КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2019-жылдын 3-июну № 266

"Кыргыз Республикасынын Салык кодексине өзгөртүүлөрдү киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Өкмөтүнүн корутундусу тууралуу

"Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 31-беренесине ылайык Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын Жогорку Кеңешинин депутаттары А.А.Артыков, Н.Т.Каримов, Т.У.Жоробеков, К.Б.Орозова, К.Ж.Жолдошбаев, С.К.Нышанов, М.Г.Мадеминов, А.Э.Самигуллина, И.Ю.Карамушкина, А.А.Арапбаев, Б.К.Райымкулов, А.Л.Юсуров, Б.Ж.Субанбеков, Э.С.Тагаев, З.Э.Шарапов, И.А.Пирматов, Т.А.Масабиров, С.М.Джураев, У.Б.Примов, А.Ж.Исмаилова, И.А.Маннанов, А.М.Эргешов, Е.Г.Строкова, Р.М.Туманбаева, А.Ш.Осмонова, А.И.Кулбараков, Б.И.Сулейманов, А.Ш.Жээнбеков, А.К.Дюшалиев, Р.Ч.Момбеков, А.Т.Мамашова, А.М.Нурбаев, А.А.Турсунбаев, Жунус уулу Адыл, М.А.Айнакулов тарабынан демилгеленген "Кыргыз Республикасынын Салык кодексине өзгөртүүлөрдү киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Өкмөтүнүн тиркелген корутундусу жактырылсын.

2. Ушул токтом Кыргыз Республикасынын Жогорку Кеңешине жиберилсин.

"Кыргыз Республикасынын Салык кодексине өзгөртүүлөрдү киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Өкмөтүнүн КОРУТУНДУСУ

"Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 31-беренесине ылайык Кыргыз Республикасынын Өкмөтү Кыргыз Республикасынын Жогорку Кеңешинин депутаттары А.А.Артыков, Н.Т.Каримов, Т.У.Жоробеков, К.Б.Орозова, К.Ж.Жолдошбаев, С.К.Нышанов, М.Г.Мадеминов, А.Э.Самигуллина, И.Ю.Карамушкина, А.А.Арапбаев, Б.К.Райымкулов, А.Л.Юсуров, Б.Ж.Субанбеков, Э.С.Тагаев, З.Э.Шарапов, И.А.Пирматов, Т.А.Масабиров, С.М.Джураев, У.Б.Примов, А.Ж.Исмаилова, И.А.Маннанов, А.М.Эргешов, Е.Г.Строкова, Р.М.Туманбаева, А.Ш.Осмонова, А.И.Кулбараков, Б.И.Сулейманов, А.Ш.Жээнбеков, А.К.Дюшалиев, Р.Ч.Момбеков, А.Т.Мамашова, А.М.Нурбаев, А.А.Турсунбаев, Жунус уулу Адыл, М.А.Айнакулов тарабынан демилгеленген, пенсиялык куракка жеткен жеке адамдарды 1-топтогу мүлккө салыкты төлөөдөн бошотууну караган "Кыргыз Республикасынын Салык кодексине өзгөртүүлөрдү киргизүү жөнүндө" Кыргыз Республикасынын Мыйзамынын долбоорун карап чыгып, төмөнкүдөй корутундуга келди.

Мыйзамдын долбоорунун негиздеме-маалым катына ылайык Мыйзамдын долбоору социалдык адилеттүүлүктү белгилөө, ишкердикти жүргүзүү үчүн пайдаланылбаган, туруктуу же убактылуу жашоо үчүн арналган кыймылсыз мүлккө салыкты төлөө боюнча жеңилдиктерди берүү жолу менен пенсиялык куракка жеткен адамдардын татыктуу жашоо деңгээлине жетишүү максатында иштелип чыккан.

Кыргыз Республикасынын Салык кодексине сунушталган толуктоо берилүүчү салыктык жеңилдиктердин тизмесин кеңейтет жана бюджеттин белгилүү бир жоготууларына алып келиши мүмкүн.

