КЫРГЫЗ РЕСПУБЛИКАСЫНЫН ШАЙЛОО ЖАНА РЕФЕРЕНДУМ ӨТКӨРҮҮ БОЮНЧА БОРБОРДУК КОМИССИЯСЫНЫН

2017 жылдын 20 июнундагы № 168 токтомуна ылайык

КҮЧҮН ЖОГОТТУ

деп табылсын

КЫРГЫЗ РЕСПУБЛИКАСЫНЫН ШАЙЛОО ЖАНА РЕФЕРЕНДУМ ӨТКӨРҮҮ БОЮНЧА БОРБОРДУК КОМИССИЯСЫ

ТОКТОМ

 2016-жылдын 13-ноябры № 204

"Кыргыз Республикасынын Шайлоо жана референдум өткөрүү боюнча борбордук комиссиясынын жана Кыргыз Республикасынын Өкмөтүнө караштуу Мамлекеттик каттоо кызматынын Кыргыз Республикасынын Президентин, Кыргыз Республикасынын Жогорку Кеңешинин депутаттарын шайлоону, Кыргыз Республикасынын референдумун даярдоодо жана өткөрүүдө өз ара аракеттенүүсүнүн тартиби жөнүндө" жобону бекитүү тууралуу

"Кыргыз Республикасынын шайлоо жана референдум өткөрүү боюнча шайлоо комиссиялары жөнүндө" Кыргыз Республикасынын Мыйзамынын 6, 7, 18-беренелерине ылайык, Кыргыз Республикасынын Президентин, Кыргыз Республикасынын Жогорку Кеңешинин депутаттарын шайлоону, Кыргыз Республикасынын референдумун даярдоо жана өткөрүү процессинде Кыргыз Республикасынын Шайлоо жана референдум өткөрүү боюнча борбордук комиссиясынын жана Кыргыз Республикасынын Өкмөтүнө караштуу Мамлекеттик каттоо кызматынын өз ара аракеттенүүсүн өркүндөтүү максатында, Кыргыз Республикасынын Шайлоо жана референдум өткөрүү боюнча борбордук комиссиясы

ТОКТОМ КЫЛАТ:

1. "Кыргыз Республикасынын Шайлоо жана референдум өткөрүү боюнча борбордук комиссиясынын жана Кыргыз Республикасынын Өкмөтүнө караштуу Мамлекеттик каттоо кызматынын Кыргыз Республикасынын Президентин, Кыргыз Республикасынын Жогорку Кеңешинин депутаттарын шайлоону, Кыргыз Республикасынын референдумун даярдоодо жана өткөрүүдө өз ара аракеттенүүсүнүн тартиби жөнүндө" жобо бекитилсин (тиркелет).

2. Кыргыз Республикасынын Шайлоо жана референдум өткөрүү боюнча борбордук комиссиясынын 2015-жылдын 12-августундагы № 117 токтому менен бекитилген "Кыргыз Республикасынын Шайлоо жана референдум өткөрүү боюнча борбордук комиссиясынын жана Кыргыз Республикасынын Өкмөтүнө караштуу Мамлекеттик каттоо кызматынын өз ара аракеттенүүсүнүн тартиби жөнүндө" жобо күчүн жоготту деп табылсын.

3. Бул токтом "Эркин Тоо" газетасына жана Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

4. Бул токтомдун аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары А.Бекматовго жүктөлсүн.

"Кыргыз Республикасынын Шайлоо жана референдум өткөрүү боюнча борбордук комиссиясынын жана Кыргыз Республикасынын Өкмөтүнө караштуу Мамлекеттик каттоо кызматынын Кыргыз Республикасынын Президентин, Кыргыз Республикасынын Жогорку Кеңешинин депутаттарын шайлоону жана Кыргыз Республикасынын референдумун даярдоо жана өткөрүү мезгилинде өз ара аракеттенүүсүнүн тартиби жөнүндө" ЖОБО

1. Жалпы жоболор

1.1. Кыргыз Республикасынын Шайлоо жана референдум өткөрүү боюнча борбордук комиссиясынын жана Кыргыз Республикасынын Өкмөтүнө караштуу Мамлекеттик каттоо кызматынын Кыргыз Республикасынын Президентин, Кыргыз Республикасынын Жогорку Кеңешинин депутаттарын шайлоону жана Кыргыз Республикасынын референдумун даярдоо жана өткөрүү мезгилинде өз ара аракеттенүүсүнүн тартиби жөнүндө ушул Жобо (мындан ары - Жобо) "Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө" Кыргыз Республикасынын конституциялык Мыйзамынын 15-беренесинин 7-бөлүгүн аткаруу үчүн, "Кыргыз Республикасынын референдуму жөнүндө" Кыргыз Республикасынын конституциялык Мыйзамынын 22-беренесинин 2-бөлүгүнүн, 33-беренесинин 2-бөлүгүнө ылайык иштелип чыкты.

