КАРА-КӨЛ ШААРДЫК КЕӉЕШИ

ТОКТОМ

2017-жылдын 6-июлу № 39/7-7

Кара-Көл шаарынын мэри И.М.Еркеевдин 2017-2020-жылдарга Кара-Көл шаарын социалдык-экономикалык жактан өнүктүрүү жана калкты социалдык жактан коргоо программасын бекитүү жөнүндө

“Жергиликтүү өз алдынча башкаруу жөнүндө” Кыргыз Республикасынын Мыйзамынын 44-беренесинин 7-бөлүмчөсүнө ылайык Кара-Көл шаарынын мэри И.М.Еркеевдин 2017-2020-жылдарга Кара-Көл шаарын социалдык-экономикалык жактан өнүктүрүү жана калкты социалдык жактан коргоо программасынын долбоорун угуп жана талккулап чыгып, депутаттардын Кара-Көл шаардык кеңешинин кезектеги VII сессиясы

ТОКТОМ КЫЛАТ:

1. Кара-Көл шаарынын мэри И.М.Еркеевдин 2017-2020-жылдарга Кара-Көл шаарын социалдык-экономикалык жактан өнүктүрүү жана калкты социалдык жактан коргоо программасы №1 тиркемеге ылайык бекитилсин.(тиркелет)

Кара - Көл шаарын 2017-2020 - жылдарга социалдык-экономикалык жактан өнүктүрүү жана калкты социалдык жактан коргоо

Программасы

Кириш сөз

Кара-Көл шаарынын экономикалык саясаты

Социалдык саясат

Коргонуу жана коопсуздук

Корутунду

Кириш сөз

Кара-Көл шаарын 2017–2020-жылдарга шаарды социалдык-экономикалык жактан өнүктүрүүнүн Программасы (мындан ары программа) “Жергиликтүү өз алдынча башкаруу жөнүндө” Кыргыз Республикасынын Мыйзамына ылайык 2017-2020-жылдардын мезгилинде Кыргыз Республикасын туруктуу өнүктүрүүнүн улуттук стратегиясынын негизинде иштелип чыккан.

Программаны даярдоодо 2016-жылдын август, 2017-жылдын февраль, март айларында мэрдин эл менен болгон жолугушуусундагы элден түшкөн суроо-талаптар эске алынган.

Программанын башкы милдети–өнөр-жай, курулуш ишканаларын жана менчик секторду өнүктүрүүнүн эсебинен экономикалык өсүштү камсыз кылуу жана колдоо болуп саналат.

Экономикалык туруктуу өнүгүүнүн милдеттерин чечүү өз булактарынын өсүшүнүн жана айрым ишканаларга тике (ички жана тышкы) инвестицияларды тартуунун, менчик секторду, ага чакан жана орто ишканаларды колдоону камтуу менен өнүктүрүүнүн эсебинен өнөр жайдын өсүшүн камсыз кылуу сыяктуу артыкчылыктарга таянат.

Жашоо-шартты жакшыртуу боюнча иш-чаралар турак-жай курууга, коммуналдык кызматтарды, байланыш кызматтарын, билим берүү жана саламаттык сактоону өнүктүрүүгө багытталган.

Жогоруда аталган милдеттерди чечүү калкты ишке жайгаштырууну камсыз кылууну, ишке орноштуруу боюнча кызматтарды өнүктүрүүнү көздөйт.

Кара-Көл шаары мааниси боюнча республикада энергетик шаары болгондуктан акыркы жылдарда шаардын өнөр жай продукцияларынын үлүшү областын өндүрүш көлөмүнүн 35% деңгээлинде сакталууда.

