Кыргыз Республикасынын Курулуш, архитектура жана турак жай-коммуналдык чарба министрлигине караштуу Шаар куруу жана архитектура департаменти жөнүндө жобо

(КР Министрлер Кабинетинин2026-жылдын 29-июнундагы № 443 токтомунун редакциясына ылайык)

1-глава. Жалпы жоболор

1. Кыргыз Республикасынын Курулуш, архитектура жана турак жай-коммуналдык чарба министрлигине караштуу Шаар куруу жана архитектура департаменти (мындан ары - Департамент) Кыргыз Республикасынын Курулуш, архитектура жана турак жай-коммуналдык чарба министрлигинин (мындан ары - Министрлик) ведомстволук бөлүмү болуп саналып, шаар куруу жана архитектура жаатында өз ишин жүзөгө ашырат.

2. Департамент өз ишинде Кыргыз Республикасынын Конституциясын, Кыргыз Республикасынын мыйзамдарын, Кыргыз Республикасынын Президентинин жарлыктарын жана тескемелерин, Кыргыз Республикасынын Министрлер Кабинетинин токтомдорун жана тескемелерин, Министрликтин буйруктарын, Кыргыз Республикасынын мыйзамдарына ылайык күчүнө кирген эл аралык келишимдерди, ошондой эле ушул Жобону жетекчиликке алат.

3. Департамент мекеменин уюштуруу-укуктук формасында түзүлгөн юридикалык жак болуп саналат, Кыргыз Республикасынын Мамлекеттик гербинин сүрөтү түшүрүлгөн мөөрү, мамлекеттик жана расмий тилдерде аталышы жазылган штамптары жана бланктары, өз алдынча балансы, банкта алыш-бериш эсеби бар, ага бекитилип берилген мүлктү ыкчам башкарууну ишке ашырат, киреше алып келүүчү ишти жүзөгө ашырууга жана аларды Кыргыз Республикасынын мыйзамдарына ылайык тескөөгө укуктуу.

4. Департамент Кыргыз Республикасынын Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттигинин алдындагы Шаар куруу жана архитектура департаментинин укук улантуучусу болуп саналат.

5. Департаменттин юридикалык дареги: 720010, Кыргыз Республикасы, Бишкек шаары, Манас көчөсү, 28.

6. Департаменттин толук расмий аталышы:

- мамлекеттик тилде: "Кыргыз Республикасынын Курулуш, архитектура жана турак жай-коммуналдык чарба министрлигине караштуу Шаар куруу жана архитектура департаменти";

- расмий тилде: "Департамент градостроительства и архитектуры при Министерстве строительства, архитектуры и жилищно-коммунального хозяйства Кыргызской Республики".

7. Департаменттин курамына төмөнкүлөр кирет:

- түзүмдүк бөлүм - Шаар куруу жана архитектура мамлекеттик долбоорлоо институту;

- юридикалык жактын статусуна ээ болгон аймактык башкармалыктар.

2-глава. Департаменттин ишинин максаты

8. Департаменттин ишинин максаты Кыргыз Республикасынын аймагында шаар куруу жана архитектура жаатында бирдиктүү саясатты ишке ашыруу, шаар куруу ишин өнүктүрүү, жер жана жаратылыш ресурстарын сарамжалдуу пайдалануу, ыңгайлуу шаардык чөйрөнү түзүү, инфраструктураны, турак жай жана коомдук зоналарды пландоо, долбоорлоонун жана курулуштун сапатын жогорулатуу, инновациялык жана энергиялык натыйжалуу технологияларды киргизүү, ошондой эле маданий жана тарыхый мурастарды сактоо жана заманбап шаардык чөйрөгө интеграциялоо аркылуу жарандардын жашоосу үчүн жагымдуу чөйрөнү камсыз кылуу болуп саналат.