Ушул Жобо Кыргыз Республикасынын Шайлоо жана референдум өткөрүү боюнча борбордук комиссиясынын (мындан ары - БШК) жана Кыргыз Республикасынын Өкмөтүнө караштуу Мамлекеттик каттоо кызматынын (мындан ары - МКК) шайлоочулардын, референдумдун катышуучуларынын тизмесин түзүү, өткөрүп берүү, шайлоочулардын, референдумга катышуучулардын тизмеси менен тааныштыруу, шайлоочулардын, референдумга катышуучулардын тизмесинде алардын жоктугу жөнүндө арыздарын кароо, андагы катачылыктар же так эместиктер, добуш берүү күнүндө шайлоочуларды, референдумдун катышуучуларын идентификациялоо, ошондой эле Кыргыз Республикасынын Президентин, Кыргыз Республикасынын Жогорку Кеңешинин депутаттарын шайлоону жана Кыргыз Республикасынын референдумун өткөрүүдө оперативдүү чечүүнү талап кылган башка маселелер боюнча өз ара аракеттенүү тартибин аныктайт.

1.2. Ушул Жобонун максаты Кыргыз Республикасынын жарандарынын жалпы тең жана түздөн түз эркин билдирүү принциптерин камсыз кылуу жана жүзөгө ашыруу, алардын шайлоо укугунун жана эркиндигинин кепилдиктери жана адилет, ачык шайлоону жүзөгө ашыруу болуп саналат.

1.3. Шайлоо жана референдум айкалышкан учурда, ушул Жободо көрсөтүлгөн шайлоо аракеттердин мөөнөттөрү "Кыргыз Республикасынын референдуму жөнүндө" Кыргыз Республикасынын конституциялык Мыйзамдын негизинде КР БШК тарабынан кабыл алынган чечимдерине ылайык кыскартылышы мүмкүн.

2. Шайлоочулардын, референдумдун катышуучуларынын тизмесин түзүү жана өткөрүп берүү боюнча өз ара аракеттенүүнүн тартиби

2.1. Шайлоочулардын, референдумга катышуучулардын укугун жүзөгө ашыруу, шайлоочуларды, референдумга катышуучуларды өзү жөнүндө маалыматтар менен тааныштыруу, ошондой эле добуш берүүнү өткөрүү максатында МКК ар бир шайлоо, референдум участогу боюнча шайлоочулардын, референдумга катышуучулардын тизмесин түзөт.

БШК добуш берүү күнүнө чейин 50 календарлык күндөн кечиктирбей шайлоо участокторунун, референдум участокторунун чектерин бекитет жана шайлоо участогунун, референдум участогунун номерин жана аталышын көрсөтүү менен МККга өткөрүп берет.

МКК БШКга добуш берүү күнүнө 50 календарлык күндөн кечиктирбей МККнын шайлоочулардын, референдумга катышуучулардын арыздарын иштеп чыгуу боюнча аймактык жооптуу органдарынын жана жарандардын (дареги, телефону жана иш тартиби) биометрикалык маалыматтарын чогултуу пункттарынын байланыш даректери туурасындагы маалыматтарды берет.

2.2. Шайлоочулардын, референдумга катышуучулардын тизмесине добуш берүү күнүнө карата активдүү шайлоо укугуна ээ, Кыргыз Республикасынын мыйзамдары менен белгиленген тартипте биометрикалык каттоодон өткөн Кыргыз Республикасынын жарандары киргизилет.

2.3. Шайлоочулардын, референдумга катышуучулардын тизмесин түзүү МКК тарабынан Кыргыз Республикасынын Калктын бирдиктүү мамлекеттик реестринин базасында шайлоочулардын тизмесин башкаруу системасын пайдалануу менен шайлоочулар жөнүндө маалыматтардын негизинде БШК тарабынан аныкталган шайлоо участокторунун, референдум участокторунун чектерин эске алуу менен жүргүзүлөт.

2.4. Кыргыз Республикасынын аймагынан тыш жашаган жана жүргөн, консулдук эсепке алууга турган жана биометрикалык каттоодон өткөн шайлоочулар, референдумдун катышуучулары жөнүндө маалыматтар Кыргыз Республикасынын чет элдеги тиешелүү дипломатиялык өкүлчүлүктөрүнүн жана консулдук мекемелеринин жетекчилери тарабынан түзүлөт жана Кыргыз Республикасынын тышкы иштер маселелери менен алектенген мамлекеттик органы аркылуу добуш берүү күнүнө 50 календарлык күндөн кечиктирбестен Форма 3 үлгүсүндөгү арызды (ушул Жобого 3.1-тиркеме), Форма 2 үлгүсүндөгү (ушул Жобого 3.2-тиркеме) арызды жана шайлоочулардын, референдумдун катышуучуларынын личностун тастыктаган документтердин көчүрмөсүн тиркөө менен МККга берилет.

2.5. Добуш берүү күнү аскер кызматын өтөөчү жерде, дарылоочу-профилактикалык мекемелеринде, кылмыш жасоого шектелип жана айыпталуучу катары камакта кармоо жайларында турган шайлоочулардын, референдумга катышуучулардын тизмеси аталган мекемелердин жетекчилери тарабынан түзүлөт жана добуш берүү күнүнө чейин 12 календарлык күндөн кечиктирбестен Форма 3, Форма 2 үлгүсүндөгү арызды жана шайлоочулардын, референдумдун катышуучуларынын личностун тастыктаган документтердин көчүрмөсүн тиркөө менен МККга берилет.