Шаардыктардын жашоосу гидроэлектростанцияларды куруп жана эксплуатациялап жаткан ишканалардын иштөөсү менен тыгыз байланышкан. Ошондуктан, шаардын андан аркы өнүгүшү өкмөттүк деңгээлдеги олуттуу жана комплекстүү чечимдерге өтө муктаж. Анткени, шаарыбызда негизинен курулуш мекемелери, ГЭСтерди эксплуатациялоочу ишканалар жайгашкандыктан түздөн-түз мамлекеттик деңгээлдеги жүргүзүлүп жаткан саясатка байланыштуу. Ошондой болсо да шаардыктардын турмуш деңгээлдеринин жакшырышына жана жумушсуздукту азайтууга орчундуу иш-аракеттер жасалып келүүдө.

Шаардын социалдык кызмат чөйрөсүндө тиешелүү мекемелердин баардыгы бар: анын ичинде И.Раззаков атындагы Кыргыз Мамлекеттик техникалык университетинин Кара-Көл технологиялык институту, колледжи, кесиптик лицей, маданият үйү, шаардык оорукана.

“Жергиликтүү өз алдынча башкаруу жөнүндө” Кыргыз Республикасынын Мыйзамына ылайык мэриянын компетенциясына, мэрдин ыйгарым укуктарына ылайык жергиликтүү маанидеги маселелерди, берилген мамлекеттик укуктарды жүзөгө ашыруу үчүн иш-чараларды жүргүзөт.

Шаардын негизги проблемалары:

1.Камбар-Ата ГЭСинин курулушунун солгун жүрүшү.

2.Инженердик коммуникациялардын моралдык жана табигый жактан эскиргендиги.

3.Калктын (Сабиров, Масиров көчөлөрүнүн тургундары) турак-жай шартын жакшыртууга (эскилиги жеткен барак тибиндеги үйлөр) муктаждыгы.

4.Ишке орношуунун жетишсиз деңгээли.

I. Шаардын макроэкономикалык саясаты жана анын максаттары

Кара-Көл шаарынын экономикалык туруктуу өсүшкө жетишүү маселеси түздөн-түз Токтогул, Күрп-Сай жана Камбар-Ата ГЭС-2 өндүргөн электр энергиясына, өнөр жай продукциясына байланыштуу. Ал эми, шаардын экономикасынын өзөгүн түзгөн Токтогул ГЭСтер Каскады, Камбар-Ата-2 ГЭС дирекциясынын үзгүлтүксүз иштеп туруусуна бир нече факторлор таасирин тийгизет. Себеби, Токтогул ГЭСинин эскилиги жеткен жабдуулары ар кандай авариялардын болушуна алып келсе, суунун көлөмү да өндүрүшкө таасирин тийгизип келет. Камбар-Ата-2 ГЭСнин 2-агрегатын ишке киргизүү инвесторлордун ишине ылайык жүргүзүлгөндүктөн, мэриянын маанилүү багыттарынын бири-өзүнө тиешелүү маселелери боюнча, бул ишти инвестициялоо үчүн ыңгайлуу шарттады түзүү аркылуу курулуш иштерин илгерилетүү болуп саналат.

Шаардык ички дүң продукцияны 3,0% дан кем эмес өстүрүү-анын ичинен өсүү темпин өткөн жылга салыштырмалуу тармактарда:

-өнөр жайы-3,0% (эгерде суунун көлөмү калыбында кармалса жана Камбарата ГЭСтери толук ишке

 киргизилсе)

-Айыл чарба-0,7%

-Курулуш-1,0%

-Кызмат көрсөтүү-1,4%

-Чекене соода жүгүртүү-1,8%

Ошондой эле, жогоруда белгиленгендей шаарды өнүктүрүүдө жеке сектордун да салымы болушу керек, ал үчүн шаардык мэрия биринчи кезекте жеке сектордун иш аракеттерине ыңгайлуу шарттарды түзүп берүү максатында мыйзам чегинде аракеттерин жасайт. Калкка кызмат көрсөтүүнү жогорку деңгээлге көтөрүү жана ишкердикти колдоо менен жергиликтүү бюджеттин кирешесин көбөйтүү.

