ТАШ-КӨМҮР ШААРДЫК КЕҢЕШИ

ТОКТОМ

XXIX чакырылышы Кезектеги XXI сессиясы

2020-жылдын 30-июну № 8

Таш-Көмүр шаарынын жергиликтүү бюджетинин 2020-жылга түзүлүшү жана 2021-2022-жылдарга болжолу жөнүндө

Таш-Көмүр шаарынын жергиликтүү бюджетинин 2020-жылга түзүлүшү жана 2021-2022-жылдарга болжолу жөнүндө» шаардык Кенештин алдындагы “Экономика жана бюджет” боюнча туруктуу комиссиянын төрагасы М.Кулдышевдин билдирүүсүн угуп жана талкуулап, Таш-Көмүр шаардык депутаттар Кенешинин XXIX чакырылышынын кезектеги 21-сессиясы

ТОКТОМ КЫЛАТ:

1. Таш-Көмүр шаарынын жергиликтүү бюджетинин 2020-жылга түзүлүшү жана 2021-2022-жылдарга болжолу жөнүндө» шаардык Кенештин алдындагы “Экономика жана бюджет” боюнча туруктуу комиссиянын төрагасы М.Кулдышевдин билдирүүсү эске алынсын.

2. Таш-Көмүр шаарынын 2020-жылга жергиликтүү бюджети кирешелер боюнча 90302,2 мин сом суммасында жана чыгашалар боюнча 90302,2 мин сом суммасында (14030,2 мин сом суммасында атайын каражаттарды кошкондо) бекитилсин.

3. Таш-Көмүр шаарынын 2021-2022-жылдарга жергиликтүү бюджетинин негизги көрсөткүчтөрүнүн болжолу жактырылсын:

- 2021-жылга киреше боюнча болжолу 110552,0 мин сом суммасында жана 2022-жылга киреше боюнча болжолу 115300,0 мин сом суммасында.

- Таш-Көмүр шаарынын 2021-2022-жылдарга жактырылган жергиликтүү бюджетинин болжолдуу көрсөткүчтөрү ар бир дайындуу мезгилде аларды кабыл алганда такталууга жатат.

4. Таш-Көмүр шаарынын 2020-жылга жергиликтүү бюджетинин киреше бөлүгү жана 2021-2022-жылдарга болжолу № 1 тиркемеге ылайык булактар боюнча түшүүлөр эсебинен түзүлсүн.

5. Таш-Көмүр шаарынын 2020-жылга жергиликтүү бюджетинен чыгашаны каржылоого каражат жана 2021-2022-жылдарга болжолу № 2 жана 2-1; 2-2 тиркемелерге ылайык белгиленсин.

6. Чыгашаларды каржылоо биринчи кезекте коргоого алынган беренелер боюнча (эмгек акы, Кыргыз Республикасынын Социалдык фондуна чегерүүлөр, тамак аш), ошондой эле коммуналдык чыгымдарды каржылоо боюнча жүргүзүлсүн.

6.1. Ушул токтомго ылайык өздүк чыгашалардын корголгон беренелерин каржылоону камсыз кылуу үчүн жоопкерчилик бюджеттик мекеме уюмдардын жетекчилерине жүктөлсүн.

7. Бюджеттик мекемелерге атайын каражаттарды казыналык системаны аттап өтүп пайдалануусуна тыюу салынсын. Көрсөтүлгөн тартип бузулган учурда атайын каражаттардын 100 пайызы жергиликтүү бюджеттин кирешесине алынсын.

8. Таш-Көмүр жергиликтүү өз алдынча башкаруу органы (Мэрия) укуктуу:

8.1. Эгерде бул жергиликтүү бюджеттин киреше бөлүгүн азайтууга алып келбесе, ушул Токтомдун 2-пунктунда бекитилген суммалардын чегинде ушул токтомдун тиркемесине өзгөртүүлөрдү киргизүүгө;

8.2.Тиешелүү органдар кабыл алган ченемдик актылардан келип чыгуучу Кыргыз Республикасынын Республикалык бюджети менен жергиликтүү бюджеттин өз ара эсептешүүлөрүнө тактоолор киргизилгенде жергиликтүү бюджеттин чыгашаларын каржылоодо түзүмдүк өзгөртүүлөрдү киргизүүгө;

8.3. Жергиликтүү кирешелердин болжолдонгондон ашыкча түшүүлөрдүн эсебинен жергиликтүү бюджеттин чыгаша бөлүгүн көбөйтүүнү карап чыгууга;

8.4. Зарыл учурларга жараша өзгөртүүлөр жана толуктоолор Таш-Көмүр шаардык депутаттар Кенешинин алдындагы «Экономика жана бюджет» боюнча туруктуу комиссиясы менен макулдашуу боюнча шаардык мэриянын буйругуна ылайык ушул токтом менен бекитилген «жергиликтүү бюджетке тиешелүү ондоолорду киргизүү жөнүндө» Таш-Көмүр шаардык депутаттар Кенешинин токтому кабыл алынганга чейин аткарылышы мүмкүн.