2.6. МККга келип түшкөн шайлоочулар, референдумдун катышуучулары жөнүндө ушул Жобонун 2.4 жана 2.5 пунктунда көрсөтүлгөн маалыматтар шайлоочулардын, референдумга катышуучулардын тизмесин башкаруу системасында иштелип чыккандан кийин тиешелүү УШК боюнча шайлоочулардын, референдумга катышуучулардын тизмесине киргизилет.

2.7. Кыргыз Республикасынын Президентин шайлоодо шайлоочулардын таанышуусу жана тактоосу үчүн тизме МКК тарабынан ар бир участок боюнча алфавиттик тартипте түзүлөт жана БШК тарабынан бекитилген (ушул Жобого 1.1-тиркемеси) формага ылайык добуш берүү күнүнө 50 календарлык күн калганда электрондук түрдө БШКга өткөрүп берилет.

Кыргыз Республикасынын Жогорку Кеңешинин депутаттарын шайлоодо шайлоочулардын таанышуусу жана тактоосу үчүн тизме МКК тарабынан ар бир участок боюнча алфавиттик тартипте түзүлөт жана БШК тарабынан бекитилген (ушул Жобого 1.2-тиркемеси) формага ылайык добуш берүү күнүнө 50 календарлык күн калганда электрондук түрдө БШКга өткөрүп берилет.

БШК шайлоочулардын, референдумга катышуучулардын тизмесин басып чыгарат жана добуш берүү күнүнө 50 календарлык күн калганда шайлоочулар, референдумга катышуучулардын таанышуусу үчүн тиешелүү УШКга жөнөтөт.

2.8. УШКга берилген шайлоочулардын, референдумга катышуучулардын тизмелери БШКнын, МККнын расмий сайттарына шайлоочунун, референдумга катышуучунун фамилиясын, аты жөнүн (мындан ары - Ф.А.Ж.), шайлоо участогунун, референдум участогунун номерин жана аталышын көрсөтүү менен жайгаштырылат.

2.9. БШКнын МККнын расмий сайттарына жайгаштырылган шайлоочулардын, референдумга катышуучулардын тизмеси келип түшүүсүнө жана маалыматтардын иштелип чыгуусуна жараша жаңыланып турат.

3. Шайлоочулардын, референдумга катышуучулардын тизмеси менен тааныштыруунун, шайлоочулардын, референдумга катышуучулардын тизмесинде алардын жоктугу жөнүндө арыздарын кароонун тартиби, андагы катачылыктар же так эместиктер

3.1. УШК шайлоочулардын, референдумга катышуучулардын тизмесин добуш берүү күнүнө 45 календарлык күн калганда тиешелүү шайлоо участогунда, референдум участогунда жашаган шайлоочуларга, референдумдун катышуучуларына тааныштыруу үчүн илет.

3.2. УШК добуш берүү күнүнө чейин 40 календарлык күндөн кечиктирбестен шайлоочуга, референдумдун катышуучусуна анын шайлоочулардын, референдумдун катышуучуларынын тизмесинде бар экендиги жөнүндө маалымдама жиберет.

3.3. Шайлоочу, референдумдун катышуучусу тиешелүү шайлоо участогунун, референдум участогунун тизмесинде жок болуп чыккан (ID-картадагы каттоосуна ылайык) жана анын башка участоктогу шайлоочулардын, референдумга катышуучулардын тизмесинде барлыгы аныкталган учурда ар бир шайлоочу, референдумдун катышуучусу добуш берүү күнүнө 15 календарлык күн калганда тиешелүү УШКга ID-картанын көчүрмөсүн тиркөө менен 3 Формадагы (ушул Жобого 3-тиркеме) үлгү боюнча арыз менен кайрылууга укуктуу. Мындай учурда УШКнын мүчөсү МККнын телефондук тейлөө Борборуна 119 номерине (чалуу бардык уюлдук жана стационардык байланыш операторлору үчүн акысыз) чалып, шайлоочуга, референдумдун катышуучусуна шайлоочулардын, референдумга катышуучулардын тизмесинде анын бар экенин тактайт.

Шайлоочу, референдумга катышуучу жалпы тизмеде жок болуп чыккан учурда УШКнын мүчөсү шайлоочулардын, референдумга катышуучулардын тизмесине кирүү үчүн шайлоочуга, референдумдун катышуучусуна биометрикалык каттоодон өтүү керектигин маалымдайт жана биометрикалык маалыматтарды чогултуу боюнча жакынкы пункттун дарегин кабарлайт.

Биометрикалык каттоодон өткөндөн кийин МКК шайлоочуну, референдумга катышуучуну Кыргыз Республикасынын жаранынын паспортунда (ID-карта) көрсөтүлгөн маалыматтарга ылайык шайлоо участогундагы, референдум участогундагы шайлоочулардын, референдумга катышуучулардын тизмесине киргизет.

