ӨЗГӨН ШААРДЫК КЕӉЕШИ

ТОКТОМ

Өзгөн шаардык Кеңешинин (V чакырылышынын) кезектеги ХII сессиясынын отурумунун

2014-жылы 17- марты № 12/1

 «Өзгөн шаарынын 2013-жылдагы бюджетинин аткарылышы жана 2014-жылга шаардын бюджетин бекитүү жөнүндө»

Өзгөн шаардык Кеңешинин (V чакырылышынын) кезектеги ХII сессиясынын отуруму Өзгөн шаарынын 2013-жылдагы бюджетинин аткарылышы жана 2014-жылга шаардын бюджетин бекитүү жөнүндөгү маселелерди угуп жана талкуулап,

Өзгөн шаардык Кеңеши

ТОКТОМ КЫЛАТ:

1.  Өзгөн шаарынын бюджетинин кирешелери жана чыгашалары  2014-жылга 57947,6 миң сом өлчөмүндө бекитилсин.

2.  2014-жылга шаардын бюджетинин кирешелерин түзүүчү булактары жана чыгашалары боюнча багыттар №1 тиркемеге ылайык аныкталсын.

3.  «Кыргыз Республикасындагы бюджеттик укуктун негизги принциптери жөнүндө»гү Кыргыз Республикасынын 1998-жылдын 11-июнундагы № 78 мыйзамынын 2-беренесине ылайык Өзгөн шаарынын бюджетинин кирешелери жана чыгашаларынын божомолу  2015-жылга 56745,0 миң сом, 2016-жылга 58560,0 миң сом өлчөмүндө бекитилсин.

4.  2015-2016-жылдарга шаардын бюджетинин кирешелерин түзүүчү булактары жана чыгашалары боюнча багыттардын божомолу №2 тиркемеге ылайык аныкталсын.

5.  Шаардык бюджеттик мекемелерге, муниципалдык ишканаларга казыналыктын регионалдык бөлүмүнөн тышкары, мекеменин кассасы аркылуу атайын каражаттарын жана башка кирешелерди чыгымдоого тыюу салынсын.

6. Шаардын бюджетине менчигинин түрүнө карабастан салык агенти төлөгөн киреше салыгынан, сатуудан алынуучу салыктан эсептеп өткөрүүлөр 2014-жылга 50 пайыз жергиликтүү бюджетке түшөөрү белгиленсин.

7.  Шаардын бюджетине ыктыярдуу патенттин негизиндеги салык, милдеттүү патенттөө негизиндеги салык, кичи ишканалардан алынуучу бирдиктүү салык, мүлккө салык, юридикалык жана физикалык жактардан алынуучу жер салыгынан эсептеп өткөрүүлөрдүн өлчөмү 100 пайыз жергиликтүү бюджетке түшөөрү белгиленсин.

8.  2014-жылга башкаруу органдарын каржылоого кетүүчү чыгымдар 8524,8 миң сом өлчөмүндө, анын ичинен шаар мэриясынын резервдик фонду 540,0 миң сом өлчөмүндө бекитилсин. Өкмөт тарабынан аныкталуучу типтүү ченемдердин негизинде шаар мэриясынын штаттык сан-эсеби жана түзүмү 3 тиркемеге ылайык бекитилсин.

9.  Шаар мэриясынын, МММБ департаментинин кенже кызматкерлеринин жана техникалык кызматкерлеринин эмгек акысына кошумча жергиликтүү бюджеттин эсебинен 50 пайыз үстөмө төлөнсүн.

10.  2015-жылдын 1-январына карата шаардык бюджет боюнча кассада жүргүзүлүүчү нак акча 30,0 мин сом өлчөмүндө белгиленсин.

11.  2014-жылдын 1-январына карата шаардык бюджетте калган 4152,8 миң сом өлчөмүндөгү калдык акча каражатынын 2325,6 миң сому тиркемеге ылайык 2013-жылда каржыланбай калган иштерге жана калган 1827,2 миң сому долбоорлор менен иштөөгө Өзгөн шаардык Кеңешинин сессиясынын чечиминин негизинде каржылансын.

12.  Кварталдык комитеттердин төрагаларынын эмгек акысын төлөө муниципалдык мүлктү башкаруу департаменти аркылуу жергиликтүү бюджеттин эсебинен жүргүзүлсүн.

13.  Шаар мэриясынын, шаардык кеңештин кызматкерлерине жергиликтүү бюджеттин эсебинен материалдык колдоо көрсөтүү боюнча мыйзамга ылайык сунуш киргизүү жагы каржы бөлүмүнүн башчысы М. Розахуновко милдеттендирилсин.

14.  Өзгөн шаарынын 2013-жылдагы бюджетинин киреше бөлүгү 109552,6 мин сомго, чыгаша бөлүгү 110404,2 мин сомго аткарылгандыгы бекитилсин.

15.  Каражаттардын жетишпестигине байланыштуу 2012-жылдын жыйынтыгы менен 1-январь 2013-жылга калган 2352,4 мин сом калдык жалпы максаттагы мамлекеттик кызмат көрсөтүүлөргө 655,4 миң сом, билим берүү бөлүмүнө 400,0 миң сом,  турак-жай чарбасына 1297,0 миң сом каржыланганы, бюджеттин киреше бөлүгүнүн 2013-жыл ичинде ашыкча аткарылгандыгынын эсебинен 3943,7 миң сом каражаттын жалпы максаттагы мамлекеттик кызмат көрсөтүүлөргө 290,4 миң сом, турак-жай чарбасына 3603,3 миң сом, элди социалдык жактан коргоо башкармасына 50,0 миң каржыланганы эсепке алынсын.

16. Өзгөн шаарынын бюджетинин киреше бөлүгүнүн аткарылышынын 6 айлык жыйынтыгы боюнча Өзгөн шаардык Кеңешинин сессиясында отчет берүү шаардык каржы бөлүмүнө милдеттендирилсин.

17 . Бюджеттин киреше бөлүгүн көбөйтүүдө шаар мэриясы менен биргеликте иш жүргүзүү жагы Өзгөн шаардык Кеңешинин «Бюджет, салык жана муниципалдык менчик боюнча» туруктуу комиссиясына тапшырылсын.

18. Автотранспортту парковкалоо үчүн жыйым эсептик көрсөткүчтүн өлчөмүнүн 3 пайызын түзүп, жергиликтүү бюджетке түшө тургандыгы белгиленсин жана парковкага киргизилген автоунаалардан 10 сомдон жыйым алынсын.

19.  Бул токтомду массалык маалымат каражаттарында жарыялоо жагы шаардык Кеңештин аппаратына милдеттендирилсин.

20.  Бул токтомдун аткарылышын көзөмөлдөө Өзгөн шаардык Кеңешинин «Бюджет, салык жана муниципалдык менчик боюнча» туруктуу комиссиясына тапшырылсын.

2014-жылга Өзгөн шаарынын бюджети

Өзгөн шаарынын бюджетинин 2015-2016 жылдарга божомолу