Кыргыз Республикасынын салык мыйзамдары уюштуруу-укуктук формасына, ишинин түрүнө, баш ийүүсүнө жана менчигинин формасына карабастан салык салынуучу субъекттерге карата бирдиктүү мамилени карайт жана Кыргыз Республикасынын Салык кодексинин 5-беренесине ылайык салык салуунун милдеттүүлүгү, салык системасынын бирдиктүүлүгү, салык мыйзамдарынын ачык-айкындыгы, салык салуунун акыйкаттуулугу, салык салуунун аныкталгандыгы принциптерине негизделет.

Кыргыз Республикасынын Бюджеттик кодексинин 45-беренесинде каралган бюджеттер аралык мамилелердин негизги принциптеринин бири Кыргыз Республикасынын мыйзамдарына өзгөртүүлөрдү киргизүү менен байланышкан бюджеттердин кирешелериндеги же кошумча чыгашаларындагы жоготуулардын ордун толтуруу болуп саналат.

Кыргыз Республикасынын Бюджеттик кодексинин 48-беренесине ылайык мүлккө салык шаарлардын жана айыл аймактарынын жергиликтүү бюджеттеринин кирешелерине толук көлөмдө чегерилүүчү жергиликтүү бюджеттердин кирешелеринин бекитилген булагы болуп саналат.

Ошентип бюджеттик жылдын ичинде жергиликтүү бюджеттердеги кирешелердин түшүп калуулары, ошондой эле Кыргыз Республикасынын ченемдик укуктук актыларын кабыл алуунун натыйжасында пайда болгон жергиликтүү бюджеттердин кирешелеринин кошумча чыгашалары же жоготуулары республикалык бюджеттен компенсацияланууга тийиш.

Мында менчигинде салык салынбаган чектен ашкан үйлөрү, батирлери жана дачалары, ошондой эле 1-топтогу кыймылсыз мүлктүн бир нече түрү болгон пенсиялык курактагы адамдарды жашоо деңгээли колдоого муктаж болгон калктын аялуу катмары деп айтууга болбой турганын белгилейбиз. Башкача айтканда Мыйзамдын долбоору менен сунушталган социалдык адилеттүүлүк жетишилбейт, анткени преференцияларга чын эле муктаж болгон пенсиялык курактагы адамдар аянты 80 кв. метрден ашык батирлерде, же 150 кв. метрден ашык үйлөрдө жашашпайт.

Пенсиялык куракка жеткен жеке адамдарды 1-топтогу мүлккө салык төлөөдөн бошотуу жергиликтүү бюджеттердин кирешелеринин төмөндөшүнө алып келет жана шаарлардын мэрияларынан жана айыл аймактарынан компенсацияларды төлөө үчүн республикалык бюджеттин каражаттарынан кошумча каражаттарды талап кылат, бул бюджеттик каражаттардын чектелүү шарттарында экономикалык жана социалдык терс кесепеттерге алып келиши мүмкүн.

Кыргыз Республикасынын Салык кодексинде төмөнкүдөй жеңилдиктер каралган:

- Кыргыз Республикасынын Салык кодексинин 330-беренесине ылайык ушул объекттин менчик ээсине таандык, төмөнкү өлчөмдөрдөн ашпаган 1-топтогу бир мүлк объектисинин аянты: аянты 80 кв. метрге чейинки батирге жана аянты 150 кв. метрге чейинки турак үйгө салык салынбайт. Салык салынбаган 1-топтогу мүлк объекттери боюнча каралган жеңилдик калктуу конуштардагы калктын санына жараша болот;

- Кыргыз Республикасынын Салык кодексинин 344-беренесине ылайык пенсиялык куракка жеткен жеке адам үй жанындагы, короо жай жана багбанчылык-огороддук участокторду пайдалангандыгы үчүн жер салыгын төлөөдөн бошотулат.

Жогоруда баяндалгандарды эске алуу менен Кыргыз Республикасынын Өкмөтү сунушталган Мыйзамдын долбоорун кабыл алууну максатка ылайыксыз деп эсептейт.