3-глава. Департаменттин милдеттери

9. Департаменттин милдеттери болуп төмөнкүлөр саналат:

1) Кыргыз Республикасынын аймагында шаар курууну өнүктүрүүнү, көрктөндүрүүнү жана жайлаштыруу камсыз кылуу;

2) архитектуранын жана шаар куруунун келечектүү багыттары боюнча илимий изилдөөлөрдү жүргүзүү, деталдуу пландоонун долбоорлорун, курулуштардын долбоорлорун жана шаарлардын, айылдык калктуу конуштардын жана курорттук-рекреациялык зоналардын аймактарын өнүктүрүүнүн схемаларын иштеп чыгуу;

3) архитектураны, шаар курууну жана курорттук-рекреациялык зоналарды келечектүү өнүктүрүү жаатында топогеодезиялык, инженердик-геологиялык, долбоордук жана илимий-изилдөө иштерин аткаруу;

4) шаарлар, айылдык калктуу конуштар, курорттук-рекреациялык зоналар, комплекстер, ар кандай багыттагы имараттар жана курулмалар үчүн, анын ичинде курорттук дарылоо жайлары, туризм жана эс алуу объекттери, жаңы курулуш, реконструкциялоо, реставрациялоо, ошондой эле турак жай-жарандык, социалдык-маданий, өнөр жай жана айыл чарба багытындагы объекттер үчүн башкы пландардын долбоорлорун жана долбоорлоо-пландоо документтерин иштеп чыгуу;

5) уруксат документтерин иштеп чыгуу, макулдашуу жана берүү, жер участокторунун чектерин аныктоо боюнча иштерди аткаруу, ошондой эле аларды берүү боюнча корутундуларды даярдоо.

4-глава. Департаменттин функциялары

10. Департаментке жүктөлгөн милдеттерди ишке ашыруу максатында Департамент төмөнкү функцияларды ишке ашырат:

1) негизги функциялары:

- Министрликтин жетекчилигинин тапшырмасы боюнча мамлекеттик комитетте, министрликтерде, административдик ведомстволордо, жергиликтүү мамлекеттик администрацияларда жана жергиликтүү өз алдынча башкаруу органдарында Министрликтин атынан чыгуу;

- Департаменттин компетенциясына кирген маселелерди Министрликтин коллегиясынын кароосуна чыгаруу;

- түзүмдүк бөлүмдөрдүн жана аймактык башкармалыктардын иш-чараларынын жылдык пландарын бекитүү жана аткарылышын контролдоо;

- аналитикалык материалдарды, отчетторду, маалымкаттарды, сунуштарды жана Департаменттин ишин камсыз кылуу үчүн зарыл болгон башка документтерди даярдоо, анын ичинде учурдагы кырдаалды, өнүктүрүү болжолдоолорун талдоо, ошондой эле ченемдик-укуктук базаны жана башкаруу процесстерин өркүндөтүү боюнча сунуштарды даярдоо;

- курулуш тармагынын адистерин кесиптик даярдоону, кайра даярдоону жана квалификациясын жогорулатууну уюштуруу;

- курулуш тармагынын адистери үчүн окуу программаларын иштеп чыгуу жана тренингдерди өткөрүү;

2) тармактык саясатты ишке ашыруу функциялары:

- архитектура жана шаар куруу жаатындагы Кыргыз Республикасынын эл аралык кызматташтыгын өнүктүрүүгө катышуу;

- шаар куруу-архитектура иши жаатындагы мамлекеттик программаларды ишке ашырууга катышуу;

- шаар куруу, архитектура, курулуш чөйрөсүндө ченемдик укуктук актылардын долбоорлорун иштеп чыгууга жана шаар куруу-архитектура иши жаатында мамлекеттик саясатты ишке ашырууга катышуу;

- белгиленген тартипте архитектуралык-шаар куруу жана архитектуралык-техникалык кеңештерди, кеңешмелерди, конференцияларды, долбоорлорду жана шаар куруу документтерин иштеп чыгуу боюнча конкурстарды уюштуруу жана өткөрүү;

