КЫРГЫЗ РЕСПУБЛИКАСЫНЫН ӨКМӨТҮ

БУЙРУК

2014-жылдын 2-октябры № 434-б

Кыргыз Республикасы менен Катар Мамлекетинин жаштар саясаты жаатындагы өз ара байланышын жана кызматташуусун кеңейтүү, ошондой эле жаштардын потенциалын, билим деңгээлин жогорулатуу жана эки өлкөнүн өкмөттөрүнүн деңгээлинде жаш муундардын өкүлдөрүнүн ортосунда тажрыйба алмашуу максатында:

Кыргыз Республикасынын Өкмөтү менен Катар Мамлекетинин Өкмөтнүнүн ортосундагы Жаштар саясаты чөйрөсүндөгү кызматташтык жөнүндө меморандумдун тиркелген долбоору жактырылсын.

Кыргыз Республикасынын Эмгек, миграция жана жаштар министрине аталган Меморандумдун долбооруна принциптүү эмес мүнөздөгү өзгөртүүлөрдү жана толуктоолорду киргизүү укугу менен Кыргыз Республикасынын Өкмөтнүнүн атынан кол коюуга ыйгарым укук берилсин.

Долбоор

Кыргыз Республикасынын Өкмөтү менен

Катар Мамлекетинин Өкмөтүнүн ортосундагы Жаштар саясаты чөйрөсүндөгү

кызматташтык жөнүндө меморандум

Мындан ары "Тараптар" деп аталуучу Кыргыз Республикасынын Өкмөтүнүн атынан Кыргыз Республикасынын Эмгек, миграция жана жаштар министрлиги жана Катар Мамлекетинин Өкмөтүнүнүн атынан Катар Мамлекетинин Жаштар жана спорт министрлиги эки өлкөнүн ортосундагы эки тараптуу достук мамилелерди өнүктүрүү жана илгерилетүү, жаштар саясаты чөйрөсүндөгү кызматташтыкты күчөтүү максатында, эки мамлекетте колдонулган мыйзамдарды жана ченемдерди көңүлгө алып, төмөнкүлөр жөнүндө макулдашты:

1-берене.

Максаттар

1. Жаштар саясаты чөйрөсүндө эксперттердин, адистердин жана жаштар уюмдарынын ортосунда тажрыйба алмашууну илгерилетүү.

2. Жаштардын дене-тарбиялык жана экономикалык жигердүүлүгү менен байланышкан, ошондой эле өз ара кызыкчылыктарды жараткан башка жааттарда маалыматтарды жана көз караштарды алмашуу.

3. Тараптардын мамлекеттеринде жүргүзулүүчү жаштар саясатынын маселелерине тийиштүү болгон жолугушууларга, конференцияларга, лекцияларга, семинарларга жана академиялык форумдарга катышуу үчүн чакырууларды алмашуу.

4. Жаштар уюмдарын, борборлорду жана окуу жайларын тартуу менен жаштар арасындагы спорттук мелдештерди жана маданий иш-чараларды өткөрүү боюнча сунуштарды алмашуу.

5. Эл аралык деңгээлде жаштардын көйгөйлөрү боюнча биргелешкен позицияларды иштеп чыгуу жана координациялоо.

2-берене.

Кызматташуу чөйрөлөрү

Тараптар төмөнкүлөрдү кошкондо, жаштар саясатын өнүктүрүү жана жаштар менен иш алып баруу жаатында кызматташат:

-Тараптардын мамлекеттеринин ортосунда жаштардын кызматташууларына түрткү берүүчү жаштардын маселелерине тийиштүү болгон маалыматтарды жана пландарды, жаштар чөйрөсүндөгү изилдөөлөрдүн жыйынтыктарын алмашуу;

-кызматташууну өнүктүрүү үчүн Тараптардын мамлекеттериндеги жаштар уюмдары жөнүндө маалыматтарды алмашуу;

-Тараптардын мамлекеттеринде өткөрүлүүчү жаштардын эл аралык иш-чараларына чакырууларды алмашуу;

-жаштарды визиттер менен жиберишүү, Тараптардын мамлекеттеринин жаштар саясаты чөйрөсүндөгү мамлекеттик кызматкерлерди жана эксперттерди визиттер менен жиберишүү;

-Тараптардын мамлекеттеринин ортосунда достукту чыңдоонун алкагында жаштардын кыймылына жана аны өнүктүрүүгө тиешелүү болгон бардык чөйрөлөрдө кызматташуу;

-жаштарды ишке орноштуруу менен байланышкан маселелерде маалымат алмашуу жана кызматташуу;

-жаштарга тиешелүү болгон кызматташуунун башка чөйрөлөрү.