Мындан сырткары муниципалдык аймактык башкармалыктарда, шаардык мэрияда, муниципалдык менчик башкармалыгында өзүн-өзү каржылоо деңгээлин жогорулатуу максатында муниципалдык менчиктеги объектилерди эффективдүү колдонуу, аларды инвентаризациядан өткөрүү, аренда акыларын учурдагы бааларга ыңгайлаштыруу иштери жүргүзүлөт.

Ошондой эле экономиканын туруктуу өсүшүн камсыз кылуу максатында:

-экономиканын реалдуу секторлорунун приаритеттүү тармактарын өнүктүрүү үчүн инвестициялык долбоорлоду иштеп чыгуу, жүзөгө ашыруу;

-бюджеттин киреше жана чыгаша бөлүгү боюнча кабыл алынган милдеттенмелерди аткаруу;

-шаарда ишкерлер Кеңешинин ишин активтештирүү. Ишкерлер, мамлекеттик органдар, банк жана банк эмес финансылык компаниялар, эл аралык донордук уюмдардын өз ара кызматташуусун өнүктүрүү;

-Токтогул суу сактагычынын жээгиндеги эс алуу жайларынын тейлөө деңгээлин жогорулатууга көмөк көрсөтүү;

-инфраструктураны, коммуникацияларды жакшыртуу боюнча иштер жүргүзүлөт.

-азык-түлүк продуктыларынын базардагы дүң жана чекене бааларды төмөндөтүү боюнча иш жүргүзүү.

II. Өнөр жай саясаты

Менеджментти өнүктүрүү жолу менен өнөр жайын жандандыруу боюнча иш-чараларды биринчи кезекте ишке ашыруу керек. Токтоп турган жана иштебей турган ишканалардын, ошондой эле чыгашалуу жана төмөн рентабелдүү чарба жүргүзүүчү субъектилердин санын кыскартуу талап кылынат.

Энергетика-калктын жашоо деңгээлине жана экономиканын бардык чөйрөлөрүнө түздөн-түз таасир көрсөтүүчү стратегиялык тармак болгондуктан мамлекеттин стратегиясында дагы өлкөбүздүн социалдык-экономикалык өнүгүүсүндө приоритеттүү катары аныкталган.

Камбар-Ата ГЭСтеринин курулуштарынын ишке ашуусуна, ТГЭС, КГЭС теринин үзгүлтүксүз иштеп туруусуна жана инвестицияларды тартуу менен эскирип калган жабдууларды алмаштырууга жетишүү. Кыргыз Республикасынын Жогорку Кеңештин, Кыргыз Республикасынын Өкмөтүнүн, “Улуттук энергетикалык холдинг компаниясы” ААКнун деңгээлинде чечиле турган маселелерди өз убагында талкууга алып чыгуу жана тиешелүү чечимдерди кабыл алынуусуна жетишүү.

1. Камбарата-2 ГЭСинин 2-агрегатын ишке киргизүү.

Камбарата ГЭС-1 көп жылдык мөөнөттөгү курулуш, бүгүнкү күндө курулуш иштери улантууга ТЭНин иштеп чыгуу иштери бүткөрүлүп, инвесторлорду тартуу иштери турат.

2. «Достук» Акционердик коому тарабынан жаны дизайндагы эки компоненттүү тиш жуугуч щеткаларын жана башка продукцияларын өндүрүү.

Завод “Достук” ААК тарабынан, ишкананы жана жумуш ордун сактап калуу боюнча тиешелүү иштерди жүргүзүү. Инвесторлорду тартуу жана ишкананы башка профилге өткөрүү иштери боюнча иш-чараларды түзүү.

III. Айыл чарба саясаты

Шаар боюнча айыл-чарба продукцияларын өндүрүүнүн жалпы дүң жыйымын жогорулатуу:

-Калктын эсебинен эт, сүт, жумуртка, жүн өндүрүүнүн так маалыматын статистика комитетине киргизүү жана мал соючу жайларды уюштуруу;

- Өсүмдүктөрдү өстүрүү боюнча жашылча мөмө жемиш, картошка, дан эгиндерин эгүү жана күнөөсканаларды ачууну уюштуруу.

