КЫРГЫЗ РЕСПУБЛИКАСЫНЫН ӨКМӨТҮ

ТОКТОМ

2015-жылдын 17-ноябры № 779

"Кыргыз Республикасынын Администрациялык жоопкерчилик жөнүндө кодексине өзгөртүүлөрдү жана толуктоолорду киргизүү тууралуу" Кыргыз Республикасынын Мыйзамынын долбооруна Кыргыз Республикасынын Өкмөтүнүн корутундусу жөнүндө

"Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 31-беренесине ылайык Кыргыз Республикасынын Өкмөтү

ТОКТОМ КЫЛАТ:

1. Кыргыз Республикасынын Жогорку Кеңешинин депутаты К.Рыспаев демилге кылган "Кыргыз Республикасынын Администрациялык жоопкерчилик жөнүндө кодексине өзгөртүүлөрдү жана толуктоолорду киргизүү тууралуу" Кыргыз Республикасынын Мыйзамынын долбооруна Кыргыз Республикасынын Өкмөтүнүн тиркелген корутундусу жактырылсын.

2. Ушул токтом Кыргыз Республикасынын Жогорку Кеңешине жиберилсин.

"Кыргыз Республикасынын Администрациялык жоопкерчилик жөнүндө кодексине өзгөртүүлөрдү жана толуктоолорду киргизүү тууралуу" Кыргыз Республикасынын Мыйзамынын долбооруна Кыргыз Республикасынын Өкмөтүнүн КОРУТУНДУСУ

"Кыргыз Республикасынын Өкмөтү жөнүндө" Кыргыз Республикасынын конституциялык Мыйзамынын 31-беренесине ылайык Кыргыз Республикасынын Өкмөтү Кыргыз Республикасынын Жогорку Кеңешинин депутаты К.Рысбаев демилге кылган "Кыргыз Республикасынын Администрациялык жоопкерчилик жөнүндө кодексине өзгөртүүлөрдү жана толуктоолорду киргизүү тууралуу" Кыргыз Республикасынын Мыйзамынын долбоорун карап чыгып, төмөнкүлөрдү белгилейт.

Мыйзамдын долбоорунда көп батирлүү үйлөрдөгү турак жайларды өндүрүштүк мүнөздөгү максаттарда, аларды соода түйүнү катары пайдаланууга, тейлөө чөйрөсүндөгү уюмдарды жайгаштырууга, анын ичинде мейманкана катары пайдаланууга, ошондой эле жашап туруудан сырткары башка каалаган максаттарга пайдаланууга мыйзамсыз берүү, өткөрүп берүү үчүн айыптын өлчөмүн көбөйтүү каралган.

Ушуну менен бирге, өлкөбүздөгү социалдык-экономикалык абал калкты жумуш менен толук камсыз кыла албай тургандыгын белгилөө зарыл. Ушул себептен улам жарандардын көпчүлүк бөлүгү өздөрүнүн турак жайларын чарбачылык максаттарда пайдаланууга аргасыз болууда, мисалы, ырчылык сабактарын өткөрүү, репетиторлук кылуу, билим берүү менен алектенүү, бычмачылык жана тигүүчүлүк, токуучулук, бала багуу жана эмгек ишинин башка жекече түрлөрүн жүзөгө ашыруу.

Турак жайдын мыйзамдуу же мыйзамсыз берилишин аныктоо жагында бул укук бузууну администрациялоонун татаалдыгынан улам коррупциялык көрүнүштөрдүн пайда болуусуна чоң тобокелдик бар.

Мындан тышкары, каралып жаткан Мыйзамдын долбоорунда ушул категориядагы администрациялык укук бузууларды кароого ыйгарым укуктуу органды өзгөртүү каралган.

Бул категориядагы администрациялык укук бузуулар боюнча ыйгарым укуктарды ички иштер органдарына берүү аркылуу саатына мейманканалык кызмат көрсөтүүлөрдү берген турак жайлардын ээлерине карата, алар орун алган жерлерде укук бузуулардын жана кылмыштардын алдын алуу жана бөгөт коюу, соттон жана тергөөдөн качып жүргөн адамдарды, Кыргыз Республикасынын аймагында кылмыш жасоону пландаган криминалдык жана террористтик топторду аныктоо жана кармоо максатында тиешелүү чараларды жүргүзүүгө жөндөм түзүлөт, албетте мунун бардыгы профилактикалык таасирин тийгизмекчи.

Бирок, көрсөтүлгөн берененин диспозициясында мейманкананы саатына берүүдөн тышкары, эреже катары коомдук коопсуздук менен укуктук тартиптин абалына таасир тийгизбеген көп батирлүү үйдөгү турак жайларды өндүрүштүк мүнөздөгү максаттарда, аларды соода түйүнү катары пайдаланууга, тейлөө чөйрөсүндөгү уюмдарды, башкача айтканда жеке ишкерчилик менен алектенген объекттерди жайгаштырууга берүү үчүн жоопкерчилик каралгандыгын белгилейбиз.

Ушуну менен бирге, Кыргыз Республикасынын Өкмөтү тарабынан азыркы учурда ички иштер органдарынын ишкер субъекттеринин ишине кийлигишүүсүн четтетүү боюнча иш-чаралар жүргүзүлүп жаткандыгын белгилөө зарыл.

Ушуга байланыштуу, бул учурда мындай ыйгарым укуктарды жергиликтүү өз алдынча башкаруу органдарында дагы калтырууну максатка ылайык деп эсептейбиз.

Мындан тышкары, "Кыргыз Республикасынын ченемдик укуктук актылары жөнүндө" Кыргыз Республикасынын Мыйзамынын 17-беренесинин 5-бөлүгүнө ылайык ченемдик укуктук актыга өзгөртүү киргизүүдө сөздөр, цифралар жана сүйлөмдөр алынып салынууга тийиш. Демек, Мыйзамдын долбоорунун 1-беренесинин 3-бөлүгүндөгү "жоюлсун" деген сөздү "алып салынсын" деген сөздөр менен алмаштыруу зарыл.

Ушуга байланыштуу Мыйзамдын долбоорун жогоруда баяндаган сунуштоолорду эске алуу менен толуктап иштеп чыгуу керек.