3.4. Шайлоочу, референдумга катышуучу тиешелүү шайлоо участогунун, референдум участогунун тизмесинде жок болуп чыккан (ID-картадагы каттоосуна ылайык) жана анын башка участоктогу шайлоочулардын, референдумга катышуучулардын тизмесинде барлыгы аныкталган учурда ар бир шайлоочу, ар бир референдумга катышуучу добуш берүү күнүнө 15 календарлык күн калганда тиешелүү УШКга ID-картанын же Кыргыз Республикасынын жаранынын жалпы жарандык паспортунун көчүрмөсүн тиркөө менен 3 Формадагы (ушул Жобого 3-тиркеме) үлгү боюнча арыз менен кайрылууга укуктуу.

3.5. Шайлоочулардын, референдумга катышуучулардын тизмесиндеги ар кандай катаны же маалыматтардын так эместигин байкаган учурда шайлоочу, референдумга катышуучу добуш берүү күнүнө 15 календарлык күн калганда тиешелүү УШКга ID-картанын же Кыргыз Республикасынын жаранынын жалпы жарандык паспортунун көчүрмөсүн тиркөө менен 3 Формадагы (ушул Жобонун 3-тиркемеси) үлгү боюнча арыз менен кайрылууга укуктуу.

Паспорттун көчүрмөсү УШКнын мөөрү менен күбөлөндүрүлөт.

3.6. Шайлоочу, референдумга катышуучу шайлоочулардын, референдумга катышуучулардын тизмеси менен таанышкан учурдан тартып добуш берүү күнүнө чейин 15 календарлык күндөн кечиктирбестен, тиешелүү УШКга каалаган шайлоо дареги боюнча добуш берүүгө ниети бар экендиги жөнүндө УШКнын мөөрү менен күбөлөндүрүлгөн Кыргыз Республикасынын жаранынын паспортунун (ID-карта) же Кыргыз Республикасынын жаранынын  жалпы жарандык паспортунун көчүрмөсүн тиркөө менен 2 Формадагы үлгү боюнча арыз берүү жолу менен билдирүүгө укуктуу.

Арыз шайлоочу, референдумга катышуучунун жеке өзү тарабынан берилет.

Аталган арыз УШК тарабынан кабыл алынат жана шайлоочунун, референдумга катышуучунун шайлоочулардын, референдумга катышуучулардын тизмесинде бар экендиги тастыкталгандан кийин БШКнын системдик администраторуна, шайлоочулардын, референдумга катышуучулардын тизмесин башкаруу системасында иштеп чыгуу үчүн аймактык шайлоо комиссиясына (мындан ары - АШК) берилет.

3.7. УШК шайлоочулардан, референдумга катышуучулардан келип түшкөн арыздарды атайын журналга (ушул Жобого 2-тиркеме) каттайт жана аларды АШКга, БШКнын системдик администраторуна (мындан ары - системдик администратор) өткөрүп берет.

3.8. Шайлоочулардын, референдумга катышуучулардын арыздарын кабыл алууда жана иштеп чыгууда арыздарда УШКнын мүчөсүнүн, системдик администратордун жана МККнын аймактык органынын кызматкеринин фамилиялары көрсөтүлөт.

3.9. Системдик администратор шайлоочулардан, референдумга катышуучулардан келип түшкөн арыздарды атайын журналга бекитилген формага ылайык (ушул Жобого 4-тиркеме) каттайт жана арыздарды МККнын аймактык органынын кызматкерине өткөрүп берет.

Арыздарды шайлоочулардын, референдумга катышуучулардын тизмесин башкаруу системасында иштеп чыгуу МККнын аймактык органынын кызматкери тарабынан жүзөгө ашырылат.

3.10. МККнын АШКга келип түшкөн арыздарды иштеп чыгууга жоопкер өкүлдөрүнүн тизмеси МККда бекитилет жана добуш берүү күнүнө 45 календарлык күн калгандан кечиктирилбей БШКга берилет.

3.11. МККнын аймактык органынын ыйгарым укуктуу кызматкери Форма 3 жана Форма 2 үлгүсүндөгү арыздарды шайлоочулардын тизмесин башкаруу системасында иштеп чыгат.

Шайлоочу, референдумдун катышуучусу тарабынан Форма 2 үлгүсүндө арыз берилгенде МККнын аймактык органынын ыйгарым укуктуу кызматкери шайлоочуну аталган Форма 2де көрсөтүлгөн шайлоо участогуна же эгерде аталган райондогу шайлоо участогундагы, референдум участогундагы шайлоочулардын, референдумга катышуучулардын саны бир шайлоо участогу, референдум участогу боюнча Кыргыз Республикасынын мыйзамдарында белгиленгенден ашса кошумча түзүлгөн шайлоо участогуна, референдум участогуна которот.

Арыздарды иштеп чыгууда системдик администратор МККнын аймактык органынын ыйгарым укуктуу кызматкерине УШКнын чектерин тактоого кол кабыш кылат.

