КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2011-жылдын 1-марты № 81

Кыргыз Республикасынын мамлекеттик бюджетинин, Кыргыз Республикасынын Социалдык фондунун жана мамлекеттик ишканалардын финансылык каражаттарын тейлөө боюнча коммерциялык банктарды тандоонун критерийлери жөнүндө

(КР Өкмөтүнүн 2017-жылдын 3-февралындагы № 61, 2017-жылдын 22-июнундагы № 398 , 2018-жылдын 27-августундагы № 402 токтомдорунун редакцияларына ылайык)

Кыргыз Республикасынын Убактылуу Өкмөтүнүн 2010-жылдын 10-июнундагы № 71 «Кыргыз Республикасынын Убактылуу Өкмөтүнүн өлкөдөгү социалдык-экономикалык абалды жакшыртуу боюнча 2011-жылга чейинки биринчи кезектеги чаралары жөнүндө» токтому менен бекитилген Кыргыз Республикасынын Убактылуу Өкмөтүнүн өлкөдөгү социалдык-экономикалык абалды жакшыртуу боюнча 2011-жылга чейинки биринчи кезектеги чараларынын планын ишке ашыруунун алкагында Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын мамлекеттик бюджетинин, Кыргыз Республикасынын Социалдык фондунун жана мамлекеттик ишканалардын финансылык каражаттарын тейлөө боюнча коммерциялык банктарды тандоо үчүн төмөндөгү критерийлер бекитилсин:

- банктык операцияларды жүргүзүү укугуна Кыргыз Республикасынын Улуттук банкынын тийиштүү лицензиясынын коммерциялык банктарда болушу;

- (3-абзац КР Өкмөтүнүн 2017-жылдын 3-февралындагы № 61 токтомуна ылайык күчүн жоготту)

- Кыргыз Республикасынын Улуттук банкы тарабынан Кыргыз Республикасынын Улуттук банкынын башкармасынын 2004-жылдын 21-июлундагы №18/1 токтому менен бекитилген “Кыргыз Республикасынын коммерциялык банктар милдеттүү түрдө аткарууга тийиш болгон экономикалык нормативдер жана талаптар жөнүндөгү” жободо, жана Кыргыз Республикасынын Улуттук банкынын башка ченемдик укуктук актыларында белгиленген экономикалык ченемдерди жана талаптарды, ошондой эле “Кылмыштуу кирешелерди легализациялоого (адалдоого) жана террористтик же экстремисттик ишти каржылоого каршы аракеттенүү жөнүндө” Кыргыз Республикасынын Мыйзамынын жоболорун конкурстан мурдагы 12 айдын ичинде баардык отчеттук датага карата (ай сайын) аткаруу;

- "коммерциялык банктарга карата конкурстан мурдагы 12 айдын ичинде “Кыргыз Республикасынын Улуттук банкы жөнүндө” жана “Кылмыштуу кирешелерди легализациялоого (адалдоого) жана террористтик же экстремисттик ишти каржылоого каршы аракеттенүү жөнүндө” Кыргыз Республикасынын мыйзамдарында каралган таасир этүү чаралары колдонулбаганы;

- Кыргыз Республикасынын бардык региондоруна банктык кызматтарды көрсөтүү үчүн бекемделген аманат жана көчмө кассалардын филиалдык тармагынын болушу;

- акыркы үч жылдын ичинде жыл сайын кирешенин болушу;

- конкурстан мурдагы акыркы эки жылда бухгалтердик жана финансылык отчеттуулуктун стандарттарында белгиленген эсепке алууга жана отчеттуулукка ылайык эскертүүсүз тастыктаган тышкы аудитордун корутундусунун болушу;

- Кыргыз Республикасынын мамлекеттик бюджетине салыктар жана башка милдеттүү төлөмдөр, ошондой эле мамлекеттик социалдык камсыздандыруу боюнча камсыздандыруу төгүмдөрү боюнча карыздын жок болушу;

