспруденция, камсыздандыруу, финансы-кредит чөйрөсүндө жогорку билими бар, камсыздандыруу (кайра камсыздандыруу) уюмунда же камсыздандыруу брокеринин уюмунда беш жылдан кем болбогон, анын ичинде жетекчи кызматтарда үч жылдан кем эмес иш стажы бар Кыргыз Республикасынын жараны болууга тийиш;

2) башкы бухгалтер камсыздандыруу иши чөйрөсүндө бухгалтердик кызматта эки жылдан кем эмес же финансы-кредит мекемесинде бухгалтердик кызматта үч жылдан кем эмес иш стажы болууга тийиш.

5. Корутунду жоболор

16. Камсыздандыруу брокерлери ар квартал сайын, отчеттук мезгилден кийинки айдын 15-күнүнөн кечиктирбей, камсыздандыруу ишин жөнгө салуу жана көзөмөлдөө чөйрөсүндөгү ыйгарым укуктуу мамлекеттик органга ушул жобонун 1-тиркемесине ылайык формада отчет берет.

17. Камсыздандыруу брокерлеринин ишин "Кыргыз Республикасында камсыздандырууну уюштуруу жөнүндө" Кыргыз Республикасынын Мыйзамына ылайык камсыздандыруу ишин жөнгө салуу жана көзөмөлдөө чөйрөсүндөгү ыйгарым укуктуу мамлекеттик орган, ошондой эле камсыздандыруучу менен камсыздандыруу брокеринин ортосундагы келишимде каралган ыйгарым укуктарды жана милдеттерди аткаруу бөлүгүндө камсыздандыруучу контролдойт.

18. Камсыздандыруу брокерлери Кыргыз Республикасынын мыйзамдарына ылайык жоопкерчилик тартышат.

20__-жылдын "__" __________ карата камсыздандыруу брокеринин иши жөнүндө МААЛЫМАТ

Уюмдун толук аталышы: __________________________________________________________________

(камсыздандыруу брокердик уюмунун толук

_______________________________________________________________________________________

аталышы (Уставга ылайык))

Салык төлөөчүнүн идентификациялык номери: _______________________________________________

Ишке берилген лицензия жөнүндө маалымат: ________________________________________________

_______________________________________________________________________________________

Камсыздандыруу брокеринин дареги (турган жери):

_______________________________________________________________________________________

_______________________________________________________________________________________

(камсыздандыруу брокердик уюмунун турган жери (Уставга ылайык))

Кварталдык отчет (сом менен)

Мөөрдүн орду