IV. Курулуш, транспорт жана коммуникация тармагындагы саясат

Көп кабаттуу турак жай курулуш иштерин жандандыруу, К. Кулданбаев көчөсүндөгү курулушу бүтпөй калган үйлөрдүн курулушун жеке инвесторлорду тартуу жолу менен бүткөрүү.

Окуучуларга, мугалимдерге жана дарыгерлерге ыңгайлуу шарттарды түзүү максатында Токтогул атындагы №1-орто мектебинин капиталдык ремонт иштери жүргүзүү, Д. Шопоков атындагы №4-мектебинин 2-корпусунун курулушун жана Жалпы дарыгерлер практикалоо борборунун аймагында жайгашкан 8 батирлүү турак жайдын курулушун бүткөрүү.

Генпландын негизинде шаарыбыздын аймагына көп кабаттуу үйлөрдү куруу программасын ишке ашыруу. Көп кабаттуу үйлөрдү куруу менен биргеликте өзүнүн техникалык жана моралдык жактан эскилиги жеткен жыгач үйлөрдө жашаган тургундарга батир менен камсыз кылуу маселеси чечилет.

Биринчи кезектеги милдеттер төмөнкүлөр болуп саналат:

- турак жай проблемасын чечүү;

- эскилиги жеткен инженердик коммуникацияларды алмаштыруу;

-үй куруу үчүн кошумча жер тилкелерин түзүү максатында “Торгой” жайлоосуна тиешелүү изилдөө иштерин уюштуруу жана жүргүзүү;

-Серый, Ак-Кыя-1, Токтогул, Сабиров, Чоң-Таш, Кайыңды көчөлөрүнүн ички жолдорун оңдоп- түзөө;

-Ак-Кыя-1, Ак-Кыя-2 айылдарын бириктирген жолду ачуу;

-Мүрзөлөрдүн айланасын королоо;

-НГЭС менен КТГЭСтен поймага түшкөн жолдун оң тарабындагы дөңсөөнүн бурчун алып, кайрылышты кеңейтүү;

-Жээн-Кыштоо айылындагы жолдорду оңдоо жана көчөлөрүн жарыктандыруу;

Шаардын аймагында бош жерлердин кескин азайгандыгын эске алуу менен аларды шаардагы капиталдык курулушка сарамжалдуу пайдалануу зарыл.

Транспорт

Шаардын транспорттук инфраструктурасын өнүктүрүү калк пайдалана ала тургандай тейлөө кызматын көрсөтүүнү, жол коопсуздугун камсыз кылууну көздөйт. Негизги багыттары активдүү менчик ээсин калыптандыруу, транспорттук кызмат көрсөтүү, уюштуруу шарттарын түзүү болуп саналат. Шаардык мэрия тарабынан тейлөөнүн сапаты, транспорт каражаттарынын абалы, жабдылышы жана токтой турган аялдамалардын абалын көзөмөлдөөнүн процедураларын кийирүү жана күчөтүү керек.

2017-2020-жылдарда шаар ичиндеги Ак-Кыя-1, Токтогул, Чоң-Таш, Кайыңды көчөлөрдөгү жолдорду оңдоо-түзөө жана асфальт төшөө иштери жасалат. Ошондой эле шаардын борбордук көчөлөрүнө да асфальт төшөө жумуштары улантылмакчы, ал эми Жазы-Кечүү айылынын ичиндеги жолдорун “Шамшыкал-Ата компани” ЖЧКу тарабынан цемент заводу курулган учурда алардын соцпакетине киргизүү менен жана “ЭС”ААКнун атайын фонду тарабынан асфальттоо иштерине каражат бөлдүрүүгө иш-чараларды аткаруу.

Байланыш жана коммуникациялар

Байланыш жана телекоммуникацияларды өнүктүрүү жана санариптик теле берүүлөр менен шаардын калкын камсыз кылуу, шаарыбызга жаңы мезгил талабына ылайык келген заман бап теле станциясын куруу маселесин ишке ашыруу.