3.12. Арызга жооп МККнын аймактык органынын кызматкери тарабынан шайлоочулардын, референдумга катышуучулардын тизмесиндеги катачылык же так эместик оңдолгондон кийин 2 календарлык күндөн кечиктирилбей берилет, же УШКнын мүчөсү жана МККнын аймактык кызматкери шайлоочуга, референдумдун катышуучусуна арыздын аткарылышы боюнча маалымат БШКнын жана МККнын расмий сайттарында же МККнын телефондук тейлөө Борборунда 119 номерине (чалуу бардык уюлдук жана стационардык байланыш операторлору үчүн акысыз) жеткиликтүү экенин шайлоочулардын, референдумга катышуучулардын тизмесиндеги катачылык же так эместик оңдолгондон кийин 2 календарлык күндөн кечиктирбей маалымдайт.

3.13. Маалыматтын шайлоочулардын тизмесин башкаруу системасына киргизүүнүн туура экендиги боюнча жоопкерчилик МККнын аймактык кызматкерине, УШКнын чектеринин туура аныкталгандыгы боюнча жоопкерчилик - системдик администраторго жүктөлөт.

3.14. БШКнын атайын өкүлү шайлоочулардын арыздарын иштеп чыгуу боюнча УШКнын жана МККнын аймактык органынын өз ара аракеттенүүсүн координациялайт.

3.15. Шайлоочулардын Форма 2 жана Форма 3 боюнча арызын кабыл алуу добуш берүү күнүнө 15 календарлык күн калганда токтотулат.

3.16. Жарандардан Форма 2 жана Форма 3 боюнча келип түшкөн арыздар жана ушул Жобонун 2.4 жана 2.5 пунктунда көрсөтүлгөн шайлоочулар жөнүндө маалыматтар иштелип чыккандан кийин:

- Кыргыз Республикасынын Президентин шайлоодо МКК шайлоочулардын акыркы тизмесин ар бир участок боюнча алфавиттик тартипте, алардын чектерине жана БШК тарабынан бекитилген формага (ушул Жобого 5.1-тиркеме) ылайык түзөт.

- Кыргыз Республикасынын Жогорку Кеңешинин депутаттарын шайлоодо МКК шайлоочулардын акыркы тизмесин ар бир участок боюнча алфавиттик тартипте, алардын чектерине жана БШК тарабынан бекитилген формага (ушул Жобого 5.2-тиркеме) ылайык түзөт.

- Кыргыз Республикасынын референдумунда МКК референдумга катышуучулардын акыркы тизмесин ар бир референдум участогу боюнча алфавиттик тартипте, алардын чектерине жана БШК тарабынан бекитилген формага (ушул Жобого 5.3-тиркеме) ылайык түзөт.

3.17. Шайлоочулардын, референдумга катышуучулардын акыркы тизмеси МКК тарабынан түзүлөт жана добуш берүү күнүнө 10 календарлык күндөн кечиктирбей БШКга электрондук түрдө берилет.

3.18. БШК шайлоочулардын, референдумга катышуучулардын тизмесин басып чыгарат жана номерленген, тигилген жана күбөлөндүрүлгөн шайлоочулардын, референдумга катышуучулардын тизмесин добуш берүү күнүнө чейин 3 календарлык күндөн кечиктирбей тиешелүү УШКга өткөрүп берет.

3.19. Добуш берүүгө катышууга шайлоочулардын, референдумга катышуучулардын тизмесине киргизилген шайлоочулар, референдумга катышуучулар гана укуктуу.

4. Шайлоочуларды, референдумдун катышуучуларын идентификациялоонун тартиби

4.1. Аймагында тиешелүү УШК турган жергиликтүү өз алдынча башкаруу органдары МККга МККнын базалык квалификациялык талаптарына ылайык идентификация жүргүзүү боюнча МККнын операторунун жана "УШКнын маалымдамасы" автоматтык маалымдоо системасынын операторунун (мындан ары - "УШКнын маалымдамасы" АИС оператору) милдетин аткарууга талапкерлерди тандоо боюнча кол кабыш кылат.

4.2. Жарандарды идентификациялоо процессин олуттуу кечиктирүүлөрсүз жүзөгө ашыруу максатында операторлордун саны шайлоо участогундагы шайлоочулардын, референдумга катышуучулардын санына карата аныкталат.

4.3. МКК БШК менен бирге:

- идентификация жүргүзүү боюнча МККнын операторлорун, "УШКнын маалымдамасы" операторлорун жана УШКнын мүчөлөрүн окутуп үйрөтүүнүн графигин иштеп чыгат;

- МККнын операторлорун, "УШКнын маалымдамасы" операторлорун жана УШКнын мүчөлөрүн добуш берүү күнү бирге иштөө үчүн окутуп үйрөтүүнү жүргүзөт.

4.4. Шайлоого 3 календарлык күн калганда МКК шайлоо участогуна, референдум участогуна жабдуулардын комплектисин, чыгымдоочу материалдарды жеткирет жана коопсуздук талаптарын жана жабдуулардын сакталышын камсыздоо үчүн жергиликтүү өз алдынча башкаруу органдарына өткөрүп берет.

4.5. Добуш берүүгө 1 күн калганда МККнын операторлору шайлоо участокторундагы жабдууларды кошот, жабдуулардын жана жарандарды идентификациялоону жүргүзүү системасынын даярдыгын текшерүүнүн толук циклин жүргүзөт.

