КР Министрлер Кабинетинин 2025-жылдын 29-декабрындагы № 845 токтомуна ылайык КҮЧҮН ЖОГОТТУ

Республикалык бюджеттин долбоорун түзүү жана республикалык бюджетке өзгөртүүлөрдү киргизүү тартиби

1-глава. Жалпы жоболор

1. Ушул Республикалык бюджеттин долбоорун түзүү жана Кыргыз Республикасынын республикалык бюджетине өзгөртүүлөрдү киргизүү тартиби (мындан ары - Тартип) Кыргыз Республикасынын Бюджеттик кодексине ылайык иштелип чыккан жана республикалык бюджетти түзүү жана ага өзгөртүүлөрдү киргизүү процессинин бирдиктүү эрежелерин аныктайт.

2. Республикалык бюджеттин долбоорун түзүү жана республикалык бюджетке өзгөртүүлөрдү киргизүү Кыргыз Республикасынын Министрлер Кабинетинин өзгөчө укугу болуп саналат.

3. Республикалык бюджеттин долбоорун түздөн-түз түзүүнү бюджетти болжолдоо жана аткаруу боюнча ыйгарым укуктуу мамлекеттик орган (мындан ары - ыйгарым укуктуу мамлекеттик орган) жүзөгө ашырат.

4. Ушул Тартипте колдонулуучу негизги түшүнүктөр жана терминдер:

1) автоматташтырылган система - казыналык системада кезектеги бюджеттик жылга жана пландык мезгилге Кыргыз Республикасынын республикалык бюджетинин долбоорун түзүү боюнча маалыматтарды генерациялоону, иштеп чыгууну, берүүнү, кабыл алууну, сактоону камсыз кылуучу программалык, программалык-аппараттык жана аппараттык каражаттардын комплекси;

2) БКБТ - бюджеттик каражаттардын башкы тескөөчүсү;

3) контролдук цифралар - бюджеттик каражаттардын чектүү көрсөткүчү, анын негизинде бюджеттик мекемелердин чыгашалары түзүлөт;

4) БКА - бюджеттик каражаттарды алуучу;

5) БКТ - бюджеттик каражаттарды тескөөчү;

6) бюджеттик каражаттар боюнча чыгашалардын сметасы (мындан ары - бюджеттик каражаттар боюнча смета) - бюджеттик эсептердеги каражаттар боюнча БКБТ/БКТ/БКА иштешине жана жүргүзүлүп жаткан иш-чараларга алардын чыгашаларын аныктоочу документ;

7) атайын эсептердеги каражаттарды эсепке алуу боюнча кирешелердин жана чыгашалардын сметасы (мындан ары - атайын эсептердеги каражаттар боюнча смета) - атайын эсептердеги каражаттар боюнча БКБТ/БКТ/БКА иштешине жана жүргүзүлүп жаткан иш-чараларга алардын чыгашаларын аныктоочу документ;

8) квалификациялуу электрондук кол тамга (ЭСК) - электрондук кол тамга жөнүндө Кыргыз Республикасынын мыйзамдарына ылайык квалификациялуу электрондук кол тамганын талаптарына ылайык келген электрондук кол тамга.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

2-глава. Бюджеттик процесстин негиздери

5. Республикалык бюджеттин долбоору (мындан ары - республикалык бюджеттин долбоору) кезектеги бюджеттик жылга жана пландык мезгилге түзүлөт.

6. Республикалык бюджеттин долбоору Кыргыз Республикасын социалдык-экономикалык өнүктүрүүнүн болжолунун, ошондой эле Кыргыз Республикасынын Министрлер Кабинетинин Кеңешинин чечими менен бекитилген Орто мөөнөттүү мезгилге фискалдык саясаттын негизги багыттарынын (мындан ары - ФСНБ) негизинде иштелип чыгат.

7. Республикалык бюджеттин долбоорун өз убагында жана сапаттуу түзүү максатында ыйгарым укуктуу мамлекеттик орган бюджеттик мекемелерден, ишканалардан, чарбалык уюмдардан жана башка бюджеттик ассигнованиелерди алуучулардан зарыл болгон маалыматтарды суроого жана алууга укуктуу.

3-глава. Республикалык бюджеттен каржылануучу БКБТ/БКТ/БКА бюджеттеринин долбоорлорун түзүү тартиби

8. ФСНБ тарабынан белгиленген чыгашалардын ведомстволук классификациясы боюнча контролдук цифралар БКБТ/БКТ/БКА бюджеттеринин долбоорлорун түзүү үчүн негиз болуп саналат.

9. Ыйгарым укуктуу мамлекеттик орган контролдук цифраларды БКБТга жеткирет. БКБТ кезектеги бюджеттик жылга жана пландык мезгилге бюджеттик каражаттар боюнча сметаларды түзүү үчүн аларды БКТ жана БКАга өз убагында жеткирүүнү камсыз кылат.

10. Ыйгарым укуктуу мамлекеттик органдын ыйгарым укуктуу кызматкерлери автоматташтырылган системага чыгашалардын ведомстволук классификациясы боюнча контролдук цифраларды БКБТга жеткиргенден кийин киргизет.

11. БКБТ берилген контролдук цифралардын негизинде бюджеттик каражаттар боюнча сметаларды түзүү үчүн бюджеттик ассигнованиелерди бөлүштүрөт.

12. Бюджеттик каражаттар боюнча смета жана атайын эсептердеги каражаттар боюнча смета автоматташтырылган системада ушул Тартиптин 1-4-тиркемелерине ылайык кирешелердин, чыгашалардын экономикалык классификациясы жана активдер жана милдеттенмелер менен операциялардын классификациясы боюнча ведомстволук, программалык, функциялык классификация боюнча ар бир БКБТ/БКБ/БКА тарабынан учурдагы жылдын 25-июлуна чейинки мөөнөттө түзүлөт.

13. БКБТ/БКБ/БКА чыгашалардын экономикалык классификациясы жана активдер жана милдеттенмелер менен операциялардын классификациясы боюнча ведомстволук, программалык, функциялык классификация боюнча жеткирилген контролдук цифраларды бөлүштүрүү аркылуу автоматташтырылган системада бюджеттик каражаттар боюнча сметаны түзөт.

14. БКБТ/БКТ/БКА автоматташтырылган системада атайын эсептердеги каражаттар боюнча сметаны түзөт.

15. Бюджеттик каражаттар боюнча сметаларга жана атайын эсептердеги каражаттар боюнча сметаларга БКБТнын ыйгарым укуктуу кызматкери жана жетекчиси тарабынан автоматташтырылган системада ЭСКны пайдалануу менен виза коюлат жана ыйгарым укуктуу мамлекеттик органга билдирилет.

16. Ыйгарым укуктуу мамлекеттик органдын жооптуу кызматкерлери бюджеттик каражаттар боюнча БКБТ тарабынан берилген сметаларды кароо процессинде:

1) бюджеттик каражаттар боюнча сметаларга киргизилген чыгашалардын суммаларынын БКБТнын болжолдуу параметрлерине ылайык келишин жана алардын негиздүүлүгүн текшерет;

2) эмгек акы фондунун өлчөмдөрүн түзүүнүн жана материалдык жана акчалай чыгашалардын ченемдерин жана бааларын эсептөөдө колдонуунун тууралыгын текшерет;

3) чыгашалардын зарылчылыгын баалайт, бюджеттик өтүнмөлөргө негизделген эсептөөлөрдүн болушун текшерет.

