КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2017-жылдын 15-сентябры № 584

Айрым өткөрүү пункттарынын иштеши боюнча маселелер жөнүндө

Евразия экономикалык бирлигинин алкагында эл аралык милдеттенмелерди аткаруу максатында, "Кыргыз Республикасынын Мамлекеттик чек арасы жөнүндө" Кыргыз Республикасынын Мыйзамынын 11 жана 31-беренелерине, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын Өкмөтүнүн 2007-жылдын 19-ноябрындагы № 556 "Кыргыз Республикасынын мамлекеттик чегарасында эл аралык автомобилдик, аба жана темир жол катнашы үчүн арналган өткөрүү пункттарынын жана Кыргыз Республикасынын автомобиль жолдорундагы ички стационардык посттордун иштерин тартипке салуу боюнча чаралар жөнүндө" токтомуна төмөнкүдөй өзгөртүү киргизилсин:

жогоруда аталган токтом менен бекитилген Кыргыз-өзбек мамлекеттик чек арасындагы өткөрүү пункттарынын тизмегинде:

- "Контролдоонун түрлөрү" графасынын "Бажылык", "Ветеринардык", "Фитосанитардык" жана "Баңгизаттарга каршы" позицияларынын 5-пунктундагы "+" деген белги "-" деген белги менен алмаштырылсын.

2. Кыргыз Республикасынын Өкмөтүнүн 2016-жылдын 6-майындагы № 231 "Өткөрүү пункттарынын иштеши боюнча айрым чаралар жөнүндө" токтомунда төмөнкүдөй өзгөртүү киргизилсин:

- 2-пунктундагы "Баймак-автожол" деген позиция алып салынсын.

3. Кыргыз Республикасынын Мамлекеттик чек ара кызматы Бажы союзунун Комиссиясынын 2011-жылдын 22-июнундагы № 688 "Бажы союзуна мүчө мамлекеттердин тышкы чек арасы аркылуу өткөрүү пункттарында ишке ашырылуучу чек аралык, бажылык, санитардык-карантиндик, ветеринардык, карантиндик фитосанитардык жана транспорттук контролдоону уюштуруу үчүн зарыл болгон имараттарды, жайларды жана курулмаларды жабдууга жана материалдык-техникалык камсыздоого жана Бажы союзуна мүчө мамлекеттердин тышкы чек арасы аркылуу өткөрүү пункттарынын паспортунун формасына бирдиктүү талаптар жөнүндө" чечимине ылайык өткөрүү пункттарын жабдуу жана техникалык камсыздоо боюнча иш-чаралар аткарылганга чейин Кыргыз Республикасынын Мамлекеттик чек арасы аркылуу адамдардын жана жеңил транспорт каражаттарын кыргыз-өзбек мамлекеттик чек арасында жайгашкан "Баймак-автожол" өткөрүү пунктунан өткөрүү убактылуу жеңилдетилген тартипте ишке ашырылсын.

4. Кыргыз Республикасынын Тышкы иштер министрлиги өзбек тарапка кабыл алынган чечим жөнүндө дипломатиялык каналдар боюнча кабарласын.

5. Ушул токтом расмий жарыяланууга тийиш жана кол коюлган күндөн тартып күчүнө кирет.