КЫРГЫЗ РЕСПУБЛИКАСЫНЫН ИЧКИ ИШТЕР МИНИСТРЛИГИНИН БУЙРУГУ

2020-жылдын 28-апрели № 306

"Тез от алуучу, катуу таасир этүүчү, уулуу, радиоактивдүү заттарды жана материалдарды коштоо" мамлекеттик кызмат көрсөтүү боюнча Кыргыз Республикасынын ИИМдин административдик регламентти бекитүү жөнүндө

Кыргыз Республикасынын Өкмөтүнүн 2018-жылдын 16-январындагы "Мамлекеттик жана муниципалдык кызмат көрсөтүүлөрдүн административдик регламенттерин иштеп чыгуу жана оптималдаштыруу тартиби жөнүндө" № 26 токтомунун 2-пунктун, Кыргыз Республикасынын Өкмөтүнүн 2014-жылдын 15-сентябрындагы № 530 токтому менен бекитилген Мамлекеттик органдарга жана жергиликтүү өз алдынча башкаруунун аткаруучу органдарына өткөрүп берилүүчү Кыргыз Республикасынын Өкмөтүнүн айрым ченем жаратуучу ыйгарым укуктарынын тизмесинин 2-1-пунктун аткарууда жана мамлекеттик кызмат көрсөтүү стандарттарын кайра бекитилгендигине байланыштуу "Тез от алуучу, катуу таасир этүүчү, уулуу, радиоактивдүү заттарды жана материалдарды коштоо" мамлекеттик кызмат көрсөтүү боюнча административдик регламенттин жол-жоболорун ылайык келтирүү зарылчылыгына карата, буйрук кылам:

1. Тиркемеге ылайык "Тез от алуучу, катуу таасир этүүчү, уулуу, радиоактивдүү заттарды жана материалдарды коштоо" мамлекеттик кызматынын Административдик регламенти бекитилсин жана колдонууга берилсин.

2. Кыргыз Республикасынын ИИМдин Жол кыймылынын коопсуздугун камсыздоо боюнча башкы башкармалыгы ушул буйруктун Кыргыз Республикасынын Өкмөтүнүн веб-сайтына мамлекеттик жана расмий тилде расмий жарыяланышын камсыз кылсын.

3. Бул буйруктун көчүрмөсү мамлекеттик жана расмий тилде, кагаз жүзүндө жана электрондук түрдө аталган ченемдик укуктук актыны жарыялоо булактарын көрсөтүү менен Укуктук ченемдик актылардын мамлекеттик реестрине киргизүү үчүн Кыргыз Республикасынын Юстиция министрлигине жиберилсин.

4. Бул буйруктун көчүрмөсү мамлекеттик жана расмий тилде, күчүнө кирген күндөн тартып үч иш күнүнүн ичинде Кыргыз Республикасынын Өкмөтүнүн Аппаратына жиберилсин.

5. Кыргыз Республикасынын ИИМдин 2018-жылдын 18-апрелиндеги "КР ИИМдин Жол кыймылынын коопсуздугун камсыздоо боюнча башкы башкармалыгынын мамлекеттик кызмат көрсөтүүлөрүнүн администрациялык регламентин бекитүү жөнүндө" № 410 буйругу күчүн жоготту деп табылсын.

6. Бул буйруктун аткарылышына жоопкерчилик Кыргыз Республикасынын ИИМдин Жол кыймылынын коопсуздугун камсыздоо боюнча башкы башкармалыгынын башчысы милициянын подполковниги А.Б. Исраиловго жүктөлсүн.

7. Бул буйруктун аткарылышын көзөмөлдөө Кыргыз Республикасынын ички иштер министринин орун басары милициянын полковниги М.Д. Каниметовго жүктөлсүн.

8. Ушул буйрук расмий жарыялангандан 7 күн өткөндөн кийин күчүнө кирет.