3-берене.

Иш сапарлар

Жаштар саясаты чөйрөсүндө кызматташууларды өнүктүрүү үчүн расмий делегациялардын иш сапарлары Тараптардын мамлекеттеринин мыйзамдарына ылайык расмий чакыруулардын негизинде уюштурулат.

4-берене.

Биргелешкен комиссия

Тараптар ушул Меморандумдун жоболорун аткаруу, бул Меморандумдун алкагында биргелешкен иштерди уюштуруу, координациялоо жана жаштар саясаты жаатындагы кызматташууну жакшыртууга багытталган сунуштарды иштеп чыгуу үчүн биргелешкен комиссия түзүшөт.

Биргелешкен комиссиянын курамын, функцияларын жана мүчөлөрүнүн ыйгарым укуктарын Тараптар аныктайт жана дипломатиялык каналдар боюнча жиберилет. Биргелешкен комиссия Тараптардын мамлекеттеринин биринин аймагында кезек-кезеги менен жылына бир жолу чогулат. Биргелешкен комиссиянын жыйынын убактысы жана боло турган жери Тараптардын дипломатиялык каналдары боюнча аныкталат.

5-берене.

Финансылык чыгымдар

1. Тараптар өз делегацияларынын баруусу, ошондой эле тамактануусу жана жашап туруусу менен байланышкан чыгымдарды эгерде Тараптардын ортосунда башкача суйлөшүлбөсө, эл аралык кызматташууну өнүктүрүүгө каралган өздөрүнүн бюджеттик каражаттарынын алкагында өз алдынча көтөрүшөт.

2. Бул Меморандумда каралган иш-чараларга катышуу жана аларды каржылоо эгерде, каржылоонун башка шарттары суйлөшүлбөсө, Тараптардын бюджетинин жана мүмкүнчүлүктөрүнүн алкагында жүргүзүлөт.

3. Зарыл болгон учурда жиберүүчү Тарап өлкө ичинде жүрүү үчүн транспорт берүүгө көмөктөшөт, ошондой эле шашылыш кырдаалдарда медициналык жардам көрсөтөт.

6-берене.

Кайчы пикирлерди чечүү

Бул Меморандумду чечмелөөгө жана колдонууга тиешелүү кайчы пикирлер Тараптардын консультацияларды жана суйлөшүүлөрү жүргүзүүсү аркылуу чечилет.

7-берене.

Оңдоолор

Тараптардын өз ара макулдугу боюнча бул Меморандумга өзгөртүүлөр жана толуктоолор киргизилиши мүмкүн, алар ушул Меморандумдун ажырагыс бөлүгү болуп саналган өзунчө протоколдор менен таризделет.

8-берене.

Күчүнө кириши жана колдонуу мөөнөтү

Бул Меморандум ар бир тарап дипломатиялык каналдар аркылуу ушул Меморандум күчүнө кириши үчүн ички мамлекеттик жол-жоболордун аяктагандыгын ырастаган жазуу жүзүндөгү акыркы кабарламаны алган күндөн тартып күчүнө кирет жана 4 жыл колдонулат жана эгерде, Тараптардын бири дагы экинчи Тарапка дипломатиялык каналдар аркылуу ушул Меморандумдун колдонулушун токтотуу ниети жөнүндө алты айдан кечиктирбестен кат жүзүндө кабарлама жибербесе, дароо ушунча мөөнөткө/мөөнөттөргө узартылат.

Мындай токтотуу, эгерде башкача суйлөшүлбөсө, ушул Меморандумдун алкагында ал аяктаганга чейин боло турган бардык иш-чаралардын, программалардын, иш-чаралардын ырааттамасынын жокко чыгарылышына таасирин тийгизбеши керек.

______шаарында 20__ -жылдын "___"_______________________ар бири кыргыз, араб, орус жана англис тилдеринде эки түп нускада түзүлдү. Тексттерди чечмелөөдө кайчы пикирлер келип чыккан учурда, Тараптар англис тилиндеги текстке кайрылышат.