МыйзамКүчүндө

КР 2009-жылдын 15-июлундагы № 219 «Кыргыз Республикасынын Социалдык фонду жөнүндө» Кыргыз Республикасынын Мыйзамына толуктоолор жана өзгөртүүлөр киргизүү тууралу" Мыйзамы

Редакция15.07.2009 редакциясы
Жүктөө .docx
Бул документ орус тилинде да барОрусча
Кыргыз Республикасынын Мамлекеттик герби

КЫРГЫЗ РЕСПУБЛИКАСЫНЫН МЫЙЗАМЫ

2009-жылдын 15-июлу № 219

"Кыргыз Республикасынын Социалдык фонду жөнүндө" Кыргыз Республикасынын Мыйзамына толуктоолор жана өзгөртүүлөр киргизүү тууралу

1-статья.

"Кыргыз Республикасынын Социалдык фонду жөнүндө" Кыргыз Республикасынын Мыйзамына (Кыргыз Республикасынын Жогорку Кеңешинин Жарчысы, 2004-ж., № 11, 510-ст.) төмөндөгүдөй толуктоолор жана өзгөртүүлөр киргизилсин:

 

1. 2-статьянын 2-бөлүгүндө:

үчүнчү абзацы "Пенсиялык фондго," деген сөздөрдөн кийин "Мамлекеттик топтоочу пенсиялык фондго," деген сөздөр менен толукталсын;

алтынчы абзацы "Пенсиялык фонддун," деген сөздөрдөн кийин "Мамлекеттик топтоочу пенсиялык фонддун," деген сөздөр менен толукталсын;

тогузунчу абзацы "пенсия менен камсыз кылуу" деген сөздөрдөн мурда "анын топтоо бөлүгүн камтыган" деген сөздөр менен толукталсын;

бөлүк төмөндөгүдөй мазмундагы онунчу жана он биринчи абзацтар менен толукталсын:

"- Мамлекеттик топтоочу пенсиялык фондду түзүү жана башкаруу;

- пенсиялык топтоолордун каражаттарын Кыргыз Республикасынын мыйзамдарында белгиленген максаттарда гана пайдалануу;";

он экинчи абзац төмөндөгүдөй редакцияда баяндалсын:

"- пенсиялык топтоолорду инвестициялоо жана жарандарды пенсия менен камсыз кылуу маселелери боюнча топтоочу пенсиялык системанын катышуучулары менен эриш-аркак иштөөнү;";

онунчу-он үчүнчү абзацтар тиешелүүлүгүнө жараша он экинчи-он бешинчи абзацтар деп эсептелсин.

 

2. 3-статьясында:

 

1-бөлүгүндө:

- он экинчи абзацындагы "Кыргыз Республикасынын мамлекеттик баалуу кагаздары" деген сөздөр "жана Кыргыз Республикасынын мыйзамдары менен белгиленген башка баалуу кагаздары" деген сөздөргө алмаштырылсын;

- бөлүк төмөндөгүдөй мазмундагы жыйырманчы жана жыйырма биринчи абзацтар менен толукталсын:

"- Кыргыз Республикасынын Өкмөтү тарабынан белгиленген тартипте конкурстун жыйынтыгы боюнча тандалып алынган пенсиялык системанын топтоо бөлүгүнө адистештирилген депозитарий жана компаниялардын башкаруучулары менен келишим түзүүгө;

- адистештирилген депозитарий менен башкаруучу компаниялардын пенсия топтоо каражаттарын түзүү жана инвестирлөө боюнча ишмердигинин финансылык жыйынтыктары жөнүндө алардын отчетторун кароого.";

 

2-бөлүгүндө:

- алтынчы абзацы "мамлекеттик социалдык камсыздандыруу" деген сөздөрдөн кийин "жана пенсиялык системанын топтоо бөлүгү үчүн" деген сөздөр менен толукталсын;

- тогузунчу абзацындагы "жана камсыздандырылган адамдар" деген сөздөр ", камсыздандырылган адамдар жана компаниялардын башкаруучулары" деген сөздөргө алмаштырылсын;

- онунчу абзацы төмөндөгүдөй редакцияда баяндалсын:

"- жылына бир жолу камсыздандырылган адамдарды жеке камсыздандыруу эсептеринен пенсиялык топтоолору жөнүндө маалымат менен камсыз кылууга;";

- бөлүк төмөндөгүдөй мазмундагы он алтынчы-жыйырма биринчи абзацтар менен толукталсын;

"- пенсиялык топтоо каражаттарын ишенимдүү башкаруу келишимдерине ылайык Кыргыз Республикасынын Өкмөтү белгилеген тартипте жана мөөнөттөрдө пенсиялык топтоо каражаттарын башкаруучу компанияларга өткөрүп берүүгө;

- пенсиялык топтоо каражаттарын инвестициялоого байланышкан чыгымдарды төлөөгө;

- пенсиялык топтоо каражаттарын, аларды жайгаштырууну, алынган инвестициялык кирешелерди өзгөчөлөнгөн каттоо жүргүзүүгө;

- Кыргыз Республикасынын мыйзамдарында белгиленген тартипте жана мөөнөттөрдө камсыздандырылган адамдардын пенсиялык топтоо эсептерине пенсиялык топтоо каражаттарын инвестициялоонун жыйынтыктарын чагылдырууга;

- камсыздандырылган адамдын пенсиялык активдерин өзүнүн арызы боюнча мамлекеттик эмес пенсиялык фонддорго жана топтоочу пенсиялык каражаттарды инвестициялоо менен иштеген башка түзүмдөргө которууга;

- камсыздандырылган адамдардын топтоочу камсыздандыруу эсептери боюнча инвестициялык кирешелерин бөлүштүрүүгө жана топтоочу пенсиялык төлөөлөрдү жүргүзүүгө.".

 

3. 4-статьянын 1-бөлүгүндө:

экинчи абзацы "Кыргыз Республикасынын" деген сөздөрдөн мурда "топтоочу бөлүккө түшкөн камсыздандыруу төгүмдөрүнөн башка" деген сөздөр менен толукталсын";

бөлүк төмөндөгүдөй мазмундагы он биринчи абзац менен толукталсын:

"- камсыздандырылган адамдардын пенсиялык активдерин инвестициялоодон алынган инвестициялык кирешелердин".

 

4. 5-статьянын 2-бөлүгү "Пенсиялык фонддун," деген сөздөрдөн кийин "Мамлекеттик топтоочу пенсиялык фонддун," деген сөздөр менен толукталсын.

 

2-берене.

Кыргыз Республикасынын Өкмөтү өзүнүн ченемдик укуктук актыларын ушул Мыйзамга ылайык келтирсин.

 

3-берене.

Ушул Мыйзам расмий жарыяланган күндөн тартып күчүнө кирет.

 

Кыргыз Республикасынын

            Президенти

 

К. Бакиев