- сапаттуу комплекстүү курулуштун жана аймакты көрктөндүрүүнүн, өнүктүрүүнүн учурдагы жана келечектүү милдеттерин чечүүгө багытталган шаар куруу-архитектуралык иш-чараларды ишке ашыруу;

- шаар куруу документтеринин ишке ашырылышын, сапаттуу комплекстүү курулушту, турак жай райондорун жана инженердик инфраструктураны көрктөндүрүүнү контролдоону камсыз кылуу;

- административдик даттануулар жана көзөмөл органдарынын сунуштамалары боюнча белгиленген тартипте чечимдерди кароо жана чыгаруу;

- шаар куруу чечимдеринин социалдык-экономикалык натыйжалуулугуна мониторинг жүргүзүү;

- кичи райондорду, турак жай комплекстерин, шаар куруу зоналарын, айрым имараттарды, курулмаларды жана ландшафттык объекттерди тажрыйба-көрсөтмө жана эксперименталдык курууну уюштурууга катышуу;

- уруксат документтерин иштеп чыгуу жана берүү, ошондой эле жоопкерчиликтин биринчи деңгээлиндеги курулуш объекттерине долбоордук жана долбоордук-сметалык документтерди иштеп чыгуу жана макулдашуу;

3) координациялоо функциялары:

- шаар куруу-архитектура ишин координациялоо;

- түзүмдүк бөлүмдөрдүн жана аймактык башкармалыктардын, анын ичинде филиалдардын жана өкүлчүлүктөрдүн ишин координациялоо, алар тарабынан берилген отчетторду кабыл алуу, жалпылоо жана талдоо, жүктөлгөн милдеттерди натыйжалуу аткаруу үчүн алардын ортосунда өз ара аракеттенүүнү камсыз кылуу, ошондой эле алардын ишин жакшыртуу жана ишинин натыйжалуулугун жогорулатуу боюнча чараларды иштеп чыгуу;

4) Шаар куруу жана архитектура мамлекеттик долбоорлоо институтунун функциялары:

- мамлекеттик квалификациялык сертификаттар болгон учурда шаар куруу-архитектура иши жаатында долбоорлоо, изилдөө, илимий-изилдөө жана конструктордук иштерди уюштуруу;

- Департамент тарабынан иштелип чыккан долбоордук документтер боюнча ишке ашырылуучу курулушка жана курууга автордук көзөмөл;

- шаар куруу документтерин, техникалык регламенттердин, стандарттардын жана башка техникалык документтердин долбоорлорун иштеп чыгуу, ошондой эле шаар куруу-архитектура кадастрын түзүү, жүргүзүү жана контролдоо, анын ичинен курорттук-рекреациялык зоналарды өнүктүрүү;

- шаарларды, калктуу конуштарды жана курорттук-рекреациялык зоналарды реконструкциялоонун теориялык аспекттерин иштеп чыгуу;

- башкы пландардын долбоорлорун, калктуу конуштарды деталдуу пландоонун долбоорлорун, курулуштардын жана курорттук-рекреациялык зоналардын долбоорлорун иштеп чыгуу;

- комплекстердин, айрым имараттардын жана курулмалардын, турак үйлөрдүн жана башка ар кандай багыттагы объекттердин долбоорлорун иштеп чыгуу;

- эксперименталдык долбоорлорду иштеп чыгуу;

- топографиялык сүрөткө тартууларды аткаруу жана жер-жерлерде координат чекиттерин жана шаар курууну жөнгө салуу сызыктарын белгилөө;

- шаар куруу документтерин макулдашуу;

- Кыргыз Республикасынын аймагында менчигинин түрүнө карабастан долбоорлоо уюмдарынын шаар куруу документтерин иштеп чыгуу, өзгөртүүлөрдү киргизүү боюнча ишин координациялоо;

- мамлекеттик эмес лицензияланган долбоорлоо уюмдары тарабынан иштелип чыккан шаар куруу документтерин, анын ичинде калктуу конуштардын башкы пландарын, деталдуу пландоолордун долбоорлорун жана курулуштардын долбоорлорун рецензиялоо;