4.6. Добуш берүү күнү шайлоочуларды, референдумдун катышуучуларын идентификациялоо системасын ишке киргизүү үчүн МККнын оператору киргизген логинди жана паролду авторизациялоо процесси жүргүзүлөт.

4.7. Паролдор ар бир УШК үчүн борбордук деңгээлде түзүлөт жана шайлоо участокторуна референдум участокторуна алдын ала атайын чапталган конверттерде жеткирилип берилет.

Пароль туура эмес киргизилген учурда система аны кайталап киргизүүнү талап кылат. Пароль 5 (беш) жолудан ашык туура эмес киргизилген учурда система автоматтык түрдө 5 (беш) мүнөткө жабылып калат. Бул убакыт пайдалануучуга паролду текшерүү жана тактоо үчүн керек.

4.8. Системада ийгиликтүү авторизация болгондо МККнын оператору тарабынан сервердеги дата жана убакыт орнотулат. Параметрлер орнотулгандан кийин МККнын оператору жарандарды идентификациялоо системасын ишке киргизет жана баштапкы отчетту басып чыгарат (ушул Жобого 6-тиркеме).

Баштапкы отчеттун бир нускасын МККнын оператору УШКнын төрагасына берүүгө милдеттүү. Баштапкы отчеттун экинчи нускасын МККнын оператору добуш берүү аяктаганга чейин сактоого милдеттүү.

МККнын оператору байкоочулардын суроо талабы боюнча баштапкы отчеттун кошумча нускаларын басып чыгарып бергенге укуктуу.

4.9. Шайлоочуларды, референдумдун катышуучуларын добуш берүүчү жайдан тышкары идентификациялоо МККнын оператору добуш берүүгө 2 күн калганда чүчүкулак кармашуу жолу менен аныкталган УШКнын мүчөсү менен бирге добуш берүүгө бир күн калганда идентификациялоону добуш берүүчү жайдан тышкары жүргүзүүнүн ушул Жободо белгиленген тартибинде жүзөгө ашырылат.

4.10. Добуш берүү күнү добуш берүүнүн процедурасы башталганга чейин чүчүкулак кармашуу жолу менен УШКнын мүчөсү аныкталат, ал МККнын оператору менен бирге шайлоочуну, референдумга катышуучуну анын жеке жана биометрикалык маалыматтары боюнча идентификациялайт.

4.11. Шайлоочуларды, референдумдун катышуучуларын добуш берүүчү жайда идентификациялоо МККнын оператору менен УШКнын мүчөсү тарабынан бирге жүзөгө ашырылат жана алардын аты жөнү идентификациялоо системасын ишке киргизүүдө системага киргизилет.

4.12. МККнын оператору жана УШКнын мүчөсү идентификациялоонун процедурасын жарандарга бирге түшүндүрөт.

4.13. МККнын оператору жаран тарабынан ID-карта көрсөтүлгөндө милдеттүү түрдө шайлоочуну ID-картадагы сүрөтү менен карап салыштырат.

Ал дал келген учурда МККнын оператору ID-картанын машина (MRZ) менен санала турган аймагын сканерлейт, андан кийин шайлоочуну, референдумдун катышуучусун шайлоо участогундагы, референдум участогундагы электрондук тизмеден автоматтык түрдө издөө кое берилет.

4.14. Шайлоочуну, референдумдун катышуучусун ID-карта боюнча идентификациялоо ийгиликтүү өткөндөн учурда шайлоочуну, референдумдун катышуучусун биометрикалык маалыматтар боюнча - колунун манжаларынын изи боюнча идентификациялоо жүргүзүлөт.

Манжаларды сканерлөөгө аракеттин саны - 5.

4.15. Идентификациялоо ийгиликтүү өткөн учурда ноутбуктун мониторуна жана көрүү мониторуна идентификациялоодон өткөн шайлоочунун, референдумга катышуучунун сүрөтү, Ф.А.Ж., аталган шайлоо участогундагы, референдум участогундагы шайлоочулардын, референдумдун катышуучуларынын тизмесине кирген шайлоочулардын, референдумга катышуучулардын жалпы саны жана аталган шайлоо участогунда, референдум участогунда идентификациялоодон өткөн шайлоочулардын, референдумга катышуучулардын саны чыгат, ошондой эле шайлоочуга, референдумдун катышуучусуна автоматтык түрдө чек басып чыгарылат.

Чекте: чектин катар номери, УШКнын номери, шайлоочуну, референдумга катышуучуну идентификациялоонун датасы жана убактысы, шайлоочунун, референдумга катышуучунун персоналдык идентификациялык номери (мындан ары - ПИН), шайлоочунун, референдумга катышуучунун Ф.А.Ж., шайлоочулардын, референдумга катышуучулардын тизмесиндеги шайлоочунун, референдумга катышуучунун катар номери көрсөтүлөт.

4.16. Идентификациялоо процесси аяктагандан кийин МККнын оператору шайлоочуга, референдумга катышуучуга ID-картаны кайтарып берет жана добуш берүү үчүн керек болгон бюллетенди алуу үчүн чек берет.

4.17. Идентификациялоодон өтпөгөн шайлоочуларга, референдумга катышуучуларга чек басылбайт жана добуш берүү үчүн бюллетень берилбейт, мында МККнын операторунун ноутбугунун мониторуна жана көрүү мониторуна тиешелүү маалымдоо чыгарылат.