17. БКБТ/БКБ/БКА боюнча бюджеттик ассигнованиелердин көлөмдөрүн азайтуу, бюджеттин ресурстарынын көлөмдөрүн көбөйтүү жагына өзгөртүү, ошондой эле бюджеттин ресурстарынын болжолдонгон көлөмдөрү кыскарган учурдагы өзгөрүүлөр Кыргыз Республикасынын Бюджеттик кодексинин 89-беренесине ылайык жүргүзүлөт.

18. Бюджеттик каражаттарды жана бюджеттик ассигнованиелерди бөлүштүрүү боюнча сметаларга сын пикирлер жок болгон учурда ыйгарым укуктуу мамлекеттик органдын ыйгарым укуктуу кызматкерлери аларды ЭСКны пайдалануу менен автоматташтырылган системага виза коюу аркылуу кабыл алышат.

19. Бюджеттик каражаттар боюнча сметаларга сын пикирлер болгон учурда ыйгарым укуктуу мамлекеттик органдын жооптуу кызматкерлери сын пикирлерди жоюу үчүн аларды автоматташтырылган системага БКБТга кайтарып беришет.

20. БКБТ бюджеттик каражаттар боюнча сметаны кайтарып берген күндөн тартып эки жумуш күндүн ичинде ыйгарым укуктуу мамлекеттик орган берген сын пикирлерге ылайык аларга оңдоолорду киргизет жана аларды автоматташтырылган системадагы ыйгарым укуктуу мамлекеттик органдын кароосуна кайра берет.

21. БКБТ бюджеттик каражаттар боюнча сметаларды карап чыгып жана тактагандан кийин ыйгарым укуктуу мамлекеттик орган учурдагы бюджеттик жылдын 25-августуна чейинки мөөнөттө Кыргыз Республикасынын кезектеги бюджеттик жылга жана пландык мезгилине республикалык бюджети жөнүндө Кыргыз Республикасынын Мыйзамынын долбоорун (мындан ары - республикалык бюджет жөнүндө мыйзамдын долбоору) түзөт.

22. Карап чыгуу процессинде сметаларга тактоолор, ошондой эле БКБТ тарабынан берилген башка документтер киргизилиши мүмкүн.

23. Бюджеттик мекемелер, ишканалар, чарбалык уюмдар жана башка бюджеттик ассигнованиелерди алуучулар чыгашалардын сметасында каралган ассигнованиелердин көлөмүнө жана максаттуу багытына так ылайык бюджеттик каражаттарды чыгашалоону камсыз кылууга милдеттүү. Бюджеттик каражаттарды чыгашалардын сметасында каралбаган иш-чараларга багыттоого тыюу салынат.

24. БКБТ ушул Тартиптин 16-тиркемесине ылайык эмгек акы фондунун жылдык көлөмүн аныктоо менен мекемелердин штаттык ырааттамасын, ошондой эле экономикалык классификация боюнча башка эсептөөлөрдү берет, зарылдыгына жараша ушул Тартиптин 17-тиркемесине ылайык эмгек акы төлөө фондунун жылдык көлөмүн эске алуу менен штаттык ырааттаманын жыйынды көлөмү түзүлөт.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

25. БКБТ/БКТ/БКА ыйгарым укуктуу мамлекеттик органга бюджеттик мекемелердин кызматкерлеринин саны жөнүндө маалыматтарды ушул Тартиптин 5-7-тиркемелерине ылайык форма боюнча берет.

26. БКБТ Кыргыз Республикасынын Министрлер Кабинетинин 2021-жылдын 24-декабрындагы № 349 токтому менен бекитилген Программалык негизде бюджеттерди түзүү, кароо жана аткаруу боюнча нускамага ылайык программалык негизде бюджеттерди түзөт жана ыйгарым укуктуу мамлекеттик органга берет.

4-глава. Республикалык бюджет жөнүндө мыйзамдын долбоорунун "Жалпы мамлекеттик программалар, иш-чаралар жана төлөмдөр" бөлүмүн түзүү тартиби

27. Республикалык бюджет жөнүндө мыйзамдын долбоорунун "Жалпы мамлекеттик программалар, иш-чаралар жана төлөмдөр" бөлүмүндө мамлекеттин милдеттерин жана функцияларын аткарууга бюджеттик каражаттар каралат:

1) теңдөөчү жана максаттуу трансферттер;

2) дем берүүчү (үлүштүк) гранттар;

3) эл аралык уюмдарга төгүмдөр;

4) тышкы жана ички карыздар боюнча пайыздарды жана негизги сумманы төлөө;

5) кошумча нарк салыгынын ордун толтуруу жана кайтарып берүү;

6) соттун чечимдерин аткаруу;

7) банктардын кызмат көрсөтүүлөрүнө акы төлөө (коммерциялык банктарга жана финансы-кредиттик мекемелерге төлөмдөр);

8) чек ара аймактарын өнүктүрүү;

9) коммерциялык банктардын пайыздык ставкаларын субсидиялоо;

10) капиталдык салымдар;

11) табигый кырсыктарды жоюу боюнча иш-чаралар;

12) социалдык төлөмдөрдү жогорулатуу жана башка иш-чаралар;

13) мамлекеттик бюджеттик резерв;

14) жергиликтүү бюджеттен республикалык бюджетке берилген мекемелер;

15) мамлекеттик-жеке өнөктөштүк долбоорлорун даярдоону каржылоо фонду;

16) экономикалык өнүктүрүү долбоорлорун каржылоо жана топтолгон финансылык резервдер;

16¹) "Укук бузуулардын бирдиктүү реестри" автоматташтырылган маалыматтык системасында иштетилген, анын ичинде "Акылдуу шаар" долбоорунун "Коопсуз шаар" компонентин ишке ашыруунун алкагында аппараттык-программалык комплексти колдонуу менен белгиленген укук бузууларды жасагандыгы үчүн өндүрүлгөн айыптардын суммасын пайдалануу;

17) COVID-19 жана башка пандемиялык ооруларга жана алардын экономикага тийгизген таасирине каршы күрөшүү боюнча жалпы мамлекеттик чыгашалар;

18) акча каражаттарын Кыргыз Республикасынын Турукташтыруу фондуна (мындан ары - Турукташтыруу фонду) которуу;

19) республикалык бюджеттин долбоорун түзүүдө, ошондой эле бюджетти аткаруу процессинде келип чыгышы мүмкүн болгон башка иш-чаралар жана төлөмдөр.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

28. Бюджеттик ассигнованиелер Кыргыз Республикасынын Бюджеттик кодексине ылайык акцияларды сатып алууга жана юридикалык жактардын капиталына катышуунун башка формаларына, юридикалык жактарга, айылдык товар өндүрүүчүлөргө жана ишкерлерге кредит берүүгө каралган.