- курулуштук долбоорлоо аркылуу архитектура жана шаар куруу, райондук пландоо жана инженердик курулуш жаатындагы илимдин жана техниканын жетишкендиктерин киргизүү;

- шаар куруу иши жана инженердик изилдөөлөр жаатындагы лицензиянын жоопкерчилик деңгээлин жогорулатуу мүмкүнчүлүгүнө корутундуларды берүү;

5) аймактык башкармалыктардын функциялары:

- шаар куруу кадастрын, нөөмөттүк планды жана жерлерди пайдаланууга мониторинг жүргүзүү, жерге жайгаштыруу схемаларын жана долбоорлорун иштеп чыгуу, жер участокторун трансформациялоого жана максаттуу багытын өзгөртүүгө шаар куруу корутундуларын берүү;

- кыймылсыз мүлк объекттерин долбоорлоого, курууга жана башкача өзгөртүүгө шаар куруу корутундуларын иштеп чыгуу жана бекитүү;

- жер участокторуна укуктарды берүүгө жана чектерин аныктоого шаар куруу корутундуларын, анын ичинде техникалык сунуштамаларды жана кыймылсыз мүлк объекттеринин функционалдык багытын өзгөртүү, жеңилдетилген типтеги объекттерди уюштуруу жана жайгаштыруу мүмкүнчүлүгү жөнүндө корутундуларды даярдоо;

- кыймылсыз мүлк объекттерин реконструкциялоого, кайра профилдөөгө жана кайра пландоого (көлөмдүк-пландоо жана конструкциялык чечимдерди өзгөртүү менен же өзгөртүүсүз) шаар куруу корутундуларын берүү;

- аткаруу жана топографиялык сүрөткө тартууларды аткаруу, имараттардын, курулмалардын, негизги магистралдык инженердик коммуникациялардын окторун жана чектерин, ошондой эле шаар курууну жөнгө салуу сызыктарын жер-жерлерде белгилөө (натурага чыгаруу);

- белгиленген тартипте архитектуралык-шаар куруу жана архитектуралык-техникалык кеңештерди, кеңешмелерди уюштуруу жана өткөрүү;

- долбоорлоо институту жана башка лицензиялоо субъекттери тарабынан иштелип чыккан шаар куруу документтерин райондук пландоо долбоорлоруна жана схемаларына, мурда иштелип чыккан шаар куруу документтерине ылайык келүүсүнө карата макулдашуу;

- көчө-жол тармагынын, шаардык аймактарды көрктөндүрүүнүн жана жашылдандыруунун, чакан архитектуралык формаларды жайгаштыруунун долбоордук документтерин, түстүк чечимдин, фасаддарды архитектуралык-көркөмдүк тариздөөнүн, дизайнерлик иштердин жана тышкы жарнамалык-маалыматтык иштин долбоорлорун жоопкерчилик деңгээлине ылайык иштеп чыгуу, макулдашуу жана бекитүү;

- долбоордук документтерди макулдашуу;

- лицензияга туура келген жоопкерчиликтин уруксат берилген деңгээлинин чегинде объекттердин долбоордук документтерин иштеп чыгуу жана чыгаруу;

- түзүмдүк бөлүмдөрдүн жана аймактык башкармалыктардын иш-чараларынын жылдык пландарын даярдоо жана аткарууну камсыз кылуу;

- Кыргыз Республикасынын мыйзамдарынын алкагында Министрликтин жетекчилигинин тапшырмасы боюнча башка функцияларды аткаруу.