4.18. Идентификациялоодон мурда өткөн шайлоочуну, референдумга катышуучуну кайрадан идентификациялоодо МККнын операторунун ноутбугунун мониторуна жана көрүү мониторуна аталган шайлоочунун, референдумга катышуучунун идентификациялоодон өткөндүгүнүн датасы жана убактысы көрсөтүлгөн маалымдоо чыгат, чек басып чыгарылбайт, шайлоочу, референдумга катышуучу кайрадан добуш берүүгө киргизилбейт.

4.19. Системанын жана/же жабдуунун ишинде үзгүлтүк болгондо МККнын оператору үзгүлтүктүн датасын, убактысын, мүнөзүн белгиленген үлгүдөгү актта көрсөтөт (ушул Жобого 7-тиркеме).

Шайлоо участогундагы, референдум участогундагы добуш берүү процедурасынын аягында МККнын оператору УШКнын мүчөсү менен бирге системанын жана/же жабдуунун ишиндеги үзгүлтүктөр жөнүндө актка кол коет.

4.20. Шайлоочуларды, референдумга катышуучуларды идентификациялоону жүзөгө ашырган МККнын оператору жана УШКнын мүчөсү жаран ID-картасын көрсөтпөгөн учурда идентификациялоо процедурасынан баш тартууга милдеттүү.

4.21. Добуш берүү күнүндө биометрикалык каттоодон өткөн шайлоочу, референдумдун катышуучусу аталган шайлоо участогу, референдум участогу боюнча шайлоочулардын, референдумга катышуучулардын тизмесине кирбей калган учурда аталган шайлоочу, референдумга катышуучу же УШКнын мүчөлөрү МККнын телефондук тейлөө Борборуна аталган шайлоочу, референдумга катышуучу боюнча түшүнүк алуу үчүн 119 номери боюнча кайрылууга укуктуу (чалуу бардык уюлдук жана стационардык байланыш операторлору үчүн акысыз).

4.22. Шайлоо участоктору, референдум участоктору ошондой эле добуш берүү күнү шайлоочулар, референдумга катышуучулар жөнүндө маалыматтарды тактоо үчүн "УШКнын  маалымдамасы" автоматтык маалымдоо системасы (мындан ары - "УШКнын маалымдамасы" АИС) орнотулган компьютерлер менен жабдылат.

"УШКнын маалымдамасы" АИС аталган УШК боюнча шайлоочулардын, референдумга катышуучулардын тизмесине кирбей калган шайлоочуларга, референдумдун катышуучуларына кол кабыш кылууга дайындалган."УШКнын маалымдамасы" АИСке шайлоочу, референдумдун катышуучусу боюнча сурап билүү шайлоочунун, референдумга катышуучунун ID-картасында көрсөтүлгөн ПИНдин негизинде жүзөгө ашырылат. Жооп шайлоочу, референдумга катышуучу тизмесине киргизилген шайлоо участогунун, референдум участогунун адресин, номерин көрсөткөн маалымат түрүндө түзүлөт.

"УШКнын маалымдамасы" АИСтин ишине жоопкер болуп кирүүгө тиешелүү формасы бар атайын даярдалган оператор саналат.

"УШКнын маалымдамасы" АИСке кирүү жекече логин жана пароль боюнча жүзөгө ашырылат.

4.23. Шайлоочуларды, референдумга катышуучуларды идентификациялоо системасы добуш берүү күнү 21.00 саатта автоматтык түрдө жаап коюлууга тийиш. 21.00 сааттан кийин шайлоочуларды, референдумга катышуучуларды идентификациялоого мүмкүн эмес.

Добуш берүү күнү шайлоочуларды, референдумга катышуучуларды добуш берүүчү жайдан тышкары идентификациялоо системасы ушул күнү 23 саат 59 минутада жаап коюлууга тийиш.

4.24. МККнын оператору УШКнын төрагасына отчет берет. Шайлоо участогунда, референдум участогунда добуш берүү аяктагандан кийин УШКнын төрагасы МККнын операторунан кол коюлган баштапкы жана жыйынтыктоочу отчетторду, техникалык мүчүлүштүктөр жөнүндө актыны талап кылууга милдеттүү.

Шайлоо участогунда, референдум участогунда добуш берүү аяктагандан кийин МККнын оператору шайлоочуларды, референдумга катышуучуларды идентификациялоону жүзөгө ашырган УШКнын мүчөсү менен бирге УШКнын төрагасына тиешелүү шайлоо участогу, референдум участогу боюнча идентификациялоо жүргүзүлгөндүгү жөнүндө баштапкы жана жыйынтыктоочу отчетту токтоосуз берет (ушул Жобого 6-тиркеме).

4.25. Добуш берүү күнү идентификациялоо боюнча МККнын операторунун иш-аракетине жана аракетсиздигине даттануу даттануучуга анын шайлоо укугу бузулгандыгы маалым болгон учурдан тартып токтоосуз түрдө тиешелүү УШКга берилет. Тиешелүү УШК келип түшкөн даттанууну токтоосуз карайт жана тиешелүү чечим кабыл алат, бул туурасында акт түзөт.

