Талас шаардык кеңешинин2023-жылдын

20-июлундагы № 190/26-8 токтомуна

тиркеме

Муниципалдык менчик объекттерин алмашуу жөнүндө

Жобо

I. Жалпы жоболор

II. Муниципалдык мүлктү алмаштыруу тартиби

III. Муниципалдык мүлктү алмашууну тариздөө

IV. Корутунду жоболор

I. Жалпы жоболор

1. Муниципалдык менчик объекттерин алмаштыруу жөнүндө жобо (мындан ары-Жобо) Кыргыз Республикасынын “Мүлккө муниципалдык менчик жөнүндө” мыйзамына жана Кыргыз Республикасынын Жарандык кодексине ылайык иштелип чыкты, муниципалдык мүлктү алмашуунун шарттарын жана тартибин аныктайт.

2. Алмашуу – муниципалдык мүлктү ээликтен ажыратуунун бир түрү, эгерде алмашуу келишими боюнча тараптардын ар бири бир мүлктү экинчи тараптын менчигине башка мүлктү алмаштырып берүүгө милдеттенсе колдонулат.

3. Муниципалдык мүлктү сатуучу (мындан ары - сатуучу) муниципалдык менчикти башкаруу боюнча ыйгарым укуктуу муниципалдык орган – Талас шаарынын муниципалдык менчик башкармалыгы болот.

4. Муниципалдык мүлктү сатып алуучулар (алмашуу келишиминдеги тараптардын бири) жеке же юридикалык жактар болушу мүмкүн.

5. Алмашуу объектилери болушу мүмкүн:

- муниципалдык ишканаларды өзгөртүп түзүү процессинде түзүлгөн чарбалык шериктештиктердин жана коомдордун уставдык капиталындагы Талас шаарынын жергиликтүү өз алдынча башкаруусуна таандык акциялар (үлүштөр) ;

- муниципалдык ишкана мүлктүк комплекс катары;

- муниципалдык ишкананы кайра уюштуруунун (жоюунун) натыйжасында түзүлгөн ишке жарамдуу комплексти түзгөн муниципалдык ишканалардын өндүрүштүк жана өндүрүштүк эмес бөлүмдөрү;

- Талас шаарынын мэриясынын муниципалдык менчигиндеги объекттер, имараттар, жабдуулар, муниципалдык жерлер жана башка кыймылдуу мүлктөр;

- мүлктүн айрым курамдык бөлүктөрү.

6. Алмашуу келишиминин негизинде ээликтен ажыратылуучу муниципалдык мүлктүн наркы Кыргыз Республикасынын “Баалоо иши жөнүндө” мыйзамына ылайык аныкталат.

II. Муниципалдык мүлктү алмаштыруу тартиби

7. Муниципалдык менчик объекттерин алмашуу алмашуу келишиминин негизинде гана жүзөгө ашырылат.

8. Муниципалдык мүлк объектилерин алмаштыруунун демилгечиси сатуучу да, сатып алуучу да боло алат.

9. Эгерде алмашуунун демилгечиси сатуучу болсо, ал муниципалдык мүлк объектисин алмаштыруу сунушу менен маалыматты бир же бир нече сатып алуучуга жөнөтө алат.

10. Эгерде алмашуунун демилгечиси сатып алуучу болсо, анда ал сатуучуга алмашуу келишиминин негизинде муниципалдык мүлктү сатып алуу ниети жөнүндө арыз менен кайрылат.

Арыз жазуу жүзүндө жана эркин формада түзүлөт.

Сатып алуучу сатуучуга алмашуу жөнүндө арыз берет жана эгерде алмашуунун демилгечиси сатуучу болсо.