Турак жай-коммуналдык чарба

Шаарыбыздын бюджетине байланыштуу, аз камсыз болгон үй-бүлөлөргө жардам көрсөтүү, батирлерге жайгаштыруу маселелери каралып келүүдө, ал эми 2017-жылга турак-жай сатып алуу үчүн каражат жергиликтүү бюджеттин абалына жараша кароо.

Кетмен-Төбө айылын толук кандуу суу менен камсыз кылуу да көп жылдык программалардын бири болуп эсептелет. Себеби, Камбарата-1 ГЭСинин курулуш иштерине суу маселесин жана айылдын инфраструктурасын жакшыртуу маселеси киргизилмекчи.

Калкты ичүүчү суу менен камсыздоо, толук кандуу коммуналдык кызматтарды көрсөтүү боюнча- шаар боюнча борборлоштурулган суу м/н камсыздоо станциясынан 10400 адам суу колдонот. Таза суу менен камсыз болгон көчөлөргө 1966-жылы муздак суу, канализация түтүкчөлөрү тартылган ж/а муздак суу түтүкчөлөрүнүн узундугу 66175м, канализация түтүкчөлөрүнүн узундугу 37087м түзөт. Көрсөтүлгөн көчөлөрдүн тургундарын таза суу менен камсыз кылуу максатында жергиликтүү бюджеттен 2015-жылы 1414,0 миң сом каралып, аталган көчөлөргө таза суу чыгаруу боюнча проектик –сметалык документтер даярдалып бүткөрүлгөн ж/а КРнын Өкмөтүнө караштуу архитектура, курулуш жана турак жай-коммуналдык чарба боюнча мамлекеттик агенттигинин “Ичүүчү суу менен камсыздоону жана саркынды суу тармактарын өнүктүрүү департаменти жана Европалык өнүктүрүү жана кайра реконструкциялоо банкы (ЕБРиР) аркылуу чакан шаарларды таза суу менен камсыз кылуу боюнча долбоордун титулдук тизмесине киргизүү үчүн кайрылуулар жөнөтүлгөн, эгерде бул маселе чечилип калса 2017-2020-жылдары 180,0 млн. сомдук проект ишке ашырылып, эл таза суу менен толук камсыз болот.

 Шаар ичиндеги көчөлөрдүн жарык берүү системаларын оңдоп-түзөө, калыбына келтирүү иштерине жергиликтүү бюджеттен каражат, ал эми Жазы-Кечүү айылына (Бишкек-Ош жолунун жээгин) жаны жарык берүүчү столбаларды, прожекторлорду орнотуу үчүн “ЭС”ААКнун атайын фонду тарабынан каражат бөлдүрүү иштери жүргүзүлүүдө.

Токтогул ГЭСинин курулуш иштери башталгандан түптөлгөн Кара-Көл шаарынын суу түтүктөрү эскирген. 50 жылдан ашык кызмат кылган жылуулук жана суу түтүкчөлөрүнүн эскилиги жеткендигине байланыштуу шаар тургундарынын арасында көптөгөн нааразычылыктар туулууда.

Эскилиги жеткен суу түтүктөрүн ондоп-түзөө иштерине жана алмаштырууга “ЭС” ААКу тарабынан каражат бөлүнбөй келген. Шаардагы көп кабаттуу жыгач үйлөрдүн жылуулук берүүчү жана муздак суу түтүкчөлөрүнүн жараксыз абалга келгендиги Токтогул ГЭСтер Каскады менен биргеликте такталган. Ошондуктан Кыргыз Республикасынын Өкмөтүнө, Жогорку Кеңешине кайрылуу каттарды жолдоо, тиешелүү иш-чараларды түзүү менен “ЭС” ААКу тарабынан каражат бөлдүрүүгө жетишүү.