30. Социалдык төлөмдөрдү жогорулатууга жана башка иш-чараларга бюджеттик ассигнованиелер ыйгарым укуктуу мамлекеттик органдын алдын ала болжолдуу маалыматтарына ылайык бюджеттик каражаттарды натыйжалуу башкаруу жана белгиленген максаттарга иш жүзүндөгү керектөөлөрдүн негизинде такталган эсептөөлөрдү БКБТ/БКТ/БКАга андан ары берүү максатында каралат.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

31. БКБТ/БКТ/БКА социалдык төлөмдөрдү жогорулатууга жана башка иш-чараларга каралган бюджеттик ассигнованиелерге бюджетти аткаруунун жүрүшүндө иш жүзүндөгү керектөөнүн негизинде такталган эсептөөлөрдү түзөт жана ыйгарым укуктуу мамлекеттик органга берет.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

32. Ыйгарым укуктуу мамлекеттик органга берилген такталган эсептөөлөргө ылайык БКБТ/БКТ/БКА ЭСКны пайдалануу менен социалдык төлөмдөрдү жогорулатууга жана башка иш-чараларга каралган каражаттардан бюджетке өзгөртүүлөрдү киргизүүгө маалымкат-билдирүүлөрдү алардын тиешелүү эсептерине автоматташтырылган системада тариздейт.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

33. Чет мамлекеттерден жана эл аралык финансылык уюмдардан алынган гранттар жана кредиттер Кыргыз Республикасынын эл аралык келишимдеринин негизинде бөлүнгөн каражаттар болуп саналат, алар толук көлөмдө максаттуу багыты боюнча пайдаланылууга тийиш. Учурдагы жылда бул каражаттар толук көлөмдө пайдаланылбаган учурда жылдын аягындагы калдыктар жаңы бюджеттик жылдагы каржылоо булагы болуп саналат.

34. Мамлекеттик-жеке өнөктөштүк долбоорлорун даярдоого чыгашаларды мамлекеттик-жеке өнөктөштүк долбоорлорун даярдоону каржылоо фондунун каражаттарынын эсебинен каржылоо Фонддун Байкоочу кеңешинин чечиминин негизинде, Кыргыз Республикасынын Министрлер Кабинетинин 2014-жылдын 17-мартындагы № 147 "Мамлекеттик-жеке өнөктөштүк долбоорлорун даярдоону каржылоо жөнүндө" токтомунун 3-пунктуна ылайык ишке ашырылат.

35. Республикалык бюджет жөнүндө мыйзамдын долбоорунда жана республикалык бюджет жөнүндө мыйзамга өзгөртүүлөрдү киргизүү жөнүндө мыйзамдын долбоорунда төмөнкүдөй чыгашаларга бюджеттик ассигнованиелер каралышы мүмкүн:

1) экономикалык өнүктүрүү долбоорлорун каржылоого, алар стратегиялык документтерге (Улуттук өнүктүрүү стратегиясы жана башкалар), ошондой эле Кыргыз Республикасынын Министрлер Кабинетинин ченемдик укуктук актыларына жана тескемелерине ылайык экономикалык өнүктүрүү долбоорлорун каржылоого, анын ичинде ТЭН иштеп чыгууга, экономиканын реалдуу секторун каржылоого, бюджеттик кредиттөөгө жана акцияларды сатып алууга жана юридикалык жактардын капиталына катышуунун башка формаларына багытталат. Экономикалык өнүктүрүү долбоорлорун каржылоого каралган каражаттар Кыргыз Республикасынын Министрлер Кабинетинин чечимдерине ылайык башка кечиктирилгис чыгашаларды каржылоого багытталышы мүмкүн;

2) топтолгон финансылык резервдер республикалык бюджеттин ресурстары түшпөй калган (толук түшпөй калган) учурда бюджеттин туруктуулугун камсыз кылуу үчүн каралат. Кыргыз Республикасынын Министрлер Кабинетинин ченемдик укуктук актыларына жана тескемелерине ылайык республикалык бюджеттин чыгашаларын каржылоого бөлүштүрүлүшү мүмкүн;

3) Кыргыз Республикасынын Министрлер Кабинетинин ченемдик укуктук актыларына жана тескемелерине ылайык салыктык, бажылык жана бюджеттик жол-жоболорду, ошондой эле башка кечиктирилгис чыгашаларды фискалдаштыруу боюнча иш-чараларды каржылоого багытталган фискалдаштырууга;

4) COVID-19 жана башка пандемиялык ооруларга, ошондой эле алардын экономикага тийгизген таасиринин кесепеттерине каршы күрөшүү боюнча жалпы мамлекеттик чыгашалар COVID-19 жана башка пандемиялык ооруларга каршы күрөшүү боюнча чыгашаларды каржылоого (вакциналарды, медициналык жабдууларды жана медикаменттерди сатып алуу, компенсацияларды төлөө, ишкерлерди колдоо ж.б.) каралат, ошондой эле Кыргыз Республикасынын Министрлер Кабинетинин чечимдерине ылайык башка кечиктирилгис чыгашаларды каржылоого багытталышы мүмкүн.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

35¹. "Укук бузуулардын бирдиктүү реестри" автоматташтырылган маалыматтык системасында иштелип чыккан, анын ичинде "Акылдуу шаар" долбоорунун "Коопсуз шаар" компонентин ишке ашыруунун алкагында аппараттык-программалык комплексти колдонуу менен белгиленген укук бузууларды жасагандыгы үчүн өндүрүлгөн айыптардын суммаларын пайдаланууга бюджеттик ассигнованиелер Кыргыз Республикасынын бюджетинин ресурстарынын тиешелүү администраторлорунун болжолдуу маалыматтарынын негизинде республикалык бюджет жөнүндө мыйзамда каралат.

Айыптардын суммасын пайдалануу Кыргыз Республикасынын Министрлер Кабинети аныктаган Тартипке ылайык жүзөгө ашырылат.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

36. Бюджеттик ассигнованиелер ушул Тартиптин 35-пунктуна ылайык төмөнкүдөй тартипте каралат:

1) экономикалык өнүктүрүү, фискалдаштыруу долбоорлорун, COVID-19 жана башка пандемиялык ооруларга, ошондой эле алардын экономикага тийгизген таасиринин кесепеттерине каршы күрөшүү боюнча жалпы мамлекеттик чыгашаларды каржылоого төмөнкү варианттардын биринин же бир нечесинин негизинде:

- бюджетти түзүүнүн мурдагы циклдеринде каралган тиешелүү жылга көрсөткүчтөргө ылайык;

- мамлекеттик органдардын өтүнмөсүнө, ченемдик укуктук актыларга жана Министрлер Кабинетинин тескемелерине, ошондой эле Кыргыз Республикасынын Президентинин, Кыргыз Республикасынын Министрлер Кабинетинин Төрагасынын жана анын орун басарларынын тескемелерине ылайык;

- республикалык бюджеттин ресурстарына жараша жана бюджеттин тең салмактуулугунун принцибине ылайык;

2) топтолгон финансылык резервдер төмөнкүдөй формула боюнча эсептелет:

ТФР = РБР - МОЧ - МПИТ,

мында:

ТФР - топтолгон финансылык резервдер;

РБР - атайын эсептердеги каражаттарды жана мамлекеттик тышкы инвестицияларды эсепке албаганда жыл башындагы республикалык бюджеттин ресурстары жана Кыргыз Республикасынын Министрлер Кабинетинин эсептериндеги калдыктар;

МОЧ - атайын эсептердеги каражаттарды жана мамлекеттик тышкы инвестицияларды эсепке албаганда мамлекеттик органдардын (БКБТ/БКТ/БКА) чыгашалары;

МПИТ - "Жалпы мамлекеттик программалар, иш-чаралар жана төлөмдөр" бөлүмүнүн башка чыгашалары.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

36¹. Республикалык бюджет жөнүндө мыйзамдын долбоорун жана республикалык бюджет жөнүндө мыйзамга өзгөртүүлөрдү киргизүү тууралуу мыйзамдын долбоорун түзүүнүн жана кароонун жүрүшүндө ушул Тартиптин 36-пунктуна ылайык эсептелген бюджеттик ассигнованиелер аларды көбөйтүү зарылдыгында чыгашалардын башка категорияларына кайра бөлүштүрүлүшү мүмкүн.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

37. Ушул Тартиптин 35-пунктуна ылайык каралган бюджеттик ассигнованиелер Кыргыз Республикасынын Министрлер Кабинетинин ченемдик укуктук актыларына, тескемелерине ылайык ЭСК пайдалануу менен автоматташтырылган системада бюджетке өзгөртүүлөрдү киргизүүгө маалымкат-билдирүүлөр аркылуу БКБТ/БКТ/БКАнын тиешелүү эсептерине бөлүштүрүлөт.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

38. "Жалпы мамлекеттик программалар, иш-чаралар жана төлөөлөр" бөлүмүндө каралган бюджеттик ассигнованиелер пайдаланылбаган учурда бул каражаттар республикалык бюджет жөнүндө мыйзамга өзгөртүүлөрдү киргизүү тууралуу мыйзамдын долбоорун түзүүдө бюджеттин тең салмактуулугунун принцибин камсыз кылуу зарылдыгында өзгөрүүсүз калышы мүмкүн.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

39. Ыйгарым укуктуу мамлекеттик орган Турукташтыруу фондун түзүү булактарынын болжолдоруна, Кыргыз Республикасынын Бюджеттик кодексинин 43²-беренесинин 1-бөлүгүнүн 1 жана 2-пункттарына ылайык Турукташтыруу фондуна которулууга тийиш болгон каражаттарды карайт.

(КР Министрлер Кабинетинин 2025-жылдын 3-мартындагы № 104 токтомунун редакциясына ылайык)

40. "Жалпы мамлекеттик программалар, иш-чаралар жана төлөмдөр" бөлүгү боюнча бюджеттик ассигнованиелер ыйгарым укуктуу мамлекеттик орган тарабынан түзүлөт.

5-глава. Кыргыз Республикасынын сот системасынын мекемелеринин жана Кыргыз Республикасынын Эсептөө палатасынын бюджеттик өтүнмөлөрүн даярдоо жана берүү

41. Кыргыз Республикасынын сот системасынын бюджетинин долбоору өз алдынча түзүлөт жана аткаруу жана мыйзам чыгаруу бийлиги менен макулдашуу боюнча Кыргыз Республикасынын Бюджеттик кодексине ылайык республикалык бюджетке киргизилет.

42. Кыргыз Республикасынын Эсептөө палатасы өз ишин каржылоо үчүн бюджеттин долбоорун жыл сайын өз алдынча түзөт жана корутунду берүү үчүн Кыргыз Республикасынын Министрлер Кабинетине жиберет.

43. Кыргыз Республикасынын Эсептөө палатасы Кыргыз Республикасынын Министрлер Кабинетинин корутундусу менен бюджеттин долбоорун республикалык бюджет жөнүндө мыйзамдын долбоорунун курамына киргизүү үчүн Кыргыз Республикасынын Жогорку Кеңешинин профилдик комитетине макулдашууга жиберет.

44. Кыргыз Республикасынын Эсептөө палатасынын бюджетинин долбооруна Кыргыз Республикасынын Министрлер Кабинети тарабынан каршы пикирлер болгон учурда Кыргыз Республикасынын Жогорку Кеңешинин профилдик комитети берилген каршы пикирлерди Кыргыз Республикасынын Министрлер Кабинетинин жана Кыргыз Республикасынын Эсептөө палатасынын өкүлдөрү менен бирдикте карайт. Кыргыз Республикасынын Эсептөө палатасынын макулдашылган бюджетинин долбоору республикалык бюджет жөнүндө мыйзамдын долбооруна киргизүү үчүн ыйгарым укуктуу мамлекеттик органга жиберилет.

45. Эсептөө палатасы өз ишин камсыз кылуу үчүн зарыл болгон кошумча каржылоо жөнүндө сунушту Кыргыз Республикасынын Жогорку Кеңешинин профилдик комитетине макулдашууга киргизүүгө укуктуу.

46. Кыргыз Республикасынын сот системасынын жана Эсептөө палатасынын бюджеттеринин долбоорлору ыйгарым укуктуу мамлекеттик органга, анын ичинде автоматташтырылган система аркылуу республикалык бюджеттин долбооруна киргизүү үчүн учурдагы жылдын 20-июлуна чейинки мөөнөттө берилет.

47. Ыйгарым укуктуу мамлекеттик орган бюджеттердин алынган долбоорлоруна ылайык республикалык бюджет жөнүндө мыйзамдын долбооруна учурдагы бюджеттик жылдын 25-августуна чейинки мөөнөттө Кыргыз Республикасынын сот системасынын мекемелеринин жана Эсептөө палатасынын бюджеттик ассигнованиелерин киргизет.

6-глава. Кыргыз Республикасынын бюджеттик системасынын трансферттерине бюджеттик өтүнмөлөрдү даярдоо жана берүү

48. Кыргыз Республикасынын бюджеттик системасынын деңгээлдеринин ортосундагы өз ара мамилелер республикалык бюджет жөнүндө мыйзамдын долбоорунун чыгаша бөлүгүндө чагылдырылган.

49. Кыргыз Республикасынын бюджеттик системасынын деңгээлдеринин ортосундагы мамилелер жалпы мамлекеттик кирешелерден жана бюджеттер аралык трансферттерден чегерүүлөрдүн ченемдерин белгилөө аркылуу жөнгө салынат.

50. Бюджеттер аралык трансферттердин системасына төмөнкүлөр кирет:

1) теңдөөчү трансферттер жана максаттуу трансферттер түрүндөгү жергиликтүү бюджеттерге трансферттер;

2) республикалык бюджеттен Кыргыз Республикасынын Министрлер Кабинетине караштуу Кыргыз Республикасынын Социалдык фондунун жана Кыргыз Республикасынын Саламаттык сактоо министрлигине караштуу Милдеттүү медициналык камсыздандыруу фондунун бюджеттерине ассигнованиелер.

51. Теңдөөчү жана максаттуу трансферттерге бюджеттик ассигнованиелер ыйгарым укуктуу мамлекеттик орган тарабынан түзүлөт.