5-глава. Департаменттин укуктары

11. Департамент ага жүктөлгөн милдеттерге ылайык төмөнкүлөргө укуктуу:

1) Кыргыз Республикасынын мамлекеттик комитетинен, министрликтеринен, административдик ведомстволорунан, жергиликтүү мамлекеттик администрацияларынан жана жергиликтүү өз алдынча башкаруу органдарынан, мамлекеттик жана муниципалдык ишканалардан, ошондой эле сот, көзөмөл жана укук коргоо органдарынан, жеке жана юридикалык жактардан Департаменттин компетенциясына кирген милдеттерди аткаруу үчүн зарыл болгон маалыматтарды жана материалдарды белгиленген тартипте суроого жана акысыз алууга;

2) Департаментке жүктөлгөн милдеттерди жана функцияларды ишке ашыруу үчүн эл аралык уюмдардын финансылык жана материалдык каражаттарын жана гранттарды белгиленген тартипте тартууга;

3) Департаментке жүктөлгөн милдеттерди жана функцияларды ишке ашыруу максатында жеке жана юридикалык жактар менен жарандык-укуктук бүтүмдөрдү түзүүгө;

4) чет өлкөлүк жана ата мекендик инвестицияларды белгиленген тартипте тартууга, ошондой эле инвесторлорго инвестициялык долбоорлорду ишке ашырууга көмөк көрсөтүүгө;

5) Министрликтин макулдугу менен кирешелердин бир бөлүгүн Департаменттин, анын түзүмдүк бөлүмдөрүнүн жана аймактык башкармалыктарынын, анын ичинде филиалдарынын жана өкүлчүлүктөрүнүн балансында турган административдик имараттарды жана курулмаларды (кеңселерди), лабораторияларды, ошондой эле санаториялык-курорттук имараттарды жана курулмаларды долбоорлоону, курууну, реконструкциялоону, капиталдык оңдоону жана эксплуатациялоону каржылоого жумшоого;

6) Министрликтин макулдугу менен кирешелердин бир бөлүгүн Департаменттин жана анын түзүмдүк бөлүмдөрүнүн жана аймактык башкармалыктарынын, анын ичинде филиалдарынын жана өкүлчүлүктөрүнүн кызматкерлерине турак жайларды (батирлерди) берүү максатында көп кабаттуу турак үйлөрдү долбоорлоону жана курууну каржылоого жумшоого;

7) Министрликтин макулдугу менен Кыргыз Республикасынын банк мекемелери, ошондой эле чет өлкөлүк кредиттик уюмдар менен кредиттик макулдашууларды туруктуу иштөөнү камсыз кылуу, материалдык-техникалык базаны модернизациялоо, иштин натыйжалуулугун жогорулатуу жана Департаменттин алдында турган артыкчылыктуу милдеттерди ишке ашыруу максатында, бул макулдашуулар боюнча милдеттенмелерди андан ары өз алдынча аткаруу менен түзүүгө;

8) Министрликтин макулдугу менен кирешелердин бир бөлүгүн мамлекеттик баалуу кагаздарды сатып алууга жумшоого;

9) Департаменттин компетенциясынын алкагында Кыргыз Республикасы катышуучу болуп саналган, мыйзамда белгиленген тартипте күчүнө кирген кредиттик жана гранттык макулдашууларга ылайык долбоорлорду ишке ашыруу үчүн убактылуу түзүмдүк бөлүмдөрдү жана топторду түзүүгө;

10) Кыргыз Республикасынын жогорку окуу жайларында Департаменттин окуу дисциплиналарынын профилине ылайык келген кафедраларды уюштурууга;

11) адистерди, анын ичинен юридикалык жана жеке жактардын өкүлдөрүн окутууну, квалификациясын жогорулатууну жана кесиптик кайра даярдоону уюштуруу жана өткөрүү үчүн окуу борборлорун түзүүгө;

12) Департаментке жүктөлгөн милдеттерди жана функцияларды ишке ашыруу үчүн эмгек макулдашууларынын же келишимдердин негизинде адистерди тартууга;

13) Министрликтин макулдугу менен Департаментке жүктөлгөн милдеттерди жана функцияларды ишке ашыруу үчүн чет өлкөлүк адистерди тартууга;

14) өзүнүн атынан Кыргыз Республикасынын сот органдарында, анын ичинде бейтарап соттордо, ошондой эле Кыргыз Республикасынын укук коргоо органдарында доогер, жоопкер, үчүнчү жак, арыз ээси же жабырлануучу тарап катары чыгууга;

