КЫРГЫЗ РЕСПУБЛИКАСЫНЫН ӨКМӨТҮНҮН ТОКТОМУ

2021-жылдын 18-февралы № 54

Кыргыз Республикасынын Өкмөтүнүн 2017-жылдын 5-октябрындагы № 653 "Кыргыз Республикасынын жарандык бюджетин түзүү жөнүндө" токтомуна өзгөртүүлөрдү киргизүү жөнүндө

Кыргыз Республикасынын жарандары үчүн жергиликтүү бюджет жөнүндө маалыматтын ачык-айкындуулугун жогорулатуу жана жеткиликтүүлүгүн камсыздоо максатында, Кыргыз Республикасынын Бюджеттик кодексинин 126-беренесине, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 10 жана 17-беренелерине ылайык Кыргыз Республикасынын Өкмөтү токтом кылат:

1. Кыргыз Республикасынын Өкмөтүнүн 2017-жылдын 5-октябрындагы № 653 "Кыргыз Республикасынын жарандык бюджетин түзүү жөнүндө" токтомуна төмөнкүдөй өзгөртүүлөр киргизилсин:

1) 1-пункту "тиркемеге" деген сөзгө чейин "1-" деген цифра толукталсын;

2) төмөнкүдөй мазмундагы 1-1-пункт менен толукталсын:

"1-1. Жергиликтүү өз алдынча башкаруу органдары тарабынан жарандык бюджетти түзүү методикасы (мындан ары - ЖӨБО методикасы) 2-тиркемеге ылайык бекитилсин.";

3) төмөнкүдөй мазмундагы 3-1-пункт менен толукталсын:

"3-1. Жергиликтүү өз алдынча башкаруу органдарына төмөнкүлөр сунушталсын:

- ЖӨБО методикасына ылайык жергиликтүү бюджеттер боюнча жарандык бюджетти түзүү;

- жергиликтүү бюджет боюнча жарандык бюджетти түзүү үчүн бюджетти болжолдоо жана аткаруу боюнча ыйгарым укуктуу мамлекеттик органдын сайтында жайгашкан веб-багытталган тиркемени колдонуу.";

4) аталган токтом менен бекитилген Кыргыз Республикасынын жарандык бюджетин түзүү методикасында:

"Тиркеме" деген сөз "1-тиркеме" деген сөздөр менен алмаштырылсын;

5) ушул токтомдун тиркемесине ылайык редакциядагы 2-тиркеме менен толукталсын.

2. Ушул токтом расмий жарыяланган күндөн тартып он күн өткөндөн кийин күчүнө кирет.

"Эркин Тоо" газетасынын 2021-жылдын 26-январындагы № 6 (3185) жарыяланды

Жергиликтүү өз алдынча башкаруу органдары тарабынан жарандык бюджетти түзүү МЕТОДИКАСЫ

1. Жалпы жоболор

1. Ушул Жергиликтүү бюджет боюнча жарандык бюджетти түзүү методикасы шаардын же айыл аймагынын жергиликтүү бюджети боюнча жарандык бюджетти түзүүдө жергиликтүү өз алдынча башкаруу органдарына методикалык жардам көрсөтүү максатында иштелип чыкты.

2. Методика жергиликтүү башкаруунун аткаруу органдарына пайдалануу үчүн сунушталат. Методика жарандык бюджеттин түзүмүн жана анын негизги бөлүктөрүнүн мазмунун, жарандык бюджеттин даярдоо мөөнөтүн, жайылтуу тартибин жана форматын аныктайт.

3. Жарандык бюджет жергиликтүү өз алдынча башкаруунун аткаруу органдары тарабынан шаардын же айыл аймагынын жергиликтүү коомчулугуна жергиликтүү бюджет жөнүндө маалыматты жеткиликтүү жана жөнөкөйлөтүлгөн формада берүү жана Кыргыз Республикасынын Бюджеттик кодексинин 126-беренесине, ошондой эле "Кыргыз Республикасынын мамлекеттик органдарынын жана жергиликтүү өзалдынча башкаруу органдарынын карамагында турган маалыматтарга жетүү жөнүндө" Кыргыз Республикасынын Мыйзамына ылайык бюджеттик маалыматтын ачык-айкындуулугун жана жеткиликтүүлүгүн камсыздоо максатында түзүлөт.

4. Жарандык бюджет бюджеттик маалыматтардын негизинде түзүлөт. Анда бюджеттин чечимдери, параметрлери жана артыкчылыктары боюнча маалымат жеткиликтүү жана түшүнүү үчүн ачык формада берилет.