52. Республикалык бюджеттен Кыргыз Республикасынын Министрлер Кабинетине караштуу Кыргыз Республикасынын Социалдык фондунун жана Кыргыз Республикасынын Саламаттык сактоо министрлигине караштуу Милдеттүү медициналык камсыздандыруу фондунун бюджеттерине ассигнованиелер Кыргыз Республикасынын Бюджеттик кодексине ылайык берилет жана каржыланат жана ыйгарым укуктуу мамлекеттик орган тарабынан Кыргыз Республикасынын Министрлер Кабинетине караштуу Кыргыз Республикасынын Социалдык фонду жана Кыргыз Республикасынын Саламаттык сактоо министрлигине караштуу Милдеттүү медициналык камсыздандыруу фонду менен биргеликте, анын ичинде автоматташтырылган системада түзүлөт.

7-глава. Бюджеттик инвестицияларга бюджеттик өтүнмөлөрдү даярдоо жана берүү

53. Республикалык бюджеттин чыгаша бөлүгүнө бюджеттик инвестицияларды ишке ашырууга ассигнованиелер кошулат.

54. Бюджеттик инвестициялар инфраструктураны түзүүгө жана өнүктүрүүгө, инновациялык системаны түзүүгө, социалдык секторду, экономика тармактарын колдоого жана өнүктүрүүгө, ошондой эле инвестициялык долбоорлор аркылуу мамлекеттик башкаруу секторундагы институттук кайра түзүүлөрдү ишке ашырууну камсыз кылууга багытталат.

55. Бюджеттик инвестицияларды жүзөгө ашырууга бюджеттик ассигнованиелер ыйгарым укуктуу мамлекеттик орган тарабынан, анын ичинде автоматташтырылган системада түзүлөт.

8-глава. Мамлекеттик карызды тейлөөгө бюджеттик өтүнмөлөрдү даярдоо жана берүү, анын ичинде негизги сумма, пайыздар боюнча төлөмдөр жана башка төлөмдөр менен чектелбестен

56. Чет мамлекеттерден жана эл аралык уюмдардан алынган кредиттер жана зайымдар боюнча негизги сумманы, пайыздарды жана башка төлөмдөрдү төлөөгө, акциялардан тышкары мамлекеттик баалуу кагаздар боюнча негизги сумманы жана пайыздарды төлөөгө, индекстелген суммалар боюнча калктын карызын тындырууга бюджеттик ассигнованиелер ыйгарым укуктуу мамлекеттик орган тарабынан, анын ичинде автоматташтырылган системада түзүлөт.

9-глава. Республикалык бюджет жөнүндө мыйзамдын долбоорун түзүү тартиби

57. Ыйгарым укуктуу мамлекеттик орган республикалык бюджет жөнүндө мыйзамдын долбоорун, анын ичинде автоматташтырылган системада түзөт.

58. Республикалык бюджет жөнүндө мыйзамдын долбоору Кыргыз Республикасынын Бюджеттик кодексине ылайык көрсөткүчтөрдү камтыйт.

59. Республикалык бюджет жөнүндө мыйзамдын долбоорунун тиркемелеринде чыгашалардын көрсөткүчтөрү Кыргыз Республикасынын Бюджеттик классификациясына ылайык төмөнкүлөрдү бөлүү менен чагылдырылат:

1) бюджеттик эсептер боюнча чыгашалар (учурдагы бюджет);

2) атайын эсептердеги каражаттар боюнча чыгашалар;

3) мамлекеттик инвестициялар.

60. Ыйгарым укуктуу мамлекеттик орган кезектеги бюджеттик жылга жана пландалган мезгилге Кыргыз Республикасынын мамлекеттик башкаруу секторунун бюджетинин ирилештирилген болжолдуу көрсөткүчтөрүн жыл сайын эсептеп чыгат жана аны республикалык бюджет жөнүндө мыйзамдын долбооруна өзүнчө тиркеме менен киргизет.

62. Республикалык бюджет жөнүндө мыйзамдын долбоору өзүнө республикалык бюджет жөнүндө мыйзамдын долбооруна түшүндүрмө катты жана ушул Тартиптин 8-тиркемесине ылайык форма боюнча тиркемени камтыйт.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

63. (Кыргыз Республикасынын Министрлер Кабинетинин 2023-жылдын 19-декабрындагы № 680 токтомуна ылайык күчүн жоготту)

10-глава. Республикалык бюджет жөнүндө мыйзамдын долбооруна түшүндүрмө кат

64. Республикалык бюджет жөнүндө мыйзамдын долбооруна түшүндүрмө кат төмөнкүдөй бөлүмдөрдөн турат:

1) өнүктүрүүнүн макроэкономикалык артыкчылыктары;

2) бюджеттин киреше бөлүгү;

3) бюджеттин чыгаша бөлүгү;

4) бюджеттин тартыштыгы;

5) бюджетти аткаруунун тобокелдиктери;

6) программалык бюджеттөө.

65. Ар бир бөлүмдүн жана бөлүмчөнүн сыпаттоо бөлүгүнүн мазмуну 5 жылдык көрсөткүчтөрдү чагылдырган таблицаны камтууга тийиш:

1) мурунку эки жылдагы;

2) учурдагы жылдагы;

3) пландык мезгилдеги.

66. "Өнүктүрүүнүн макроэкономикалык артыкчылыктары" бөлүмү номиналдык ички дүң продукт (мындан ары - ИДП), ИДПнын реалдуу өсүшү, инфляция сыяктуу негизги макроэкономикалык көрсөткүчтөрдү чагылдырат:

1) 3 болжолдуу жылга ИДПнын өсүшүнө таасир этүүнүн күтүлүүчү тобокелдиктери;

2) 5 жылдык мезгилдеги негизги макрокөрсөткүчтөр (өткөн жылдын фактысы, учурдагы мезгил жана 3 болжолдуу жыл):

3) ИДПнын номиналдык деңгээли;

4) инфляциянын деңгээли;

5) реалдуу ИДПнын өсүшү;

6) пландалган жылдарга ИДПны өндүрүүнүн түзүмүн талдоо.

67. Бөлүм бюджеттин чыгашаларына жана кирешелерине макроэкономикалык болжолдордун (сезимталдыкты талдоо) таасири жөнүндө маалыматты камтыйт.

68. "Бюджеттин киреше бөлүгү" бөлүмү төмөнкү бөлүктөрдөн турат:

1) пландалган бюджеттик жылга жана кийинки эки жылга (мамлекеттик жана республикалык бюджеттерге) мурдагы эки жыл үчүн киреше бөлүгүнүн негизги көрсөткүчтөрү;

2) бюджеттин ресурстук бөлүгү;

3) болжолдуу көрсөткүчтөрдү аткарбоо тобокелдиктери.

