КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2013-жылдын 10-июну № 322

Бирдиктүү төлөөчү тутумунда иштеген саламаттык сактоо уюмдарын дары каражаттар жана медициналык багыттагы буюмдар менен борбордоштуруп камсыз кылуу жөнүндө жобону бекитүү тууралуу

Кыргыз Республикасынын "Мамлекеттик сатып алуулар жөнүндө" Мыйзамынын 13 жана 17-статьяларына ылайык, Кыргыз Республикасынын жарандарын медициналык-санитардык жардам менен камсыздоо боюнча мамлекеттик кепилдиктердин программасын ишке ашырууга жумшалуучу мамлекеттик каражаттарды сарамжалдуу пайдалануу максатында Кыргыз Республикасынын Өкмөтү

ТОКТОМ КЫЛАТ:

1. Тиркелген: Бирдиктүү төлөөчү тутумунда иштеген саламаттык сактоо уюмдарын дары каражаттар жана медициналык багыттагы буюмдар менен борбордоштуруп камсыз кылуу жөнүндө тиркелген жобо бекитилсин.

2. Кыргыз Республикасынын Саламаттык сактоо министрлиги жана Кыргыз Республикасынын Өкмөтүнө караштуу Милдеттүү медициналык камсыздандыруу фонду үч айлык мөөнөттө:

- өздөрүнүн актыларын ушул токтомдун 1-пунктунда аталган Жобого ылайык келтиришсин;

- милдеттүү медициналык камсыздандыруу багытында камсыздоого алынган адамдар медициналык тейлөөдөн пайдаланышкан учурда аларды каржылоо механизмин иштеп чыгып, ал маселе боюнча коомдук талкуу өткөрүшсүн жана Кыргыз Республикасынын Өкмөтүнүн кароосуна киргизишсин.

3. Бул токтомдун аткарылышын контролдоо Кыргыз Республикасынын Өкмөтүнүн Аппаратынын билим берүү, маданият жана спорт бөлүмүнө тапшырылсын.

4. Бул токтом расмий жарыяланган күндөн тартып күчүнө кирет.