9. Сот органдарынын чечимдери боюнча жеке адамдарга аткаруу барагы боюнча төлөмдөр тиешелүү бюджеттик мекемелердин каражаттарынын эсебинен жүзөгө ашырылсын.

10. Шаардын жергиликтүү бюджетин камсыз кылуу кызыкчылыгын коргоо максатында биринчи кезекте салык жана салык эмес төлөмдөрдү белгиленген пландарынын ар бир түрү боюнча аткарууну камсыз кылуу жагы мамлекеттик салык кызматынын шаардык башкармалыгына милдеттендирилсин.

11. Кыргыз Республикасынын Бюджеттик кодексинин 24-беренесине ылайык, шаардын жергиликтүү бюджетинин 1 пайызы же болбосо 762,7 мин сом өлчөмүндө Мэриянын резервдик фонду болуп бөлүштүрүлүп бекитилсин.

12. Шаардын жергиликтүү бюджети боюнча жүгүртүүчү кассалык накталай акчасы 2020-жылдын 1-январына карата 100, 0 мин сом өлчөмүндө бекитилсин.

13. «Кыргыз Республикасынын жарандык коргонуу жөнүндөгү» мыйзамынын 10-беренесине ылайык, материалдык-техникалык, азык-түлүк, медициналык, жеке жана жамааттык коргонуу каражаттарынын запастарын түзүү жана даярдыктарды кармоо үчүн 150,0 мин сом өлчөмүндө каражат шаардык муниципалдык менчик департаментинин түрдүү чыгымдар статьясында кол тийгиз каражат катары бекитилсин. Бекитилген каражат өзгөчө кырдаал түзүлгөн мезгилде шаардын мэри тарабынан атайын буйрук чыгарылып чыгымдоого уруксат берилсин.

14. Кыргыз Республикасынын “Мамлекеттик жарандык кызмат жана муниципалдык кызмат жөнүндө” мыйзамынын 31-беренесин жетекчиликке алып, шаардык муниципалдык менчик департаментинде жана “Таш-КөмүрТазалык” муниципалдык ишканасында эмгектенген тейлөөчү кенже персоналдарга 2000 (эки мин) сом өлчөмүндө жана кароолчуларга 1000 (бир мин) сом өлчөмүндө ай сайын материалдык жардам берилип туруусу белгиленсин.

15. Жергиликтүү бюджеттен каржыланган мекемелердин штаттык бирдиктеринде кошумча үсток акылар Кыргыз Республикасынын Өкмөтүнүн “Кыргыз Республикасынын мамлекеттик жарандык кызматчыларынын жана муниципалдык кызматчыларынын ишин баалоо жана эмгек акы төлөө шарттары жөнүндө” токтомуна ылайык төлөп берүү жагы мекемелердин жетекчилерине милдеттендирилсин.

16. Кошумча финансы ресурстарын талап кылган чыгашалар кийинки жылдагы Таш-Көмүр шаарынын жергиликтүү бюджетинде каралсын.

17. 2020-жылга каралган жергиликтүү бюджеттин эсебинен төмөндөгү мекемелерге каражат бөлүштүрүлсүн:

17.1. Кыргыз Республикасынын “Жергиликтүү өз алдынча башкаруу жөнүндө” мыйзамына ылайык, Муниципалдык аймактык башкармалыктардын штаттык бирдиктеринин эмгек акылары жана соц.фондго чегерүүсү үчүн муниципалдык менчик департаменти аркылуу – 1345,0 мин сом;

17.2. Шаардык муниципалдык менчик департаментине бөлүнгөн каражаттардын кайсыл максаттарга жумшалышы жөнүндө титулдук баракча № 3 тиркемеге ылайык бекитилсин;

17.3. “Таш-КөмүрТазалык” муниципалдык ишканасына бөлүнгөн каражаттардын кайсыл максаттарга жумшалышы жөнүндө титулдук баракча № 4 тиркемеге ылайык бекитилсин;

17.4. Шаардын аймагында ВИЧ СПИД илдети менен төрөлгөндөрдүн 1 жашка чейинки сүт азыгына – 100,0 мин сом, калкка женилдиктер үчүн – 310,0 мин сом, жалпы – 410,0 мин сом шаардык социалдык өнүгү башкармалыгы аркылуу;