69. Пландык мезгилге ар бир параметр тиешелүү номиналдык ИДПга карата катышты, ошондой эле мурунку мезгилге карата көрсөткүчтөрдүн өсүшүн же азайышын чагылдырат жана болжолдонгон бюджеттик жылда аткаруу бийлигинин саясатынын республикалык бюджеттин ресурстарына тийгизген таасиринин даражасын баалоо боюнча маалыматты, ар бир салыктык жеңилдиктерге, болжолдонгон бенефициарларга карата саясаттын максаттарын баяндоо жана негиздөө жана алынбай калган кирешени баалоо менен жаңы салыктык преференцияларды берүүнүн натыйжасында алынбай калган кирешелер жөнүндө маалыматтарды камтыйт.

70. Бюджеттин киреше бөлүгү боюнча маалымат төмөнкүлөрдү чагылдырат:

1) республикалык бюджеттин ресурстарынын толук көлөмү, анын ичинде салыктык, салыктык эмес кирешелер жана алынган расмий трансферттер, ошондой эле өткөн жыл үчүн (иш жүзүндөгү маалыматтар), учурдагы жыл үчүн (такталган маалыматтар) жана пландалган үч жылдык мезгилге, өткөн жана пландалган мезгил үчүн жылдар боюнча кыскача талдоо;

2) республикалык бюджеттин учурдагы жылдагы жана болжолдонгон мезгилдеги түшүүлөрүнүн айрым булактарын (бир жолку түшүүлөрүн) баалоо;

3) пландалган бюджеттик жылда болжолдуу көрсөткүчтөрдү аткарбоо тобокелдиктери.

71. "Бюджеттин чыгаша бөлүгү" бөлүмү функциялык классификация боюнча чыгашаларды бөлүштүрүү принциби боюнча бөлүнгөн. Ыйгарым укуктуу мамлекеттик орган функциялык классификация боюнча тейлеген БКБТ боюнча жыйынтыктоочу түшүндүрмө каттарды түзөт.

72. Пландык мезгилге ар бир параметр көрсөткүчтөрдүн тиешелүү номиналдык ИДПга карата катышын, ошондой эле мурунку мезгилге салыштырмалуу өсүштү же төмөндөшүн чагылдырат.

73. Чыгаша бөлүк боюнча маалымат төмөнкүлөрдү камтыйт:

1) аткаруу бийлигинин саясатынын таасир этүү даражасын баалоо менен функциялык классификация боюнча өткөн жыл үчүн (иш жүзүндөгү маалыматтар), учурдагы жыл үчүн (бекитилген/такталган маалыматтар) жана жыл боюнча пландалган үч жылдык мезгилге (мындан ары - 5 жылдык мезгил) республикалык бюджеттин чыгашаларынын көлөмү;

2) Кыргыз Республикасынын мамлекеттик карызын тейлөөгө багытталган чыгашалар жөнүндө маалыматтар (тышкы жана ички карыз боюнча түзүмдүк көрсөткүчтөр боюнча 5 жылдык мезгил үчүн чыгашалардын динамикасын көрсөтүү менен);

3) мамлекеттик ишканалардын (анын ичинде энергетика секторунун) республикалык бюджетке карыздары жөнүндө маалыматтар, таза пайдадан чегерүүлөрдүн 50%ы жана бюджеттик кредиттер боюнча мамлекеттик ишканалардын болгон карыздары боюнча маалыматтар;

4) 5 жылдык мезгил үчүн жергиликтүү бюджеттердин кирешелеринин/чыгашаларынын көлөмү, теңдөөчү трансферттердин көлөмү жөнүндө маалымат жана жергиликтүү бюджеттердин түшпөй калган кирешелери жана аларды компенсациялоо жөнүндө маалыматтар;

5) жалпы мамлекеттик чыгашалар боюнча чыгашалардын көлөмү: пландалган мезгилге мамлекеттик программалар, иш-чаралар жана төлөмдөр;

6) 5 жылдык мезгилдин аналитикасы менен бюджеттик инвестициялардын көлөмү: гранттарга жана мамлекеттик инвестицияларга дем берүүчү капиталдык салымдар.

74. "Жалпы мамлекеттик программалар, иш-чаралар жана төлөмдөр" бөлүмүндө экономикадагы жаңы багыттардын алдыдагы бюджеттик жылга жана пландык мезгилге республикалык бюджеттин чыгаша бөлүгүнө тийгизген таасирин баалоо боюнча маалымат кыскача түшүндүрмө баяндоо жана болжолдонгон бюджеттик жылда республикалык бюджеттин чыгашаларына аткаруу бийлигинин багыттарынын таасир этүү даражасын баалоо менен чагылдырылат.

75. "Бюджеттин тартыштыгы" бөлүмү тиешелүү пландалган мезгилге карата көрсөткүчтөн, ошондой эле тышкы жана ички каржылоого бөлүү менен бюджеттин тартыштыгын каржылоо булактарынан турат. Көрсөткүч тиешелүү номиналдык ИДПга карата катышты, ошондой эле мурунку мезгилге салыштырмалуу өсүштү же төмөндөөнү чагылдырышы керек.

76. "Бюджетти аткаруу тобокелдиктери" бөлүмү республикалык бюджеттин ар бир түзүүчү бөлүгү боюнча бюджетти аткаруунун тиешелүү мезгилинде бардык күтүлүүчү тобокелдиктерди чагылдырат (өнүктүрүүнүн макроэкономикалык перспективалары, бюджеттин киреше жана чыгаша бөлүгү). Ар бир бөлүм боюнча тобокелдиктердин сыпаттамасы аныкталган тобокелдиктер үчүн негиз катары кыскача талдоону камтууга тийиш.

77. "Программалык бюджеттөө" бөлүмү Кыргыз Республикасын өнүктүрүү программаларынын/стратегияларынын алкагында программалык бюджеттөөнү киргизүү процессин чагылдырат жана алдыдагы мезгилдерге пландалган чаралар жөнүндө маалыматтарды камтыйт.

78. Мыйзамдын долбооруна түшүндүрмө катты түзүү үчүн көрсөткүчтөрдүн тизмеси ушул Тартиптин 9-тиркемесине ылайык форма боюнча түзүлөт.

11-глава. Жыйынды бюджеттик жазууну түзүү жана бекитүү

79. Жыйынды бюджеттик жазуу ыйгарым укуктуу мамлекеттик орган тарабынан кезектеги бюджеттик жылга жана пландык мезгилге бекитилген республикалык бюджеттин негизинде түзүлөт.

80. Жыйынды бюджеттик жазуу атайын эсептердеги каражаттарды жана мамлекеттик тышкы инвестицияларды эсепке албастан кирешелердин, чыгашалардын экономикалык классификациясы жана активдер жана милдеттенмелер менен операциялардын классификациясы боюнча бюджеттин киреше жана чыгаша бөлүктөрүнүн көрсөткүчтөрүн квартал боюнча бөлүштүрүүнү камтыйт.

81. Жыйынды бюджеттик жазуунун киреше бөлүгүн квартал сайын бөлүштүрүү Кыргыз Республикасынын бюджеттик мыйзамдарына ылайык өткөн жылдар үчүн иш жүзүндөгү түшүүлөрдүн динамикасынын, ошондой эле бюджеттик ресурстарды тескөөчүлөрдүн болжолунун негизинде жүргүзүлөт.

82. Кирешелер боюнча жыйынды бюджетти жазуу = кирешелер + активдер жана милдеттенмелер + Кыргыз Республикасынын Министрлер Кабинетинин эсептериндеги жыл башындагы калдыктар.