11. Сатып алуучу арыз менен кошо муниципалдык мүлктү сатуучуга төмөнкү документтерди берет:

жеке жактар үчүн:

- арыз ээси жөнүндө маалымат (автобиография);

- ким экендигин ырастоочу документтин көчүрмөсү;

- алмашуу катары иш алып барган объектиге укук белгилөөчү документтердин көчүрмөлөрү;

- Кыргыз Республикасынын “Баалоо иши жөнүндө” мыйзамына ылайык сунушталган объекттин баалоо наркы.

юридикалык жактар үчүн:

- уюштуруу документтеринин белгиленген тартипте күбөлөндүрүлгөн көчүрмөлөрү;

- юридикалык жакты мамлекеттик каттоо жөнүндө күбөлүктүн көчүрмөсү;

- алмашуу катары иш алып барган объектиге укук белгилөөчү документтердин көчүрмөлөрү;

- Кыргыз Республикасынын “Баалоо иши жөнүндө” мыйзамына ылайык сунушталган объекттин баалоо наркы.

Берилген документтердин Кыргыз Республикасынын мыйзамдарынын талаптарына шайкештигин аныктоо үчүн сатуучу зарыл болгон учурда кошумча маалыматтарды суроого, ошондой эле берилген документтерди экспертизага жөнөтүүгө укуктуу.

12. Сатып алуучудан тиешелүү документтерди тиркөө менен арыз келип түшкөндөн кийин сатуучу муниципалдык мүлктү алмашуу келишимин түзүү мүмкүнчүлүгү жөнүндө чечим кабыл алууга укуктуу.

13. Муниципалдык мүлктү алмашуу келишимин түзүү жөнүндө чечимди сатуучу демилгелейт жана буга муниципалдык мүлктү алмашуу боюнча маселелерди кароо үчүн конкурстук комиссиянын макулдугун алат.

Муниципалдык мүлктү алмашуу боюнча маселелерди кароо үчүн конкурстук комиссия Талас шаарынын мэринин тескемеси менен бекитилет. Конкурстук комиссиянын төрагасын жана мүчөлөрүн Талас шаарынын мэри аныктайт.

14. Конкурстук комиссиянын курамына сатуучунун, Талас шаарынын мэриясынын кызыкдар түзүмдүк бөлүмдөрүнүн өкүлдөрү, Талас шаарынын мэриясынын кызматкерлери, Талас шаардык кеңешинин депутаттары (макулдашуу боюнча) кирет. Анын курамына көз карандысыз эксперттер жана коомчулуктун өкүлдөрү киргизилиши мүмкүн. Конкурстук комиссия бир муниципалдык мүлктү алмашуу үчүн гана түзүлөт жана анын ыйгарым укуктары муниципалдык мүлктү алмашуу келишими түзүлгөндөн кийин токтойт.

Конкурстук комиссиянын мүчөлөрүнүн саны 7 адамдан кем эмес жана 11 адамдан ашык болбойт.

15. Конкурстук комиссиянын чечимдери конкурстук комиссиянын жыйналышка катышкан мүчөлөрүнүн жөнөкөй көпчүлүк добушу менен кабыл алынат. Добуш берүүдө конкурстук комиссиянын ар бир мүчөсү бир добушка ээ. Эгерде жыйынга анын добуш берүүгө укуктуу мүчөлөрүнүн жарымынан кем эмеси катышса, конкурстук комиссия анын компетенциясына кирген маселелерди чечүүгө укуктуу. Добуштар тең болуп калган учурда конкурстук комиссия төрага добуш берген чечимди кабыл алат.

16. Сатуучунун чечими Кыргыз Республикасынын мыйзамдарына ылайык жана тартипте таризделет жана сатуучу менен алмашуу келишимин түзүүгө Сатып Алуучунун укугун ырастоочу документ болуп саналат.

