КЫРГЫЗ РЕСПУБЛИКАСЫНЫН ӨКМӨТҮ

БУЙРУК

2011-жылдын 4-апрели № 96-б

1. Техникалык-экономикалык кызматташуу жөнүндө Кыргыз Республикасынын Өкмөтү менен Кытай Эл Республикасынын Өкмөтүнүн ортосундагы макулдашуунун тиркелген долбоору жактырылсын.

2. Кыргыз Республикасынын биринчи вице-премьер-министри Бабанов Өмүрбек Токтогуловичке жогоруда аталган Макулдашуунун долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен Кыргыз Республикасынын Өкмөтүнүн атынан кол коюуга ыйгарым укук берилсин.

Долбоор

Техникалык-экономикалык кызматташуу жөнүндө Кыргыз Республикасынын Өкмөтү менен

Кытай Эл Республикасынын Өкмөтүнүн ортосундагы

макулдашуу

Кыргыз Республикасынын Өкмөтү менен Кытай Эл Республикасынын Өкмөтү достук мамилелерди жана техникалык-экономикалык кызматташууну мындан ары өнүктүрүү максатында төмөнкүлөр тууралуу макулдашты:

1-берене

Кыргыз Республикасынын Өкмөтүнүн суроо-талабына ылайык Кытай Эл Республикасынын Өкмөтү жалпы суммасы (______) кытай юанын түзгөн кайтарымсыз түрдөгү грант бөлүп берет.

2-берене

Жогоруда аталган кайтарымсыз грант эки өлкөнүн өкмөттөрү тарабынан макулдашылган техникалык-экономикалык долбоорлорду кароого жана иш жүзүнө ашыруу үчүн пайдаланылат. Конкреттүү шарттар эки тараптын кошумча макулдашууну түзүүсү жолу менен аныкталат.

3-берене

Бул Макулдашууну аткаруу үчүн эсептик жол-жоболор боюнча тийиштүү Макулдашууга Кытайдын Мамлекеттик өнүктүрүү банкы менен Кыргыз Республикасынын Өкмөтү тарабынан дайындалган органдын ортосунда кошумча кол коюлат.

4-берене

Бул Макулдашуу кол коюлган күндөн тартып күчүнө кирет жана ушул Макулдашуудан келип чыгуучу бардык милдеттенмелерди эки тараптын өкмөттөрү толугу менен аткарып бүткөн күнгө чейин күчүндө болот.

2011-жылдын «___» - апрелинде Пекин шаарында ар бир тарап үчүн эки түп нускада, ар бири кыргыз, кытай жана орус тилдеринде түзүлдү жана бардык тексттер бирдей күчкө ээ.