83. Кирешелерге салыктык кирешелер, салыктык эмес кирешелер (атайын эсептердеги каражаттарды эсепке албастан) жана расмий трансферттер (мамлекеттик чет өлкөлүк инвестициялар боюнча гранттарды эсепке албастан) кирет.

84. Активдер жана милдеттенмелер финансылык эмес активдерди (мамлекеттик тышкы инвестицияларды эсепке албастан), финансылык активдерди жана милдеттенмелерди (мамлекеттик тышкы инвестицияларды эсепке албастан) камтыйт.

85. Кирешелерди квартал сайын бөлүштүрүүдө жылдык бюджет боюнча пландалган чыгашаларды жабууга бөлүнгөн бюджеттик каражаттардын жыл башындагы бош калдыктары Кыргыз Республикасынын Министрлер Кабинетинин эсептериндеги калдыктар түрүндө жылдын башында берилет.

86. Эгерде бюджеттин кирешелерин жана чыгашаларын квартал сайын бөлүштүрүүнү балансташтырууда жеке кварталдар боюнча кирешелер чыгашалардан ашып кетсе, кийинки кварталдын чыгашаларын жабуу үчүн ушул кварталдын бюджеттик каражаттарынын калдыктары (кирешелердин чыгашалардан ашуусу) пайдаланылышы керек.

86¹. Жыйынды бюджеттик жазуунун кирешелери жана чыгашалары боюнча пландалган көрсөткүчтөрүнө жараша кварталдын бюджеттик каражаттарынын калдыктары ("жалпы кирешелер, активдер жана милдеттенмелер" менен "жалпы чыгашалар, активдер жана милдеттенмелер" ортосундагы айырма) "оң" же "терс" мааниге ээ болушу мүмкүн.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

87. Чыгаша бөлүк боюнча жыйынды бюджеттик жазуу өзүнө бюджеттик эсептердеги каражаттар боюнча чыгашаларды, мамлекеттик чет өлкөлүк инвестицияларды кошо каржылоону, мамлекеттик карызды тейлөөнү (пайыздарды жана негизги сумманы) камтыйт.

88. Жыйынды бюджеттик жазуунун чыгаша бөлүгүн квартал боюнча бөлүштүрүү алардын спецификасын жана артыкчылыгын (билим берүү мекемелеринин кызматкерлеринин жайкы мезгилде өргүүлөрү, күзгү-кышкы мезгилге даярдык, жазгы талаа иштери, өзгөчө кырдаалдар, жалпы мамлекеттик иш-чаралар ж.б.) эске алуу менен жүргүзүлөт.

89. Жыйынды бюджеттик жазуунун чыгаша бөлүгүн квартал боюнча бөлүштүрүү анын киреше бөлүгүнө жана өткөн мезгилдер үчүн иш жүзүндөгү чыгашалардын динамикасын талдоого көз каранды.

90. Жыйынды бюджеттик жазууда ушул Тартиптин 10-тиркемесине ылайык форма боюнча жылга карата ар бир кварталдын пайыздык катышында абсолюттук суммада бюджеттик ассигнованиелердин жылдык пландык көлөмдөрү чагылдырылат.

91. Жыйынды бюджеттик жазуунун кирешелеринин жана чыгашаларынын жыйынтык маалыматтары атайын эсептердеги каражаттарды жана мамлекеттик тышкы инвестицияларды эсепке албастан бекитилген жылдык бюджетте кабыл алынган суммаларга шайкеш келүүгө тийиш.

92. Жыйынды бюджеттик жазуу ыйгарым укуктуу мамлекеттик органдын жетекчиси тарабынан бекитилет.

92¹. Ыйгарым укуктуу мамлекеттик орган республикалык бюджет жөнүндө мыйзамга өзгөртүүлөрдү киргизүү тууралуу мыйзам кабыл алынгандан кийин жыйынды бюджеттик жазууга өзгөртүүлөрдү киргизет. Жыйынды бюджеттик жазууга өзгөртүүлөрдү киргизүүдө 1-4-кварталдардын көрсөткүчтөрүн тактоого жол берилет, бул ушул кварталдарда республикалык бюджеттин кошумча булактарынын жана республикалык бюджеттин чыгашаларын кайра бөлүштүрүүнүн эсебинен кошумча чыгашаларды бөлүүнү караштырган Кыргыз Республикасынын Министрлер Кабинетинин чечимдери кабыл алынгандыгына байланыштуу.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

12-глава. Кезектеги бюджеттик жылга жана пландык мезгилге республикалык бюджет жөнүндө мыйзамга өзгөртүүлөрдү киргизүү

93. Кыргыз Республикасынын Министрлер Кабинети, эгерде республикалык бюджет жөнүндө мыйзам менен бекитилген бюджеттик параметрлердин өзгөрүүсүнө алып келбесе, төмөнкүлөрдү киргизүүгө укуктуу:

1) эгерде бюджеттин киреше бөлүгүн азайтууга алып келбесе, республикалык бюджет жөнүндө мыйзамдын тиркемесине каралган суммалардын чегинде өзгөртүүлөрдү киргизүүгө;

2) тиешелүү органдар кабыл алган ченемдик укуктук актыларга, ошондой эле түзүмдүк өзгөртүүлөргө, өндүрүштүн (жумуштардын, кызмат көрсөтүүлөрдүн) көлөмдөрүнүн өзгөрүүлөрүнө, баалардын деңгээлдерине ылайык жергиликтүү өз алдынча башкаруу органдарынын бюджеттери менен республикалык бюджеттин өз ара эсептөөлөрүнө тактоолорду киргизүүгө.

94. Кыргыз Республикасынын Министрлер Кабинети өзгөртүүлөр киргизилгенге чейин республикалык бюджет жөнүндө мыйзам менен бекитилген бюджеттик параметрлерди өзгөртүү зарыл болгон учурда Кыргыз Республикасынын Министрлер Кабинетинин тескемелерине жана ченемдик укуктук актыларына ылайык, Кыргыз Республикасынын Жогорку Кеңешинин профилдик комитети менен макулдашуу боюнча аткаруу үчүн зарыл болгон иш-чараларды кошумча каржылоону жүзөгө ашырууга укуктуу.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

95. Республикалык бюджет жөнүндө мыйзамга Кыргыз Республикасынын Бюджеттик кодексинин 115-беренесинде белгиленген учурларда жана мезгилдүүлүк менен өзгөртүүлөр киргизилет.

96. Республикалык бюджетке өзгөртүүлөрдү киргизүү бюджеттин аткарылышын талдоонун жана бюджеттик ассигнованиелерди пайдалануунун натыйжалуулугун баалоонун, бюджеттик программаларды ишке ашыруунун жыйынтыктарынын негизинде жүзөгө ашырылат.

97. Республикалык бюджет жөнүндө мыйзамга өзгөртүүлөрдү киргизүү жөнүндө мыйзамдын долбоору ыйгарым укуктуу мамлекеттик орган тарабынан, анын ичинде автоматташтырылган системада түзүлөт.