Ушул Методикада жарандык бюджетке киргизүү үчүн милдеттүү болгон көрсөткүчтөр аныкталган. Жергиликтүү өз алдынча башкаруу органдары жүргүзүлгөн сурамжылоонун негизинде бюджет жана бюджеттик саясат боюнча кошумча маалыматты бере алышат.

Жергиликтүү өз алдынча башкаруу органдарына бюджетти болжолдоо жана аткаруу боюнча ыйгарым укуктуу мамлекеттик органдын сайтында (gb.minfin.kg) жайгаштырылган атайын веб-багытталган тиркемени колдонуу сунушталат.

5. Жарандык бюджет бекитилген бюджеттин негизинде түзүлөт (жергиликтүү бюджет бекитилгенден кийин 15 (он беш) календардык күндүн ичинде).

6. Жарандык бюджеттин көрсөткүчтөрү бекитилген жергиликтүү бюджет боюнча өткөн жыл үчүн иш жүзүндөгү маанини (алар жок болсо - күтүлгөн аткарууну) жана кезектеги жылга пландык көрсөткүчтөрдү камтууга тийиш.

7. Жергиликтүү өз алдынча башкаруунун аткаруу органынын чечими боюнча жарандык бюджет жергиликтүү бюджет жөнүндө чечимге киргизилген өзгөртүүлөргө ылайык такталышы мүмкүн.

2. Жарандык бюджеттин түзүмү жана мазмуну

8. Жарандык бюджет өзүнө төмөнкү бөлүктөрдү камтыйт:

1) киришүү;

2) жергиликтүү бюджет жөнүндө жалпы маалыматтар;

3) жергиликтүү бюджеттин кирешелери жөнүндө маалымат;

4) жергиликтүү бюджеттин чыгымдары жөнүндө маалымат;

5) тартылган финансылык ресурстар жана долбоорлор жөнүндө маалымат;

6) бюджеттин натыйжалуулук көрсөткүчтөрүн берүү үчүн индикаторлордун тизмеги.

9. "Киришүү" бөлүгүнө төмөнкүлөрдү киргизүү сунушталат:

1) жарандарга жеткиликтүү формада бюджеттик процессте колдонулуучу негизги түшүнүктөрдүн жана терминдердин сөздүгүн;

2) жарандардын бюджеттик процесске катышуу календарын (коомдук бюджеттик угуулар, кеңештин ачык сессиялары) кошуп алганда бюджеттик календарды.

10. "Жергиликтүү бюджет жөнүндө жалпы маалыматтар" бөлүгүнө төмөнкүлөрдү киргизүү сунушталат:

1) жергиликтүү бюджеттин негизги параметрлерин (кирешелердин, чыгымдардын жалпы көлөмү, жергиликтүү бюджеттин финансылык жана финансылык эмес активдери);

2) социалдык-экономикалык өнүктүрүү программасында белгиленген жергиликтүү өз алдынча башкаруу органдарынын бюджеттик чыгымдарынын негизги артыкчылыктарын.

11. "Жергиликтүү бюджеттин кирешелери" бөлүгүндө төмөнкүлөр көрсөтүлөт:

1) кирешелердин түрлөрү боюнча жергиликтүү бюджеттин кирешелери жөнүндө маалымат, анын ичинде жергиликтүү бюджеттин кирешелеринин өзгөрүү себептерин түшүндүрүү менен салыктык, салыктык эмес кирешелер, расмий трансферттер боюнча маалымат;

2) жергиликтүү бюджетке негизги салыктык түшүүлөр боюнча маалымат;

3) муниципалдык менчиктен түшкөн кирешелер жөнүндө маалымат;

4) расмий трансферттердин түзүмү, анын ичинде мамлекеттик ыйгарым укукту көрсөтүү менен өткөрүлүп берилген мамлекеттик ыйгарым укуктарды аткаруу үчүн максаттуу трансферттер, аларды колдонуу үчүн максаттар жана багыттар;

Көрсөткүчтөр мыйзамдардагы четтөөлөрдү түшүндүрүү, мыйзамдардагы өзгөртүүлөргө (болсо) жана көрсөткүчтүн өсүү (кыскаруу) себептерине түшүндүрмө берүү менен инфографика түрүндө көрсөтүлөт.