Шайлоочулардын, референдумга катышуучулардын тизмесинде шайлоочунун, референдумга катышуучунун жок экени жөнүндө даттануу келип түшкөн учурда УШК токтоосуз акт түзөт, андан кийин 3 календарлык күн ичинде даттанууну жана УШКнын тиешелүү актысын кароо жана чечим кабыл алуу үчүн АШКга жиберет.

Шайлоочулардын, референдумга катышуучулардын тизмесин иштеп чыгуу боюнча МККнын операторлорунун иш-аракеттерине же аракетсиздигине даттануулар шайлоочуга, референдумга катышуучуга анын шайлоо укуктары бузулганы маалым болгон учурдан тартып 3 (үч) календарлык күн ичинде тиешелүү АШКга берилет. Тиешелүү АШК 3 (үч) календарлык күн ичинде келип түшкөн даттанууну карайт жана жүйөлөштүрүлгөн чечим кабыл алат. Даттанууну кароонун жыйынтыгы боюнча АШК Кыргыз Республикасынын мыйзамдарына ылайык шайлоочулардын, референдумга катышуучулардын тизмесин иштеп чыгуу боюнча МККнын операторунун иш-аракетине юридикалык баа берүү үчүн укук коргоо органдарына кайрылууга укуктуу.

4.25. Шайлоо процессинин катышуучуларынын шайлоо укуктарын бузган УШКнын, алардын кызмат адамдарынын чечимдери жана/же иш-аракеттери/аракетсиздиги АШКга даттанылат.

4.26. Шайлоо процессинин катышуучуларынын шайлоо укуктарын бузган АШКнын, алардын кызмат адамдарынын чечимдери жана/же иш-аракеттери/аракетсиздиги Борбордук шайлоо комиссиясына даттанылат.

4.27. Борбордук шайлоо комиссиясынын чечимдери жана/же иш-аракеттери/аракетсиздиги биринчи инстанциядагы сотко даттанылат, биринчи инстанциядагы соттун чечими Кыргыз Республикасынын Жогорку сотуна даттанылат. Жогорку соттун чечими акыркы болуп эсептелет жана даттанууга жатпайт.

1.1-тиркеме

КЫРГЫЗ РЕСПУБЛИКАСЫНЫН ПРЕЗИДЕНТИН ШАЙЛООГО КАТЫШУУ ҮЧҮН ШАЙЛООЧУЛАРДЫН ТИЗМЕСИ 20__-жылдын "__" _________________

____________________________________________________________________________

аймактык шайлоо комиссиясы

__________________________________________________________ № шайлоо участогу

(добуш берүүчү участоктун номери жана турган жери)

1-барактын номери

2-барактын номери

Шайлоочулардын ушул тизмесинде N+1 барак бар.

1.2-тиркеме

КЫРГЫЗ РЕСПУБЛИКАСЫНЫН ЖОГОРКУ КЕҢЕШИНИН ДЕПУТАТТАРЫН ШАЙЛООГО КАТЫШУУ ҮЧҮН ШАЙЛООЧУЛАРДЫН ТИЗМЕСИ 20__-жылдын "__" _______________

________________________________________________________________________________

аймактык шайлоо комиссиясы

_____________________________________________________________ № шайлоо участогу

(добуш берүүчү участоктун номери жана турган жери)

1-барактын номери

2-барактын номери

Шайлоочулардын ушул тизмесинде N+1 барак бар.

1.3-тиркеме

КЫРГЫЗ РЕСПУБЛИКАСЫНЫН РЕФЕРЕНДУМУНА КАТЫШУУ ҮЧҮН РЕФЕРЕНДУМГА КАТЫШУУЧУЛАРДЫН ТИЗМЕСИ 20__-жылдын "__" _________________

_______________________________________________________________________________

аймактык шайлоо комиссиясы

_______________________________________________________ № референдум участогу

(добуш берүүчү участоктун номери жана турган жери)

1-барактын номери

2-барактын номери

Референдумга катышуучулардын ушул тизмесинде N+1 барак бар.

2-тиркеме

Шайлоочулардан, референдумдун катышуучуларынан, участкалык шайлоо комиссиясына Форма 3 боюнча келип түшкөн арыздардын РЕЕСТРИ

3.1-тиркеме

ФОРМА № 3

№ ___________________ участкалык шайлоо комиссиясы

ЖЕКЕ МААЛЫМАТТАРГА ӨЗГӨРТҮҮ КИРГИЗҮҮ ЖӨНҮНДӨ АРЫЗ

Мен, ___________________________________________________________________________________

(фамилиясы, аты, жөнү)

Менин жеке маалыматтарымдагы так эместиктерге байланыштуу шайлоочулардын тизмесине өзгөртүүлөрдү киргизүүнү өтүнөм:

АРЫЗДА КӨРСӨТҮЛГӨН МЕНИН МААЛЫМАТТАРЫМДЫ АВТОМАТТЫК ИШТЕП ЧЫГУУГА, ӨТКӨРҮП БЕРҮҮГӨ ЖАНА САКТООГО МАКУЛМУН.