Кыргыз Республикасынын Министрлер Кабинетинин Төрагасынын

2023-жылдын 8-сентябрындагы № 466 тескемесине ылайык

КҮЧҮН ЖОГОТТУ

КЫРГЫЗ РЕСПУБЛИКАСЫНЫН ПРЕМЬЕР-МИНИСТРИ

БУЙРУК

2015-жылдын 24-ноябры № 551

Ош облусунун Кара-Суу, Алай жана Өзгөн райондорунун аймактарында болуп өткөн жер титирөөнүн кесепеттерин жоюу, калкка шашылыш жардам көрсөтүү боюнча иш-чараларды уюштуруунун жана жүргүзүүнүн ыкчам чараларын көрүү максатында:

1. Жер титирөөнүн кесепеттерин жоюу боюнча республикалык штаб тиркемеге ылайык курамда түзүлсүн.

2. Кыргыз Республикасынын биринчи вице-премьер-министри жер титирөөнүн кесепеттерин жоюу, жабыркаган калкка жардам көрсөтүү, материалдык зыянды аныктоо жана авариялык-калыбына келтирүүчү иштерди жүргүзүү боюнча республикалык штабдын ишин уюштурсун.

3. Министрликтердин, административдик ведомстволордун жетекчилерине, Кыргыз Республикасынын Өкмөтүнүн Ош облусундагы ыйгарым укуктуу өкүлүнө, Ош шаарынын мэрине (макулдашуу боюнча), Кара-Суу, Алай жана Өзгөн райондорунун мамлекеттик администрация башчыларына:

- өз күчтөрүн жана каражаттарын тартуу менен жер титирөөнүн кесепеттерин жоюу боюнча иш-чараларды жүргүзүүнү камсыз кылышсын;

- жер титирөөнүн натыйжасында жабыркаган калкка акысыз жардам көрсөтүүнү, анын ичинде эл аралык уюмдар менен аракеттенип уюштурушсун.

4. Ушул буйруктун аткарылышын контролдоо Кыргыз Республикасынын Өкмөтүнүн Аппаратынын тийиштүү бөлүмдөрүнө жүктөлсүн.

Тиркеме

Жер титирөөнүн кесепеттерин жоюу боюнча республикалык штабдын КУРАМЫ

Кыргыз Республикасынын биринчи вице-премьер-министри, республикалык штабдын төрагасы;

Кыргыз Республикасынын Өзгөчө кырдаалдар министри, республикалык штабдын төрагасынын орун басары.

Республикалык штабдын мүчөлөрү:

Кыргыз Республикасынын Финансы министри;

Кыргыз Республикасынын Транспорт жана коммуникациялар министри;

Кыргыз Республикасынын Саламаттык сактоо министри;

Кыргыз Республикасынын Ички иштер министри;

Кыргыз Республикасынын Экономика министри;

Кыргыз Республикасынын Айыл чарба жана мелиорация министри;

Кыргыз Республикасынын Билим берүү жана илим министри;

Кыргыз Республикасынын Эмгек жана социалдык өнүктүрүү министри;

Кыргыз Республикасынын Тышкы иштер министри;

Кыргыз Республикасынын Өкмөтүнө караштуу Мамлекеттик материалдык резервдер фондунун төрагасы;

Кыргыз Республикасынын Социалдык фондунун төрагасы;

Кыргыз Республикасынын Өкмөтүнө караштуу Архитектура, курулуш жана турак жай-коммуналдык чарба мамлекеттик агенттигинин директору;

Кыргыз Республикасынын Өкмөтүнө караштуу Жергиликтүү өз алдынча башкаруу иштери жана этностор аралык мамилелер боюнча мамлекеттик агенттигинин директору;

Кыргыз Республикасынын Өкмөтүнө караштуу Мамлекеттик каттоо кызматынын төрагасы;

Кыргыз Республикасынын Өкмөтүнүн Ош облусундагы ыйгарым укуктуу өкүлү;

Ош шаарынын мэри (макулдашуу боюнча).