V.Ишкердикти өнүктүрүү саясаты

Ишкердикти колдоо Кеңешинин өз ишин алып барууда ишкердик менен жана башка структураларды, тартууга укуктуу экендиги, коомдук уюмдарды макулдашуу менен тартуу жагы белгиленген. Ишкерлер Кеңешинин иштерин активдештирүү үчүн шаардык ишкердүүлүктү өнүктүрүүнү колдоо Кеңеши жөнүндө Жобо кабыл алынып, ишкердүүлүктү өнүктүрүү Кеңешинин иш-чарасы бекитилген. Ишкерлердин жаңыдан иш башташына колдоо көрсөтүү, бюрократтык тосмолорду жоюу. Текшерүүгө мараторийлерди киргизүү жана ишкерлер, мамлекеттик органдар, банк жана банк эмес мекемелер, эл аралык донордук уюмдардын өз ара кызматташуусун өнүктүрүү иштери каралган.

VI. Туризмди өнүктүрүү

Туризмди өнүктүрүү максатында Токтогул суу сактагычынын жээгиндеги эс алуу базаларынын шарттарын жакшыртуу менен областтын, республикадан келген эс алуучуларды кабыл алуу.

“Кайыңды” балдар эс алуу борборун мэриянын муниципалдык менчигине өткөзүп алуу жана келечекте жыл ичинде иштөөчү эс алуу борборуна айландыруу. Ошондой эле тейлөө кызматын жакшыртуу.

VII.Инвестициялык саясат

Кара-Көл шаары иштеп жаткан ишканалардын экономикалык жагынан жагымдуулугуна жана шаардын улуу жибек жолу Бишкек-Ош трассасынын жээгинде жайгашкандыгына байланыштуу инвестициялык мүмкүнчүлүктөргө ээ.

 Шаар четиндеги Токтогул суу сактагычынын айланасындагы эс алуу жайлары инвестиция тартууга ыңгайлуу шарт түзөт.

Келечекте туризмди өнүктүрүү, мейманканалык-ресторандык чарбаларды, инфраструктураларды өнүктүрүүнүн эсебинен аны экономиканын артыкчылыктуу тармагына айландыруу абзел.

Инвестициялык долбоорлорду иштеп чыгуу жана жүзөгө ашыруу, анын ичинде

- Камбар-Ата ГЭС-2 экинчи, үчүнчү гидроагрегатын ишке киргизүү;

- Камбар-Ата ГЭС-1 курулушун баштоо;

-инфраструктураны, коммуникацияларды жакшыртуу;

VIII. Каржы саясаты

 Кара-Көл шаардык бюджетин киреше бөлүгүн көбөйтүү максатында салыктар жана салык эмес жыйымдардын салыктык базаларын дайыма анализдөөнүн негизинде иш алып баруу, киреше (подоходный) салыгынан түшүүчү салыктын көлөмүн көбөйтүүдө Камбарата ГЭСтерине бөлүнүүчү капиталдык салымдын көлөмүн көбөйтүү боюнча иш-чараларды аткаруу.

Ошондой эле бюджеттин киреше бөлүгүнүн өсүшүнө жетишүү, салыктарды жакшыртуу үчүн:

- салыктарды толук жыйноону камсыз кылуу максатында салык мыйзамдарын колдонууга көзөмөлдү күчөтүү, документалдык текшерүүлөрдүн сапатын көтөрүү жана салыктардын жашырылгандыгы боюнча ачылган суммаларын, финансылык жана штрафтык санкцияларды толук өндүрүп алууну камсыз кылуу;

- жергиликтүү салыктарды жана жыйымдарды башкарууну күчөтүү, калкка акылуу кызматтын жана чекене сооданын салык салынуучу базасын максималдуу түрдө кеңейтүү;

- ишкердик жүргүзүү үчүн укук алууга акы төлөөнүн патентинин формасын андан ары кеңейтүү;

- шаарды көрктөндүрүүгө каралган каражаттардын үнөмдүү пайдаланышын камсыз кылуу;

-шаардагы баардык чарбалык субъектилерди инвентаризациялоо иштерин күчөтүү, келишимдерди түзүү менен салыктарды өз убагында жыйноо.

