КЫРГЫЗ РЕСПУБЛИКАСЫНЫН ѲКМѲТY

ТОКТОМ

2015-жылдын 27-августу № 609

"Кыргыз Республикасынын айрым мыйзам актыларына өзгөртүүлөрдү жана толуктоолорду киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Өкмөтүнүн корутундусу тууралуу

Кыргыз Республикасынын Конституциясынын 80-беренесине, "Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 31-беренесине ылайык Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын Жогорку Кеңешинин депутаттары Кочкоров У.Т., Бекешев Д.Д., Измалкова А.Н. жана Бакиров М.И. тарабынан демилгеленген "Кыргыз Республикасынын айрым мыйзам актыларына өзгөртүүлөрдү жана толуктоолорду киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Өкмөтүнүн тиркелген корутундусу жактырылсын.

2. Ушул токтом Кыргыз Республикасынын Жогорку Кеңешине жиберилсин.

Кыргыз Республикасынын Жогорку Кеңешинин депутаттары Кочкоров У.Т., Бекешев Д.Д., Измалкова А.Н. жана Бакиров М.И. тарабынан демилгеленген "Кыргыз Республикасынын айрым мыйзам актыларына өзгөртүүлөрдү жана толуктоолорду киргизүү жөнүндө" Кыргыз Республикасынын Мыйзамынын долбооруна Кыргыз Республикасынын Өкмөтүнүн КОРУТУНДУСУ

"Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 31-беренесине ылайык Кыргыз Республикасынын Өкмөтү Кыргыз Республикасынын Жогорку Кеңешинин депутаттары Кочкоров У.Т., Бекешев Д.Д., Измалкова А.Н. жана Бакиров М.И. тарабынан демилгеленген "Кыргыз Республикасынын айрым мыйзам актыларына өзгөртүүлөрдү жана толуктоолорду киргизүү жөнүндө" Кыргыз Республикасынын Мыйзамынын долбоорун карап чыгып, төмөнкүдөй корутундуга келди.

Мыйзамдын долбоорунда 2016-жылдын 1-январынан баштап КНС төлөөчүлөр үчүн сатуудан салыкты жоюу каралган. Баалоо боюнча, бул Мыйзам кабыл алынса бюджеттин жоготуулары 2016-жылы 5,9 млрд. сомдун тегерегинде болот.

Ушуга байланыштуу Кыргыз Республикасынын Евразия экономикалык бирлигине интеграциясынын шартында бюджеттин жоготуусунун ордун толтуруу үчүн альтернативдүү булактар жок эле бул мыйзам долбоорун кабыл алуу кирешелердин болжолу аткарылбай калышына жана бекитилген бюджеттин тартыштыгынын көбөйүшүнө алып келээрин айтып коюу зарыл.

Бул мыйзам долбоорун Кыргыз Республикасынын Жогорку Кеңешинин комитеттеринде толуктап иштеп чыкканда ага редакциялык мүнөздө, ошондой эле Өкмөттүн өкүлдөрүнүн сунуштары боюнча да өзгөртүүлөр менен толуктоолор киргизилген. Бирок сатуудан салыкты этап менен жоюу зарылдыгы жөнүндө сунуш колдоого алынган эмес жана мыйзам долбоору экинчи окулушунда, Кыргыз Республикасынын Жогорку Кеңешинин 2015-жылдын 26-июнундагы № 5374-V токтому менен кабыл алынган.

Ушуну менен бирге, бюджеттин киреше бөлүгүнүн алынбай калуусун азайтуу максатында Кыргыз Республикасынын Өкмөтү Кыргыз Республикасынын Өкмөтүнүн 2015-жылдын 7-июлундагы № 455 токтому менен бекитилген 2015-2020-жылдарга карата фискалдык саясаттын концепциясын ишке ашыруунун алкагында Кыргыз Республикасынын Жогорку Кеңешинин кароосуна мыйзам долбоорунун сатуудан салыкты этап менен жоюуну караштырган альтернативдүү варианты киргизилген (Кыргыз Республикасынын Өкмөтүнүн 2015-жылдын 21-августундагы № 587 "Кыргыз Республикасынын айрым мыйзам актыларына өзгөртүүлөрдү жана толуктоолорду киргизүү жөнүндө" Кыргыз Республикасынын Мыйзамынын долбоору тууралуу" токтому).

Мисалы, ал мыйзам долбоорунда сатуудан салыкты этап менен жоюу каралган:

- биринчи этап - 2016-жылдын 1-январынан баштап - экспорттук жеткирип берүүлөргө жана Кыргыз Республикасынын аймагынан сырттагы жеткирип берүүлөргө карата гана (баалоо боюнча бюджеттин жоготуулары 1,5 млрд. сомду түзөт);

- экинчи этап - 2017-жылдын 1-январынан баштап - КНСтен бошотулган жана КНС салынуучу жеткирип берүүлөрдү жүзөгө ашыруучу КНС төлөөчүлөрдүн бардыгы үчүн сатуудан салыкты жоюу каралган (бюджеттин бааланган жоготуусу 8,8 млрд. сомду түзөт).

Мыйзам долбоорунда ошондой эле сатуудан салыкты этап менен жоюудан болгон жоготуулардын ордун салыктар боюнча негизсиз жеңилдиктердин айрымдарын кыскартуу жолу менен, баалоо боюнча 261,1 млн. сом өлчөмүндө толтурууну белгилеген ченемдер да каралган.

Мындан тышкары Кыргыз Республикасынын Өкмөтү тарабынан кирешелерди көбөйтүү багытында төмөнкүдөй компенсациялык чараларды ишке ашыруу белгиленүүдө:

- автотранспорт каражаттарына салыкты администрациялоону жакшыртуудан (баалоо боюнча 375,0 млн. сом);

- Кыргыз Республикасынын Өкмөтүнүн 2014-жылдын 8-апрелиндеги № 204 токтому менен жактырылган мыйзам долбоорун кабыл алуу менен жүргүнчүлөрдү жана жүктөрдү ташуучулардан алынуучу салыкты администрациялоону жакшыртуудан (баалоо боюнча жылына 1000 млн. сом);

- бюджеттин корголбогон беренелер боюнча сарптоо бөлүгүн кыскартуудан (баалоо боюнча 302,1 млн. сом).

Биздин оюбузча, Кыргыз Республикасынын Өкмөтү тарабынан демилгеленген мыйзам долбоору кабыл алынса көрсөтүлгөн чаралар кирешелердин алынбай калуусун болжол менен жалпысынан жылына 1938,2 млн. сомго компенсациялоого мүмкүндүк берет.

Жогоруда айтылгандардын негизинде Кыргыз Республикасынын Өкмөтү Кыргыз Республикасынын Жогорку Кеңешинин депутаттары Кочкоров У.Т., Бекешев Д.Д., Измалкова А.Н. жана Бакиров М.И. тарабынан демилгеленген "Кыргыз Республикасынын айрым мыйзам актыларына өзгөртүүлөрдү жана толуктоолорду киргизүү жөнүндө" Кыргыз Республикасынын Мыйзамынын долбоорун кабыл алуу ылайыксыз деп эсептейт.