КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2013-жылдын 6-ноябры № 590

Кыргыз Республикасынын Өкмөтүнүн иш-чараларынын ар жылдык максаттарын, милдеттерин жана пландарын түзүү стандартын бекитүү жөнүндө

Кыргыз Республикасынын Өкмөтүнүн ишин стратегиялык пландаштыруу процессин өркүндөтүү жана Кыргыз Республикасынын Президентинин 2013-жылдын 21-январындагы № 11 Жарлыгы менен бекитилген, 2013-2017-жылдардын мезгилине Кыргыз Республикасын туруктуу өнүктүрүүнүн улуттук стратегиясын натыйжалуу ишке ашыруу максатында Кыргыз Республикасынын Өкмөтү токтом кылат:

1. Тиркелген: Кыргыз Республикасынын Өкмөтүнүн иш-чараларынын ар жылдык максаттарын, милдеттерин жана пландарын түзүү стандарты (мындан ары - стандарт) бекитилсин.

2. Министрликтердин, мамлекеттик комитеттин, администрациялык ведомстволордун жетекчилери:

- Кыргыз Республикасынын Өкмөтүнүн иш-чаралар пландарынын ар жылдык долбоорлорун бекитилген стандартка ылайык даярдоону жүргүзүшсүн;

- 2013-жылдын 25-ноябрына чейинки мөөнөттө Кыргыз Республикасынын Экономика министрлиги менен Кыргыз Республикасынын Президентинин 2013-жылдын 21-январындагы № 11 Жарлыгы менен бекитилген, 2013-2017-жылдардын мезгилине Кыргыз Республикасын туруктуу өнүктүрүүнүн улуттук стратегиясын эске алып, 2014-жылга мамлекеттик органдын максаттарын жана индикаторлорун макулдашышсын жана 2014-жылга Кыргыз Республикасынын Өкмөтүнүн иш-чаралар планынын долбоору боюнча сунуштарды жиберишсин.

3. Кыргыз Республикасынын Экономика министрлиги:

- Кыргыз Республикасынын Премьер-министринин алдындагы эксперттик-консультациялык топ менен биргеликте:

2014-жылга мамлекеттик органдар үчүн максаттарды жана индикаторлорду аныктасын;

2013-жылдын 16-декабрына чейинки мөөнөттө 2014-жылга Кыргыз Республикасынын Өкмөтүнүн иш-чаралар планынын долбоорун бекитилген стандартка ылайык жана белгиленген тартипте Кыргыз Республикасынын Өкмөтүнүн кароосуна киргизсин;

- Кыргыз Республикасынын министрликтери жана администрациялык ведомстволору менен бирге 2014-жылдын 30-декабрына чейинки мөөнөттө Кыргыз Республикасынын Өкмөтүнүн 2013-жылдын 30-апрелиндеги № 218 токтому менен жактырылган 2013-2017-жылдарга Кыргыз Республикасын туруктуу өнүктүрүүгө өткөрүү боюнча программасынын 1-тиркемесинин долбоорун бекитилген стандартка ылайык даярдасын жана белгиленген тартипте Кыргыз Республикасынын Өкмөтүнүн кароосуна киргизсин.

4. Кыргыз Республикасынын Финансы министрлиги 2014-жылдын ичинде мамлекеттик органдардын программалык бюджеттөө принциптерине өтүүсүн караштырган, методикалык инструменттерди жана ченемдик укуктук актылардын долбоорлорун иштеп чыксын.

5. Бул токтом расмий жарыяланган күндөн тартып күчүнө кирет.

6. Бул токтомдун аткарылышын контролдоо Кыргыз Республикасынын Өкмөтүнүн Аппаратынын тиешелүү бөлүмдөрүнө жүктөлсүн.

