КЫРГЫЗ РЕСПУБЛИКАСЫНЫН МИНИСТРЛЕР КАБИНЕТИ

ТОКТОМУ

2022-жылдын 18-августу № 464

Чет өлкөлүк жарандарга “Санариптик көчмөн” (“Digital nomad”) статусун ыйгаруу боюнча пилоттук долбоорду жүргүзүү жөнүндө

(КР Министрлер Кабинетинин 2023-жылдын 21-сентябрындагы № 496 токтомунун редакциясына ылайык)

“Санариптик көчмөндөр” (“Digital nomad”) заманбап креативдүү адамдардын категориясы үчүн жагымдуу шарттарды түзүү, инновациялык долбоорлорду жана экономиканын жогорку технологиялык тармактарын өнүктүрүү, Кыргыз Республикасына маалыматтык-коммуникациялык технологиялар жана креативдүү индустриялар чөйрөсүндөгү жогорку квалификациялуу чет өлкөлүк адистерди тартуу максатында, “Кыргыз Республикасынын Министрлер Кабинети жөнүндө” Кыргыз Республикасынын конституциялык Мыйзамынын 13, 17-беренелерине ылайык Кыргыз Республикасынын Министрлер Кабинети токтом кылат:

1. Кыргыз Республикасынын Эмгек, социалдык камсыздоо жана миграция министрлиги:

- 2022-жылдын 12-июлунан 2024-жылдын 30-июнуна чейин чет өлкөлүк жарандарга "Санариптик көчмөн" ("Digital nomad") статусун ыйгаруу боюнча пилоттук долбоорду (мындан ары - пилоттук долбоор) жүргүзсүн;

- пилоттук долбоордун ишке ашырылышына туруктуу негизде мониторинг жана баалоо жүргүзсүн;

- Кыргыз Республикасынын Экономика жана коммерция министрлиги менен биргеликте кызыкдар тараптардын арасында пилоттук долбоорду ишке ашыруу боюнча маалыматтык-түшүндүрүү иштерин жүргүзсүн;

- Кыргыз Республикасынын Экономика жана коммерция министрлиги менен биргеликте пилоттук долбоор аяктаганга чейин мамлекеттик санариптик платформа аркылуу туруктуу негизде чет өлкөлүк жарандарга "Санариптик көчмөн" ("Digital nomad") статусун ыйгаруу боюнча маселелерди жөнгө салууга багытталган ченемдик укуктук актылардын долбоорлорун иштеп чыксын.

(КР Министрлер Кабинетинин 2023-жылдын 21-сентябрындагы № 496 токтомунун редакциясына ылайык)

2. Чет өлкөлүк жарандарга “Санариптик көчмөн” (“Digital nomad”) статусун ыйгаруу боюнча пилоттук долбоорду жүргүзүү тартиби жөнүндө убактылуу жобо тиркемеге ылайык бекитилсин.

3. Чет өлкөлүк жарандарга "Санариптик көчмөн" ("Digital nomad") статусун ыйгаруу боюнча пилоттук долбоорду жүргүзүү тартиби жөнүндө убактылуу жобо 2024-жылдын 30-июнуна чейин колдонулат деп белгиленсин.

(КР Министрлер Кабинетинин 2023-жылдын 21-сентябрындагы № 496 токтомунун редакциясына ылайык)

4. Кыргыз Республикасынын Санариптик өнүктүрүү министрлиги “ЖААК” авторизацияланган маалыматтык системасында Кыргыз Республикасынын Эмгек, социалдык камсыздоо жана миграция министрлигинин ыйгарым укуктуу кызматкерлери тарабынан чет мамлекеттердин жарандарына – “Санариптик көчмөн” (“Digital nomad”) статусунун ээлерине идентификациялык жеке номерлерди (ИЖН) ыйгарууну камсыз кылсын.

5. Кыргыз Республикасынын Улуттук коопсуздук мамлекеттик комитети Тышкы миграцияны эсепке алуунун бирдиктүү системасын киргизүү боюнча координациялоочу орган катары бир айлык мөөнөттө ушул токтомдун 2-пунктунда көрсөтүлгөн Убактылуу жобону техникалык ишке ашыруу боюнча зарыл чараларды көрсүн. 

6. Кыргыз Республикасынын Улуттук банкына финансылык-кредиттик мекемелердин арасында пилоттук долбоорду жүргүзүү жөнүндө маалыматтык-түшүндүрүү өнөктүгүн жүргүзүү сунушталсын.

7. Кыргыз Республикасынын Тышкы иштер министрлиги пилоттук долбоор жөнүндө Кыргыз Республикасынын аймагындагы дипломатиялык өкүлчүлүктөрдү багыттасын, ошондой эле ушул токтомдон келип чыгуучу башка тиешелүү чараларды көрсүн.

(КР Министрлер Кабинетинин 2023-жылдын 21-сентябрындагы № 496 токтомунун редакциясына ылайык)

7¹. Пилоттук долбоорду ишке ашырууга байланышкан чыгымдарды каржылоо республикалык бюджетте тиешелүү жылдарга министрликтерди жана мамлекеттик комитетти каржылоого каралган каражаттардын, ошондой эле Кыргыз Республикасынын мыйзамдарында тыюу салынбаган бюджеттен тышкаркы каражаттардын чегинде ишке ашырылат деп белгиленсин.

(КР Министрлер Кабинетинин 2023-жылдын 21-сентябрындагы № 496 токтомунун редакциясына ылайык)

8. Бул токтомдун аткарылышын контролдоо Кыргыз Республикасынын Президентинин Администрациясынын Президенттин жана Министрлер Кабинетинин чечимдерин аткарууну контролдоо башкармалыгына жүктөлсүн.

9. Бул токтом расмий жарыяланган күндөн тартып жети күн өткөндөн кийин күчүнө кирет.

«Эркин-Тоо» мамлекеттик расмий гезитинин 2022-жылдын 2-сентябрында № 79 (3414) саны менен жарыяланды.