15) Министрликтин макулдугу менен Департаментке жүктөлгөн милдеттерди жана функцияларды ишке ашыруу максатында чет өлкөдө иш-чараларды өткөрүү үчүн чет өлкөлүк жеке жана юридикалык жактар менен жарандык-укуктук бүтүмдөрдү түзүүгө, ошондой эле чет өлкөдө аталаган иш-чараларга катышууга;

16) Департаменттин компетенциясына кирген маселелер боюнча Кыргыз Республикасынын аймагында өткөрүлүүчү семинарларды, конференцияларды жана форумдарды, анын ичинде илимий жана практикалык семинарларды, конференцияларды жана форумдарды уюштурууга, катышууга жана Департаменттин, анын түзүмдүк бөлүмдөрүнүн жана аймактык башкармалыктарынын, анын ичинде филиалдарынын жана өкүлчүлүктөрүнүн атынан чыгууга, ошондой эле Министрликтин тапшырмасы боюнча анын кызыкчылыктарын коргоого;

17) Министрликтин макулдугу менен Департаменттин компетенциясына кирген маселелер боюнча чет өлкөдө өткөрүлүүчү семинарларга, конференцияларга жана форумдарга, анын ичинде илимий жана практикалык семинарларга, конференцияларга жана форумдарга катышууга жана Департаменттин, анын түзүмдүк бөлүмдөрүнүн жана аймактык башкармалыктарынын, анын ичинде филиалдарынын жана өкүлчүлүктөрүнүн атынан чыгууга, ошондой эле Министрликтин тапшырмасы боюнча анын кызыкчылыктарын коргоого;

18) Департаменттин компетенциясынын алкагында шаар куруу, архитектура, курулуш чөйрөсүндөгү инновациялык технологияларды өздөштүрүү, эксплуатациялоо жана киргизүү, курулуш процессине мониторинг жүргүзүү, ошондой эле курулуш материалдарын жана буюмдарын өндүрүү менен байланышкан долбоорлорго катышууга;

19) Департаменттин компетенциясынын алкагында жана Кыргыз Республикасынын мыйзамдарына ылайык акы төлөнүүчү кызматтарды көрсөтүүгө жана акы төлөнүүчү жумуштарды аткарууга;

20) Кыргыз Республикасынын колдонуудагы ченемдик укуктук актыларына ылайык иштелип чыккан программалар боюнча акы төлөнүүчү билим берүү кызматтарын көрсөтүүгө;

21) Министрликтин аймактык жана ведомстволук бөлүмдөрү, анын ичинде алардын түзүмдүк бөлүмдөрү, аймактык башкармалыктары, филиалдары жана өкүлчүлүктөрү, ошондой эле Министрликке караштуу "Кыргызкурулуш" мамлекеттик ишканасы менен акы төлөнүүчү кызматтарды көрсөтүү жана акы төлөнүүчү жумуштарды аткаруу маселелери боюнча түздөн-түз, башкача айтканда атаандаштык жол-жоболорун жүргүзүүнү талап кылбаган шарттарда жарандык-укуктук келишимдерди түзүүгө.

6-глава. Департаменттин ишин уюштуруу

12. Департаментти Кыргыз Республикасынын курулуш, архитектура жана турак жай-коммуналдык чарба министринин сунушу боюнча Кыргыз Республикасынын Министрлер Кабинетинин Төрагасы тарабынан кызмат ордуна дайындалуучу жана кызмат ордунан бошотулуучу директор жетектейт.

13. Директордун орун басарлары болот, алар Департаменттин директорунун сунушу боюнча Кыргыз Республикасынын курулуш, архитектура жана турак жай-коммуналдык чарба министри тарабынан кызмат ордуна дайындалат жана кызмат ордунан бошотулат.