12. "Жергиликтүү бюджеттин чыгымдары" бөлүгүндө төмөнкүлөр берилет:

- учурдагы жана капиталдык чыгымдарга бөлүштүрүү менен жергиликтүү бюджеттин чыгымдары;

- функциялык классификация боюнча жергиликтүү бюджеттин чыгымдарынын негизги түзүмү;

- функциялык классификация боюнча жергиликтүү бюджеттин негизги чыгымдарынын динамикасы;

- жергиликтүү маанидеги маселелерди каржылоого бюджеттин чыгымдарынын көлөмү;

- чөйрө (билим берүү, социалдык коргоо, турак жай-коммуналдык чарбасы ж.б.) жана мекемелер боюнча каражаттарды чыгымдоонун багыттарын кыскача баяндоо.

Көрсөткүчтөр мыйзамдардагы четтөөлөрдү түшүндүрүү, мыйзамдардагы өзгөртүүлөргө (болсо) жана көрсөткүчтүн өсүү (кыскаруу) себептерине түшүндүрмө берүү менен инфографика түрүндө көрсөтүлөт.

13. "Тартылган финансылык ресурстар жана долбоорлор жөнүндө маалымат" бүлүгүндө кийинки жылдын инвестициялык долбоорлору, учурдагы жылга планы жана өткөн жыл үчүн отчет боюнча маалыматтар берилет. Маалыматтар долбоор боюнча алынган жана пландалган натыйжаларды кыскача баяндоо менен коштолот.

14. Жарандык бюджетке кошуу үчүн сунушталган индикаторлор:

- калктын жан башына жергиликтүү бюджеттин кирешелери;

- калктын жан башына жергиликтүү бюджеттин чыгымдары;

- жергиликтүү бюджеттин кирешелерине карата % менен жергиликтүү бюджетке түшкөн трансферттер;

- жалпы кирешелерге карата % менен аппаратка чыгымдар;

- резервдик фонд;

- айыл өкмөтүнүн (мэриянын) аппаратынын саны, адам;

- айыл өкмөтүнүн (мэриянын) 1 (бир) муниципалдык кызматкеринин орточо айлык акысы, сом;

- автожолго жана көпүрөгө чыгымдар, млн. сом;

- 1 (бир) км автожолго жана көпүрөгө чыгымдар жана башка индикаторлор (зарылдыгы боюнча).

3. Жарандык бюджет жөнүндө маалыматка жеткиликтүүлүк

15. Жарандык бюджет жергиликтүү өз алдынча башкаруунун аткаруу органынын расмий сайтына жайгаштырылат. Расмий сайт жок болгон учурда жарандык бюджет төмөнкү жерлерде жалпыга жарыяланышы мүмкүн:

- жергиликтүү кеңеш тарабынан аныкталган атайын эл чогулган жерлерге (тактачаларда, стенддерде);

- бюджетти болжолдоо жана аткаруу боюнча ыйгарым укуктуу мамлекеттик органдын расмий сайтында жайгашкан (gb.minfin.kg) атайын веб-багытталган тиркемеде.

Жарандык бюджетти экиден кем эмес түрдүү ыкма менен жалпыга жарыялоо сунушталат: сайтка жарыялоо жана жарандык бюджетти кагазга жана башка материалдык алып жүрүүчүдө басып чыгаруу (брошюра, баннер чыгаруу ж.б.).

16. Жарандык бюджетти даярдоодо маалыматтын ачыктыгын камсыздоо максатында, графикалар, диаграммалар, сүрөттөр, схемалар жана инфографиканын башка элементтери түзүлөт.

Жогоруда белгиленген максаттарга жетүү үчүн жергиликтүү өз алдынча башкаруу органдарына бюджетти болжолдоо жана аткаруу боюнча ыйгарым укуктуу мамлекеттик органдын сайтында жайгашкан (gb.minfin.kg) атайын веб-багытталган тиркемени пайдалануу сунушталат.

17. Ар бир бюджетте жергиликтүү өз алдынча башкаруунун аткаруу органынын (же жооптуу кызмат адамынын) так байланыш маалыматтарын жана бюджет жөнүндө көбүрөөк билгиси келген жарандар үчүн публикацияларды жайгаштыруу булактарынын шилтемелерин көрсөтүү сунушталат.

18. Жарандык бюджет мамлекеттик жана расмий тилдерде жарыяланат. Тиешелүү айыл аймагында же шаардын аймагында мамлекеттик тилде сүйлөй билген адамдардын басымдуу саны жашаганда жана жергиликтүү өз алдынча башкаруунун өкүлчүлүктүү органынын тийиштүү чечими болгон шарттарда мамлекеттик тилде жарыялоого жол берилет.".