КЫРГЫЗ РЕСПУБЛИКАСЫНЫН ЖОГОРКУ КЕҢЕШИ

ТОКТОМ

2014-жылдын 18-июну № 4181-V

Кыргыз Республикасынын Эсептөө палатасынын 2013-жылдагы иши жөнүндө

Кыргыз Республикасынын Эсептөө палатасынын төрагасынын отчету тууралуу

Кыргыз Республикасынын Конституциясынын 74-беренесине ылайык Кыргыз Республикасынын Эсептөө палатасынын 2013-жылдагы иши жөнүндө Кыргыз Республикасынын Эсептөө палатасынын төрагасы Э.С.Ибраимованын отчетун угуп, Кыргыз Республикасынын Жогорку Кеңеши

ТОКТОМ КЫЛАТ:

1. Кыргыз Республикасынын Эсептөө палатасынын 2013-жылдагы иши жөнүндө Кыргыз Республикасынын Эсептөө палатасынын төрагасы Э.С.Ибраимованын отчету канааттандырарлык деп табылсын.

2. Кыргыз Республикасынын Эсептөө палатасы:

- программалык бюджеттештирүү принциптеринде каржылоого өткөн министрликтер жана ведомстволор тарабынан каражаттарды пайдалануунун натыйжалуулугу боюнча аудиттерди жүргүзсүн;

- аудиттин эл аралык стандарттарынын иштерин практикага киргизүү процессин улантсын;

- бюджеттик каражаттардын толук кайтарылуусун камсыз кылуу үчүн укук коргоо органдары менен өз ара аракеттенүү жөнүндө тийиштүү макулдашууларды даярдоо боюнча иштерди аяктасын;

- Кыргыз Республикасынын Эсептөө палатасынын ишине баа берүү үчүн критерийлерди аныктоо маселесин карасын;

- Кыргыз Республикасынын Бажы союзуна кошулушунун жол картасын (долбоор) натыйжалуу жүзөгө ашырууга талдоо жүргүзсүн.

3. Кыргыз Республикасынын Өкмөтү:

- Жогорку Кеңештин кароосуна берилүүчү ар жылдык отчетуна аудиттердин жыйынтыктары боюнча министрликтерге жана ведомстволорго жөнөтүлгөн Эсептөө палатасынын эскертмелерин аткаруу боюнча көрүлгөн чаралар тууралуу маалыматты киргизсин;

- Ош жана Жалал-Абад шаарларын калыбына келтирүү жана өнүктүрүү боюнча жоюлган Мамлекеттик дирекциянын финансылык-чарбалык ишине Эсептөө палатасынын аудитин өз учурунда аяктоо үчүн бухгалтердик эсеп жөнүндө мыйзам актыларынын талаптарына ылайык аталган мекеменин бухгалтердик эсебин жана отчеттуулугун жүргүзүү боюнча чараларды кабыл алсын.