14. Директор:

1) Департаменттин ишин жалпы жетектейт жана ага жүктөлгөн милдеттердин жана функциялардын аткарылышы, анын ичинде түзүмдүк бөлүмдөрдүн, аймактык башкармалыктардын, филиалдардын жана өкүлчүлүктөрдүн иши үчүн жеке жоопкерчилик тартат;

2) Департаментти өнүктүрүү стратегиясын иштеп чыгат, узак мөөнөттүү жана кыска мөөнөттүү иш пландарын бекитет;

3) Департаменттин ишине тиешелүү тармакты же секторду өнүктүрүүгө багытталган улуттук программаларды ишке ашырууга катышат;

4) Департаменттин ишине жаңы технологияларды жана иштөө методдорун киргизүүнү демилгелейт;

5) жергиликтүү жана эл аралык өнөктөштөр менен иштиктүү байланыштарды түзөт жана өнүктүрөт, Департаменттин атынан сүйлөшүүлөргө катышат;

6) Министрликке штаттык расписаниени, түзүмүн, кирешелер жана чыгашалар сметасын, анын ичинде аймактык башкармалыктардын, ошондой эле филиалдардын жана өкүлчүлүктөрдүн штаттык расписаниесин, түзүмүн, кирешелер жана чыгашалар сметасын бекитүүгө киргизет;

7) Департаменттин финансылык-чарбалык иши үчүн толук жоопкерчилик тартат, мүлктү жана финансылык каражаттарды башкарат, ошондой эле Министрлик тарабынан бекитилген кирешелер жана чыгашалар сметасына ылайык кирешелерди тескейт;

8) Департаменттин чыгымдарын оптималдаштыруу боюнча чараларды иштеп чыгат, аларды сарамжалдуу пайдаланууну камсыз кылат;

9) Департаментти өнүктүрүү үчүн кошумча каржылоо булактарын тартууга катышат;

10) Кыргыз Республикасынын эмгек мыйзамдарына ылайык Департаменттин кызматкерлерин кызмат ордуна дайындайт жана кызмат ордунан бошотот;

11) орун басарларынын, түзүмдүк бөлүмдөрдүн, аймактык башкармалыктардын, анын ичинде филиалдардын жана өкүлчүлүктөрдүн жетекчилеринин функциялык милдеттерин жана жоопкерчилик даражасын аныктайт;

12) эмгек өргүүлөрүнүн графигин бекитет, эмгек келишимдерин түзөт жана кол коёт, Департаменттин кызматкерлерине, түзүмдүк бөлүмдөрдүн, аймактык башкармалыктардын, анын ичинде филиалдардын жана өкүлчүлүктөрдүн кызматкерлерине карата белгиленген тартипте сыйлоо жана тартиптик жоопкерчилик чараларын колдонот;

13) Департаменттин кызматкерлеринин квалификациясын жогорулатууну, кайра даярдоону жана кесиптик өнүктүрүүнү уюштурат;

14) эмгек мыйзамдарына ылайык эмгек талаш-тартыштарын жана чыр-чатактарды чечет;

15) кызматкерлердин, түзүмдүк бөлүмдөрдүн жана аймактык башкармалыктардын, анын ичинде филиалдардын жана өкүлчүлүктөрдүн ишинин натыйжалуулугуна мониторинг жүргүзөт;

16) Министрликтин чечимдерин жана тапшырмаларын аткарууну камсыз кылат;

17) түзүмдүк бөлүмдөргө жана аймактык башкармалыктарга, анын ичинде филиалдарга жана өкүлчүлүктөргө коюлган милдеттердин аткарылышынын сапатын контролдоону уюштурат;

18) ишеним катсыз Департаменттин атынан иш алып барат, республиканын бардык мамлекеттик органдарында жана уюмдарында анын кызыкчылыктарын коргойт, ишеним каттарды берет, банктарда алыш-бериш жана башка эсептерди ачат, банктык жана финансылык документтерге кол коёт;

19) өз компетенциясынын чегинде Департаменттин бардык кызматкерлери үчүн милдеттүү болгон буйруктарды чыгарат жана көрсөтмөлөрдү берет, алардын аткарылышын контролдоону уюштурат, ошондой эле Департаментке жүктөлгөн милдеттерди жана функцияларды аткаруу үчүн зарыл болгон документтерге кол коёт;