Шаардык бюджеттин чыгаша бөлүгүн социалдык багытка багыттоо, анын ичинде: шаарыбыздын жакыр, аз камсыз болгон катмарынын жөлөк пулдарынын көлөмүн көбөйтүү, шаардык муниципалдык объектилерин сарамжалдуу пайдалануу, эффективдүү кармоого шаардык бюджеттин 15-20% га чейинки каражатын багыттоо менен иш алып баруу.

Социалдык саясат

Саламаттыкты сактоо

Бүгүнкү күндө шаардык Б.Рысбеков атындагы жалпы дарыгерлик практикалоо борборуна караштуу 4ҮДБ, 2 ФАПта 35 жогорку билимдүү дарыгер, 116 мээрбан айым эмгектенип калкыбызга алгачкы жардамдарды көрсөтүп келишет.

КРнын Өкмөтүнүн 04.06.2014-ж №306 токтому менен кабыл алынган 2020-жылга “Ден-соолук-2020” улуттук программасын ишке ашыруу максатында саламаттыкты сактоо мекемелери (4 ҮДТ, 100 орундук оорукана, ОАА ж ЭБ) калкка медициналык жана санитардык жардамдарды сапаттуу көрсөтүү боюнча иш алып барууда. Бул программа негизги беш багытты көздөйт. Энелердин жана ымыркайлардын өлүмүн азайтуу, ВИЧ\СПИДдин социалдык жана экономикалык залалдарын азайтуу, кургак учукка каршы күрөшүү, кан тамыр, жүрөк оорусун азайтуу.

Социалдык жактан коргоо

Кара-Көл шаарында калктын саны 25017 адам же 5773 кожолук, анын ичинде 793 үй-бүлө жакыр жана алар жалпы кожолуктун 13,7% түзөт, ал былтыркы жылга салыштырганда 9,2 % га азайган.

Кыргыз Республикасынын 2015-2017-жылдарга калкты социалдык коргоону өнүктүрүү стратегиясын турмушка ашыруу боюнча иш-чаралардын планы түзүлүп, негизги багыт катары төмөнкүлөр аныкталган: турмуштагы оор абалга кабылган үй-бүлөлөрдү жана балдарды социалдык коргоо; ден соолугунун мүмкүнчүлүгү чектелүү адамдарды социалдык коргоо; улгайган жарандарды социалдык коргоо; опурталдуу топторду социалдык коргоо.

Билим берүү

Шаарыбыздын аймагындагы жүргүзүлүп жаткан иштердин натыйжалуулугун арттыруунун бир компоненти билим берүүнүн жеткиликтүүлүгү. Шаардык билим берүү бөлүмүнө караштуу мектептерде 258 жогорку, 49 атайын орто, 2 орто, 18 бүтпөгөн жогорку билимдүү жалпы 327 мугалим эмгектенет. 2016/2017-окуу жылында шаарыбыздын аймагында 1 мектеп гимназия, 1 инновациялык мектеп, 4 жалпы билим берүүчү мектептер, 2 башталгыч мектептер өз ишмердүүлүгүн жүргүзүп, анда 4155 мектеп окуучусу билим алышууда.

Кыргыз Республикасынын Өкмөтүнүн 2012-жылдын 23-мартындагы №201 “Кыргыз Республикасында билим берүү системасын өнүктүрүүнүн стратегиялык багыттары жөнүндө” токтомун ишке ашыруу боюнча иш-чаралардын планы иштелип мектепке чеинки билим берүү мекемелерин ачуу, мектептердин материалдык техникалык базасын чыңдоо, электрондук күндөлүк ачуу.