1.    Кыргыз Республикасынын Өкмөтүнүн иш-чараларынын ар жылдык максаттарын, милдеттерин жана планын түзүү стандарты

1. Бул стандарт ар жылдык максаттарды, милдеттерди, ошондой эле Кыргыз Республикасынын Өкмөтүнүн иш-чаралар планын формалдаштыруунун бирдиктүү эрежелерин белгилейт. Бул төмөнкүлөргө бир беткейлүүлүктү киргизүүгө мүмкүндүк берет:

- алардын формулировкаларын түшүнүүгө;

- иштин акыркы натыйжаларына баа берүү критерийлерин аныктоого;

- аларды аткаруу боюнча бардык мамлекеттик органдардын жетекчилеринин арасында жекече бөлүштүрүүгө;

- аларга жетишүүнүн же ишке ашыруунун мөөнөттөрүн аныктоого.

2. Максаттарды, милдеттерди жана иш-чараларды аныктоо

2. Максат - бул мамлекеттик органдын жылдын аягындагы, милдет - жыл ичиндеги ишинин так жана акыркы багыты. Мисалы, Кыргыз Республикасынын Айыл чарба жана мелиорация министрлиги үчүн:

- максаты - "2014-жылы айыл чарба ИДПсын 3% көбөйтүү";

- милдети - "2014-жылдын февралынын аягына чейин айыл чарбасын жазгы талаа иштерине өз убагында жана толук даярдоону камсыз кылуу" болушу мүмкүн.

Иш-чара - максаттарга жана милдеттерге жетишүүдө мамлекеттик органдын белгилүү бир салым кошуу боюнча бир жолку иш аракети.

3. Максаттардын, милдеттердин жана иш-чаралардын формулировкасы

3. Максаттарды, милдеттерди жана иш-чараларды формулировкалоо төмөнкү компоненттерди камтууга тийиш: этиш + иштин түрү + институттук чектөөлөр + мейкиндик чектөөлөрү + багыт.

Максатты стандарттуу формулировкалоо мисалы: Кыргыз Республикасынын (мейкиндик чектөөсү) Өкмөтүнүн (институттук чектөө) стратегиялык пландоосун (иштин түрү) натыйжа боюнча башкаруу принциптерине (багыт) өткөрүлсүн (этиш).

4. Максаттардын жана милдеттердин атрибуттары

4. Бардык максаттар жана милдеттер төмөнкү атрибуттарга ээ болууга тийиш:

- аларды ченөө боюнча индикаторлор;

- аларга жетишүү үчүн мамлекеттик органдардын жетекчилеринин арасындагы жекече жооптуу аткаруучулар;

- аларга жетүү боюнча мөөнөттөр, алардын формулировкасы натыйжа алуунун конкреттүү датасын көрсөтүүгө тийиш жана төмөнкү формат боюнча аныкталган: №№ (күнү).ММ(айы).КК(жылы) чейин.

Мисал: 31.05.14-чейин.

1-таблицада мындай атрибуттардын мисалы келтирилет.

5. Индикаторлордун атрибуттары

5. Бардык индикаторлор төмөнкү атрибуттарга ээ болууга тийиш:

- индикаторду ченөө булагы;

- индикаторду ченөөнүн мезгилдүүлүгү;

- өткөн жылдар үчүн индикатордун иш жүзүндөгү мааниси;

- пландалган мезгилге карай индикатордун болжолдуу мааниси.

Индикатордун атрибуттарынын мисалы (шарттуу) 2-таблицада көрсөтүлгөн.

6. Иш-чаралардын атрибуттары

6. Иш-чаралардын атрибуттары максаттардын жана милдеттердики сыяктуу эле, болгону төмөнкүнү эске албаганда гана:

- индикаторлордун ордуна күтүлгөн натыйжалар көрсөтүлүүгө тийиш;

- жооптуу аткаруучулар катары жекече жоопкерчиликтүү жетекчилердин ордуна алар башкарган мамлекеттик органдар көрсөтүлүүгө тийиш.

3-таблицада мындай атрибуттардын конкреттүү мисалы келтирилет.

7. Кыргыз Республикасынын Өкмөтүнүн планынын форматы

7. Кыргыз Республикасынын Өкмөтүнүн планынын бардык иш-чаралары алардын атрибуттарына ылайык тиешелүү максаттарга жана милдеттерге топтоштурулууга жана баш ийдирилүүгө тийиш. Анын конкреттүү мисалы 4-таблицада көрсөтүлгөн.