- конкурстан мурдагы акыркы отчеттук датага карата Кыргыз Республикасынын Улуттук банкына, ошондой эле башка кредиторлорго жана контрагенттерге төлөнө элек, мөөнөтү өткөн береселеринин жоктугу;

- төлөм карталары боюнча тейлөө үчүн банктын кеңейтилген инфраструктурасынын (перифериялык түзүлүшүнүн) жана коммуналдык төлөмдөрдүн, байланыш кызматынын ж.б. бардык түрлөрү боюнча калкка сунушталган кызматтарды көрсөтүүнүн (мисалы, суткадагы 24 сааттын ичинде мүмкүнчүлүк боюнча калктан акыларды кабыл алуу) кеңири спектринин болушу;

- эсептерди ачуу жана иштетүү, төлөм карталарды чыгаруу жана тейлөө, банк ичиндеги жана банктар арасындагы төлөмдөрдү жана башка кызматтарды ишке ашыруу үчүн коммерциялык банктар тарабынан Кыргыз Республикасынын банк мыйзамдарынын талаптарына ылайык өз алдынча белгиленген коммерциялык банктардын кызмат көрсөтүүлөрүнө тарифтер;

- Кыргыз Республикасынын мамлекеттик бюджетинин, Кыргыз Республикасынын Социалдык фондунун жана мамлекеттик ишканалардын финансылык каражаттарын тейлөө тартибин регламенттеген банктын тийиштүү ички ченемдик документтеринин болушу;

- банктын активдеринин үлүшү банктык системанын, конкурстан мурдагы акыркы отчеттук датага карата активдеринен 1 пайыздан аз эмесин түзүүсү керек;

- конкурстан мурдагы акыркы отчеттук датага карата жеке адамдардан депозиттерди тартууга, жеке жана юридикалык жактарга алыш-бериш эсептерди ачууга, кредит берүүгө тыюу салуу же чектөөлөрдүн жоктугу;

- Кыргыз Республикасынын Улуттук банкы менен соттук териштирүүлөрдүн жоктугу;

- банк убактылуу башкаруу режиминде эмес жана банкка тике банктык көзөмөл киргизилген эмес.

(КР Өкмөтүнүн 2017-жылдын 3-февралындагы № 61, 2017-жылдын 22-июнундагы № 398 , 2018-жылдын 27-августундагы № 402 токтомдорунун редакцияларына ылайык)

2. Кыргыз Республикасынын Финансы министрлиги жана мамлекеттик ишканалар Кыргыз Республикасынын мамлекеттик бюджетинин финансылык агымдарын тейлөө боюнча коммерциялык банктарды тандоодо ушул критерийлерди жетекчиликке алышсын.

3. Кыргыз Республикасынын Социалдык фонду фонддун каражаттарын тейлөө боюнча коммерциялык банктарды тандоодо, Мамлекеттик топтоочу пенсиялык фонддун каражаттарын коммерциялык банктардагы депозиттик эсептерге салгандан башка учурларда, ушул критерийлерди жетекчиликке алсын.

(КР Өкмөтүнүн 2018-жылдын 27-августундагы № 402 токтомунун редакциясына ылайык)

3-1. Мамлекеттик үлүшү 51 пайыздан жогору болгон акционердик коомдорго акционердик коомдун каражаттарын тейлөө үчүн коммерциялык банктарды тандоодо ушул токтомдун 1-пунктунда бекитилген критерийлерге таянуу, ошондой эле акча каражаттарын бир коммерциялык банкта топтолуу тобокелдигине жол бербөө максатында акча каражаттарын бир нече коммерциялык банктарга диверсификациялоо сунушталсын.

(КР Өкмөтүнүн 2017-жылдын 3-февралындагы № 61 токтомунун редакциясына ылайык)

4. Бул токтомдун аткарылышын контролдоо Кыргыз Республикасынын Өкмөтүнүн Аппаратынын финансы жана кредиттик саясат бөлүмүнө жүктөлсүн.

5. Бул токтом расмий жарыяланган күндөн тартып күчүнө кирет.