17.5. Шаардык билим берүү бөлүмүнө Кыргыз Республикасынын Өкмөтүнүн № 302 Токтомунун 4-пунктуна ылайык мектепке чейинки билим берүү уюмдарын эсептик тейлөө үчүн борборлоштурулган бухгалтерияга 1 (бир) штаттык кызмат киргизилип, эмгек акы жана соц.фондго чегерүүлөрү үчүн – 166,7 мин сом, «Керемет» бала бакчасынын түрткү берүүчү грантка түзүлгөн долбоордун өздүк салымына – 524,5 мин сом, “Келечек» бала бакчасынын түрткү берүүчү грантка түзүлгөн долбоордун өздүк салымына – 524,5 мин сом, № 4 Т.Сатылганов атындагы орто мектебинин терезе блокторун алмаштыруу үчүн түрткү берүүчү грантка түзүлгөн долбоордун өздүк салымына - 522,0 мин сом, №2 К.Осмонкулов атындагы орто мектебинин чатырын алмаштыруу үчүн түрткү берүүчү грантка түзүлгөн долбоордун өздүк салымына - 523,7 мин сом, №8 М.Фрунзе атындагы орто мектебинин жылытуу системасын жуудуруу үчүн – 334,2 мин сом, №7 К.Кузембаев атындагы орто мектебинин ашканасын ремонттоо үчүн – 506,2 мин сом, №1 Н.Островский атындагы орто мектебинин отказанын ремонттоо үчүн – 529,4 мин сом, №13 башталгыч мектептин жылытуу системасына отказан алуу үчүн – 30,0 мин сом, балдар чыгармачылык үйунүн ремонту үчүн – 267,4 мин сом шаардык билим берүү бөлүмү аркылуу;

17.6. Шамалды-Сай аймактык башкармалыгында Афган согушунун катышуучуларына арнап курулган монумент эстелигинин курулушуна – 500,0 мин сом, Шамалды-Сай шаарчасынын аймактык башкармалыгы аркылуу;

17.7. Шаардык маданият сарайынын имаратынын ремонт иштерине – 150,0 мин сом, Шамалды-Сай шаарчасындагы клубдун имаратынын ремонтуна – 92,0 мин сом, Кызыл-Жар шаарчасындагы клубдун имаратынын ремонтуна – 196,0 мин сом, “Тъндък” аймактык башкармалыгындагы клубдун имаратынын ремонтуна – 567,0 мин сом, жалпы – 1005,0 мин сом, шаардык маданият бөлүмү аркылуу;

18. 2020-жылдын башында калган калдык 8710,5 мин сом 00 тыйын түзгөндүгү белгиленсин жана ушул каражаттын эсебинен төмөндөгүлөргө бөлүштүрүлсүн:

· Кызыл-Алма аймактык башкармалыгынын жашоочуларын үзгүлтүксүз таза суу менен камсыз кылуу үчүн ЦНС-300/180 насосун жана 6000В электро кыймылдаткыч сатып алууга – 1350,0 мин сом “Таш-КөмүрТазалык” муниципалдык ишканасы аркылуу;

· Шаардык билим берүү бөлүмүнүн жылулукка болгон төлөмдөрү үчүн – 1007,6 мин сом шаардык билим берүү бөлүмү аркылуу;

· Кош-Терек айылына мамыларды орнотуу үчүн - 470,0 мин сом шаардык муниципалдык менчик департаменти аркылуу.

19. Бул токтом 2020-жылдын 1-январынан колдонууга киргизилсин.

20. Кыргыз Республикасынын Бюджеттик кодексинин 115-беренесинин 4-пунктуна ылайык, бюджет жөнүндө ченемдик укуктук актыга бюджеттик жылдын ичинде экиден ашык эмес өзгөртүүлор киргизилиши мүмкүн: биринчиси – учурдагы бюджеттик жылдын 1-июнуна чейин, экинчиси – 1-ноябрына чейин.

21. Бул токтом менен бекитилген жергиликтүү бюджетти аткаруу, Кыргыз Республикасынын Бюджеттик кодексине ылайык жергиликтүү өз алдынча башкаруу органдарынын аткаруучу органы шаардык Мэрияга, Кыргыз Республикасынын финансы министрлигинин шаардык башкармалыгына жана салык кызматына жүктөлсүн.

22. Токтомду мамлекеттик реестрге киргизүү жагы шаардык Кенештин аппаратына милдеттендирилсин.

23. Токтом жергиликтүү массалык маалымат каражаттарында жарыяланган күндөн тартып күчүнө кирсин.

24. Бул токтомдун аткарылышын көзөмөлгө алуу жагы шаардык Кенештин алдындагы «Экономика жана бюджет» боюнча туруктуу комиссиясына (М.Кулдышев) жүктөлсүн.