20) аймактык башкармалыктарды, анын ичинде филиалдарды жана өкүлчүлүктөрдү түзүүдө алар жөнүндө жоболорду, штаттык расписаниени, түзүмүн, ошондой эле кирешелер жана чыгашалар сметасын Министрликке бекитүүгө берет;

21) аймактык башкармалыктардын, анын ичинде филиалдардын жана өкүлчүлүктөрдүн жетекчилерин кызмат ордуна дайындоо жана кызматтан бошотуу жөнүндө сунуштарды Министрликке киргизет;

22) аймактык башкармалыктардын, анын ичинде филиалдардын жана өкүлчүлүктөрдүн жетекчилерине карата тартиптик чараларды жана сыйлоо чараларын колдонуу жөнүндө сунуштарды Министрликке киргизет;

23) отчетторду өз убагында даярдоону жана Министрликке берүүнү камсыз кылат;

24) мыйзамдардын талаптарына ылайык документтерди архивдөөнү жана иш кагаздарын жүргүзүүнү уюштурат;

25) Кыргыз Республикасынын жарандардын кайрылуулары жана мамлекеттик органдардын карамагында болгон маалыматка жетүүнү камсыз кылуу чөйрөсүндөгү мыйзамдарында белгиленген тартипте жарандардын жана юридикалык жактардын арыздарын жана кайрылууларын карайт;

26) Департаментте эмгекти коргоо, техникалык коопсуздук жана маалыматты коргоо боюнча чаралардын аткарылышын камсыз кылат.

27) коррупцияга каршы иш-чараларды ишке ашырууга жеке жоопкерчилик тартат.

(КР Министрлер Кабинетинин2026-жылдын 29-июнундагы № 443 токтомунун редакциясына ылайык)

15. Департаменттин алдында Архитектуралык-шаар куруу кеңеши (АШК) жана Архитектуралык-техникалык кеңеш (АТК) түзүлөт.

АШК жана АТК жөнүндө жобо жана курамы Министрлик тарабынан бекитилет.

7-глава. Департаменттин мүлкү

16. Департаменттин мүлкүн негизги жана жүгүртүлүүчү каражаттар, ошондой эле ага ыкчам башкаруу укугунда бекитилип берилген жана Департаменттин балансында чагылдырылган материалдык баалуулуктар түзөт.

17. Департамент жана анын аймактык башкармалыктары, анын ичинде филиалдары жана өкүлчүлүктөрү өзүн-өзү каржылоо принцибинде иштейт, мында анын каражаттарынын булактары болуп республикалык жана жергиликтүү бюджеттер, гранттар, юридикалык жана жеке жактардын ыктыярдуу төгүмдөрү, кирешелери, ошондой эле Кыргыз Республикасынын мыйзамдарына каршы келбеген башка булактар саналат.

18. Департамент жана анын аймактык башкармалыктары, анын ичинде филиалдары жана өкүлчүлүктөрү ай сайын өзүнүн ишинин натыйжасында алынган жалпы кирешенин 10%ынан ашпаган сумманы Министрликтин атайын эсебине которот, ал Министрликтин чечими менен белгиленет жана бекитилет.

19. Департаменттин негизги фонддорун, жүгүртүлүүчү каражаттарын жана пайдаланылуучу мүлкүн алып коюу Кыргыз Республикасынын мыйзамдарына ылайык менчик ээсинин чечими боюнча ишке ашырылат.

8-глава. Кайра уюштуруу жана жоюу

20. Департаменттин иши Кыргыз Республикасынын жарандык мыйзамдарына ылайык ал кайра уюштурулган же жоюлган учурда токтотулат.

21. Департамент жоюлган учурда, анын ишинин процессинде пайда болгон документтер "Кыргыз Республикасынын Улуттук архив фонду жөнүндө" Кыргыз Республикасынын Мыйзамына ылайык сакталат жана пайдаланылат.