КЫРГЫЗ РЕСПУБЛИКАСЫНЫН ѲКМѲТY

ТОКТОМ

2015-жылдын 14-июлу № 489

«Кыргыз Республикасынын айрым мыйзам актыларына

өзгөртүүлөрдү жана толуктоо киргизүү жөнүндө» Кыргыз Республикасынын Мыйзамынын  долбоору тууралуу

Кыргыз Республикасынын Конституциясынын 79-беренесине жана «Кыргыз Республикасынын Өкмөтү жөнүндө» Кыргыз Республикасынын конституциялык Мыйзамынын 31-беренесине ылайык Кыргыз Республикасынын Өкмөтү

ТОКТОМ КЫЛАТ:

1. «Кыргыз Республикасынын айрым мыйзам актыларына өзгөртүүлөрдү жана толуктоо киргизүү жөнүндө» Кыргыз Республикасынын Мыйзамынын долбоору жактырылсын.

2. Аталган мыйзамдын долбоору Кыргыз Республикасынын Жогорку Кеңешинин кароосуна жиберилсин.

3. Кыргыз Республикасынын Өкмөтүнө караштуу Жергиликтүү өз алдынча башкаруу  иштери  жана этностор аралык мамилелер боюнча  мамлекеттик агенттигинин директору аталган мыйзамдын долбоорун Кыргыз Республикасынын Жогорку Кеңеши караган учурда Кыргыз Республикасынын Өкмөтүнүн расмий өкүлү болуп дайындалсын.

Долбоор

КЫРГЫЗ РЕСПУБЛИКАСЫНЫН МЫЙЗАМЫ

Кыргыз Республикасынын айрым мыйзам актыларына өзгөртүүлөрдү жана толуктоо киргизүү жөнүндө

1-берене

«Жергиликтүү өз алдынча башкаруу жөнүндө» Кыргыз Республикасынын Мыйзамына (Кыргыз Республикасынын Жогорку Кеңешинин Жарчысы, 2011-ж., № 7, 1004-бер.) төмөнкүдөй өзгөртүүлөр жана толуктоо киргизилсин:

1. 48-беренесинин биринчи абзацында:

«2» деген цифра «3» деген цифра менен алмаштырылсын;

«3» деген цифра «5» деген цифра менен алмаштырылсын.

2. 51-беренесинин 3-бөлүгү төмөнкүдөй редакцияда баяндалсын:

«Айыл өкмөтүнүн башчысынын орун басары административдик муниципалдык кызматты ээлеген жана конкурстун жыйынтыгы боюнча айыл өкмөтүнүн башчысы тарабынан дайындалган муниципалдык  кызматчы болуп эсептелет.».

3. 52-беренесинде:

1-бөлүгүндөгү  «айыл кеңешинин» деген  сөздөр «жергиликтүү кеңештин» деген сөздөр менен алмаштырылсын;

2-бөлүгүндөгү «айыл өкмөтүнүн» деген сөздөр «жергиликтүү өз алдынча башкаруунун аткаруучу органынын» деген сөздөр менен алмаштырылсын;

3-бөлүгүндөгү «айыл башчысы тарабынан» деген сөздөр «жергиликтүү өз алдынча башкаруунун аткаруучу органы тарабынан» деген сөздөр менен алмаштырылсын;  

4-бөлүгү төмөнкүдөй редакцияда баяндалсын:

«4. Эгерде тиешелүү калктуу конуштан жергиликтүү кеңешке депутаттар шайланбаса, айыл башчысы тиешелүү айылдык кеңештин жыйындарына кеңеш берүүчү добуш укугу менен, ал эми шаардык кеңештин  жыйындарына тийиштүү айылга тиешеси бар маселелер каралганда катышууга укуктуу.».

2-берене

«Муниципалдык кызмат жөнүндө» Кыргыз Республикасынын Мыйзамына (Кыргыз Республикасынын Жогорку Кеңешинин Жарчысы, 2005-ж., № 2, 91-ст.)  төмөнкүдөй толуктоо киргизилсин:

23-беренеси төмөнкүдөй мазмундагы 6-бөлүк менен  толукталсын:

«Эгерде жергиликтүү өз алдынча башкаруу чөйрөсүндөгү мыйзамдарда дайындоонун башкача тартиби каралса, өзгөчө учурда айрым кызмат орундарына конкурстук тандоосуз эле дайындалышы мүмкүн.».

3-берене

Ушул Мыйзам расмий жарыяланган күндөн он күн өткөндөн кийин күчүнө кирет.

Кыргыз Республикасынын Өкмөтү үч айлык мөөнөттө өзүнүн ченемдик укуктук актыларын ушул Мыйзамга шайкеш келтирсин.

Кыргыз Республикасынын

         Президенти