Маданият жана спорт

Кыргыз Республикасынын Президентинин 2017-жылдын 5-январындагы “2017-жылды Ыйман, адеп жана маданият жылы деп жарыялоо жөнүндө” ПЖ №1 Жарлыгын турмушка ашыруу, Кыргыз Республикасынын Өкмөтүнүн Жалал-Абад областындагы ыйгарым укуктуу өкүлүнүн иш-чараларын аткаруу, шаардык маданият үйүнүн ишин кеңейтүү, алардын кызмат көрсөтүүсүнүн сапатын жакшыртуу, жеткиликтүү кылуу маданият чөйрөсүн өнүктүрүүдөгү негизги багыт.

Кыргыз Республикасынын Өкмөтүнүн №254 “2014-2017-жылдарга Кыргыз Республикасында дене тарбияны жана спортту өнүктүрүүнүн программасын бекитүү” токтомун ишке ашырууда дене тарбиянын жана спорттун материалдык техникалык базасын өнүктүрүү, “Энергетик” спорткомплексин утурумдук ремонттон өткөрүү, дене тарбия жана спорт менен машыгуу аркылуу сергек жашоо ыңгайын пропагандалаган жарнамалык баннерлерди жайгаштыруу.

X. Коргонуу жана коопсуздук тармагы

Шаардын ичинде коомдук-саясий абалдын туруктуулугун камсыз кылуу максатында шаардын эли менен графикке ылайык үзгүлтүксүз жолугушууларды өткөрүү, антикоррупция саясатын, экстремизм, диний агымдар жөнүндө түшүндүрүү иштерин жүргүзүп туруу негизги милдет болуп саналат. Мындан сырткары, өспүрүмдөр арасында кылмыштуулуктун алдын алуу максатында профилактикалык иштерди күчөтүү: ай сайын мектептерде ата-энелер, өспүрүмдөр менен жолугушууларды өткөрүү абзел.

Ошондой эле төмөнкү иштер жүргүзүлөт:

- Укук коргоо органдарынын кылмыштуулук менен күрөшүүдөгү аткарган иштерин жыйынтыгын талдоо жана координациялык кеңешмеде кароо;

- Диний экстремизмге, терроризмге жана банги заттардын таркалышына каршы күрөш жүргүзүү;

- Прокуратура органдары менен мыйзамдуулукту сактоо жана жарандардын укугун коргоодо эл арасында кылмыштуулукка каршы күрөшүү;

- Жашы жете элек балдар боюнча иштөө инспекциясы жана участкалык инспекторлордун иштерин жергиликтүү өз алдынча башкаруу органдары менен иш алып баруусун талдоо;

- МАИ кызматкерлери менен жол кырсыгын алдын алуу боюнча жергиликтүү бийликтердин биргелешип иш алып баруусун камсыз кылуу;

- Жол кырсыктарын алдын алуу максатында профилактикалык иш чараларды жүргүзүү;

- Шаардын аймагында улуттар аралык чыр чатактардын болтурбоо жана алдын алуу максатында профилактикалык иш чараларды жүргүзүү.

Корутунду

 Мэриянын ишинин эффективдүүлүгүн жогорулатуу жана бул программанын ийгиликтүү аткарылышын камсыз кылуу максатында шаарыбыздын калкы, жарандык коому, менчик түрүнө карабастан шаар аймагындагы баардык мекеме-ишканалардын жетекчилери менен биргеликте тыгыз иш жүргүзүлөт. Шаарыбыздын калкынын жашоосун жакшыртуу, ыңгайлуу шарт түзүү жана шаарыбыздын инфраструктурасын түзүү, өнүктүрүү жана туруктуулуктун болушун камсыз кылуу максатында күч-аракет жумшалат. Жалпы аракеттин жана ынтымактын негизинде Программадагы белгиленген максаттар, милдеттер туура жана өз убагында ишке ашырылып, жыйынтыгы болот деп ишенебиз.

Кара - Көл шаарын 2017-2020 - жылдарга социалдык-экономикалык жактан өнүктүрүү жана калкты социалдык жактан коргоо

Программасы (млн.сом)

  Аппарат жетекчи:        Нурматова К.И.