98. Өзгөртүүлөр жана толуктоолор кийинки пландык мезгилге республикалык бюджеттин параметрлерин өзгөртүүсүз учурдагы жылдын республикалык бюджетинин параметрлерине киргизилет.

98¹. Бюджеттик программалардын натыйжалуулугуна мониторинг жүргүзүү жана баалоо максатында кийинки пландык мезгилге программалык негизде республикалык бюджеттин параметрлерине өзгөртүүлөр жана толуктоолор киргизилиши мүмкүн.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

13-глава. Бюджетти аткаруу процессинде бюджеттик каражаттарды кайра бөлүштүрүү жана кайра бөлүштүрүүнүн натыйжалары жөнүндө отчет

99. Бюджеттик каражаттарды кайра бөлүштүрүү жана кайра бөлүштүрүүнүн натыйжалары жөнүндө БКБТнын отчету автоматташтырылган системада ЭСКны пайдалануу менен ушул Тартиптин 11-14-тиркемелерине ылайык формалар боюнча бюджетке өзгөртүүлөрдү киргизүүгө маалымкат-билдирүү түрүндө бюджеттик каражаттарды кайра бөлүштүрүү жүргүзүлгөн күнү ыйгарым укуктуу мамлекеттик органга берилет.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

14-глава. Бюджетти кошумча каржылоо

100. Республикалык бюджеттин кошумча чыгашалары (мындан ары - кошумча чыгашалар) республикалык бюджеттин кошумча булактарынын жана республикалык бюджеттин чыгашаларын кайра бөлүштүрүүнүн эсебинен каржыланат.

101. Республикалык бюджеттин кошумча булактары болуп төмөнкүлөр саналат:

1) өткөн бюджеттик жылда кирешелер планын ашыкча аткаруунун же чыгашалар боюнча үнөмдөөнүн натыйжасында бюджеттик жылдын башында пайда болгон бюджеттик каражаттардын эркин калдыктары;

2) республикалык бюджет жөнүндө мыйзамда мурда каралбаган республикалык бюджеттин ресурстук бөлүгүнө кошумча түшүүлөр;

3) Кыргыз Республикасынын Министрлер Кабинетинин чечимдерине жана республикалык бюджет жөнүндө мыйзамда мурда каралган конкреттүү чыгашаларды каржылоого ченемдик укуктук актыларга ылайык багытталган кошумча түшүүлөр болгон учурда республикалык бюджет жөнүндө мыйзамда каралган республикалык бюджеттин бошогон ресурстары.

102. Республикалык бюджеттин кошумча булактары финансылык ажырымды жабууга багытталышы мүмкүн.

103. Кошумча чыгашаларды каржылоого республикалык бюджеттин чыгашаларын кайра бөлүштүрүү төмөнкүлөрдүн эсебинен жүзөгө ашырылат:

1) чыгашалардын башка категорияларын, анын ичинде "Жалпы мамлекеттик программалар, иш-чаралар жана төлөмдөр" бөлүмүндө каралган каражаттарды кайра бөлүштүрүүнүн жана оптималдаштыруунун;

2) республикалык бюджеттин чыгашалары боюнча аткарууну талдоонун негизинде белгиленген үнөмдөөлөрдүн;

3) тиешелүү жылга республикалык бюджеттин аткарылышынын жыйынтыктары жөнүндө Кыргыз Республикасынын Эсептөө палатасынын аудитинин жыйынтыгы боюнча бюджеттик мекемелерди каржылоодо жылдык отчеттор боюнча эсептөөлөрдө товардык-материалдык баалуулуктардын ченемден ашыкча запастарын жана каражаттардын калдыктарын эсепке алууга байланыштуу чыгашалар боюнча үнөмдөөлөрдүн.

104. БКБТ/БКТ экономикалык классификация боюнча кошумча чыгашаларга, анын ичинде эмгек акы төлөө фондунун өлчөмдөрүн көбөйтүүгө тиешелүү эсептөөлөрдү ыйгарым укуктуу мамлекеттик органга берет.

105. Кошумча чыгашалар Кыргыз Республикасынын Министрлер Кабинетинин ченемдик укуктук актыларына жана тескемелерине ылайык бюджетке өзгөртүүлөрдү киргизүүгө маалымкат-билдирүү түрүндө автоматташтырылган системада ЭСКны пайдалануу менен бөлүштүрүлөт.

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)

106. Ыйгарым укуктуу мамлекеттик орган республикалык бюджет жөнүндө мыйзамга өзгөртүүлөр киргизилгенге чейин кошумча чыгашаларды каржылоо максатында учурдагы жылга республикалык бюджеттин чыгашаларынын кошумча реестрин (мындан ары - кошумча реестр) даярдайт.

15-глава. Бюджеттик процесстин катышуучуларынын жоопкерчилиги

108. БКБТ/БКТ/БКАнын жетекчилери бюджеттик эсептердеги каражаттардын жана атайын эсептердеги каражаттардын сапаттуу пландалышы жана максаттуу пайдаланылышы үчүн жоопкерчилик тартышат.

109. Бюджеттик процесстин катышуучуларынын бюджеттик мыйзамдарды бузгандыгы үчүн жоопкерчилик принциби Кыргыз Республикасынын бюджеттик мыйзамдарында каралган.

110. Мамлекеттик органдардын финансылык тартипти сактоосун контролдоо жана мониторинг жүргүзүү Кыргыз Республикасынын бюджеттик мыйзамдарында жана башка ченемдик укуктук актыларда каралган.

Бюджеттик каражаттар боюнча чыгашалардын сметасы №

__________________________________________________________________________ (бюджеттик каражаттарды башкы тескөөчүнүн аталышы)

(миң сом)

Бюджеттик каражаттар боюнча чыгашалардын сметасы №

____________________________________________________________________ (бюджеттик каражаттарды башкы тескөөчүнүн аталышы)

____________________________________________________________________ (бюджеттик каражаттарды алуучунун аталышы)

(миң сом)

Атайын эсептердеги каражаттарды эсепке алуу боюнча кирешелер жана чыгашалар сметасы №

_______________________________________________________________________________ (бюджеттик каражаттарды башкы тескөөчүнүн аталышы)

(миң сом)

Атанын эсептердеги каражаттарды эсепке алуу боюнча кирешелердин жана чыгашалардын сметасы №

________________________________________________________________________________ (бюджеттик каражаттарды башкы тескөөчүнүн аталышы)

________________________________________________________________________________ (бюджеттик каражаттарды алуучунун аталышы)

(миң сом)

Форма

Республикалык жана жергиликтүү бюджеттерден каржылануучу мекемелердин ТАРМАГЫ, ШТАТТАРЫ ЖАНА КОНТИНГЕНТТЕРИ

Форма

Республикалык жана жергиликтүү бюджеттерден каржылануучу Кыргыз Республикасынын Саламаттык сактоо министрлигинин жана ММКФ мекемелеринин ТАРМАГЫ, ШТАТТАРЫ ЖАНА КОНТИНГЕНТТЕРИ

(Кыргыз Республикасынын Министрлер Кабинетинин 2023-жылдын 19-декабрындагы № 680 токтомунун редакциясына ылайык)