17. Объекттерди өткөрүп берүүдө жана кабыл алууда кабыл алуу/өткөрүп берүү актысы түзүлөт, кабыл алуу/өткөрүп берүү актысын түзүү үчүн Талас шаарынын мэриясынын буйругу менен комиссия түзүлөт. Комиссиянын курамына Талас шаарынын мэриясынын, Талас шаарынын муниципалдык менчик башкармалыгынын, архитектура жана шаар куруу өкүлдөрү, кыймылсыз мүлккө мамлекеттик каттоонун өкүлдөрү, Депутаттардын Талас шаардык кеңешинин депутаттары (макулдашуу боюнча) кирет, ошондой эле комиссия зарыл болгон учурда тиешелүү ведомстволордун жана чарбакер субъекттердин өкүлдөрүн тарта алат.

III. Муниципалдык мүлктү алмашууну тариздөө

17. Муниципалдык мүлктү алмаштыруу жөнүндө чечим кабыл алынгандан кийин сатуучу менен сатып алуучунун ортосунда алмашуу келишими түзүлөт.

Муниципалдык мүлктү (кыймылсыз мүлк объекттерин) алмашуу келишими Кыргыз Республикасынын мыйзамдарына ылайык нотариалдык жактан күбөлөндүрүлүүгө жана мамлекеттик каттоодон өткөрүлүүгө тийиш.

Муниципалдык мүлктү (баалуу кагаздардын муниципалдык пакеттерин) алмашуу келишими Кыргыз Республикасынын баалуу кагаздар рыногу боюнча мыйзамдарында белгиленген тартипте катталууга тийиш.

18. Алмашуу келишимине карата, эгерде бул алмашуунун маңызына карама-каршы келбесе, сатып алуу-сатуу келишиминин эрежелери колдонулат. Мында тараптардын ар бири өзү өткөрүп берүүгө милдеттенген объекттин сатуучусу жана ал алмаштырып кабыл алууга милдеттенген объекттин сатып алуучусу деп таанылат.

19. Муниципалдык мүлктү алмашуу келишиминде төмөнкүлөр камтылууга тийиш:

- мүлктү сатуучу жана сатып алуучу жөнүндө маалымат;

- келишимдин предметин аныктоо;

- алмашуу объекттери жөнүндө маалымат;

- келишимди аткаруу мөөнөттөрү;

- алмашуу келишимин бузуу тартиби;

- айып санкциялары;

- өз ара макулдашуу боюнча мындай келишимдин тараптары тарабынан белгиленген башка шарттар.

20. Эгерде Алмашуу келишиминен башкасы келип чыкпаса, алмаштырылууга тийиш болгон объекттер тең баалуу деп болжолдонот, ал эми аларды өткөрүп берүү жана кабыл алуу боюнча чыгымдар ар бир учурда тиешелүү милдеттерди аткарган тарап тарабынан жүзөгө ашырылат.

21. Келишимге ылайык алмаштырылуучу объекттер тең эмес деп таанылган учурда, эгерде Кыргыз Республикасынын мыйзамдарына ылайык келишимде акы төлөөнүн башка тартиби каралбаса, баасы алмаштыруучу объекттин баасынан төмөн болгон объектти өткөрүп берүүгө милдеттүү болгон тарап баалардын айырмасын төлөөгө тийиш (КР Жарандык кодексинин 506-беренеси).

22. Эгерде мыйзамда же алмашуу келишиминде башкача каралбаса, алмаштырылуучу объекттерге менчик укугу тиешелүү объекттерди эки тарап тең өткөрүп берүү милдеттенмелерин аткаргандан кийин алмашуу келишими боюнча сатып алуучу катары чыгуучу тараптарга өтөт.

IV. Корутунду жоболор

23. Тараптардын ортосунда келип чыккан жана ушул Жобо менен жөнгө салынбаган талаш-тартыштар, эгерде Кыргыз Республикасынын мыйзамдарында башкача каралбаса, сүйлөшүүлөр жолу менен чечилет.

24. Бул Жобого өзгөртүүлөрдү жана толуктоолорду киргизүү жөнүндө Талас шаардык мэриясынын демилгеси боюнча Депутаттардын Талас шаардык кеңеши тарабынан кабыл алынат.